Ta wĩcirie mũthuri ũkoragwo na mũtugo wa kwĩrorera ponografĩ na hitho, no mũtumia wake agacoka akamenya. Mũthuri ũcio agathaitha mũtumia wake amuohere, na akamwĩra atĩ nĩ egũtiga kũmĩrorera. Agatigana na mũtugo ũcio kwa ihinda, no agaikara akĩũcokagĩra rĩngĩ na rĩngĩ o akĩhoyaga mũtumia wake mũhera.

 Angĩkorũo nĩ ũragerera ũndũ ta ũcio, nĩ ũrabatara gũtaũkĩrũo nĩ ũrĩa mũtugo waku wa kwĩrorera ponografĩ ũrahutia mũndũ ũrĩa mũhikanĩtie nake, na ũrĩa ũngĩka nĩguo ũtigane biũ na mũtugo ũcio. a

Maũndũ marĩa marĩ gĩcunjĩ-inĩ gĩkĩ

•  Maũndũ marĩa wagĩrĩirũo kũmenya

•  Ũrĩa ũngĩka

•  Hihi mũthuri waku nĩ eroragĩra ponografĩ?

 Mũtugo wa kwĩrorera ponografĩ no ũharaganie kĩhiko. Ũtũmaga mũndũ ũrĩa mũhikanĩtie nake akorũo na marakara ngoro-inĩ na atige gũkwĩhoka. b

 Mũtumia ũrĩ na mũthuri wĩroragĩra ponografĩ no agerere maũndũ ta maya:

•   Kuona mũthuri wake ta atarĩ mwĩhokeku. Mũtumia ũmwe wĩtagwo Sarah aaugire, “Ndonaga mũthuri wakwa ta arĩ ũtharia akoragwo agĩka.”

•   Kũigua ta atangĩendeka. Mũtumia ũmwe aaugire atĩ mũtugo wa mũthuri wake wa kwĩrorera ponografĩ watũmaga aigue “aconorithĩtio na atarĩ wa kwendeka.”

•   Kũremwo kwĩhoka mũthuri wake. Mũtumia ũmwe wĩtagwo Helen aaugire, “Ndĩkũũagĩra mũthuri wakwa maũndũ-inĩ mothe marĩa areka.”

•   Kũgĩa na mĩtangĩko. Mũtumia ũmwe wĩtagwo Catherine aaugire, “Hingo ciothe ndaikaraga ngĩtangĩkaga nĩ ũndũ wa mũtugo wa mũthuri wakwa wa kwĩrorera ponografĩ.”

 Ũndũ wa gwĩciria: Bibilia ĩrĩte mũthuri ende mũtumia wake. (Aefeso 5:25) Hihi no akorũo agĩka ũguo angĩkorũo nĩ atũmaga mũtumia wake agerere maũndũ ta macio magwetwo?

 Ti ũndũ mũhũthũ gũtigana na mũtugo wa kwĩrorera ponografĩ. Mũtumia ũmwe wĩtagwo Stacey aaugire ũũ: “Mũthuri wakwa nĩ aatigire kũnyua thigara, bangi, na njohi, no nĩ aremetwo gũtiga kwĩrorera ponografĩ.”

 Angĩkorũo nĩ ũragerera ũndũ ta ũcio, maũndũ maya marĩrĩirio haha mũhuro no magũteithie gũtooria biũ mũtugo ũcio.

•   Taũkĩrũo nĩ kĩrĩa gĩtũmaga ponografĩ ĩkorũo ĩrĩ njũru. Kwĩrorera ponografĩ gũtũmaga mũndũ ahingie merirĩria ma mwĩyendo, ũndũ ũrĩa ũthũkagia wendo, kwĩhokana, na wĩhokeku, ngumo iria ibataranagia nĩguo kĩhiko gĩkorũo na gĩkeno. Ningĩ nĩ kwagagĩra Jehova gĩtĩo, o we Mwambĩrĩria wa kĩhiko.

   Ũtaaro wa Bibilia: “Kĩhiko nĩ kĩheagwo gĩtĩo.”—Ahibirania 13:4.

•   Ĩtĩkĩra mahĩtia maku. Ndwagĩrĩirũo kuuga ũũ, ‘Ndingĩĩroragĩra ponografĩ korũo mũtumia wakwa nĩ anyonagia wendo mũingĩ.’ Ti ũndũ wa kĩhooto gũcokereria mũtumia waku mahĩtia. Ningĩ gwĩka ũguo no gũkũhe kũrakũhe gĩtũmi gĩa gũcokerera mũtugo ũcio rĩrĩa mũtumia waku aga kũhingia ũndũ ũrĩa ũrerĩgĩrĩra.

   Ũtaaro wa Bibilia: “O mũndũ ageragio na njĩra ya kũgucĩrĩrio na kũheenererio nĩ merirĩria make mwene.”—Jakubu 1:14.

•   Aragiai na ũrĩa mũhikanĩtie nake mumĩranĩtie ngoro. Mũthuri ũmwe wĩtagwo Kevin aaugire ũũ: “O mũthenya nĩ nyendaga kũigua mawoni ma mũtumia wakwa. Kwoguo nĩ ndĩmũũragia kana nĩ onete ngĩĩrorera ũndũ ũngĩarahũra merirĩria moru, kana nĩ ndĩrethema gwĩka ũguo. Na njĩra ĩyo, mũtumia wakwa ndaiguaga ta ndĩramũhitha ũndũ o na ũmwe.”

   Ũtaaro wa Bibilia: “Twendaga gũikara tũrĩ ehokeku maũndũ-inĩ mothe.”—Ahibirania 13:18.

•   Ikaraga ũrĩ maitho. No ũcokerere mũtugo ũcio o na thutha wa gũikara mĩaka mĩingĩ wĩciragia atĩ nĩ waũtooririe. Kevin ũrĩa ũkũgwetetwo aaugire: “Ndaikarĩte mĩaka ikũmi kuuma ndatiga kwĩrorera ponografĩ, na kwoguo ndarĩ na ma atĩ nĩ ndatooretie mũtugo ũcio biũ. Ũndũ ũrĩa itaamenyaga nĩ atĩ mũtugo ũcio nĩ ta weetagĩrĩra ihinda rĩrĩa rĩagĩrĩire nĩguo wĩyumĩrie rĩngĩ.”

   Ũtaaro wa Bibilia: “Mũndũ ũrĩa wĩciragia atĩ nĩ arũgamĩte nĩ emenyagĩrĩre ndakae kũgwa.”—1 Akorintho 10:12.

•   Rĩrĩa werirĩria kwĩrorera ponografĩ, amba ũtithie hanini. O na gũtuĩka no ũremwo kũgirĩrĩria kũgĩa na merirĩria macio, no ũhote gũthuura kwaga kũmahingia. Merirĩria macio o na no mathire na ihenya, ũngĩĩruta kwerekeria meciria maku maũndũ-inĩ mangĩ.

   Ũtaaro wa Bibilia: “O ũmwe wanyu nĩ agĩrĩirũo kũmenya ũrĩa angĩgirĩrĩria mwĩrĩ wake nĩguo aikarage arĩ mũtheru na arĩ na gĩtĩo, ti na mũkoroko wa merirĩria moru ma ngomanio.”—1 Athesalonike 4:4, 5.

•   Wĩtheme maũndũ marĩa mangĩtũma ũcokerere mũtugo ũcio. Ibuku rĩtagwo Willpower’s Not Enough riugaga, “Gũkorũo ũndũ-inĩ ũngĩkũingĩria igerio-inĩ nĩ ta kũmundia kĩbiriti. No tũguta tũnini tu tũrabatarania . . . nĩguo mwaki wakane.”

   Ũtaaro wa Bibilia: “Ndĩroaga gwathwo nĩ ũndũ o na ũmwe mũũru.”—Thaburi 119:133.

•   Ndũgate mwĩhoko. No kũbataranie ihinda iraihu, nginya mĩaka mĩingĩ, nĩguo mũndũ ũrĩa mũhikanĩtie nake ambĩrĩrie gũkwĩhoka rĩngĩ. No andũ aingĩ nĩ mahotete kwĩhokana rĩngĩ.

   Ũtaaro wa Bibilia: “Wendo nĩ ũrĩ wetereri.”—1 Akorintho 13:4.