¿TUKU makatsinikana akxni likgalhtawakgaya periódico, akxni akxilha televisión o kgaxpata radio? ¡Lhuwa lichuwinankan xlakata tiku lakatsala limapakgsin, guerra chu makgninanin! Chu kalakapastakti la wi mintaʼakglhuwit. Max tajatat o max nilh chatum xalak mifamilia o tiku xpaxkiya chu lu lilakgaputsapat. Max makgkatsiya la Job, chatum chixku tiku tlan xlikatsi, xla wa: «Lu kpatinama» (Job 10:15).

Max wix kgalhskinkana:

• ¿Wa uma xlakaskin Dios kakiʼakgspulalh chu xkaʼakgspulalh putum latamanin?

• ¿Niku tlan naktekgsa tamakgtay xlakata naklakkaxtlawa kintaʼakglhuwit?

• ¿Namin kilhtamaku akxni kKatiyatni natawila takaksni?

Biblia kinkamaxkiyan tlan tamakatsin xlakata umakgolh takgalhskinin.

«Na paks nakaxakanikgo Dios xlakgpixtajatkan; na nialh katiʼanalh linin, chu na nialh katiʼanalh ntalipuwan, ni mpala wa ntatasa, chu na ni mpala wa ntakatsanajwat.» (Apocalipsis 21:4)

«Tiku nila tlawan, nakgosnan la juki.» (Isaías 35:6)

«Xlakgastapukan lakgaxokgo nalakawanamparakgo.» (Isaías 35:5)

 «Xlipaks nti aknukgoy, [...] natakxtupalakgoy.» (Juan 5:28)

«Ni chatum lataman nawan: “Ktatatla”.» (Isaías 33:24)

«Kan aktsu lichanat nachankan y likuanit nalhuwan [taway] nak katiyatni.» (Salmo 72:16)

Ni lakapala kalakpuwanti pi tuku wi kʼuma páginas kaj akgtum tamanaxnat. Dios wanit pi chuna natlawa chu Biblia kinkawaniyan la namakgantaxti.

Pero ni kajwatiya ama. Biblia na kinkamasiyaniyan la natlawayaw xlakata xalipaxuw nalatamayaw. Tsinu kalakapastakti mintaʼakglhuwit nema kgalhiya chu tuku lilakgaputsaya. Max lilakgaputsaya tumin, mifamilia, tajatat o nilh chatum tiku lu xpaxkiya. Biblia kinkamakgtayayan xlakata tlan natayaniyaw ama talakgaputsit chu na kinkamatliwakglhan akxni kinkakgalhtiyan takgalhskinin la uma:

• ¿Tuku xlakata patinanaw?

• ¿La tlan natayaniyaw akxni kgalhiyaw taʼakglhuwit?

• ¿Tuku tlan natlawayaw xlakata lipaxuw natawilakgo kifamiliajkan?

• ¿Tuku kinkaʼakgspulayan akxni niyaw?

• ¿Namin kilhtamaku akxni nakaʼakxilhparayaw wantiku nikgonita nema xkapaxkiyaw?

• ¿Tuku xlakata tlan nakanajlayaw pi Dios namakgantaxti tuku wanit natlawa?

 Xlakata wix likgalhtawakgapat uma tatsokgni limasiyaya pi katsiputuna tuku masiya Biblia. Uma libro namakgtayayan nakatsiniya xlakata tuku wan Biblia. Kaʼakxilhti pi akgatunu párrafo limin xtakgalhskinin. Lhuwa millón latamanin lakgatikgo la xtatayananin Jehová limaklakaskinkgo takgalhskinin chu takgalhtin akxni likgalhtawakgakgo Biblia chu klakaskinaw pi wix na xlakgati. Dios kasikulanatlawan akxni nakatsitilhaya wantuku xlikana masiya Biblia.