Iñchiñ pu Dunguquelu Ineingen Jehová taiñ feyentuqueel nüucülei Biblia ñi feipin mu, feimu reyüconquelaiñ politico dungu meu. Cafei quiñe politico no rume hulquelafiyiñ taiñ voto, eluuquelaiñ taiñ llohual quiñe cüdau nüucülelu politico dungu meu, dicümtucuquelaiñ pu politico, ca chem dungu mu no rume coneltuquelaiñ taiñ caletual pu huentru ñi ngünenieel. Tati Biblia pengeli falinque dungu taiñ reyüconcülenoal politico dungu meu.

•   Mülei taiñ inayentuafiel ta Jesús, quisu cüpa lloulai quiñe ülmen cüdau nüucülefulu politico dungu mu (Juan 6:15). Ca femngechi Jesús feipifi tañi inaniequeteu ñi ‘coneltulenoal tüfachi mapu meu’, feimu ngelafui ñi quelluntucuafiel quiñe politico no rume (Juan 17:14, 16; 18:36; Marcos 12:13-17).

•   Mülei taiñ quelluconcüleal Chau Ngünechen ñi Gobierno mu müten. Tüfachi Gobierno mu Jesúsfeipi: “Tüfachi cümeque dungu ñi Ngünenien mu, quimelngeai ta com Mapu meu” (Mateo 24:14, Traducción del Nuevo Mundo). Iñchiñ huerquen reque feleiñ Chau Ngünechen ñi Gobierno mu, feimu reyüconquelaiñ politico dungu mu quisu taiñ troquiñ mapu, ca caquelu no rume. Huelu mai, elfalcünungeiñ taiñ amuldungual tüfachi Gobierno ñi cüpayal (2 Corintios 5:20; Efesios 6:20).

•   Chem raquiduam niele rume tati pu che, dungulelafuiñ llemai Ngünechen ñi Gobierno mu, reyüconcülenolu am iñchiñ politico dungu meu. Iñchiñ maneluucüleiñ Ngünechen ñi Gobierno müten ñi cüme elcünutuafiel tati huesaque dungu tüfachi Mapu meu, ca pengelqueiñ tüfa taiñ feipiqueel ca femqueel mu (Hebreos 13:6).

•   Iñchiñ müleiñ com huall Mapu püle, feimu quelluconliyiñ quiñe politico troquiñche mu, quiñeucülehuelayafuiñ (Colosenses 3:14; 1 Pedro 2:17). Tati pu religion reyüconcülelu tati politico dungu mu quiñeucülelaingün (1 Corintios 1:10).

 Yamniefiyiñ pu huentru tañi gobierno. Coneltuquelaiñ politico dungu mu, huelu yamniefiyiñ tati pu autoridad. Femngechi inaniequeiñ tüfachi huercün dungu Biblia mu mülelu: “Itrocom che felei ñi yamnieafiel tati mülechi pu autoridad” (Romanos 13:1). Feimu, inaquefiyiñ tati ley dungu, culliquefiyiñ impuesto, ca inaquefiyiñ ti dungu ñi femqueel tati autoridad ñi cüme feleal tati pu che. Iñchiñ coneltuquelaiñ quiñe dungu no rume ñi fentecünuafiel quiñe gobierno, huelu mai inaniequeiñ tüfachi ngülam mülelu Biblia mu: “Felei ñi ngillatuñmangeal tati loncolelu quiñe troquiñ mapu meu ca com ti pu quelluconcülelu ti loncolelu meu”, doyelchi mai dullimequelu engün quiñe dungu taiñ catrütuñmayafeteu taiñ poyequefiel Ngünechen (1 Timoteo 2:1, 2).

 Cafei yamquefiyiñ tati pu che ñi dulliel politico dungu mu. Quiñe dungu, pofolcaquelafiyiñ ta che amulu ñi dullial quiñe autoridad ca catrütuquelafiyiñ tati che ayülu ñi hulal tañi voto.

 Taiñ reyüconcülenon politico dungu mu, ¿quiñe hue dungu am chi? Feingelai tati. Tati pu apostol ca tati hunenque cristiano hunen siglo mu ca femngechi raquiduamquefui. Quiñe lifru dungulu tüfa mu, feipi pu hunenque cristiano ñi yamniefiel tati pu autoridad, huelu ‘cümelai coneltual politico dungu mu’, troquifingün (Beyond Good Intentions—A Biblical Vieu of Politics). Ca femngechi Origenes, quiñe huentru mülefulu tati siglo II ca III, chillcatuquefui fillque feyentun, ca huirintucui: “Tati pu cristiano eluucülelafuingün ñi cüdahual politico dungu mu”.

 Taiñ reyüconcülenon politico dungu meu, ¿chaftumequefiyiñ mai taiñ troquiñ mapu? Feingelai tati. Tati pu autoridad ngelai ñi llicaleal, quehuatuchefengenolu am iñchiñ. Peafiyiñ quiñe huirin chillca entufilu tati Academia Nacional de Ciencias de Ucrania 2001 tripantu meu, feichi dungu mu inaduamngei taiñ reyüconcülenon politico dungu meu ca feipi fentren che ñi cüme llounoel taiñ raquiduamquen tüfa mu. Feimu lle tati pu nazi ca pu comunista ñi ngünenieel caiñetuyeniefi pu Dunguquelu Ineingen Jehová tañi raquiduam mu. Ca femngechi ti huirin chillca feipi petu ñi ngünenieel tati pu sovietico, quisu engün amulei tañi yamniefiel tati ley dungu, cafei nor piuque mu doyümfingün caquelu che ñi duam, cüdaulu ngancülechi lelfün meu ca tati pu fabrica mu, ca turpu chaftulafingün tati pu comunista ñi ngünenieel. Inan mu tüfachi chillca feipi pu Dunguquelu Ineingen Jehová tañi femqueel ca feyentuqueel huesalcaquelafi quiñe troquiñ mapu no rume ñi cüme felen.