GADO abi kefalek moi sani na prakseri gi a grontapu. Yehovah wani taki a grontapu musu kon furu nanga koloku èn gosontu sma. Bijbel e taki dati "Gado ben prani wan dyari na ini Eden” èn taki a "ben meki ibri sortu bon gro, di ben de wan lostu gi na ai èn di ben bun fu nyan”. Baka di Gado meki a fosi man nanga uma, Adam nanga Eva, A poti den na ini a moi tanpresi dati èn a taigi den: "Un meki pikin èn kon furu èn furu grontapu èn poti en na un ondro” (Genesis 1:28; 2:8, 9, 15). Sobun, Gado ben abi na prakseri taki libisma musu meki pikin, taki den ben musu meki heri grontapu tron wan paradijs te fu kaba, èn taki den ben musu sorgu gi den meti.

² Yehovah wani taki libisma musu libi na ini wan paradijs grontapu. Ma yu denki taki a sani dati sa kon tru oiti? "Na mi taki en,” na so Gado e fruklari, "mi sa du en sosrefi” (Yesaya 46:9-11; 55:11). Iya, san Gado abi na prakseri fu du, a sa du trutru! A taki dati a "no meki [a grontapu] fu soso” ma taki a "ben seti en fu sma libi na tapu” (Yesaya 45:18). Sortu sma Gado ben wani fu libi na grontapu? Èn o langa a ben wani den fu libi dyaso na grontapu? Bijbel e piki: "Na den regtfardikisma srefi sa abi grontapu leki a gudu fu den, èn den sa libi na tapu fu têgo.”—Psalm 37:29; Openbaring 21:3, 4.

³ A de krin fu si taki disi no pasa ete. Na ini a ten disi sma e kon siki èn e dede; den e feti èn den e kiri makandra srefi. Wan sani no waka bun. Ma toku, wi kan abi a dyaranti taki Gado no ben abi na prakseri taki grontapu musu de leki fa a de now! San ben pasa dan? Fu san ede den sani di Gado abi na prakseri no kon tru? Nowan historia buku di libisma skrifi kan fruteri wi san pasa fu di a problema bigin na ini hemel.

WAN FEANTI OPO KON

⁴ A fosi buku fu Bijbel e fruteri wi fu wan feanti fu Gado di ben opo kon na ini a dyari fu Eden. Bijbel e kari en "a sneki”, ma a no ben de wan meti trutru. A lasti buku fu Bijbel e taki dati en na "a wan di den e kari Didibri nanga Satan, èn a e kori sma na heri grontapu”. Bijbel e kari en sosrefi "a fosi sneki” (Genesis 3:1; Openbaring 12:9). A makti engel disi, noso a yeye mekisani disi di wi no man si, gebroiki wan sneki fu taki nanga Eva, neleki wan sma di sabi fa fu meki a gersi leki a sten fu en e komoto fu wan popki di a e hori krosibei na en. A no de fu taki dati a yeye disi ben de drape tu di Gado ben sreka a grontapu gi libisma.—Yob 38:4, 7.

⁵ Ma efu ala den sani di Yehovah meki de volmaakti, dan suma meki ’Satan Didibri’? Fu taki en leti, wán fu den makti yeye manpikin fu Gado meki ensrefi kon tron Didibri. Fa a sani disi ben kan pasa? We, na ini a ten disi, a kan taki wan sma di ben e tyari ensrefi na wan bun fasi èn di no ben e bedrigi sma, e kon tron wan fufuruman. Fa a sani dati kan pasa? A sma kan gi pasi taki wan takru lostu opo kon na ini en ati. Efu a e tan prakseri a sani dati, dan a takru lostu dati kan kon tranga srefisrefi. Efu so wan sma kisi na okasi, a kan go du a takru sani di a ben abi na prakseri.—Yakobus 1:13-15.

⁶ Disi pasa nanga Satan Didibri. A no de fu taki dati a ben yere di Gado taigi Adam nanga Eva fu meki pikin èn fu meki grontapu kon furu nanga den pikin fu den (Genesis 1:27, 28). A kan taki Satan ben e prakseri: ’Te mi luku a tori bun, dan ala den sma disi kan anbegi mi na presi fu Gado!’ Sobun, wan takru lostu bigin opo kon na ini en ati. Te fu kaba a du wan sani fu kori Eva, fu di a bigin fruteri en lei fu Gado (Genesis 3:1-5). Na a fasi disi a tron "Didibri”, san wani taki "Ogri-ati leiman”. Na a srefi ten a tron "Satan”, san wani taki "Gensman”.

⁷ Satan Didibri gebroiki lei nanga triki fu meki Adam nanga Eva trangayesi Gado (Genesis 2:17; 3:6). Leki bakapisi fu dati den dede te fu kaba, soleki fa Gado ben taki na fesi (Genesis 3:17-19). Fu di Adam ben kon tron wan onvolmaakti libisma baka di a sondu, meki ala den bakapikin fu en kisi sondu fu en (Romesma 5:12). Yu kan agersi a tori disi nanga wan blik di sma e gebroiki fu baka kuku. Efu a blik abi wan fow na ini, dan san e pasa nanga ala den kuku di yu e baka na ini a blik? Ibri kuku e kisi wan fow na ini, noso den no de volmaakti. Na a srefi fasi wi kan taki dati, ala libisma kon tron sma di no de volmaakti fu di den kisi a sondu fu Adam, neleki fa a kuku kisi a srefi "fow” fu a blik. Na fu dati ede meki ala libisma e kon owru, èn e dede.—Romesma 3:23.

⁸ Te yu luku en bun, dan di Satan meki Adam nanga Eva sondu teige Gado, a ben e teki fesi fu meki sma opo densrefi teige Gado. A ben e tyalensi a fasi fa Yehovah e tiri. Fu taki en leti, dan Satan ben e taki: ’Gado na wan ogri tiriman. A e fruteri lei èn a no wani gi bun sani na den wan di e saka densrefi na en ondro. Libisma no abi Gado fanowdu fu tiri den. Den kan bosroiti gi densrefi san bun èn san ogri. Boiti dati, dan sani sa waka moro bun gi den te mi o tiri den.’ San Gado ben o du baka di Satan afrontu en na a fasi disi? Son sma e prakseri taki na kiri Gado ben musu kiri den sma disi, di ben opo densrefi teige en. Ma a sani dati ben o gi piki tapu a tyalensi fu Satan? Dati ben o buweisi taki Gado e tiri na a yoisti fasi?

⁹ Fu di Yehovah e sori retidu na wan volmaakti fasi, meki a no ben o kiri den sma disi wantewante, baka di den opo densrefi teige en. A ben sabi taki ten ben o de fanowdu fu gi piki tapu a tyalensi fu Satan na wan fasi di ben o lusu a tori dorodoro, èn na wan fasi di ben o buweisi taki Didibri na wan leiman. Sobun, Gado ben bosroiti fu gi libisma na okasi fu tiri densrefi fu wan pisi ten, aladi Satan ben o abi makti tapu den. Na ini kapitel 11 fu a buku disi, wi sa luku fu san ede Yehovah du dati èn fu san ede a meki so furu ten pasa, fosi a tyari wan kaba kon na a strei disi. Ma now a bun fu poti prakseri na den aksi disi: A de so, taki Adam nanga Eva ben abi reti fu bribi Satan di noiti no ben du wan bun gi den? Den ben abi reti fu bribi taki Yehovah na wan takru leiman, aladi na en ben gi den ala san den ben abi? San yu ben o du?

¹⁰ A bun fu teki ten fu prakseri fu den aksi disi, fu di ibriwan fu wi na ini a ten disi abi fu du nanga den srefi tori disi. Iya, yu abi na okasi fu teki a sei fu Yehovah na ini a strei, so taki yu kan yepi fu gi piki tapu a tyalensi fu Satan. Yu kan teki Yehovah leki yu Tiriman èn na a fasi dati yu sosrefi kan yepi fu sori taki Satan na wan leiman (Psalm 73:28; Odo 27:11). A sari fu si taki na mindri ala den milyardmilyard sma na grontapu, wan tu sma nomo de di e teki a bosroiti fu du dati. Dati meki wan tra prenspari aksi e opo kon: Bijbel e leri wi trutru taki Satan na a tiriman fu a grontapu disi?

SUMA E TIRI A GRONTAPU DISI?

¹¹ Noiti Yesus ben tweifri taki Satan na a tiriman fu a grontapu disi. Wan leisi, Satan gebroiki wan wondru fu sori Yesus "ala den kownukondre fu grontapu nanga a moi fu den”. Ne Satan pramisi Yesus: "Mi o gi yu ala den sani disi efu yu boigi èn anbegi mi wan leisi nomo” (Mateyus 4:8, 9; Lukas 4:5, 6). Prakseri a tori disi. Yu denki taki a sani dati ben o de wan tesi gi Yesus efu a no ben de so trutru taki Satan ben de a tiriman fu ala den kownukondre disi? Yesus no ben taki dati den grontapu tirimakti disi no de fu Satan. A no abi misi dati, efu den tirimakti disi no ben de fu Satan, dan Yesus ben o taki dati tu.

¹² A no de fu taki dati Yehovah na a Almakti Gado, a Mekiman fu ala den kefalek moi sani na hemel nanga grontapu (Openbaring 4:11). Ma nowan presi na ini Bijbel a skrifi taki Yehovah Gado, noso Yesus Krestes na tiriman fu a grontapu disi. Fu taki en leti, Yesus ben taki krin dati Satan na "a tiriman fu a grontapu disi” (Yohanes 12:31; 14:30; 16:11). Bijbel e taki srefi dati Satan Didibri na "a gado fu a grontapu sistema disi” (2 Korentesma 4:3, 4). A Kresten apostel Yohanes ben skrifi fu Satan, a feanti disi: "Heri grontapu de na ini a makti fu na ogriwan.”—1 Yohanes 5:19.

FA A GRONTAPU FU SATAN SA KOMOTO NA PASI

¹³ Ibri yari, a grontapu disi e kon moro ogri. Grontapu kon furu nanga legre di e feti nanga makandra, politiekman di e kori sma, kerki fesiman di e hoigri, nanga ogriman di no e firi gi sma kwetikweti. A heri grontapu pori so kefalek, taki a no man kon bun moro. Bijbel e tyari kon na krin taki heri esi Gado sa pori ala ogrisma na ini en feti fu Armagedon. Na presi fu na ogri grontapu disi, wan regtfardiki nyun grontapu o kon.—Openbaring 16:14-16.

¹⁴ Yehovah Gado poti Yesus Krestes leki Tiriman fu a Kownukondre, noso a tirimakti fu En di de na hemel. Langa ten pasa, Bijbel ben taki na fesi: "Wan pikin kon gebore gi wi, wan manpikin den ben gi wi; èn a kownu tirimakti sa kon na tapu en skowru. Èn en nen sa de:…Granman fu Vrede. Na a kownu tirimakti di de pasa marki èn na vrede, wan kaba no sa kon” (Yesaya 9:6, 7). Yesus ben leri den bakaman fu en fa fu begi fu a tirimakti disi. Den ben musu taki: "Meki yu kownukondre kon. Meki yu wani pasa na grontapu soleki fa a e pasa na hemel” (Mateyus 6:10). Soleki fa wi sa si moro fara na ini a buku disi, dan a Kownukondre fu Gado sa puru ala den tirimakti fu a grontapu disi, èn a Kownukondre disi sa teki a presi fu den alamala (Danièl 2:44). Dan a Kownukondre fu Gado sa seti wan paradijs na grontapu.

WAN NYUN GRONTAPU DE KROSIBEI!

¹⁵ Bijbel e gi wi a dyaranti: "Wi e fruwakti nyun hemel nanga wan nyun grontapu, soleki fa [Gado] ben pramisi, èn drape regtfardikifasi o tan” (2 Petrus 3:13; Yesaya 65:17). Son leisi, te Bijbel e taki fu "a grontapu”, dan a e taki fu den sma di e libi na grontapu (Genesis 11:1). Sobun, a regtfardiki "nyun grontapu” na wan libimakandra fu sma di Gado feni bun.

¹⁶ Yesus ben pramisi taki den sma di Gado feni bun sa kisi "têgo libi” leki presenti, na ini a nyun grontapu di de na pasi e kon (Markus 10:30). Grantangi, opo yu Bijbel na Yohanes 3:16 nanga Yohanes 17:3, èn leisi san Yesus ben taki dati wi musu du fu kisi têgo libi. Luku now san Bijbel e taki fu den blesi di sma sa kisi te den doro den markitiki fu kisi a tumusi moi presenti dati di Gado o gi sma na ini a Paradijs grontapu di e kon.

¹⁷Ogridu, feti, nanga ogri di sma e du nanga tranga, no sa de moro. "Na ogri sma no sa de moro…Ma den safri-ati sma srefi sa abi grontapu leki a gudu fu den” (Psalm 37:10, 11). Vrede sa de bika ’Gado sa meki feti kon na wan kaba te na a moro farawe presi fu grontapu’ (Psalm 46:9; Yesaya 2:4). Dan "a regtfardikiwan sa sproiti, èn vrede sa de pasa marki, teleki a mun no de moro”, dati wani taki fu têgo!—Psalm 72:7.

¹⁸Sani sa waka bun nanga den anbegiman fu Yehovah. Solanga den Israelsma na ini Bijbel ten ben e gi yesi na Gado, sani ben o waka bun nanga den (Lefitikus 25:18, 19). Na so a sa de tu taki sani sa waka bun nanga wi na ini a Paradijs!—Yesaya 32:18; Mika 4:4.

¹⁹Angriten no sa de moro. "Aleisi sa de bogobogo na grontapu”, na so a psalm skrifiman ben singi. "Na tapu na ede fu den bergi sani sa de pasa marki” (Psalm 72:16). Yehovah Gado sa blesi den regtfardikiwan fu en, èn ’grontapu srefi sa gi en froktu trutru’.—Psalm 67:6.

²⁰A heri grontapu sa tron wan paradijs. Sma sa meki moi oso èn den sa seti moi dyari na presi di sondu libisma ben pori fositen (Yesaya 65:21-24; Openbaring 11:18). Bakaten, den difrenti pisi fu grontapu di seti kon bun baka sa kon bigi moro nanga moro, teleki a heri grontapu kon moi èn teleki a doti e gi nyanyan neleki fa a ben de na ini a dyari fu Eden. Ala ten Gado sa ’opo en anu èn meki ala libisani kisi den sani di den wani’.—Psalm 145:16.

²¹Vrede sa de na mindri libisma nanga meti. Werdri meti nanga osometi sa nyan nanga makandra. Srefi wan yongu pikin no sa abi fu frede den meti moro di kan du sma ogri na ini a ten disi.—Yesaya 11:6-9; 65:25.

²²Siki no sa de moro kwetikweti. Leki Tiriman fu a Kownukondre fu Gado di de na hemel, Yesus sa dresi moro furu sma leki di a ben de na grontapu (Mateyus 9:35; Markus 1:40-42; Yohanes 5:5-9). Dan "nowan sma di e libi drape sa taki: ’Mi siki’.”—Yesaya 33:24; 35:5, 6.

²³Lobiwan di dede sa kisi libi baka èn den sa abi a howpu fu no dede noiti moro. Ala den dedesma di Gado wani memre, sa kisi wan opobaka. Fu taki en leti, "Gado sa gi wan opobaka na den regtfardikiwan èn na den onregtfardikiwan”.—Tori fu den Apostel 24:15; Yohanes 5:28, 29.

²⁴ Fu tru, den wan di e teki a bosroiti fu kon leri sabi wi Gran Mekiman, Yehovah Gado, èn di e teki a bosroiti fu dini en, sa abi wan tumusi moi tamara! Yesus ben pramisi na ogriman di ben dede na en sei: "Yu o de nanga mi na ini Paradijs.” Na a momenti dati Yesus ben e taki fu a Paradijs di sa kon na grontapu (Lukas 23:43). A de tumusi prenspari taki wi kon leri sabi moro fu Yesus Krestes, fu di nanga yepi fu en ala den blesi disi sa kon tru.