Ngɛ jamɛ a munyu ɔ mi ɔ, wa kase kaa sane nɛ he hia pe kulaa nɛ kɔɔ Mawu nibɔ níhi tsuo a he ɔ ji Yehowa biɛ ngua a he nɛ ma tsɔ ɔ. He blɔ nɛ Yehowa ngɛ kaa e yeɔ je mluku ɔ tsuo nɔ kɛ e biɛ ɔ he nɛ ma tsɔ ɔ hu ngɛ tsakpa. Jã nɔuu kɛ̃ nɛ anɔkuale nɛ adesahi maa ye ɔ hu kɛ Mawu biɛ ɔ he nɛ ma tsɔ ɔ ngɛ tsakpa.

Mɛni he je nɛ amlɔ nɛ ɔ, wa ngɛ nɔ mi mae kaa sane nɛ he hia pe kulaa ji Yehowa biɛ kɛ e biɛ ɔ he nɛ ma tsɔ ɔ? Nyɛ ha nɛ wa susu yi mi tomi etɛ komɛ a he je.

Kekleekle ɔ, Satan gbe Yehowa biɛ ɔ he guɛ ngɛ Eden abɔɔ ɔ mi. Sane nɛ Satan bi Hawa a tsɔɔ kaa Yehowa ji Mawu nɛ ha we nɔ nɔ́ faa, nɛ mlaahi nɛ e wo Adam kɛ Hawa a hu ngɛ kpɛii tsɔ. Lɔ ɔ se ɔ, Satan tsake munyu nɛ Yehowa tu ɔ hɛ mi, nɛ e tsɔɔ kaa Mawu ji lakpatsɛ. Enɛ ɔ nɛ e pee ɔ tsɔɔ kaa e gbe Yehowa biɛ ɔ he guɛ. Lɔ ɔ ha nɛ e ba plɛ pee “Abosiami” nɛ e sisi ji, “nɔ he guɛ gbelɔ.” (Yoh. 8:44) Akɛnɛ Hawa hu ya bu Satan tue he je ɔ, e gbo Mawu nɔ tue nɛ e te si kɛ wo he blɔ nɛ Mawu ngɛ kaa e yeɔ je ɔ tsuo nɔ ɔ. (1 Mose 3:1-6) Kɛ ba si mwɔnɛ ɔ, Satan yaa nɔ nɛ e gbeɔ Mawu biɛ ɔ he guɛ. Enɛ ɔ haa nɛ e he wɛ kaa nihi nɛ a heɔ lakpa munyu nɛ ɔmɛ yeɔ ɔ hu ma gbo Yehowa nɔ tue. Se Mawu we bi lɛɛ a le kaa Yehowa biɛ klɔuklɔu ɔ he guɛ nɛ Satan gbe ɔ ji nɔ́ ko nɛ e hí kulaa. Sane nɛ ɔ ji nɔ́ titli nɛ ha nɛ nɔ́ nami kɛ yi wu tso ní peepee pɔ he wawɛɛ ngɛ je ɔ mi ɔ nɛ.

Enyɔne, Yehowa fia e pɛɛ si kaa e maa wo e biɛ ɔ nguɔ, nɛ e ma tsɔ e biɛ nɛ a gbe he guɛ ɔ he konɛ adesahi kɛ bɔfohi nɛ a ná he se. Enɛ ɔ ji nɔ́ ko nɛ he hia Yehowa wawɛɛ. Lɔ ɔ he je nɛ e de ke: “Ye biɛ ɔ nɛ nyɛ ble ngɛ je ma amɛ a kpɛti ɔ, ma pee lɛ klɔuklɔu” ɔ nɛ. (Eze. 36:23) Munyu nɛ Yesu tu ke: “Ha nɛ o biɛ ɔ he nɛ tsɔ” ɔ, ha nɛ wa ná nɔ́ nɛ e sa nɛ e he nɛ hia Yehowa sɔmɔli anɔkualetsɛmɛ tsuo ke a ngɛ sɔlee. (Mat. 6:9) Baiblo ɔ hu tsɔɔ nɔ́ he je nɛ e sa nɛ a wo Yehowa biɛ ɔ hɛ mi nyami ɔ si abɔ. Mo susu ekomɛ a he nɛ o hyɛ. Baiblo ɔ de ke: ‘Nyɛɛ ngɔ hɛ mi nyami nɛ sa Yehowa biɛ ɔ kɛ ha lɛ.’ (1 Kron. 16:29; La 96:8) ‘Nyɛ la kɛ je e biɛ ɔ yi.’ (La 66:2) “Ma wo o biɛ ɔ hɛ mi nyami kɛ ya neneene.” (La 86:12, NW) Ligbi ko benɛ Yesu ngɛ Yerusalem sɔlemi we ɔ, e de ke: “Tsaatsɛ, wo o biɛ ɔ hɛ mi nyami,” nɛ Yehowa nitsɛ tu munyu kɛ je hiɔwe nɛ e ha lɛ heto ke: “I wo e hɛ mi nyami momo, nɛ ma wo e hɛ mi nyami ekohu.”​—Yoh. 12:28. a

Etɛne, Yehowa yi tomi kɛ e biɛ ɔ ngɛ tsakpa be fɛɛ be. Mo susu enɛ ɔ he nɛ o hyɛ: Mɛni maa ba ngɛ nyagbe ka nɛ maa ba ngɛ Kristo Jeha Akpe Nɔ Yemi ɔ se? Ngɛ jamɛ a be ɔ mi ɔ, anɛ Yehowa biɛ ɔ he maa hia bɔfohi kɛ adesahi wawɛɛ lo? Bɔ nɛ pee nɛ waa na heto ɔ, nyɛ ha nɛ wa susu sane enyɔ nɛ a kɛ Mawu biɛ ɔ ngɛ tsakpa a he. Lɔ ɔmɛ ji: Anɔkuale nɛ adesahi maa ye,  kɛ he blɔ nɛ Mawu ngɛ kaa e yeɔ je mluku ɔ tsuo nɔ ɔ. Anɛ ngɛ jamɛ a be ɔ mi ɔ, adesahi nɛ a ji anɔkualetsɛmɛ ɔ maa ya nɔ nɛ a kɛ kahi maa kpe nɛ ma bi nɛ a ye anɔkuale lo? Dɛbi. Ngɛ jamɛ a be ɔ mi ɔ, a maa ye mluku nɛ a kɛ a ní peepee maa tsɔɔ kaa a ji anɔkualetsɛmɛ momo, nɛ a blɔ hyɛmi ji kaa a ma ná neneene wami. Jehanɛ hu ɔ, nɔ fɛɛ nɔ maa na kaa Yehowa nɔ yemi ɔ hi pe kulaa. Ngɛ jamɛ a be ɔ mi ɔ, adebɔ níhi tsuo nɛ a ngɛ hiɔwe kɛ zugba a nɔ ɔ maa pee kake nɛ a maa kplɛɛ Yehowa nɔ yemi ɔ nɔ. Se ngɛ jamɛ a be ɔ mi hu ɔ, anɛ Yehowa biɛ ɔ he maa hia adebɔ níhi tsuo wawɛɛ lo?

Ngɛ jamɛ a be ɔ mi ɔ, nɔ fɛɛ nɔ maa le anɔkuale nɛ kɔɔ Yehowa he, nɛ Yehowa ma tsɔ e biɛ ɔ he kulaa. Se Yehowa biɛ ɔ maa pee nɔ́ nɛ he maa hia e sɔmɔli anɔkualetsɛmɛ tsuo ngɛ hiɔwe kɛ zugba a nɔ. Mɛni he je? Ejakaa Yehowa maa ya nɔ maa pee ní nguanguahi kɛ ha mɛ nɛ a maa na. Akɛnɛ Yesu maa je he si bami mi nɛ e maa ngɔ e nɔ yemi ɔ kɛ ha Yehowa he je ɔ, “Mawu ma plɛ níhi tsuo kɛ ha nɔ fɛɛ nɔ.” (1 Kor. 15:28) Lɔ ɔ se ɔ, adesahi tsuo nɛ a ngɛ zugba a nɔ ɔ a bua maa jɔ, nɛ a ma “ná Mawu bimɛ ɔmɛ a hɛ mi nyami he yemi ɔ.” (Rom. 8:21) Yehowa ma tsu e yi mi tomi he ní, nɛ e ma ha nɛ e sɔmɔli nɛ a ngɛ hiɔwe kɛ zugba a nɔ ɔ maa pee kake.​—Efe. 1:10.

Ke ní nɛ ɔmɛ tsuo ba mi ɔ, kɛ Yehowa sɔmɔli nɛ a ngɛ hiɔwe kɛ zugba a nɔ ɔ maa pee a ní ha kɛɛ? Ngɛ anɔkuale mi ɔ, wɔ tsuo wa bua maa jɔ, nɛ wa maa suɔ kaa wa ma je Yehowa biɛ nɛ nɔ kuɔ ɔ yi. La polɔ David ngma ke: ‘A je Yehowa, Israel Mawu ɔ yi, a je e biɛ klɔuklɔu ɔ yi kɛ ya neneene!’ (La 72:18, 19) Ngɛ anɔkuale mi ɔ, wa maa ya nɔ maa kase ní hehi fuu nɛ ma ha nɛ wa je Yehowa yi kɛ ya neneene.

Yehowa biɛ ɔ tsɔɔ wɔ anɔkualehi tsuo ngɛ e he, se titli ɔ, e haa nɛ wa naa kaa Yehowa suɔ wɔ. (1 Yoh. 4:8) Wa ma kai be fɛɛ be kaa Yehowa bɔ wɔ akɛnɛ e suɔ wɔ ɔ he je, nɛ suɔmi nɛ e ngɛ kɛ ha wɔ ɔ he je nɛ e ha wɔ kpɔ̃mi nɔ́ ɔ nɛ. Jehanɛ hu ɔ, wa maa ya nɔ maa na kaa blɔ nɔ nɛ e guɔ kɛ yeɔ nɔ ɔ da, nɛ lɔ ɔ tsɔɔ kaa e suɔ wɔ hulɔ. Wa maa ya nɔ maa hɛ kɛ su wa hiɔwe Tsɛ ɔ he, nɛ wa ma la kɛ je e biɛ ɔ ngua a yi.​—La 73:28.