Ay kay Agtugutan-na si Diyos i Pagˈantos?
Pinugad-mo baˈ nga . . .
oho?
gaˈi?
tingali?
AY I ALLINGUN-NA SI BIBLIYA
“Ngan pahitan-na si Diyos i dimuˈan mga luhaˈ tikang si mga mata-na mga iya, ngan ganaˈ-na kamatayon, pagˈantos, pagpanangis, ngan bisan kapaddi.”
AY I KAPULSANAN-NA SITO SI KAˈAW
Agpasarig to nga maˈin i Diyos i tinikangan-na si mga prublima.
Agliˈaw to si kita si pagpakatuˈan kon ay i nagˈabat-na si Diyos kon agˈantos kita.
Akabuwan to paglaˈom si kita nga waraˈ-na i dimuˈan pagˈantos.
AKASARIG BAˈ KITA SI ALLINGUN-NA SI BIBLIYA?
Oho, si duwa mga rason:
Aghumutan-na si Diyos i pagˈantos ngan kaˈangganaˈ hustisya. Hunaˈ-hunaˈon kon ay i nagˈabat-na si Diyos ngan i mga piniliˈ-na mga aˈa nagmaltratar si panahun-na si Bibliya. Lingun-na si Bibliya nga abidoˈ iya tungod si “pagtalumpigos si mga iya.”
—Huwis 2:18, New World Translation. Asina i Diyos si mga magparapamapaddi si ditangngaˈ. Pananglitan, lingun-na si Bibliya nga “i mga tamburoˈ nga magpamaˈawas si lahaˈ-na si mga inusinti” makarima-dima si iya.
—Mga Proverbio 6:16, 17. Agpaˈid i Diyos si balang addangan. Agˈaghat-na kita kam Jehova pagpatubyan si iya si mga kabaraka-ta ‘kay agmalasakit iya si kita’.
—1 Pedro 5:7, New World Translation.
Gaˈi-na agˈawat tapus-na na si Diyos i mga pagˈantus-na si balang addangan pinaˈagi si Ginhadiˈan. (Mateo 6:9, 10) Samtang gaˈi pay nan anakka, agliˈaw-na i mga sinsiro mga aˈa nga magpangandaˈ si iya.
ALAYON PAMALANDUNGON TO
Kapaˈi kay agtugutan-na si Diyos i pagˈantos?
I Bibliya agsaruman sinan patilaw anan si ROMA 5:12 ngan 2 PEDRO 3:9.