Пукты син азяд таӵе югдурез: быдэ вуымтэ Карен шулдыръяськонэ лыктӥз. Дас минут но ӧз ортчы, со вӧзысьтыз тодмо куараез кылӥз:

Карен берытскиз но аслэсьтыз Джессика эшсэ адӟиз. Солэн кияз кык бутылка сур. Джессика, одӥг бутылказэ Каренлы ӵектыса, вера: «Тон пичи ӧвӧл ни, озьы ук?»

Каренлэн басьтэмез уг поты, нош Джессика солэн эшез ук. Озьы ик, Каренлэн уг поты, эшез сое шулдыръяськыны быгатӥсьтэм адямиен мед лыдъялоз шуыса. Со сяна, Джессикаез тодо, со умой нылаш шуыса. Со но юэ бере, татын номыр уродэз ӧвӧл, дыр. «Со наркотикъёс ӧвӧл ук»,— буйгатэ ассэ Карен.

Мар тон карысалыд Карен интыын?

Таӵе югдурын визьмо ужпум кутон понна, аслад йырыд луыны кулэ. Аслад йырыныд улыса, тон ачид быгатод бырйыны, мар карыны, но мукетъёссэ ачид интые бырйыны уд лэзьы (1 Коринфъёслы 9:26, 27).

Кызьы аслыд ачид оскондэ юнматоно? Нырысь гожтэм юанъёслы валэктонъёс сёт.

Валаськод ке, тынад кыӵе ке нимысьтыз быгатонлыкъёсыд но умой сямъёсыд вань шуыса, со юрттоз тыныд аслыд оскыны.

БИБЛИЫСЬ ПРИМЕР. Апостол Павел гожтӥз: «Вераськон ласянь мон олокыӵе ик усто ӧвӧл ке но, со понна тодон-валанэ вань» (2 Коринфъёслы 11:6). Павел Библиез умой тодэ вал, соин ик со ответ сётыны быгатэ вал котькинлы, кин сое серекъя. Сое ултӥяло вал ке но, солэн аслыз осконэз ӧз лябӟы (2 Коринфъёслы 10:10; 11:5).

ЭСКЕРЫ АСТЭ.

Улӥяз гожты, кыӵе нимысьтыз быгатонлыкъёсыд тынад вань.

Табере гожты кудӥз ке умой сямыд сярысь. Малпаськы, кыӵе тон адями: сюлмаськись? шырыт сямо? оскымон? тыршись?

Таӵе веран вань: «Кытӥ векчи, отӥ ик чигиське». Ляб интыостэ ӧд юнматъя ке, ӟеч сямъёсыд ӝоген бырыны быгатозы.

БИБЛИЫСЬ ПРИМЕР. Павел вала вал, солэн ляб интыосыз вань шуыса. Со гожтӥз: «Лулыным-сюлмыным мон Инмар законлы шумпотӥсько; нош мугор люкетъёсысьтым мукет законэз адӟисько, со визьмылэн законэзлы пумитъяське но монэ мугор люкетъёсам интыяськем сьӧлык законлэн киулаз кутыса возе» (Римъёслы 7:22, 23).

ЭСКЕРЫ АСТЭ. Кыӵе ляб интыостэ тыныд юнматоно?

Таксие пуксьыса, курысалыд-а тон, бензин бырытозь тонэ одӥг урамтӥ котыръяськыса мед нуллозы шуыса? Ӧд! Со тумошо луысал, но со понна тон трос коньдон тыроно луысалыд.

Малы со дышетэ? Улонын ужпумъёс пуктӥськод ке, со юрттэ, одӥг интыын сылытэк, азьлань мыныны. Уго тон умой тодӥськод, кыӵе тынад ужпумъёсыд но кызьы тон соосты быдэстыны малпаськод.

БИБЛИЫСЬ ПРИМЕР. Павел гожтӥз: «Бызисько ке, пумозяз вуон понна бызисько» (1 Коринфъёслы 9:26). Павел ас улонэзлы ачиз кузё вал. Со ӧз сёты югдуръёслы асэныз кивалтыны, нош ужпумъёс пуктылӥз но тыршиз соосты быдэсъяны (Филиппыослы 3:12—14).

ЭСКЕРЫ АСТЭ. Улӥяз гожты куинь ужпумъёстэ, кудъёссэ тынад ар куспын быдэстэмед потэ.

Аслад учконъёсыд ӧз луэ ке, тон дӥсьтӥсьтэм луод но, вошъяськись тӧл сямен, мукетъёсызъя тупатскыса улод. Со возьматэ, тон ачид малпаськыны но ужпумъёс кутыны уд быгатӥськы шуыса.

Аслад йырыныд улыса, тон уд учкиськы, мар каро мукетъёсыз, нош ас учконъёсыдъя лэсьтӥськод.

БИБЛИЫСЬ ПРИМЕР. Куке Даниилэз семьяезлэсь люкизы, со быдэ вуэмын ӧй вал на. Озьы ке но, со ужпум кутӥз Инмарлэсь курон-косонъёссэ быдэсъяса улыны (Даниил 1:8). Озьы со возьматӥз, аслаз йырыныз улэ шуыса. Даниил зэмзэ ик аслаз учконъёсызъя улӥз.

ЭСКЕРЫ АСТЭ. Кыӵе тынад учконъёсыд? Кылсярысь: оскиськод-а тон Инмарлы? Оскиськод ке, малы? Мар тонэ оскытэ, со вань шуыса?

Оскиськод-а тон, Инмарлэн курон-косонъёсыз тыныд пайда ваё шуыса? Оскиськод ке, малы?

Озьыен, кин тон? Усем куар, кудзэ тӧлъя нуэ, яке писпу, кудӥз кужмо сильтӧллы но уг сётскы? Юн мылкыдо лу, соку тон юн выжыё писпу кадь луод но валэктон сётыны быгатод таӵе юанлы: «Кыӵе мон адями?»