ИЗРАИЛЬ Ханаанэ пыремлэсь трос дауръёслы азьлогес, Иегова та музъемез Авраам выжыысь потэмъёслы сӥзиз. Иисус Навинлэн кивалтэмез улсын израиль калык Сӥзем музъемез киултыны дась вал.

Инмар ужпум кутӥз хананейёсты быдтыны. Соос музъемез юрӟым азон-калгон ужъёсын но кышкыт вир кисьтонэн тырмытӥзы. Соин ик Ханаанысь каръёсты, кудъёссэ израиль калык киултӥз, быдэсак куашкатоно вал.

Ханаанэ пыремлэсь азьло, Иисус Навин кык чакласькись-утчаськисьёсты ыстӥз. Соос Иерихон карын Раав нимо кышномурт доры дугдӥзы. Со тодӥз ке но, чакласькись-утчаськисьёс израиль пиос луо шуыса, соосты ас дораз пыртӥз но ватӥз. Раав израиль калыклэн Инмарезлы оскиз, малы ке шуоно со кылӥз, кызьы Иегова аслэсьтыз калыксэ утьылӥз. Та кышномурт чакласькись-утчаськисьёслэсь кылзэс басьтӥз, со но солэн ӵыжы-выжыосыз улэп кылёзы шуыса.

Берлогес, куке израиль калык Ханаанэ пыриз но Иерихонлы пумит ӝутскиз, Иегова паймымон амалэн карлэсь борддоръёссэ куашкатӥз. Иисус Навинлэн ожгарчиосыз каре пыризы но сутӥзы сое, нош Раавез но солэсь ӵыжы-выжыоссэ улэп кельтӥзы. Куать ар куспын гинэ Иисус Навин Сӥзем музъемлэсь бадӟым люкетсэ киултӥз. Собере музъем Израильлэн выжыосыз куспын люкемын вал.

Мӧйымыса Иисус Навин вань израиль калыкез люказ. Со соослы тодазы вайытӥз, мар лэсьтӥз Иегова соослэн атайёссылы. Собере со калыклэсь мылкыдзэ ӝутӥз Иеговалы ужаны-тыршыны. Нош Иисус Навин но мукетъёсыз Инмарлы оскымон тӧроос кулэм бере, израиль пиос Иеговаез кельтӥзы но зэмос луисьтэм инмаръёслы ужаны-тыршыны кутскизы. 300 ар пала калык Иеговалэсь катъёссэ санэ понытэк улӥз. Со дыр ӵоже Инмар израиль калыклэн тушмонъёсызлы, кылсярысь, филистим калыклы, соосыз зӥбыса возьыны лэзиз. Нош куке израиль пиос Иеговалы юрттэт курыса вазиськылӥзы, со соослы судьяос пуктылӥз — ваньзы соос 12 кузя вал,— кудъёсыз калыкез утьылӥзы.

Судьяос улон дыръёс сярысь Библиын Судьяос книгаын верамын. Нырысетӥез соос пӧлысь вал Гофониил, нош берпуметӥез — Самсон, музъем вылысь тужгес но кужмоез адями. Судьяос книгаысь тунсыко веранын выльысь но выльысь саклык висъяське одӥг вошъяськисьтэм зэмлыклы: Иеговалэсь кылзӥськон бакель каронъёс вае, нош кылзӥськытэк улон — шугадӟонъёс.

Пыкиськемын: Иисус Навин; Судьяос; Левит 18:24, 25.