1. Ngɛ mɛni blɔ nɔ nɛ ní sɛɛmi kpakpa yeɔ bua nɛ gba si himi peeɔ kpakpa?

NYƐMINYUMU ko nɛ e ngɛ Canada a de ke, “Ma suɔ nɛ ma ná deka kɛ ha ye yo mohu pe ni kpahi.” E de hu ke: “Ke ye yo ngɛ ye kasa mi ɔ, i kɛ lɛ tsuo wa náa bua jɔmi wawɛɛ nitsɛ, nɛ ke i kɛ haomi ko kpe nɛ i kɛ lɛ susu he ɔ, ye haomi ɔ baa si.” Huno ko nɛ e ngɛ Australia a ngma ke: “Wa sɛ gba si himi maa pee jeha 11 ji nɛ ɔ, se ligbi kake po bi nɛ i kɛ ye yo wa sɛɛ we ní. Wa nuɔ he kaa suɔmi ngɛ wa gba si himi ɔ mi. Ní nɛ wa sɛɛɔ daa a lɛ ha nɛ wa nuɔ he jã a nɛ.” Nyɛmiyo ko nɛ e ngɛ Costa Rica a de ke: “Ní sɛɛmi kpakpa nɛ ngɛ wa kpɛti ɔ ha nɛ suɔmi ngɛ wa gba si himi ɔ mi; wa hɛ wɔ kɛ su Yehowa he, wa nyɛɔ daa kahi a nya, kake peemi ngɛ wa kpɛti, nɛ suɔmi nɛ ngɛ wa kpɛti ɔ hu mi wa.”

2. Mɛni heje nɛ e yee kɛ haa gba si himi he piɛɛli kaa a maa sɛɛ ní ɔ?

² Anɛ o kɛ o yo loo o huno sɛɛɔ ní kɛ bua jɔmi, aloo e yee ha nyɛ kaa nyɛ maa sɛɛ ní? Ngɛ anɔkuale mi ɔ, nyagbahi ma nyɛ maa ba, ejakaa nyɛ ni enyɔ ɔmɛ tsuo nyɛ yi mluku, nɛ nyɛ ngɛ su slɔɔtohi. (Rom. 3:23) Jehanɛ hu ɔ, eko ɔ, e slo bɔnɛ nyɛ ti nɔ tsuaa nɔ sɛɛɔ ní ha. Enɛ ɔ he ɔ, gba si himi he nikaseli nɛ ji, John M. Gottman kɛ Nan Silver tsɔɔ kaa ke gba si himi he piɛɛli ngɛ hlae nɛ a gba si himi ɔ se nɛ kɛ ɔ, e sa nɛ a bɔ mɔde wawɛɛ nɛ a sɛɛ ní saminya.

3. Mɛni yeɔ bua gba si himi he piɛɛli nɛ suɔmi hii a gba si himi ɔ mi?

³ E biɔ mɔde bɔmi saminya loko gba si himi ma nyɛ maa ye manye. Se nɔ́ nɛ jeɔ mi kɛ baa ji bua jɔmi. Gba si himi he piɛɛli nɛ a suɔ a he ɔ ma nyɛ ma ná bua jɔmi nitsɛnitsɛ. (Fiɛlɔ 9:9) Mo susu Isak kɛ Rebeka a gba si himi nɛ suɔmi ngɛ mi ɔ he nɛ o hyɛ. (1 Mose 24:67) Be babauu nɛ a kɛ hi si kaa nɔ kɛ e yo ɔ ha nɛ suɔmi nɛ a  ngɛ kɛ ha a he ɔ mi wa wawɛɛ. Jã nɔuu nɛ e ji mwɔnɛ ɔ ngɛ gba si himi he piɛɛli fuu a blɔ fa mi. Mɛni yeɔ bua mɛ? A yeɔ anɔkuale nɛ a jeɔ a susumi kpo kɛ tsɔɔ a sibi ngɛ mi mi jɔmi mi. A jeɔ suhi kaa nɔ́ se yomi, suɔmi, bumi, kɛ he si bami kpo. Amlɔ nɛ ɔ, wa maa hyɛ bɔnɛ su nɛ ɔmɛ ma nyɛ maa ye bua gba si himi he piɛɛli ha, konɛ a nyɛ nɛ a sɛɛ ní saminya.

4, 5. Mɛni blɔ nɔ lɛ nɔ́ se yomi ma nyɛ maa ye bua gba si himi he piɛɛli konɛ a nu a sibi sisi? Mo ha enɛ ɔ he nɔ hyɛmi níhi.

⁴ Abɛ 16:20 de ke: “Bu nɔ́ nɛ a ngɛ mo tsɔɔe ɔ tue, nɛ e maa hi ha mo.” Munyu nɛ ɔ ji anɔkuale, e yeɔ bua gba si himi kɛ weku si himi. (Kane Abɛ 24:3.) Mawu Munyu ɔ haa wa yoɔ níhi a se, nɛ wa náa nile. 1 Mose 2:18 deɔ wɔ kaa Mawu bɔ yo ɔ kaa nyumu ɔ he piɛɛlɔ, se pi kaa bɔnɛ nyumu ɔ ngɛ ɔ pɛpɛɛpɛ. Enɛ ɔ heje ɔ, e slo bɔnɛ nyumuhi sɛɛɔ ní ha, nɛ e slo bɔnɛ yihi hu sɛɛɔ ní ha. Yihi fuu suɔ nɛ a sɛɛ a he numi, nihi, kɛ huɛ bɔmi he ní. A suɔ nɛ a kɛ mɛ nɛ sɛɛ ní nɛ a ná bua jɔmi, ejakaa e haa nɛ a nuɔ he kaa a suɔ mɛ. Nyumuhi fuu sume nɛ a sɛɛɔ a he numi he ní. A suɔ nɛ a sɛɛ níhi nɛ ngɛ nɔ yae a he ní. A suɔ hu kaa a maa sɛɛ haomihi kɛ bɔnɛ a ma tsu he ní ha a he ní, nɛ nyumuhi suɔ hu nɛ a bu mɛ.

⁵ Nyɛmiyo ko nɛ ngɛ Britain ɔ de ke, “Ye huno suɔ nɛ e tsu nyagbahi a he ní o ya pe nɛ e maa bu mi tue.” E tsɔɔ nya kaa e haoɔ lɛ wawɛɛ ejakaa e suɔ nɛ e huno ɔ nɛ e bu lɛ tue konɛ e bɔ mɔde kaa e maa nu lɛ sisi. Huno ko ngma ke: “Benɛ i sɛ gba si himi mi nɔuu ɔ, i suɔ nɛ ma tsu nyagba saisaa nɛ ye yo ɔ ngɛ ɔ he ní oya. Se pee se ɔ, i ba na kaa nɔ́ tutuutu nɛ e ngɛ hlae ji kaa ma bu lɛ tue.” (Abɛ 18:13; Yak. 1:19) Huno nɛ e yoɔ níhi a se ɔ, le e yo he numihi, nɛ e haa yo ɔ nuɔ he kaa e suɔ lɛ. E haa nɛ yo ɔ leɔ kaa lɛ yo ɔ e susumi kɛ e he numihi he hia lɛ nyumu ɔ. (1 Pet. 3:7) Jã nɔuu nɛ yo nɛ e yoɔ níhi a se ɔ, nuɔ e huno ɔ susumihi a sisi. Ke nɔ kɛ e yo peeɔ níhi nɛ Mawu hyɛɔ blɔ kaa a pee ɔ, a ma ná bua jɔmi ngɛ a gba si himi ɔ mi, nɛ a ma nyɛ maa pee kake kɛ mwɔ a yi mi kpɔ ngɛ blɔ nɛ da nɔ.

6, 7. (a) Sisi tomi mlaa nɛ ngɛ Fiɛlɔ 3:7 ɔ maa ye bua gba si himi he piɛɛli konɛ a kɛ nɔ́ se yomi nɛ tsu ní ngɛ mɛni blɔ nɔ? (b) Mɛni blɔ nɔ yogbayo ma nyɛ maa ngɔ nɔ́ se yomi kɛ tsu ní ngɛ, nɛ mɛni e sa kaa huno ɔ nɛ e bɔ mɔde nɛ e pee?

⁶ Gba si himi he piɛɛli nɛ a kɛ nɔ́ se yomi tsuɔ ní ɔ hu le kaa “dii peemi be ngɛ, nɛ munyu tumi be ngɛ.” (Fiɛlɔ 3:1, 7) Nyɛmiyo ko nɛ e sɛ gba si himi mi maa pee jeha nyɔngma ji nɛ ɔ de ke: “Kpaako i na kaa ní komɛ ngɛ nɛ pi be tsuaa be nɛ e sa kaa ma tu he munyu. Ke i na kaa nítsumi aloo blɔ nya nítsumi kpahi ha nɛ pɔ tɔ ye huno ɔ he ɔ, i mlɛɔ nɛ i kɛ lɛ sɛɛɔ ní ngɛ be nɛ sa mi. Lɔɔ haa nɛ wa sɛɛɔ ní kɛ bua jɔmi.” Yigbayi nɛ a kɛ nɔ́ se yomi tsuɔ ní ɔ a nya mi munyu ngɔɔ, ejakaa a le kaa ke a tu munyu ngɔngɔɛ ngɛ “be nɛ sa mi” ɔ, a huno ɔmɛ maa bu mɛ tue.—Kane Abɛ 25:11.

⁷ E hi kaa huno nɛ e ji Kristofono ɔ nɛ e bu e yo tue, se e sa nɛ e ha nɛ yo ɔ nɛ le bɔnɛ lɛ huno ɔ hu e nuɔ níhi a he ha. Asafo mi nɔkɔtɔma ko nɛ e sɛ gba si himi mi maa pee jeha 27 ji nɛ ɔ de ke: “I bɔɔ mɔde nɛ i haa nɛ ye yo ɔ leɔ nɔ́ nɛ ngɛ ye tsui mi.” Nyɛminyumu ko nɛ e sɛ gba si himi mi maa pee jeha 24 ji nɛ ɔ de ke: “Ke nɔ́ ko ngɛ mi haoe ɔ, i tui he munyu, ‘I susu kaa ke i tui he munyu ɔ, e se maa po.’ Se i ba na kaa ke nɔ́ ko ngɛ mi haoe nɛ i tu he munyu ɔ, lɔɔ tsɔɔ we kaa i gbɔjɔ. Ke e he wa kɛ ha mi kaa ma tu bɔnɛ i nuɔ he ha a he munyu ɔ, i sɔleɔ konɛ ma le nɔ́ nɛ e sa kaa ma de, kɛ bɔnɛ e sa kaa ma tsu he ní ha. Jehanɛ hu ɔ, i woɔ mumu wawɛɛ, kɛkɛ lɔɔ se ɔ, i bɔni munyu tumi.” E he hia nɛ a tu nyagbahi a he munyu ngɛ  be nɛ sa mi, eko ɔ, ke nyɛ ni enyɔ ɔmɛ pɛ nyɛ ngɛ daa ligbi ngmami ɔ he susue aloo nyɛ bla kɛ ngɛ Baiblo ɔ kanee.

8. Mɛni maa ye bua gba si himi he piɛɛli konɛ a ha nɛ a ní sɛɛmi nɛ ngɔ?

⁸ E yee kaa nɔ kɛ e yo ma tsake blɔ nɛ a guu nɔ kɛ sɛɛɔ ní ɔ. E sa nɛ huno ɔ kɛ e yo ɔ nɛ a sɔle kɛ bi Mawu mumi klɔuklɔu ɔ, nɛ a bɔ mɔde nɛ a ha a ní sɛɛmi nɛ ngɔ. Ke gba si himi he piɛɛli suɔ Yehowa, nɛ a suɔ nɛ a sa e hɛ mi, nɛ a buɔ a gba si himi ɔ kaa e ngɛ klɔuklɔu ɔ, a ma ha nɛ a ní sɛɛmi maa ngɔ. Yogbayo ko nɛ e sɛ gba si himi mi maa pee jeha 26 ji nɛ ɔ ngma ke: “I kɛ ye huno ɔ wa buu gba si himi kaa bɔnɛ Yehowa buu gba si himi ɔ, lɔɔ he ɔ, wa susuu we gba jemi he po. Enɛ ɔ ha nɛ ke nyagba ko ba a, wa peeɔ kake kɛ susuɔ he nɛ wa tsuɔ he ní.” Gba si himi he piɛɛli nɛ a yeɔ Mawu anɔkuale ngɛ blɔ nɛ ɔ nɔ ɔ haa nɛ Mawu náa bua jɔmi, nɛ a náa jɔɔmi kɛ jeɔ e ngɔ.—La 127:1.

9, 10. Mɛni gba si himi he piɛɛli ma nyɛ maa pee konɛ a ha nɛ suɔmi nɛ a ngɛ ha a he ɔ mi nɛ wa?

⁹ Suɔmi nɛ ngɛ “kaa kpa nɛ fiɔ níhi tsuo ngɔ peeɔ kake” ɔ ji su nɛ e he hia pe kulaa ngɛ gba si himi mi. (Kol. 3:14) Be mi nɛ huno ɔ kɛ e yo ɔ nɛ a yeɔ a sibi anɔkuale ɔ peeɔ kake kɛ hiɔ si ngɛ bua jɔmi kɛ haomi behi a mi ɔ, e haa nɛ suɔmi nitsɛnitsɛ nɛ ngɛ a kpɛti ɔ mi waa. A ba peeɔ huɛmɛ nɛ mɛtɛ a sibi a he, nɛ a náa bua jɔmi ke a ngɛ he kake. Tsa pi ní nguahi nɛ haa gba si himi kaa kikɛ ɔ ngɔɔ kaa bɔnɛ a jeɔ ngɛ sɛnihi a mi ɔ. Mohu ɔ, ní tsɔwitsɔwi komɛ kaa—nɔ fuami, nɔ yi jemi, ní peepee nɛ tsɔɔ nɔ he susumi, mwɔ hɛlii, aloo nɛ a maa je tsui mi kɛ bi ke, “kɛ níhi ya nɔ ha kɛɛ mwɔnɛ ɔ?” Ní tsɔwitsɔwi nɛ ɔmɛ ma nyɛ ma ha nɛ bua jɔmi babauu maa hi gba si himi ɔ mi. Nyumu ko nɛ e kɛ e yo sɛ gba si himi mi maa pee jeha 19 ji nɛ ɔ tsɔɔ kaa a fiaa a he, aloo a ngmaa sɛ gbi kɛ maneɔ a sibi ngɛ mobile phone nɔ konɛ a kɛ le bɔnɛ níhi ngɛ nɔ yae ha kɛkɛ.

¹⁰ Ke gba si himi he piɛɛli suɔ a he ɔ, a bɔɔ mɔde kaa a maa le a he saminya. (Filip. 2:4) E ngɛ mi kaa gba si himi he piɛɛli yi mluku mohu lɛɛ, se ke a le a he saminya a, e haa nɛ suɔmi nɛ a ngɛ ha a he ɔ mi waa. Ke nihi sɛ gba si himi mi nɛ be ngɛ mi pue ɔ, suɔmi nɛ ngɛ a kpɛti ɔ mi waa. Lɔɔ ke o sɛ gba si himi mi ɔ, mo bi o he ke: ‘Anɛ i le ye yo ɔ loo ye huno ɔ saminya lo? Anɛ i le bɔnɛ e nuɔ he ha ngɛ níhi a he, kɛ bɔnɛ e susuɔ níhi a he ha lo?  Anɛ i pɔɔ suhi nɛ ye huno ɔ loo ye yo ɔ ngɛ, nɛ lɔɔ ha nɛ i suɔ lɛ ɔ he susumi lo?’

11. Mɛni heje nɛ bumi he hia wawɛɛ ngɛ gba si himi mi ɔ? Mo ha enɛ ɔ he nɔ hyɛmi nɔ́.

¹¹ Ngɛ gba si himi nɛ bua jɔmi ngɛ mi po mi ɔ, gba si himi he piɛɛli ɔmɛ kɛ haomihi kpeɔ, nɛ pi be tsuaa be nɛ huno ɔ kɛ e yo ɔ nɛ a suɔ he ɔ kɛ a he kpaa gbi. Tsa pi be tsuaa be nɛ Abraham kɛ Sara kɛ a he kpaa gbi. (1 Mose 21:9-11) Se enɛ ɔ ha we nɛ a gba si himi ɔ nɛ puɛ. Mɛni heje? Ejakaa a ngɛ bumi kɛ ha a sibi. Kaa nɔ hyɛmi nɔ́ ɔ, Abraham de Sara ke, “I kpa mo pɛɛ.” (1 Mose 12:11, 13, NW) Sara hu bu Abraham tue nɛ e tsɛ lɛ ke e “nyɔmtsɛ.” (1 Mose 18:12, NW) Ke gba si himi he piɛɛli bui a sibi ɔ, behi fuu ɔ, e jeɔ kpo ngɛ bɔnɛ a tuɔ munyu ha aloo gbi nɛ a kɛ tuɔ munyu ɔ mi. (Abɛ 12:18) Ke a tsu we nyagba nɛ ɔ he ní ɔ, a gba si himi ɔ ma nyɛ ma puɛ.—Kane Yakobo 3:7-10, 17, 18.

12. Mɛni heje nɛ e sa kaa nihi nɛ a sɛ gba si himi mi ehe ɔ nɛ a bɔ mɔde wawɛɛ nɛ a kɛ a he nɛ tu munyu ngɛ bumi mi ɔ?

¹² E sa nɛ nihi nɛ a sɛ gba si himi mi ehe ɔ nɛ a bɔ mɔde wawɛɛ nɛ a je mi mi himi kɛ bumi mi kɛ tu munyu kɛ tsɔɔ a sibi. Enɛ ɔ ma ha nɛ e be yee ha mɛ kaa a maa sɛɛ ní. Huno ko de ke: “E ngɛ mi kaa nihi nɛ a sɛ gba si himi mi ehe ɔ náa bua jɔmi mohu, se a kɛ haomi ma nyɛ maa kpe hulɔ. Benɛ o ngɛ o yo ɔ he numihi, e suhi, kɛ e hiami níhi lee, nɛ lɛ hu e ngɛ o nɔ́ lee ɔ, enɛ ɔ kɛ nyagba ma nyɛ maa ba! Se ke nyɛ nuɔ a sibi sisi, nyɛ jeɔ bua jɔmi kpo, nyɛ jeɔ su kpakpahi kaa he si bami kɛ tsui si tomi kpo, nɛ nyɛɛ kɛ nyɛ hɛ fɔ Yehowa nɔ ɔ, nyɛ ma ná he se.” Enɛ ɔ ji ga womi kpakpa kɛ ha wɔ tsuo!

13. Mɛni heje nɛ he si bami he hia wawɛɛ ngɛ gba si himi mi loko bua jɔmi maa hi gba si himi ɔ mi ɔ?

¹³ Loko gba si himi he piɛɛli ma nyɛ maa sɛɛ ní ngɛ mi mi jɔmi kɛ tue mi jɔmi mi ɔ, ja mɛ ni enyɔ ɔmɛ tsuo a ‘baa a he si.’ (1 Pet. 3:8) Nyɛminyumu ko nɛ e sɛ gba si himi mi maa pee jeha 11 ji nɛ ɔ de ke, “He si bami haa nɛ a tsuɔ haomihi a he ní oya, ejakaa e haa nɛ o deɔ ke, ‘I kpa mo pɛɛ.’” Asafo mi nɔkɔtɔma ko nɛ e sɛ  gba si himi mi maa pee jeha 20 ji nɛ ɔ de ke: “Be komɛ ɔ, e he hia nɛ o de ke, ‘I kpa mo pɛɛ’ pe nɛ o ma de ke, ‘I suɔ mo.’” E de hu ke: “Sɔlemi haa nɛ gba si himi he piɛɛli baa a he si. Ke i kɛ ye yo ɔ wa bla kɛ sɔle kɛ ha Yehowa a, e haa nɛ wa kaiɔ kaa wa yi mluku nɛ Mawu dloomi heje nɛ wa ngɛ. Enɛ ɔ yeɔ bua mi nɛ i tsuɔ haomihi a he ní saminya.”

14. Kɛ he nɔ womi ma nyɛ maa sa gba si himi he ha kɛɛ?

¹⁴ Se he nɔ womi haa nɛ e yee ha gba si himi mi he piɛɛli kaa a maa sɛɛ ní konɛ a tsu nyagbahi a he ní. He nɔ womi ha we ní sɛɛmi hiɔ huno ɔ kɛ yo ɔ a kpɛti ejakaa e ha we nɛ nɔ náa kã kɛ deɔ ke, “I kpa mo pɛɛ, mo kɛ pa mi.” Nɔ nɛ woɔ e he nɔ ɔ, bɔɔ mɔde kaa e ma je e nya aloo e ma pia nɔ kpa mohu pe nɛ e maa kplɛɛ e tɔmi nɔ. Ke nɔ ko tɔ̃ e nɔ ɔ, e ngmɛɛ we he. E tuɔ munyu kɛ abofu aloo e kɛ nɔ ɔ tui munyu kulaa. (Fiɛlɔ 7:9) Niinɛ, he nɔ womi ma nyɛ ma puɛ gba si himi. E sa nɛ wa kai kaa “Nihi nɛ woɔ a he nɔ ɔ, Mawu baa mɛ si; se ni nɛmɛ nɛ baa a he si ɔ lɛɛ e dlooɔ mɛ.”—Yak. 4:6.

15. Mɛni blɔ nɔ ga womi nɛ ngɛ Efesobi 4:26, 27 ɔ ma nyɛ maa ye bua gba si himi he piɛɛli konɛ a tsu a haomihi a he ní?

¹⁵ Ke nɔ kɛ e yo kɛ a he kpa we gbi ngɛ nɔ́ ko he ɔ, e sa nɛ a tsu he ní mla mohu pe nɛ a ma wo a he nɔ. Bɔfo Paulo de Kristofoli ke: ‘Nyɛ tsui he nɛ jɔ loko pu nɛ nɔ si. Nyɛ ko ha Abosiami blɔ nɛ e ba sɛ nyɛ kpɛti.’ (Efe. 4:26, 27) Ke gba si himi he piɛɛli kɛ Mawu Munyu ɔ mi ga womi nɛ ɔ tsu we ní ɔ, a kɛ haomihi maa kpe. Nyɛmiyo ko de ke: “Be ko nɛ nyagba ko ba a, i kɛ ye huno ɔ ngɔɛ ga womi nɛ ngɛ Efesobi 4:26, 27 ɔ kɛ tsu we ní. E hao mi wawɛɛ nɛ i nyɛ we nɛ ma hwɔ mahe!” Ke nyagba ko ba a, e sa nɛ huno ɔ kɛ yo ɔ nɛ a tsu he ní nɔuu, konɛ tue mi jɔmi nɛ ba! E sa kaa a sɔle kɛ bi Yehowa nɛ e ye bua mɛ nɛ a nyɛ nɛ a ba a he si. Enɛ ɔ maa ye bua mɛ konɛ a ti nɔ tsuaa nɔ nɛ e ko susu lɛ pɛ e he, se mohu e hyɛ konɛ a tsu haomi ɔ he ní.—Kane Kolosebi 3:12, 13.

16. He si bami ma nyɛ maa ye bua gba si himi he piɛɛli konɛ a bua nɛ jɔ a sibi a su kpakpahi a he ngɛ mɛni blɔ nɔ?

¹⁶ He si bami ma nyɛ maa ye bua gba si himi he piɛɛli konɛ a bua nɛ jɔ su kpakpahi kɛ nyɛmihi nɛ a ti nɔ tsuaa nɔ ngɛ ɔ he. Kaa nɔ hyɛmi nɔ́ ɔ, eko ɔ, yo ɔ bɔɔ mɔde ngɛ ní komɛ a mi kɛ yeɔ bua weku ɔ. Ke e huno ngɛ he si bami ɔ, e be he nue kaa e yo ɔ kɛ lɛ ngɛ koli sie, mohu ɔ, e maa wo e yo ɔ he wami konɛ e ya nɔ nɛ e ngɔ nyɛmi nɛ e ngɛ ɔ kɛ tsu ní. Ke huno ɔ pee jã a, lɔɔ tsɔɔ kaa e buɔ e yo ɔ, nɛ e suɔ lɛ. (Abɛ 31:10, 28; Efe. 5:28, 29) Jehanɛ hu ɔ, ke yo ko baa e he si ɔ, e kɛ nyɛmi nɛ e ngɛ ɔ be fiãe, nɛ e be e huno ɔ he fɛu yee kaa e huno ɔ be jamɛ a nyɛmi ɔ eko. Mɛ ni enyɔ ɔmɛ tsuo a ji ‘helo kake,’ nɛ nɔ́ nɛ haoɔ nɔ kake ɔ haoɔ e he piɛɛlɔ ɔ hulɔ.—Mat. 19:4, 5.

17. Mɛni ma nyɛ ma ha bua jɔmi nɛ hi gba si himi mi konɛ e wo Mawu hɛ mi nyami?

¹⁷ Atsinyɛ jemi ko be he kaa o suɔ nɛ o gba si himi nɛ pee kaa Abraham kɛ Sara aloo Isak kɛ Rebeka a nɔ ɔ—gba si himi nɛ bua jɔmi ngɛ mi, nɛ e hiɔ si be kɛkɛɛ, nɛ e woɔ Yehowa hɛ mi nyami. Ke jã a, moo bu gba si himi kaa bɔnɛ Yehowa buɔ lɛ ɔ. Mo hla nɔ́ se yomi kɛ nile kɛ je e Munyu ɔ mi. O bua nɛ jɔ o huno ɔ loo o yo ɔ su kpakpahi nɛ e ngɛ ɔ a he, bɔnɛ pee nɛ suɔmi nɛ nyɛ ngɛ kɛ ha nyɛ he ɔ mi nɛ wa. (Lahi 8:6) Bɔɔ mɔde wawɛɛ nɛ o je he si bami kpo. Nyɛɛ bu nyɛ sibi. Ke o pee ní nɛ ɔmɛ ɔ, o ma ná bua jɔmi ngɛ o gba si himi ɔ mi, nɛ o hiɔwe Tsɛ ɔ hu ma ná bua jɔmi. (Abɛ 27:11) Huno ko nɛ e sɛ gba si himi mi maa pee jeha 27 ji nɛ ɔ ngma ke: “Kaa i ngɔɛ ye yo nɛ ɔ, jinɛ i li bɔnɛ i ko pee ha. Suɔmi nɛ ngɛ wa kpɛti kaa gba si himi he piɛɛli ɔ mi waa daa ejakaa wa suɔ Yehowa, nɛ wa sɛɛɔ ní daa.”