PISI 3
Fa fu lusu problema
„Un musu lobi makandra nanga un heri ati, bika lobi e tapu bun furu sondu.”—1 Petrus 4:8
Baka te unu trow, dan difrenti problema o opo kon. A sani disi kan pasa fu di unu ala tu e firi tra fasi èn unu kweki tra fasi. Son leisi tra sma kan meki taki unu kisi problema èn son leisi sani o pasa di unu no ben fruwakti.
A kan makriki fu du neleki noti no pasa, ma Bijbel e gi wi rai fu no lon gi problema (Mateyus 5:23, 24). A moro bun fasi fu lusu den problema fu unu na te unu e fiti Bijbel rai.
1 TAKI FU A PROBLEMA
SAN BIJBEL E TAKI: ’Wan ten de fu taki’ (Preikiman 3:1, 7). Sorgu taki unu e teki ten fu taki fu a problema. Taki krin nanga yu patna èn meki a sabi fa yu e firi èn e denki fu a tori. Noiti no lei gi yu patna (Efeisesma 4:25). Srefi te unu e mandi, un no musu meki trobi. Te yu e piki na wan switi fasi, dan wan pikin problema no o tron wan bigi trobi.—Odo 15:4; 26:20.
Awinsi unu no e agri fu wan tori, toku un musu tan taki na wan switi fasi. Noiti yu musu frigiti fu sori lobi nanga lespeki gi yu patna (Kolosesma 4:6). No draidrai fu lusu a problema èn tan taki nanga makandra.—Efeisesma 4:26.
SAN YU KAN DU:
-
Luku san na a yoisti ten fu taki fu a problema
-
Te yu patna e taki, dan no koti en mofo, ma arki. Baka dati yu o kisi na okasi fu taki
2 ARKI ÈN FRUSTAN
SAN BIJBEL E TAKI: ’Lobi makandra trutru èn de a fosiwan fu sori trawan lespeki’ (Romesma 12:10). A de tumusi prenspari fu arki bun. Pruberi fu frustan fa yu patna e denki. Abi „sakafasi” èn du muiti fu sabi fa a e „firi” (1 Petrus 3:8; Yakobus 1:19). No du neleki yu e arki. Efu a kan, dan tapu nanga a sani di yu ben e du èn arki bun san yu patna e taki. Noso aksi en efu unu kan taki fu a problema moro lati. Efu yu e si yu trowpatna leki yu mati na presi fu si en leki yu feanti, dan yu no o „mandi esi”.—Preikiman 7:9.
SAN YU KAN DU:
-
Arki èn pruberi fu frustan yu patna, srefi te den sani di yu e yere no switi gi yu
-
Pruberi fu frustan san yu patna wani taigi yu. Luku yu patna te a e taki èn arki fa a e taki
3 DU SAN UNU BOSROITI
SAN BIJBEL E TAKI: „Ala tranga wroko e tyari wini kon, ma soso takitaki e meki sma tron pôtiman” (Odo 14:23). Te unu e agri fu wan tori, dan unu no kaba ete. Un musu du san unu ala tu bosroiti. Disi wani taki dati unu o abi fu du tranga muiti. Ma a o tyari wini kon (Odo 10:4). Efu unu e du sani leki wán man, dan unu o kisi wini fu a muiti di unu meki.—Preikiman 4:9.
SAN YU KAN DU:
-
Bosroiti san unu ala tu o du fu lusu un problema
-
Ten na ten un musu luku efu sani e go moro bun na ini un trowlibi
