E bon noticia ta bin di Jehova, e Dios feliz, cu kier pa tur famia ta feliz. (1 Timoteo 1:11) E ta esun cu a establece matrimonio. Un matrimonio legal ta esencial pa e felicidad di un famia, pasobra e ta duna tanto e pareha como e yiunan un sintimento di siguridad. Cristiannan tin cu cumpli cu e leynan local relaciona cu registracion di matrimonio.—Lesa Lucas 2:1, 4, 5.

Con Dios ta mira matrimonio? E kier pa e union entre un homber y un muher ta algo permanente. Jehova kier pa esposo y esposa ta fiel na otro. (Hebreonan 13:4) E ta odia divorcio. (Malakias 2:16) Pero e ta permiti un cristian divorcia y bolbe casa si su casa comete adulterio.—Lesa Mateo 19:3-6, 9.

Jehova a crea homber y muher di tal manera cu nan ta pas cu otro den matrimonio; pues cada un tin cu cumpli cu su papel. (Genesis 2:18) Como cabes di cas, e esposo ta esun principalmente responsabel pa percura pa e necesidadnan material di su famia y pa siña nan tocante Dios. Ademas, amor pa su esposa ta pone cu e mester ta dispuesto pa haci sacrificio. Esposo y esposa mester stima otro y respeta otro. Como cu nan ta imperfecto, nan mester siña pordona otro si nan kier pa nan matrimonio ta feliz.—Lesa Efesionan 4:31, 32; 5:22-25, 33; 1 Pedro 3:7.

Si bo tin problema den bo matrimonio, tanto abo como bo casa mester haci esfuerso pa trata otro cu amor. (1 Corintionan  13:4, 5) E Palabra di Dios no ta recomenda separacion como un manera pa soluciona problema cu sa presenta den matrimonio.—Lesa 1 Corintionan 7:10-13.

Jehova kier pa boso ta feliz. Pesey, e ta duna boso e mihor conseho cu boso por haya pa boso por gosa di boso hubentud. Tambe e ta desea pa boso probecha di e sabiduria y experencia di boso mayornan. (Colosensenan 3:20) Ademas, Jehova kier pa boso sinti e goso di haci e boluntad di boso Creador y di su Yiu.—Lesa Eclesiastes 11:9–12:1; Mateo 19:13-15; 21:15, 16.

Boso mester traha duro pa percura cuminda, cas y paña pa boso yiunan. (1 Timoteo 5:8) Pero pa nan por ta feliz, esey so no ta basta. Tambe boso tin cu siña nan stima Dios y imita su cualidadnan. (Efesionan 6:4) E ehempel cu boso ta pone den mustra amor pa Dios por tin un influencia profundo riba curason di boso yiunan. Ora boso instruccion ta basa riba e Palabra di Dios, esey por tin un efecto positivo riba boso yiunan.—Lesa Deuteronomio 6:4-7; Proverbionan 22:6.

Lo bay bon cu boso yiunan ora boso ta anima nan y elogia nan pa e cosnan bon cu nan ta haci. Tin biaha yiunan tin mester di coreccion y disciplina tambe. Asina, nan ta evita di haci cosnan cu por kita nan felicidad. (Proverbionan 22:15) Sinembargo, nunca disciplina mester ta demasiado severo of cruel.—Lesa Colosensenan 3:21.

Testigonan di Jehova a publica varios buki specialmente dirigi na mayornan y yiunan. Tur e bukinan aki ta basa riba Bijbel.—Lesa Salmo 19:7, 11.