Нылпилэн вордӥськемез трос кузпалъёслы шумпотон вае но, со дыре ик, сюлмаськытэ но. Соос паймыны быгатозы, табере трос дырзы но кужымзы пичи пиналзы сярысь сюлмаськонлы кошке шуыса. Ӧжыт изён, выль пӧртэм шӧдонъёс но сюлмаськонъёс кузпалъёслэсь кусыпъёссэс сӧрыны быгато. Пиналды сярысь сюлмаськон но ог-огеныды матысь кусыпъёстэс утён понна, тӥледлы кузпалэныды выль улонлы дышоно луоз. Кызьы Библиысь визь-кенешъёс юрттозы тӥледлы кылдӥсь шуг-секытъёсты вормыны?

МАР ВЕРА БИБЛИЯ. «Яратон кема чида, гажа-жаля». Со сяна, яратон «аслыз пайда уг утча; уг керӟегъяськы» (1 Коринфъёслы 13:4, 5). Ӵем дыръя егит анайлэн вань малпанъёсыз пичи пиналыз сярысь гинэ луо. Соин ик картэз малпаны быгатоз, со сярысь вунэтӥзы шуыса. Нош кышноезлы тодаз возьыны кулэ, картэзлы но саклыксэ висъяно шуыса. Кышнолэн чидамез но лякыт сямыз юрттозы картлы шӧдыны, сое гажало но нылпи будэтонын юрттэмзэ дунъяло шуыса.

«Тӥ но, воргоронъёс, кышноосыныды асьтэдыз визьмо возе» (1 Пётр 3:7). Картлы лыдэ басьтыны кулэ, кышноезлэн трос кужымез нылпиез сярысь сюлмаськонлы кошкоз шуыса. Выль сюлмаськонъёс быгатозы солэсь мылкыдзэ кемалы куашкатыны, соос сэрен со жадьыны но, висьыны усьыны но быгатоз. Куддыръя со картэз шоры лекъяськыны быгатэ, нош картэзлы чидано, малы ке шуоно «кема чидась мурт кышкасьтэм муртлэсь умойгес» (Мадёнъёс 16:32). Шӧдӥсь-валась луэ но кышнодылы юрттэ (Мадёнъёс 14:29).

ПАЙДАЁ ВИЗЬ-КЕНЕШЪЁС

• Атайёслы. Юрттэ кышнодылы уйин но пичи пиналды сярысь сюлмаськыны. Тырше тросгес дырдэс кышноеныды но пиналэныды ортчытъяны, со понна куд-ог мукет ужъёстэс палэнтыса

• Анайёслы. Куке картты нылпи сярысь сюлмаськонын юрттэтсэ ӵектэ, соглаш кариське. Со мае ке умойтэм лэсьтэ ке, эн тышкаське сое, нош лякытэн возьматэ, кызьы шонер лэсьтоно

МАР ВЕРА БИБЛИЯ. Кыкназы «одӥг лулмугор луозы» (Улон-вылон 2:24). Тодады возе, семьяяды нылпи вордӥськиз ке но, тӥ, азьло сямен ик, кузпалэныды «одӥг лулмугор». Кусыпъёстэс юнматон понна, лэсьтэ ваньзэ, мае быгатӥськоды.

Кышноос, картъёстылы юрттэмзы понна тау каре. Тӥляд тау карон кылъёсты эмъяны быгатозы (Мадёнъёс 12:18). Картъёс, оскытэ кышноостэс, тӥ соосты яратӥськоды но дунъяськоды шуыса. Ушъялэ соосты, семьяды сярысь сюлмаськемзы понна (Мадёнъёс 31:10, 28).

«Нокин но аслыз пайда медаз утча, мукетызлы мед утчалоз» (1 Коринфъёслы 10:24). Котьку но кузпалдылэн кулэяськонъёсыз сярысь малпаське. Висъялэ дырдэс ваче вераськон понна, ушъялэ но кылзэ ог-огдэс. Кузпалэн ӵош кӧлан сярысь верано ке, ачид сярысь гинэ малпаськоно ӧвӧл, озьы ик кузпалыд сярысь но малпаськоно. Библиын верамын: «Огдылэсь огды эн палэнскылэ... ог-огеныды огкылысь луыса... гинэ» (1 Коринфъёслы 7:3—5). Соин ик ог-огеныды со сярысь возьдаськытэк вераське. Тӥ чидасесь но валасесь луиськоды ке, тӥляд кусыпъёсты юнмалозы.

ПАЙДАЁ ВИЗЬ-КЕНЕШЪЁС

• Тодады возе, ӵошен гинэ луон понна, дыр висъяны кулэ шуыса

• Эн вунэтэ мылкыдэз ӝутӥсь чыры-пырыос сярысь. Открытка, СМС яке пичи кузьым кузпалдылы возьматоз, тӥ сое яратӥськоды шуыса

МАР ВЕРА БИБЛИЯ. «Тон пичи дырысеныд ик Священной Гожтэмез тодӥськод, со тыныд... утиськон басьтонлы визь-нод сётыны быгатэ» (2 Тимофейлы 3:15). Малпаське, кызьы тӥ нылпидэс будэтоды но дышетоды. Туж паймымон луэ, вордӥськемезлэсь азьло ик со дышетскыны быгатэ ини шуыса. Кӧт пушкын дыръяз ик нылпи дышетске тӥлесьтыд куарадэс тодманы но мылкыддэс шӧдыны. Вордӥськем бераз ик соин ӵош лыдӟиське. Нылпи тӥлесьтыд верам кылъёстэс уг вала ке но, со юрттоз солы будэм бераз лыдӟиськонэз яратыны.

Вож нуны дырысеныз ик нылпилы Инмар сярысь вераны луоз. Со мед кылоз, кызьы тӥ Иеговалы вӧсяськиськоды (Кыкетӥ Закон 11:19). Нылпиеныды шудыкуды но вераське со сярысь, мае Инмар кылдытӥз (Псалтирь 77:3, 4). Будэмъяз нылпи Иеговаез яратэмдэс адӟоз но ачиз сое яратыны дышетскоз.

ПАЙДАЁ ВИЗЬ-КЕНЕШЪЁС

• Визьлык сярысь вӧсяське — со юрттоз нылпидэс будэтыны

• Выльысь но выльысь вераса, нылпидэс дышетэ кылъёслы но валтӥсь зэмлыкъёслы. Озьы со пичи дырысеныз ик дышетскоз