9-ТӤ ЛЮКЕТ
Израиль калык аслыз эксэй куре
Саул, Израильлэн нырысетӥ эксэез, кылзӥськисьтэм сямзэ возьматэ. Со интые эксэй луэ Давид, кудӥныз Инмар дауръёслы эксэйлык сярысь тупанкыл кутэ
САМСОН бере Израильын судья но пророк вал Самуил. Израиль пиос сое юн куризы соослы эксэй пуктыны, мукет калыкъёс кадь мед луозы шуыса. Та курон Иеговаез ултӥяз, озьы ке но со Самуилэз соослэсь куронзэс быдэстыны косӥз. Инмар Саул нимо зӥбыт-востэм адямиез эксэе бырйиз. Но дыр ортчыса, Саул вылтӥяськись но кылзӥськисьтэм луиз. Иегова Саулэз эксэй луонлэсь палэнтӥз но Самуилэз со интые Давид нимо егит пиез пуктыны косӥз. Но Давид эксэй луытозь, трос аръёс ортчизы.
Одӥг пол, егит дыръяз, Давид аслаз агай-вынъёсыныз адӟиськыны мынӥз, кудъёсыз Сауллэн ожгарчиосыз пӧлын вал. Вань Израиль ожгарчиос туж кышкамын вал Голиаф нимо филистим батырлэсь, кудӥз соосыз но соослэсь Инмарзэс серекъяз. Йырыз кур луыса, Давид соин нюръяськыны малпаз. Со из зӥръян арбери но кӧня ке из басьтыса, куинь метръем батырен нюръяськыны потӥз. Голиаф Давидэз серекъяны кутскиз. Егит пи пумитаз вераз, со нюръяськыны умойгес дасяськемын шуыса, малы ке шуоно со Иегова Инмарлэн нимыныз нюръяське! Одӥг гинэ изэз зӥртыса, Давид Голиафез погыртӥз, нош собере солэн меченыз ик йырзэ ӵогиз. Филистим ожгарчиос кышкаменызы бызьыса кошкыны кутскизы.
Нырысь Сауллы туж кельшиз Давидлэн кышкасьтэм луэмез, но со сое аслаз ожгарчиосыныз кивалтыны пуктӥз, нош берлогес туж вожъяськыны кутскиз солы. Давид утиськон понна пегӟоно но кӧня ке ар пегаса улоно луиз. Саул Давидэз трос пол виыны тыршиз ке но, Давид эксэйлы оскымон кылиз, малы ке шуоно Саулэз Иегова пуктӥз шуыса валаз. Дыр ортчыса, Саул ожмаськонын быриз. Инмарлэн кыл сётэмезъя, ӝоген Давид эксэй луиз.
«Мон солэн эксэйлыкезлэсь престолзэ пумтэм вапумъёслы юнмато» (2 Эксэйлыкъёслэн 7:13)
Давид эксэйлэн юн мылкыдыз вал Иеговалы храм пуктыны. Но Инмар вераз, Давид храм уз пукты, нош солэн выжыез пуктоз шуыса. Со выжы луиз Давидлэн пиез, Соломон. Озьы ке но, Инмар Давидлы мед-кузьым сётӥз, соин паймымон тупанкыл кутыса: со бордысен аспӧртэмлыко эксэй выжы кутскоз, кытысь потоз Едемын сӥзем Мозмытӥсь, яке Кидыс-Выжы. Со луоз Инмарен ыстэм Мессия, кудӥз «Вӧйын зырӟем» шуэм луэ. Иегова азьло ик вераз, Мессия дауръёслы пуктэм кивалтэтлы, яке Эксэйлыклы, йыр луоз шуыса.
Давид Иеговалы туж тау кариз. Храм пуктон понна, со туж трос лэсьтӥськон материалъёс но дуно металлъёс дасяз. Озьы ик Давид трос псаломъёсты гожтӥз. Улонэзлэн пумаз со вераз: «Кузё-Инмарлэн Духез мон пушкын вера, Солэн кылыз мынам кыл йылам улэ» (2 Эксэйлыкъёслэн 23:2).
Пыкиськемын: 1 но 2 Эксэйлыкъёслэн; 1 Паралипоменон; Исаия 9:7; Матфей 21:9; Лука 1:32; Иоанн 7:42.
