In Imito Ngeyo Lok Ada?

LOK ada i kom ngo? I kom lapeny mogo ma pigi tego ma dano gipenye kwede. Nyo gwok in bene dong ipenye ki kodi lapeny macalo magi:

Lubanga tika ada paro piwa?

Lweny ki peko mono bigik?

Ngo ma timme i komwa ka wato?

Gen mo tika dok tye pi jo muto?

An atwero lega nining wek Lubanga owiny legana?

An mono atwero nongo yomcwiny nining i kwona?

In iromo nongo lagam me lapeny magi ki kwene? Ka ipenyo jo mapat pat, inongo bene lagam mapat pat. Lupwonye dini-gu bene gimiyo lagam ma pe rwatte ki pa luwotgi. Ka icito i kagwoko bukke nyo dukan me cato buk, iromo nongo bukke mapol ma gitemme me gamo lapeny magi. Ento pol kare buk magi gingone kekengi. Mukene miyo tam ma nen calo ber pi kare moni ento i nge kare manok keken nongo karegi okato woko ci kiloko lokke nyo bukke olu.

Ento tye buk mo acel ma tye ki lagam ma gene. En aye buk ma tye ki lok me ada. Yecu Kricito owaco i legane bot Lubanga ni: “Lokki en ada.” (Jon 17:17) I kare-ni wangeyo ni Lok meno obedo Baibul Maleng. I pot karatac ma lubo man, ibinongo lagam mulil me Baibul wiye wiye, ma tye ada i kom lapeny ma gitye malo-ni.

 Lubanga Tika Ada Paro Piwa?

GIN MUMIYO LAPENY MAN BINO:

Watye ka kwo i lobo ma opong ki tim gero ki tim maraco. Dini mapol gipwonyo ni peko ma watye ka limone-ni obedo miti pa Lubanga.

GIN MA BAIBUL PWONYO:

Lubanga pe kelo gin marac. Yubu 34:10 waco ni: “Lubanga pe twero timo gin marac kadi ki acel, Won Twer Ducu pe timo gin mo ma pe tye atir.” Lubanga tye ki yub mo me mar pi dano. Meno aye oweko Yecu opwonyowa me lega ni: “‘Wonwa ma tye i polo, . . . Ker meri obin; giti gin ma imito i lobo kit ma gitiyo i polo.” (Matayo 6:9, 10) Lubanga paro piwa tutwal ma oweko en otimo gin mo matek adada me wek yubbe-ni ocobbe.​—Jon 3:16.

Nen bene Acakki 1:26-28; Yakobo 1:13; ki 1 Petero 5:6, 7.

Lweny ki Peko Mono Bigik?

GIN MUMIYO LAPENY MAN BINO:

Lweny pud tye ka medde ki neko dano mapol ata. Peko ma poto i kom dano olo dong ogudo kom wan ducu.

GIN MA BAIBUL PWONYO:

Lubanga otito con, kare ma en bikelo iye kuc i wi lobo ducu. I te Kerre ma obedo gamente me polo-ni, dano pe dong “gibimedde ki pwonyo lweny.” Ma ka meno, “gibiteto pala lucwangi doko lak kweri dyang.” (Icaya 2:4) Lubanga bigiko tim maraco ki peko ducu. Baibul cikke ni: “[Lubanga] bijwayo pig wanggi woko ducu. To bene dong bibedo pe, kadi kumo nyo koko, nyo arem, pien gin macon dong ducu gurwenyo woko matwal.”​—Niyabo 21:3, 4.

Nen bene Jabuli 37:10, 11; 46:9; ki Mika 4:1-4.

Ngo ma Timme i Komwa ka Wato?

GIN MUMIIYO LAPENY MAN BINO:

Pol pa dini me lobo-ni gipwonyo ni gin mo tye i i dano ma medde ki kwo i nge to. Jo mukene giwaco ni jo muto gitwero wano jo makwo nyo ni Lubanga pwodo jo maraco ki bologi i mac me kapiny.

GIN MA BAIBUL PWONYO:

I nge to, dano giko bedo kwo woko. Latitlok 9:5 waco ni: “Jo ma dong guto woko pe gingeyo gin mo.” Kit ma jo muto nongo dong pe gitwero ngeyo gin mo, nyo niang gin ma timme-ni, pe gitwero wano nyo konyo jo makwo.​—Jabuli 146:3, 4.

Nen bene Acakki 3:19 ki Latitlok 9:6, 10.

 Gen mo Tika dok Tye pi Jo Muto?

GIN MUMIYO LAPENY MAN BINO:

Wan wamito ni wabed makwo, dok wamito ni wacam kwo ki jo ma wamarogi. Miti me neno jo me amarawa ma guto obedo gin ma tye i remowa.

GIN MA BAIBUL PWONYO:

Kibicero pol pa jo muto woko. Yecu ociko ni “jo ma tye i lyel [me nipo, New World Translation] . . . gibikatti woko.” (Jon 5:28, 29) Ma lubbe ki yub mukwongo pa Lubanga, jo ma kibicerogi-ni gibibedo ki kare me kwo i lobo paradic. (Luka 23:43) Jami ma kiciko pigi i anyim-mi tye iye bedo ki yotkom labongo two mo ki kwo ma pe tum pi dano ma luwiny. Baibul waco ni: “Jo ma kitgi atir gibicamo lobo, dok gibibedo iye matwal.”​—Jabuli 37:29.

Nen bene Yubu 14:14, 15; Luka 7:11-17; ki Tic pa Lukwena 24:15.

An Atwero Lega Nining Wek Lubanga Owiny Legana?

GIN MUMIYO LAPENY MAN BINO:

Dano me dini ducu gilego. Ento jo mapol gitamo ni legagi pe kigamo.

GIN MA BAIBUL PWONYO:

Yecu opwonyowa ni pe myero wabed ka nwoyo en lok acel moni-ni ka watye ka lega. En owacci: “Ka wulego pe myero wunwo gin acel-li kare ki kare.” (Matayo 6:7, NW) Ka ce wamito ni Lubanga owiny legawa, ci omyero waleg i yo ma en cwako. Me timo meno, omyero kong wanong pwony i kom gin ma Lubanga mito ka dong waleg i yo ma rwatte kwede. Waraga mukwongo pa Jon 5:14 tito ni: “Ka walegge gin mo kun walubo gin ma en [Lubanga] mito, ci en winyo legawa.”

Nen bene Jabuli 65:2; Jon 14:6, 14; ki 1 Jon 3:22.

An Mono Atwero Nongo Yomcwiny Nining i Kwona?

GIN MUMIYO LAPENY MAN BINO:

Jo mapol gitamo ni cente, yweka, nyo bedo laber aye keligi yomcwiny. Pi meno, giyelle me yenyo jami magi, ento dok ginongo ni yomcwiny kara pe i jami magi.

GIN MA BAIBUL PWONYO:

Yecu onyuto lagony me nongo yomcwiny i kare ma owaco ni: “Gitye ki [‘yomcwiny,’ NW] jo ma gingeyo ni gin lucan i lok me cwiny.” (Matayo 5:3) Yo acel keken ma watwero nongo kwede yomcwiny me ada aye obedo kwanyo yo me cobo mitiwa ma pire dit atika me ngeyo Lubanga ki yubbe piwa. Lok ada meno nonge i Baibul. Ngeyo lok ada meno twero konyowa me niang gin ma pire tek ki gin ma pire pe tek. Ka waye ni lok ada me Baibul aye otirwa i moko tamwa ki dok i gin ma watimo ci wabibedo ki kwo maber.​—Luka 11:28.

Nen bene Carolok 3:5, 6, 13-18 ki 1 Temceo 6:9, 10.

 Magi gubedo lagam macek cek ma Baibul miyo i kom lapeny abicel-li. In imito ngeyo jami mapol makato kenyo? Ka ce itye i kin jo ma “gin lucan i lok me cwiny,” ci nongo imito. Iromo penye ki lapeny mukene calo: ‘Ka Lubanga paro piwa, ci pingo en oweko ni tim marac ki peko obed tye cakke wa i tekwaro? An atwero yubo kwo me oda nining?’ Baibul miyo lagam muromo dok ma kelo yengo i kom lapeny magi ki mukene mapol.

Ento jo mapol i kare-ni pe gimito kwano Baibul. Gin gineno calo obedo buk mo madit ma cawa mukene niang iye tek. In imito ni kikonyi wek inong lagam ma tye i Baibul? Lucaden pa Jehovah gitiyo ki jami aryo ma twero konyi.

Mukwongo obedo buk me Baibul Mono Ada Pwonyo Gin Ango? ma kiyubo me konyo jo ma nongo tic omako komgi wek gunen lagam ma Baibul miyo pi lapeny ma pigi tego. Me aryone obedo yub me kwano Baibul ki gang. Lacaden pa Jehovah mo ma bedo cok kwedi dok romo pwonyo jami ma i Baibul twero bino i gangi nyo i kabedo mo maber piri ci wunyamo kwede lok me Baibul cabit ki cabit, labongo kit cul mo. Dano milion mapol i twok lobo-ni dong gunongo kony ki i yub man. Polgi dong gutyeko ye kun giwaco ni: “An dong atyeko nongo lok me ada!”

Pe tye lonyo mo madit kato man. Lok ada me Baibul gonyowa ki i tim me kwiya piny, anyobanyoba, ki dong lworo ma konye pe. Miniwa gen, kwo ma tyene tye, kacel ki yomcwiny. Yecu owacci: “Wubingeyo lok me ada, lok me ada bigonyowu.”​—Jon 8:32.

□ Alego ni wucwalla buk me Baibul Mono Ada Pwonyo Gin Ango?

□ Wutim ber wubin wucak kwano Baibul kweda ki gang.

Imito nongo ngec mukene? Tim ber ico bot Lucaden pa Jehovah, kun itiyo ki canduk posta ma rwatte piny kany.

Ka pe dok kinyuto mapatte, lok ducu kikwanyo ki i Baibul me leb Acholi me mwaka 1985 pa Bible Society of Uganda, kun kitiyo ki nukta me kare-ni.

© 2008 Watch Tower Bible and Tract Society of Pennsylvania

All Rights Reserved

[Ka ma cal oa ki iye i pot karatac 2]

© Paul Lowe/Panos Pictures