1. Mɛni ji níhi nɛ ha nɛ tue mi jɔmi kɛ bua jɔmi be weku komɛ a mi ɔ?

 AFƆ lɔle momo ko he nɛ a diki he. Ke nihi bee nɛ a na lɔle ɔ, a bu kaa ehe. Se ngɛ anɔkuale mi ɔ, lɔle ɔ sisi dadehi tsuo nɔ kana. Jã ji bɔ nɛ weku komɛ ngɛ. Ke o na weku mi bimɛ ɔmɛ a ti nɔ tsuaa nɔ ɔ, o ma susu kaa bua jɔmi kɛ tue mi jɔmi ngɛ a kpɛti. Se ngɛ anɔkuale mi ɔ, níhi yɛ nya kulaa. Kaa bɔ nɛ o ngɛ lɔle ɔ hyɛe tsuaa, se e sisi dadehi tsuo nɔ kana a, jã kɛ̃ nɛ o naa kaa muɔ ngɛ weku mi bimɛ ɔmɛ a hɛ mi. Se ngɛ anɔkuale mi ɔ, ní komɛ ha nɛ tue mi jɔmi be weku ɔ mi. Ní peepee enyɔ komɛ ma nyɛ ma ha nɛ tue mi jɔmi kɛ bua jɔmi be weku ko mi hie. Kake ji, ke weku ɔ mi nɔ ko kɛ dã numi pee e ní tsumi. Enyɔne ji, ke weku ɔ mi nɔ ko peeɔ yi wu tso ní.

2. (a) Mɛni Baiblo ɔ de ngɛ dã nɛ nya wa numi he? (b) Ke a ke nɔ ko kɛ dã numi pee e ní tsumi ɔ, mɛni e tsɔɔ?

² Baiblo ɔ tsɔɔ kaa tɔmi ko be he kaa nɔ ko maa nu dã nɛ nya wa bɔɔ ko. (Abɛ 23:20, 21; 1 Korinto Bi 6:9, 10; 1 Timoteo 5:23; Tito 2:2, 3) E slo dã numi nɛ nɔ ko kɛ pee e ní tsumi ngɛ dã demi he. Ke nɔ ko kɛ dã numi pee e ní tsumi ɔ, lɔ ɔ tsɔɔ kaa ke nɔ ɔ nui dã a, e nyɛ we si himi. Nikɔtɔmahi nyɛɔ ngɔɔ dã numi kɛ peeɔ a ní  tsumi. Se aywilɛho sane ji kaa nihewi kɛ yihewi hu ngɛ jã pee.

3, 4. Ke fɔlɔ ko ngɔ dã numi kɛ pee e ní tsumi ɔ, mɛni blɔ nɔ lɔ ɔ yeɔ lɛ, e he piɛɛlɔ ɔ, kɛ jokuɛwi ɔmɛ awi ngɛ?

³ Baiblo ɔ tsɔɔ kɛ je blema lokoo kaa ke nɔ ko nuu dã fuu ɔ, tue mi jɔmi be e weku ɔ mi hie. (5 Mose 21:18-21) Ke weku no ko ngɔ dã numi kɛ pee e ní tsumi ɔ, e yeɔ weku mi bimɛ ɔmɛ tsuo awi. Eko ɔ, yo ɔ maa bɔ mɔde wawɛɛ kaa e ma ha nɛ e huno ɔ nɛ jɔɔ dã numi, aloo ke nyumu ɔ nu dã nɛ e ngɛ su komɛ kpo jee ɔ, lɛ yo ɔ maa bɔ mɔde maa da nya. a Eko ɔ, yo ɔ bɔɔ mɔde nɛ e ngɔɔ dã a kɛ laa nyumu ɔ, aloo e plɛɔ dã a kɛ pueɔ he. Eko ɔ, e ngɔɔ nyumu ɔ sika kɛ laa lɛ, aloo e woɔ lɛ he wami kaa e ná suɔmi kɛ ha e weku ɔ, nɛ e bu wami kaa e he jua wa. E woɔ lɛ he wami hu kaa e ná suɔmi kɛ ha Mawu. Se loloolo ɔ, nyumu ɔ kpa we dã numi. Ke mɔde tsuo nɛ yo ɔ bɔɔ kaa e ma ha nɛ nyumu ɔ nɛ kpa dã numi ɔ yi manye ɔ, e kɔni mi maa wo nyu, nɛ e ma susu kaa nɔ́ ko be nɛ e ma nyɛ maa pee hu. Eko ɔ, yo ɔ ma bɔni gbeye yemi, e mi mi ma fu, e ma pia e he, e tsui be e mi nɔe, e maa pee yeyeeye, nɛ e kɔni mi ma jɔ̃.

⁴ Ke fɔlɔ ko kɛ dã numi pee e ní tsumi ɔ, lɔ ɔ yeɔ jokuɛwi nɛ a ngɛ weku ɔ mi ɔ hu awi. Fɔli nɛ a peeɔ jã a waa jokuɛwi ɔmɛ ekomɛ yi mi, nɛ a tuaa a ti ni komɛ hu abonua. Jokuɛwi ɔmɛ ma nyɛ ma pia a he po kaa mɛ lɛ a ha nɛ a fɔlɔ ɔ ngɔ dã numi kɛ pee e ní tsumi ɔ nɛ. Behi fuu ɔ, bɔ nɛ fɔlɔ nɛ e ngɔ dã numi kɛ pee e ní tsumi ɔ peeɔ e ní haa a, ha we nɛ jokuɛwi ɔmɛ heɔ ni kpahi po yeɔ. Akɛnɛ jokuɛwi ɔmɛ kɛ a fɔli ɔmɛ nyɛ we ní sɛɛmi faa ngɛ we mi he je ɔ, ke nɔ́ ko ngɛ mɛ haoe po ɔ, a de we nɔ ko. Behi fuu ɔ, enɛ ɔ yeɔ mɛ awi. (Abɛ 17:22) Jokuɛwi nɛ a ngɛ jã a waa ba peeɔ nikɔtɔmahi nɛ a bui a he, nɛ a he we nɔ ko hu yi.

5. Mɛni o maa pee konɛ nɔ ko nɛ e ngɔ dã numi kɛ pee e ní tsumi ɔ nɛ e kpa, nɛ mɛni he je nɛ enɛ ɔ peemi yee ɔ?

⁵ E ngɛ mi kaa ní leli fuu tsɔɔ kaa ke nɔ ko kɛ dã numi pee e ní tsumi ɔ, e be nyɛe ma kpa dã numi mohu lɛɛ, se a ti nihi fuu kplɛɛ nɔ kaa ke a to blɔ nya nɛ nɔ ɔ yu e he kulaa ngɛ dã he ɔ, e ma nyɛ ma kpa. (Kɛ to Mateo 5:29 ɔ he.) Se e be gbɔjɔɔ kaa o ma ha nɛ nɔ ko nɛ e kɛ dã numi pee e ní tsumi ɔ nɛ e kplɛɛ yemi kɛ buami nɔ, ejakaa behi fuu ɔ, e li kaa e ngɛ nyagba. Se kɛ̃ ɔ, nɔ́ ko ngɛ nɛ weku mi bimɛ ɔmɛ ma nyɛ maa pee kɛ ha nɛ nɔ ɔ nɛ yɔse kaa e ngɛ nyagba. Dɔkita ko nɛ e yeɔ bua nihi nɛ a kɛ dã numi pee a ní tsumi kɛ a wekuhi ɔ de ke: “I susu kaa nɔ́ nɛ he hia pe kulaa ji, nɛ weku mi bimɛ ɔmɛ maa ya nɔ ma tsu a daa ligbi ní tsumihi ngɛ blɔ kpakpa nɔ. Lɔ ɔ ma ha nɛ nɔ nɛ ngɔ dã numi kɛ pee e ní tsumi ɔ maa na kaa e ní peepee je ekpa kulaa ngɛ weku mi bimɛ kpa amɛ he.”

6. Jije weku mi bimɛ ma ná ga womi kpakpa kɛ je konɛ a kɛ ye bua a weku no ko nɛ e kɛ dã numi pee e ní tsumi ɔ?

⁶ Ke nɔ ko ngɔ dã numi kɛ pee e ní tsumi ngɛ o weku ɔ mi ɔ, Baiblo mi ga womi ma nyɛ maa ye bua mo konɛ o kɛ jamɛatsɛ ɔ nɛ hi si saminya. (Yesaya 48:17; 2 Timoteo 3:16, 17) Weku komɛ nyɛ nɛ a ye bua a weku mi bimɛ nɛ a kɛ dã numi pee a ní tsumi ɔ nɛ a nyɛ nɛ a kpa dã numi. Nyɛ ha nɛ wa susu sisi tomi mlaa komɛ nɛ ye bua mɛ ɔ he nɛ waa hyɛ.

7. Ke nɔ ko ngɔ dã numi kɛ pee e ní tsumi ngɛ weku ko mi ɔ, mɛnɔ e sa kaa a pia?

⁷ Ko pia mo pɛ o he. Baiblo ɔ de ke: “Nɔ tsuaa nɔ maa tloo lɛ nitsɛ e tlomi” nɛ “wa ti nɔ tsuaa nɔ maa bu lɛ nitsɛ e he akɔtaa ngɛ Mawu hɛ mi.” (Galatia Bi 6:5; Roma Bi 14:12) Eko ɔ, nɔ nɛ e kɛ dã numi pee e ní tsumi ɔ ma pia e weku mi bimɛ ɔmɛ kaa mɛ lɛ a ha nɛ e ngɛ jã pee. Kaa nɔ hyɛmi nɔ́ ɔ, eko ɔ, e ma de ke: “Kaa nyɛɛ kɛ mi hi si saminya a, jinɛ i be dã nue.” Ke e ná nihi nɛ a fĩ e se ɔ, lɔ ɔ tsɔɔ kaa a ngɛ lɛ he wami woe konɛ e ya nɔ nɛ e nu dã.  Nɔ ɔ ngɛ wɔ piae jio, e pia we wɔ jio, ni kpahi hu ngɛ wɔ piae jio, a pia we wɔ jio, waa kɛ nɔ nɛ e kɛ dã numi pee e ní tsumi ɔ tsuo maa bu akɔtaa kɛ ha Mawu.​​—Kɛ to Filipi Bi 2:12 ɔ he.

8. Ke nɔ ko nɛ e kɛ dã numi pee e ní tsumi kɛ haomihi ngɛ kpee ɔ, mɛni weku mi bimɛ ma nyɛ maa pee?

⁸ Ko susu kaa be tsuaa be ɔ, e sa nɛ o po nɔ ko nɛ e kɛ dã numi pee e ní tsumi ɔ he piɛ ngɛ níhi nɛ jeɔ dã numi mi kɛ ba a he. Abɛ ko ngɛ Baiblo ɔ mi nɛ kɔɔ nɔ ko nɛ e mi mi fu he. Jamɛ a abɛ ɔ ma nyɛ ma kɔ nɔ ko nɛ e kɛ dã numi pee e ní tsumi ɔ hu he. Baiblo ɔ de ke: “Ngmɛɛ mi mi latsɛ he nɛ e ná e tue gblami; ejakaa ke o je lɛ kɛ je haomi mi si kake ɔ, e maa hia kaa o ya je lɛ ngɛ mi ekohu.” (Abɛ 19:19) Enɛ ɔ he ɔ, ke nɔ ko kɛ dã numi pee e ní tsumi nɛ e kɛ haomi ngɛ kpee ɔ, e sa nɛ o ngmɛɛ e he konɛ lɛ nitsɛ e tsu he ní. Ke e de nɛ e vie wo e he, aloo e pee e he basaa a, ha nɛ lɛ nitsɛ e dla e he. Aloo ke e de nɛ e be nyɛe maa ya ní tsumi e nɔ jena a, ha nɛ lɛ nitsɛ e tsɛ e nitsumitsɛ ɔ ngɛ tɛlifoo nɔ nɛ e bɔ lɛ amaniɛ.

9, 10. Ke nɔ ko kɛ dã numi pee e ní tsumi ngɛ o weku ɔ mi ɔ, mɛni he je nɛ e sa nɛ weku ɔ nɛ hla yemi kɛ buami se blɔ? Mɛnɔmɛ a dɛ titli nɛ e sa kaa a hla yemi kɛ buami kɛ je?

⁹ Ha nɛ nihi nɛ a ye bua mo. Abɛ 17:17 ɔ de ke: ‘Huɛmɛ suɔ a he be tsuaa be, haomi be mi tete po a si we a sibi.’ Ke nɔ ko kɛ dã numi pee e ní tsumi ngɛ o weku ɔ mi ɔ, lɛɛ haomi ngɛ o kuɛ nɔ. E he hia nɛ nihi nɛ a ye bua mo. E ko ye ha mo kaa o ma bi yemi kɛ buami kɛ je o ‘huɛ’ nitsɛnitsɛ ko dɛ. (Abɛ 18:24) Ni komɛ ngɛ nɛ a le haomi nɛ o kɛ ngɛ kpee ɔ, nɛ ni komɛ hu ngɛ nɛ mɛ hu a kɛ haomi ko kaa jã ngɛ kpee. Ke o kɛ nihi kaa jã susu níhi a he ɔ, a ma nyɛ maa tsɔɔ mo níhi nɛ e sa kaa o pee, kɛ níhi nɛ e sɛ kaa o pee. O kɛ nihi nɛ o he mɛ ye nɛ a be o “laami sanehi” kpo jee ɔ pɛ nɛ susu níhi kaa jã a, a he.​​—Abɛ 11:13.

¹⁰ Ha nɛ asafo mi nikɔtɔma amɛ nɛ a ye bua mo. Asafo mi nikɔtɔma amɛ ma nyɛ maa ye bua wɔ wawɛɛ nitsɛ. A kɛ Mawu Munyu ɔ tsɔse asafo mi nikɔtɔma amɛ, nɛ a  nane pi si ngɛ Mawu jami mi. Enɛ ɔ he ɔ, a le bɔ nɛ a kɛ Baiblo sisi tomi mlaahi tsuɔ ní ha. A ma nyɛ maa pee kaa “wesa he ngɛ kɔɔhiɔ kɛ ahumi nya, kaa pa nɛ ywia nga ngɛ zugba kpataa nɔ, aloo kaa zugba kplanaa nɔ tɛ sa sisi hɔ̃.” (Yesaya 32:2) Asafo mi nikɔtɔma amɛ buu nihi nɛ a ngɛ asafo ɔ mi ɔ a he ngɛ níhi nɛ maa ye mɛ awi ɔ a he. A woɔ nihi nɛ a ngɛ asafo ɔ mi nɛ a kɛ haomihi ngɛ kpee ɔ hu a bua. Moo ngɔ yemi kɛ buami nɛ a kɛ ma ha mo ɔ kɛ tsu ní saminya.

11, 12. Mɛnɔ yeɔ bua wekuhi nɛ nihi ngɔ dã numi kɛ pee a ní tsumi ngɛ a mi ɔ wawɛɛ? Mɛni blɔ nɔ Yehowa guu kɛ peeɔ jã?

¹¹ Nɔ́ nɛ he hia pe kulaa ji kaa o ma ha nɛ Yehowa nɛ wo mo he wami. Baiblo ɔ de ke: ‘Nihi nɛ a kɔni mi jɔ̃, kɛ nihi nɛ a be hɛ nɔ kami ɔ, Yehowa hii a kasa nya, konɛ e wo mɛ he wami.’ (La 34:18) Ke o weku ɔ mi no ko nɛ e kɛ dã numi pee e ní tsumi ɔ ha nɛ o kɔni mi jɔ̃, nɛ o susu kaa o be hɛ nɔ kami ko ɔ, mo ná nɛ o le kaa ‘Yehowa ngɛ o kasa nya.’ E le haomi nɛ o weku ɔ kɛ ngɛ kpee.​​—1 Petro 5:6, 7.

¹² Ke o he nɔ́ nɛ Yehowa de ngɛ e Munyu ɔ mi ɔ ye ɔ, lɔ ɔ maa ye bua mo konɛ o ko pee yeyeeye tsɔ. (La 130:3, 4;  Mateo 6:25-34; 1 Yohane 3:19, 20) Ke o kaseɔ Mawu Munyu ɔ nɛ o kɛ sisi tomi mlaahi nɛ ngɛ mi ɔ tsuɔ ní ɔ, Mawu mumi klɔuklɔu ɔ maa ye bua mo, nɛ o ma ná “he wami kpetekpleenyɛ” kɛ da haomihi nɛ o kɛ kpeɔ daa ligbi ɔ a nya.​​—2 Korinto Bi 4:7. b

13. Mɛni haomi kpa ko hu gbɛɛ wekuhi fuu?

¹³ Dã fuu numi ma nyɛ maa ngɔ haomi kpa ko hu kɛ ba. Lɔ ɔ ji yi wu tso ní peepee. Enɛ ɔ gbɛɛ wekuhi fuu.

14. Mɛni be yi mi wami ní peepee nɛ yaa nɔ ngɛ weku mi bimɛ a kpɛti ɔ je sisi, nɛ mwɔnɛ ɔ, kɛ ji lɛ kɛɛ?

¹⁴ Gbemi nɛ Kain gbe e nyɛmi Habel ɔ ji kekleekle yi wu tso ní peepee nɛ ya nɔ ngɛ weku mi bimɛ a kpɛti. (1 Mose 4:8) Kɛ je jamɛ a be ɔ mi kɛ ma nɛ ɔ, yi wu tso ní peepeehi fuu yaa nɔ ngɛ weku mi bimɛ a kpɛti ngɛ je ɔ mi. Nyumu komɛ ngɛ nɛ a kongoɔ a yihi, nɛ yigbayi komɛ hu ngɛ nɛ a tsuaa a hunomɛ ní. Fɔli komɛ hu ngɛ nɛ a fiaa a bimɛ kpa basabasa, nɛ bimɛ komɛ hu peeɔ a fɔli nɛ a bwɔ ɔ basabasa.

15. Ke yi mi wami ní peepeehi yaa nɔ ngɛ weku ko mi ɔ, kɛ e saa weku mi bimɛ ɔmɛ a he ha kɛɛ?

¹⁵ Tsa pi pa doku pɛ nɛ yi wu tso ní peepee nɛ yaa nɔ ngɛ weku mi bimɛ a kpɛti ɔ haa nɛ a náa. Yo ko nɛ e huno kongo lɛ hyɛ ɔ de ke: “E ngɛ dɔmi nɛ e ji zo hulɔ. Behi fuu ɔ, ke jena a, e pee we mo kaa o te si, e peeɔ mo kaa nlami yaya ko kɛkɛ.” Jokuɛwi nɛ a fɔli waa mɛ yi mi, aloo a naa kaa a fɔli ɔmɛ waa a sibi yi mi ɔ, ke a wa nɛ a sɛ gba si himi mi ɔ, mɛ hu a peeɔ jã.

16, 17. Mɛni ma nyɛ maa ngɔ tsui yemi kɛ ba weku mi, nɛ kɛ enɛ ɔ yeɔ weku mi bimɛ awi ha kɛɛ?

 ¹⁶ Pi kongomi pɛ ji yi wu tso ní peepeehi nɛ yaa nɔ ngɛ weku mi bimɛ a kpɛti. Behi fuu ɔ, jɛmi hu piɛɛ he. Abɛ 12:18 ɔ de ke: “Munyu nɛ a tuɔ kɛkɛ nɛ juɛmi be mi ɔ, e yeɔ nɔ awi kaa klaate.” Nɔ se biɛ tsɛmi, nɔ yi kemi, munyu nɛ a tuɔ kɛ siɔ nɔ, jɛmi nɛ a jɛɔ nɔ kɛ pueɔ nɔ hɛ mi si, kɛ nɔ he gbeye womi ji yi mi wami ní peepee komɛ nɛ yeɔ nɔ “awi” ngɛ weku ɔ mi. Behi fuu ɔ, enɛ ɔmɛ haa nɛ nihi yeɔ tsui. Se tsui yemi be kaa pa doku nɛ nihi naa kɛ a hɛngmɛ.

¹⁷ Ke fɔli yeɔ jokuɛwi a tsui ɔ, e ngɛ dɔmi wawɛɛ. A tuɔ jokuɛwi ɔmɛ a hɛ mi munyu, nɛ a buu mɛ kaa a li nɔ́ ko, nɛ se nami ko hu be a he. Ke e ba ja a, jokuɛwi ɔmɛ a kɔni mi jɔ̃ɔ. Ngɛ anɔkuale mi ɔ, jokuɛwi tsuo hia tsɔsemi. Se Baiblo ɔ de tsɛmɛ ke: “Nyɛ ko wo nyɛ bimɛ a mi mi la; ke nyɛ pee jã a, a nine mi maa wo nyu.”​​—Kolose Bi 3:21.

18. Jije yi mi wami ní peepee nɛ yaa nɔ ngɛ weku mi bimɛ a kpɛti ɔ jeɔ sisi ngɛ? Mɛni Baiblo ɔ tsɔɔ kaa nɔ ko ma nyɛ maa pee konɛ e kpa jamɛ a su ɔ?

¹⁸ Yi wu tso ní peepeehi nɛ yaa nɔ ngɛ weku mi bimɛ a kpɛti ɔ jeɔ sisi ngɛ tsui ɔ kɛ juɛmi ɔ mi. Níhi nɛ wa susuɔ he ɔ ji níhi nɛ wa peeɔ. (Yakobo 1:14, 15) Loko nɔ ko maa yu e he ngɛ yi wu tso ní peepeehi a he ɔ, ja e tsake e susumi. (Roma Bi 12:2) Anɛ nɔ ko ma nyɛ maa pee jã lo? Ee. Mawu Munyu ɔ ngɛ he wami nɛ e nyɛɔ tsakeɔ nihi. E ma nyɛ maa ku “mɔ nguahi” aloo susumi yayahi. (2 Korinto Bi 10:4; Hebri Bi 4:12) Ke nɔ ko kase Baiblo ɔ, nɛ e ná anɔkuale nile ɔ, lɔ ɔ ma nyɛ maa ye bua lɛ konɛ e tsake e je mi bami kulaa, nɛ́ e wo nɔmlɔ su ehe ɔ.​​—Efeso Bi 4:22-24; Kolose Bi 3:8-10.

19. Mɛni juɛmi e sa kaa Kristofo no nɛ ná ngɛ e yo aloo e huno he, nɛ kɛ e sa kaa a kɛ a sibi nɛ hi si ha kɛɛ?

¹⁹ Juɛmi nɛ e sa kaa huno ɔ kɛ yo ɔ tsuo nɛ a ná ngɛ a sibi a he. Mawu Munyu ɔ de ke: “E sa nɛ nyumu nɛ suɔ  e yo kaa bɔ nɛ e suɔ lɛ nitsɛ e he. Ke nyumu ko suɔ e yo ɔ, ngɛ blɔ ko nɔ ɔ, e suɔ lɛ nitsɛ e he.” (Efeso Bi 5:28) Baiblo ɔ tsɔɔ kaa e sa nɛ huno nɛ na ‘kaa ngɛ nɔmlɔ tso blɔ fa mi ɔ, yo he wɛ tsɔ.’ (1 Petro 3:7) A wo yigbayihi hu ga kaa “a suɔ a hunomɛ,” nɛ ‘a bu mɛ.’ (Tito 2:4; Efeso Bi 5:33) Ke huno ko nɛ yeɔ Mawu gbeye kongoɔ e yo aloo e jɛɛ lɛ ɔ, jamɛ a nyumu ɔ be nyɛe ma de ke e buɔ e yo. Jã kɛ̃ nɛ ke yogbayo ko hu kpaa ngmlaa kɛ woɔ e huno yi, e bui lɛ, nɛ be tsuaa be ɔ, e kãa e huno ɔ hɛ mi ɔ, jamɛ a yo ɔ be nyɛe ma de ke e suɔ e huno ɔ, nɛ e buu lɛ.

20. Fɔli maa bu a bimɛ ɔmɛ a he akɔtaa kɛ ha mɛnɔ, nɛ mɛni he je nɛ e sɛ nɛ fɔli nɛ hyɛ blɔ kaa jokuɛ ko nɛ pee nɔ́ ko nɛ e be nyɛe maa pee ɔ?

²⁰ Mo ná o bimɛ a he juɛmi nɛ da. Ngɛ anɔkuale mi ɔ, e sa nɛ fɔli nɛ a je suɔmi kpo kɛ ha a bimɛ nɛ a susu a he. Mawu Munyu ɔ tsɔɔ kaa bimɛ ji ‘weto ní nɛ Yehowa haa nɔ, nɛ a ji nike ní nɛ e kɛ dlooɔ nɔ.’ (La 127:3) E ji fɔli a blɔ nya ní tsumi ngɛ Yehowa hɛ mi kaa a maa hyɛ weto ní nɛ ɔ nɔ. Baiblo ɔ tu ‘jokuɛwi a ní peepee’ kɛ “kuasia jemi” he munyu. (1 Korinto Bi 13:11; Abɛ 22:15) Enɛ ɔ he ɔ, ke jokuɛwi ngɛ kuasia jee ɔ, e sɛ nɛ e pee fɔli nyakpɛ. E sa nɛ a le kaa jokuɛwi ɔmɛ wɛ lolo. E sa nɛ fɔli nɛ a da jeha nɛ a bimɛ ɔmɛ ye, weku ɔ si fɔfɔɛ, aloo nyɛmi nɛ a bimɛ ɔmɛ ngɛ ɔ nɔ kɛ ha mɛ ní tsumi. E sɛ nɛ a hyɛ blɔ kaa a bimɛ nɛ pee nɔ́ ko nɛ a be nyɛe maa pee.​​—Hyɛ 1 Mose 33:12-14.

21. Kɛ Baiblo ɔ tsɔɔ kaa waa kɛ wa fɔli nɛ a bwɔ ɔ nɛ hi si ha kɛɛ?

²¹ Juɛmi nɛ e sa kaa o ná ngɛ fɔli nɛ a bwɔ ɔ a he. Baiblo ɔ de ngɛ 3 Mose 19:32 ɔ ke: ‘Buu nɔkɔtɔma, nɛ o wo e hɛ mi nyami. Ye mi gbeye. Imi ji Yehowa, o Mawu ɔ nɛ.’ Enɛ ɔ he ɔ, Mawu Mlaa a tsɔɔ kaa e sa nɛ bimɛ nɛ a je bumi kpo kɛ ha nihi nɛ a wa ngɛ jeha mi ɔ. Se eko ɔ, e he maa wa kaa bimɛ maa pee jã ke kpamisaa a, fɔlɔ nɛ e wa ngɛ jeha mi ɔ suɔ nɛ e bimɛ nɛ a ye bua lɛ, aloo e be he wami nɛ eko ɔ, e nyɛ we nɛ e nyɛɛ, aloo e nyɛ we nɛ e susu níhi a he saminya. Se kɛ̃ ɔ, e sa nɛ bimɛ nɛ a kai  kaa e sa nɛ ‘a to a fɔli ɔmɛ nane mi.’ (1 Timoteo 5:4) Enɛ ɔ tsɔɔ kaa e sa nɛ a bu mɛ nɛ a wo a hɛ mi nyami, nɛ a ye bua mɛ ngɛ sika blɔ fa mi. Baiblo ɔ tsɔɔ kaa e sɛ nɛ waa wa wa fɔli nɛ a bwɔ ɔ yi mi. E tsɔɔ hu kaa wa je bumi kpo kɛ ha mɛ.

22. Mɛni su titli ma nyɛ maa ye bua nɔ ko konɛ e ko wa e weku mi bimɛ a yi mi, nɛ mɛni blɔ nɔ e maa gu kɛ je su nɛ ɔ kpo?

²² Moo ye o he nɔ. Abɛ 29:11 ɔ de ke: “Kuasia jeɔ e we abofu tsuo kpo; se ní lelɔ lɛɛ e toɔ e tsui si kɛ tsiɔ abofu nya.” Mɛni blɔ nɔ o maa gu kɛ ye o he nɔ? Ke nɔ́ ko hao mo ɔ, koo ngɔ kɛ wo o mi, mohu ɔ, mo tsu haomi ɔ he ní oya. (Efeso Bi 4:26, 27) Ke o na kaa o mi mi ngɛ hlae ma fu ɔ, moo je he nɛ haomi ɔ ngɛ ɔ. Moo sɔle konɛ Mawu mumi klɔuklɔu ɔ nɛ ye bua mo konɛ o nyɛ nɛ o ye o he nɔ. (Galatia Bi 5:22, 23) Si slaami, aloo he mi kami ma nyɛ maa ye bua mo konɛ o ye o he nɔ. (Abɛ 17:14, 27) Moo fia o pɛɛ si kaa o be hae nɛ o ‘mi mi nɛ fu mla.’​​—Abɛ 14:29.

23. Ke nɔ ko ngɛ Kristofohi asafo ɔ mi, nɛ e kɛ abofu nɛ nya wa peeɔ e ní, nɛ e pɔɔ e we mi bimɛ yi mi wami nɛ e pia we e he ɔ, mɛni a ma nyɛ maa pee lɛ?

²³ Baiblo ɔ wo ‘ninyɛ, pɛ hlami, kɛ mi mi la womi’ a ta kɛ piɛɛ ní peepeehi nɛ Mawu sume ɔ a he. Baiblo ɔ tsɔɔ kaa “nihi nɛ peeɔ kikɛmɛ a ní nɛ ɔmɛ a nine be Mawu matsɛ yemi ɔ nɔ sue gblegbleegble.” (Galatia Bi 5:19-21) Lɔ ɔ he ɔ, ke nɔ ko ngɛ Kristofohi asafo ɔ mi nɛ e kɛ abofu nɛ nya wa peeɔ e ní, e pɔɔ e yo aloo e bimɛ yi mi wami, nɛ e pia we e he ɔ, a ma nyɛ maa fiee lɛ kɛ je Kristofohi asafo ɔ mi. (Kɛ to 2 Yohane 9, 10 he.) Enɛ ɔ haa nɛ asafo ɔ he tsɔɔ, nɛ yiwutsotsɛmɛ hi asafo ɔ mi.​​—1 Korinto Bi 5:6, 7; Galatia Bi 5:9.

24. (a) Ke nɔ ko ngɛ e he piɛɛlɔ yi mi wae ɔ, mɛni nɔ ɔ he piɛɛlɔ ɔ ma nyɛ maa pee? (b) Mɛni huɛmɛ kɛ asafo mi nikɔtɔmahi ma nyɛ maa pee ngɛ sane ɔ he, nɛ mɛni e sɛ kaa a pee?

²⁴ Nɛ Kristofohi nɛ amlɔ nɛ ɔ, a hunomɛ aloo a yihi ngɛ  mɛ yi mi wae nɛ nɔ́ ko tsɔɔ we kaa a ma kpa a hu nɛɛ? Ni komɛ ngɛ nɛ yi mi tomi komɛ a he je ɔ, a ji a he piɛɛli ɔmɛ a he. Ni komɛ hu jeɔ a he piɛɛli ɔmɛ a he, ejakaa a na kaa a wami, kɛ huɛ bɔmi nɛ ngɛ a kɛ Mawu a kpɛti ɔ hu ngɛ oslaa mi. Ke nɔ ko ya je si himi kaa kikɛ ɔ mi ɔ, e sa nɛ nɔ ɔ nitsɛ nɛ mwɔ e yi mi kpɔ ngɛ Yehowa hɛ mi ngɛ nɔ́ nɛ e maa pee ɔ he. (1 Korinto Bi 7:10, 11) Eko ɔ, huɛmɛ nɛ a hɛɛ we juɛmi yaya ko, weku li, aloo asafo mi nikɔtɔmahi maa suɔ kaa a maa ye bua mohu lɛɛ, se e sɛ nɛ a tsɔɔ nɔ ɔ nɔ́ nɛ e sa kaa e pee kɔkɔɔkɔ. E sa nɛ nɔ ɔ nitsɛ nɛ mwɔ e yi mi kpɔ.​​—Roma Bi 14:4; Galatia Bi 6:5.

25. Mɛni ji Yehowa yi mi tomi kɛ ha wekuhi?

²⁵ Benɛ Yehowa ngɔ Adam kɛ Hawa kɛ tsa kaa nɔ kɛ e yo ɔ, e tui e yi mi kaa dã, loo yi wu tso ní peepee nɛ puɛ a gba si himi ɔ. (Efeso Bi 3:14, 15) E yi mi tomi ji kaa suɔmi kɛ tue mi jɔmi nɛ hi weku ɔ mi, konɛ weku mi bimɛ ɔmɛ a ti nɔ tsuaa nɔ nine nɛ su e hiami níhi a nɔ. Se kɛ je benɛ yayami ba je ɔ mi pɛ nɛ weku ɔ gbɛ.​​—Kɛ to Fiɛlɔ 8:9 ɔ he.

26. Mɛni jɔɔmi nihi nɛ a bɔɔ mɔde kaa a maa pee Yehowa suɔmi nya ní ɔ ma ná hwɔɔ se?

²⁶ Bua jɔmi sane ji kaa Yehowa hɛ ji e yi mi tomi nɛ e ngɛ ha weku ɔ nɔ. E wo si kaa e maa ngɔ je ehe ko kɛ ba, nɛ nihi “maa hi si ngɛ tue mi jɔmi mi, nɛ nɔ ko nɔ ko be a he gbeye woe.” (Ezekiel 34:28) Jamɛ a be ɔ mi ɔ, nihi be da numi ngɔe kɛ pee a ní tsumi. Yi wu tso ní peepeehi nɛ yaa nɔ ngɛ weku mi bimɛ a kpɛti, kɛ nɔ́ saisaa nɛ gbɛɛ wekuhi ɔ tsuo se maa po. Nihi be gbeye yee, nɛ a be piie ngɛ a mi hulɔ, mohu ɔ, a bua maa jɔ, ejakaa a maa hi si “ngɛ kplɔkɔtɔ, kɛ tue mi jɔmi mi.”​​—La 37:11.