BASAHON nindo an arin man na peryodiko. Magdalan kamo sa telebisyon, o maghinanyog kamo sa radyo. Kadakol kan bareta nin krimen, guerra, asin terorismo! Isipon an manongod sa sadiri nindong mga problema. Tibaad an helang o pagkagadan nin sarong namomotan nagtatao saindo nin dakulang kapurisawan. Tibaad magsaboot kamo kapareho kan marahay na tawong si Job, na nagsabi na sia “rupit-rupit nin kasakitan.”​—Job 10:15, The Holy Bible in the Language of Today.

Hapoton nindo an saindong sadiri:

• Ini daw an katuyohan nin Dios para sa sako asin para sa iba pa sa katawohan?

• Saen daw ako makakanompong nin tabang tanganing makaya ko an sakong mga problema?

• May paglaom daw na maheheling ta pa an katoninongan sa daga?

An Biblia nagtatao nin nakakakontentong mga simbag sa mga hapot na ini.

• “Papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog.”​—Kapahayagan 21:4

• “An pilay matukad na garo lalaking usa.”​—Isaias 35:6

• “An mga mata kan mga buta magkakaburuklat.”​—Isaias 35:5

•  “An gabos na nasa mga lolobngan na girumdoman . . . maruluwas.”​—Juan 5:28, 29

• “Mayo nin nag-eerok na masabi: ‘Naghehelang ako.’”​—Isaias 33:24

• “Magkakaigwa nin abundang tipasi sa ibabaw kan daga.”​—Salmo 72:16

Dai tolos isipon na an iinatubang sa sinusundan na mga pahina mga pagmawot sana nin boot. Nanuga an Dios na papangyayarihon an mga bagay na ini, asin ipinapaliwanag kan Biblia kun paano nia iyan gigibohon.

Alagad labi pa dian an ginigibo kan Biblia. Itinatao kaiyan an paagi tanganing makamtan nindo an talagang nakakakontentong buhay dawa ngonyan. Isipon nin madali sana an manongod sa saindong mga kahaditan asin problema. Tibaad kaiba dian an kadaihan nin kuarta, mga problema sa pamilya, pagluya kan salud, o an pagkagadan nin sarong namomotan. Makakatabang sa saindo an Biblia na atubangon an mga problema ngonyan, asin makakatao iyan nin kaginhawahan paagi sa pagsimbag sa mga hapot na siring baga kaini:

• Taano ta nagdudusa kita?

• Paano niato makakaya an mga kahaditan sa buhay?

• Paano niato gigibohon na magin mas maogma an satong buhay pampamilya?

• Ano an mangyayari sato kun kita magadan?

• Maheheling pa daw niato giraray an satong nagadan na mga namomotan?

• Paano kita nakakasierto na ootobon nin Dios an saiyang mga panuga sa ngapit?

 An bagay na binabasa nindo an librong ini nagpapaheling na gusto nindong maaraman kun ano an itinotokdo kan Biblia. An librong ini matabang sa saindo. Maririsa nindo na an mga parapo may kapadis na hapot. Minilyon an nagustohan an paggamit kan hapot-simbagan na paagi kun tinotokar an Biblia kaiba kan mga Saksi ni Jehova. Linalaoman niamo na magugustohan man nindo iyan. Bendisyonan logod kamo nin Dios mantang nananamitan nindo ngonyan an nakakapukaw sa boot asin nakakakontentong eksperyensia nin pag-adal kun ano man nanggad an itinotokdo kan Biblia!