Mbôgi Yéhôva i nyén haa ni mam ma m’bô inyu manjom ma ma niñne i jam Bibel i niiga. Di nit bé likoda li m’bô to jada, to i yoñ ngaba i téé minlôñ mi m’bô tole bôt ba ñéga mo, to i ti jôl jés inyu boñ le ba pohol bés kiki ñane loñ wada, to yoñ ngaba i minyiñgha mi minlôñ mi m’bô inyu tinde baane i lona mahéñha ikété loñ. Di nhémle le Bibel i nti manjom makeñi inyu yén haa ni mam ma m’bô.

•   Di noñ hihéga hi Yésu, nu a bi tjél le ba téé nye kiki kiñe hana isi. (Yôhanes 6:​15) A kal banigil bé le “ba ta bé ba nkoñ isi,” a bi tibil unda ki bo le ba nlama bé yoñ ngaba i mam ma m’bô.​—Yôhanes 17:14, 16; 18:36; Markô 12:13-​17

•   Di tiñi i gwés Ane Djob, i Yésu a bi pôdôl ngéda a kal le: “Miñañ minlam mi Ane mini, nw’a añlana nkoñ isi wonsôna i ba biloñ gwobisôna mbôgi; ndi to le lisuk li nlo.” (Matéô 24:14) Kiki di yé bakeñwin ba Ane Djob, ba ba yé ñomok inyu legel malo mé, di nke ni bisu i yén haa ni mam ma m’bô ikété biloñ gwobisôna, yak i loñ i het di niñil.​—2 Korintô 5:​20; Efésô 6:​20.

•   Kiki di ntjél yoñ ngaba i mam ma m’bô, di nla añle bôt ba minlôñ mi m’bô nwominsôna ni kiññem i mpôp ñañ nlam u Ane Djob. Di noode unda ni njel bipôdôl ni maboñog le di mbôdôl Ane Djob ñem le yon i ga mélés mandutu ma nkoñ isi.​—Tjémbi 56:12.

•   Kiki di nkeñgle i mbagla mam ma m’bô ma nlona, di yé ñadak kiki lihaa likeñi ikété nkoñ isi wonsôna. (Kôlôsé 3:​14; 1 Pétrô 2:​17) Ndi, bibase bi nyoñ ngaba i mam ma m’bô bi mboñ le mbagla i ba ipôla bôt ba base yap.​—1 Korintô 1:​10.

 I ti biane lipém. Tolakii di nyoñ bé ngaba i mam ma m’bô, di nti baane ba ba yé i ngii yés lipém. Hala a nkiha ni i oda i Bibel ini le: “Hi mut a suhus nyemede isi baane ba kéhi i ngii yé.” (Rôma 13:1) Di nôgôl mbén i loñ, di saak tas, ni le di nit biliya bi ngomin inyu lémés niñ i bôt ba loñ. Ilole di yoñ ngaba i biliya gwo ki gwo bôt ba mboñ inyu kwés ngomin, di noñ maéba ma Bibel le di soohe inyu “bikiñe, yak ni inyu bobasôna ba nyôgi biyééne bi ane,” téntén ngéda ba nyoñ makidik ma ma yé le ma tihba kunde yés i sélél Djob.​—1 Timôtéô 2:​1, 2.

 Di ndiihe ki kunde i bôt bape ba gwé i yoñ ngaba i mam ma m’bô. Kiki hihéga, di nlona bé yubda ngéda nteba u baane u ntagbe i loñ, di ntééñga bé ki to i bet ba mpohol baane.

 Baa i yén haa ni mam ma m’bô i yé jam li mondo? To. Baôma ni bilôk bikéé bi hiai bisu bi bi yoñ minlélém mi makidik inyu jam li mbéñge kunde i biane. I kaat Ngisi ini le Beyond Good Intentions i nkal le: “Tolakii ba bé hoñol le ba yé nyéksaga i ti baane lipém, bikiristen bi bisu bi bé hémle bé le ba nla yoñ ngaba i mam ma m’bô.” Nlélém jam inyu kaat Ngisi yada le On the Road to Civilization i i nkal le bikristen bi bisu “bi bé bé le bi neebe bitel inyu mam ma m’bô.”

 I tjél di ntjél yoñ ngaba i mam ma m’bô, baa i ntééñga nsañ u loñ? To. Di yé bôt ba nsañ, baane ba loñ ba gwé bé le ba kon bés woñi. Di béñge ñañga u ñwii 2001 u suklu ikeñi yada i njôôñ yi le National Academy of Sciences i loñ Ukren. Mu kii ba bé pôdôl inyu lem yés i tjél yoñ ngaba i mam ma m’bô, u ñañga u, u nkal le: “I len ini, ngim bôt i yé le i oo lem i Mbôgi Yéhôva i tjél yoñ ngaba i mam ma m’bô; inyu njom i nyen bôt ba nlôñ u m’bô u Hitler ni ba nlôñ u m’bô u Ruslan u kôba, ba bé soman Mbôgi Yéhôva.” To hala, yak isi énél mbanda i nlômbi loñ Ruslan, Mbôgi Yéhôva “i bi ke ni bisu i nôgôl mambén ma loñ. Ba bé bôt ba bôlô ba ba bé sal ni maliga ikété nwom ni ikété ndap liuu mam. Ba bé tééñga bé nlôñ u m’bô u bisu i loñ Ruslan.” Nlélém i len ini, biniigana ni maboñog bi Mbôgi Yéhôva bi “ntééñga bé nsañ ni adna i loñ yo ki yo,” kiki ñañga u u bi sôk kal i mamélél.