Abraham​—Nyumu Nɛ Ngɛ Kã

Abraham ngɛ e weku ɔ kɛ e sɔmɔli ɔmɛ hyɛe be mi nɛ a ngɛ a he dlae konɛ a ho Kanaan zugba a nɔ ya a. (1 Mose 12:1-5) Ke e hyɛ nimli babauu nɛ ɔmɛ, nɛ lɛ nɛ e maa hyɛ a nɔ ɔ, e nu he kaa blɔ nya ní tsumi ngua ko fɔɔ si ngɛ e nɔ. Se kɛ e ma plɛ kɛ pee jã be mi nɛ e li ma nɔ he nɛ e yaa a ha kɛɛ? Akɛnɛ níhi yaa nɔ saminya ngɛ Ur, nɛ zugba kpakpa kɛ nyu babauu kɛ hehi nɛ lohwehi maa ye ní ngɛ ngɛ lejɛ ɔ he je ɔ, e he be wae kaa e maa hyɛ nimli babauu nɛ ɔmɛ a nɔ ngɛ lejɛ ɔ. Nɛ ke Abraham ya nu hiɔ loo e ya gbo ngɛ he nɛ e yaa hu nɛɛ? Mɛnɔ lɛ maa hyɛ e weku ɔ nɔ? Ke Abraham susu nɔ́ ko kaa jã a he po ɔ, lɔ ɔ wui e he gbeye. E fia e pɛɛ si kaa bɔ fɛɛ bɔ nɛ ji ɔ, e maa bu Mawu tue nɛ e maa pee e suɔmi nya ní. Enɛ ɔ tsɔɔ kaa e ngɛ kã niinɛ.

MƐNI JI KÃ PEEMI? Kã ji su ko nɛ haa nɛ nɔ ko fĩɔ si nɛ e yi gbeye. Ke nɔ ko be kã a, lɔ ɔ tsɔɔ kaa fɔ̃lɔ ji lɛ. Se enɛ ɔ tsɔɔ we kaa ke nɔ ko ngɛ kã a, e be gbeye yee gblee. Mohu ɔ, nɔ nɛ ngɛ kã nɛ je Mawu ngɔ ɔ, ke e ngɛ gbeye yee po ɔ, e peeɔ si fɔfɔɛ ɔ he nɔ́ ko.

MƐNI ABRAHAM PEE KƐ TSƆƆ KAA E NGƐ KÃ? Abraham yi gbeye kaa e maa je ekpa. He nɛ a fɔ Abraham ngɛ ɔ, nihi jaa mawuhi kɛ amaga slɔɔtohi. Se ngɛ lɔ ɔ tsuo se ɔ, Abraham ha we nɛ nɔ́ nɛ ni ɔmɛ ma susu ngɛ e he ɔ nɛ wo e he gbeye nɛ e ko pee nɔ́ nɛ da. Mohu ɔ, e pee kã nɛ e ba e je mi saminya, nɛ ji kaa e ya nɔ nɛ e sɔmɔ Yehowa Mawu, “Nɔ Nɛ E Nɔ Kuɔ Pe Kulaa” a pɛ.​—1 Mose 14:21, 22.

Abraham ha nɛ Mawu jami he hia lɛ pe he lo nya níhi. Abraham ná suɔmi ɔ kaa e maa je si himi kpakpa nɛ ngɛ Ur ɔ he nɛ e hia blɔ kɛ nyɛɛ nga a nɔ, ejakaa e ngɛ hɛ kɛ nɔ fɔmi ɔ kaa Yehowa ma ha lɛ e he lo nya hiami níhi. Ngɛ anɔkuale mi ɔ, eko ɔ, benɛ be ngɛ mi puee ɔ, Abraham ma kai si himi kpakpa nɛ e ngɛ ngɛ Ur ɔ. Se e ná nɔ mi mami kaa Yehowa maa ya nɔ ma ha e kɛ e weku ɔ a hiami níhi be fɛɛ be. E ha nɛ Yehowa pee nɔ nɛ e he hia lɛ wawɛɛ ngɛ e si himi mi. Enɛ ɔ ha nɛ e kɛ kã pee Mawu suɔmi nya ní.

MƐNI WA KASEƆ NGƐ MI? Ke wa pee kã nɛ wa bu Yehowa tue be mi nɛ nihi nɛ a bɔle wɔ ɔ pee we jã po ɔ, lɔ ɔ tsɔɔ kaa wa ngɛ Abraham kasee. Kaa nɔ hyɛmi nɔ́ ɔ, Baiblo ɔ tsɔɔ kaa nihi nɛ a ngɛ hemi kɛ yemi ngɛ Yehowa Mawu mi ɔ kɛ si temi kɛ womi maa kpe. Si temi kɛ womi nɛ ɔ ma nyɛ maa je a weku li loo a huɛmɛ po a ngɔ. (Yohane 15:20) Ke wa ná nɔ mi mami ngɛ nɔ́ nɛ wa kase kɛ kɔ Yehowa he ɔ mi ɔ, e ma ha nɛ waa je bumi mi kɛ fã wa hemi kɛ yemi ɔ he.​—1 Petro 3:15.

Jehanɛ hu ɔ, e ma ha nɛ wa ná nɔ mi mami kaa Mawu ma ha nihi tsuo nɛ a ngɛ hemi kɛ yemi ngɛ e mi ɔ a hiami níhi. Enɛ ɔ ma ha nɛ waa pee kã nɛ waa ngɔ mumi mi níhi kɛ pee oti ngɛ wa si himi mi mohu pe nɛ wa maa di he lo nya níhi a se. (Mateo 6:33) Mo hyɛ bɔ nɛ weku ko pee enɛ ɔ he nɔ hyɛmi nɔ́ ha.

E ngɛ mi kaa Doug kɛ Becky ngɛ binyumuhi enyɔ nɛ a wɛ mohu lɛɛ, se a ná suɔmi ɔ kaa a maa hia kɛ ya ma kpa nɔ, he nɛ fiɛɛli fuu a he hia ngɛ. Benɛ a hla níhi a mi nɛ a sɔle wawɛɛ ɔ, a ma nya si kaa a maa pee jã. Doug de ke: “E ngɛ mi kaa wa li bɔ nɛ níhi maa ya nɔ ha ngɛ lejɛ ɔ mohu lɛɛ, se wa pee kã nɛ wa muɔɔ wa níhi nɛ waa kɛ jokuɛ ɔmɛ hia blɔ ɔ. Sisije ɔ, benɛ wa ngɛ níhi a he susue ɔ, wa susu Abraham kɛ Sara nɔ hyɛmi nɔ́ ɔ he. Wa na kaa a ngɔ a hɛ kɛ fɔ Yehowa nɔ, nɛ Yehowa hu ye bua mɛ nɛ e ha we nɛ a nine nɛ nyɛ si.”

Benɛ Doug ngɛ bɔ nɛ níhi ya nɔ ha mɛ ha benɛ a hia blɔ ɔ he munyu tue ɔ, e de ke: “Yehowa jɔɔ wɔ wawɛɛ. Ejakaa wa si himi ngɛ kpokploo amlɔ nɛ ɔ, nɛ wa nyɛɔ nɛ waa kɛ wa sibi peeɔ níhi kɛ blaa kaa weku. Ní nɛ ɔmɛ ekomɛ ji kaa wa blaa kɛ yaa fiɛɛmi, waa kɛ wa sibi sɛɛɔ ní, nɛ waa kɛ jokuɛ ɔmɛ blaa kɛ jeɔ wa hɛja. Enɛ ɔ ha nɛ wa náa bua jɔmi nɛ hi kalemi.”

Ngɛ anɔkuale mi ɔ, tsa pi nɔ fɛɛ nɔ nɛ e si himi maa ngmɛ lɛ blɔ nɛ e ya sɔmɔ ngɛ he nɛ fiɛɛli fuu he hia ngɛ. Se wɔ tsuo wa ma nyɛ maa kase Abraham nɔ hyɛmi nɔ́ ɔ nɛ waa ngɔ Mawu jami kɛ pee oti ngɛ wa si himi mi, nɛ wa ná nɔ mi mami kaa Mawu maa ye bua wɔ be fɛɛ be. Ke wa pee jã a, lɔ ɔ tsɔɔ kaa waa kɛ Baiblo mi ga womi nɛ ji “wa nɔ gbagba nɛ te, nɛ wa de ke: ‘Yehowa ji ye yemi kɛ bualɔ; i be gbeye yee’”ɔ ngɛ ní tsue.​—Hebri Bi 13:5, 6.

[Bua Jɔmi Munyu Nɛ A Ma Nɔ Mi]

Nɔ nɛ ngɛ kã nɛ je Mawu ngɔ ɔ, ke e ngɛ gbeye yee po ɔ, e peeɔ si fɔfɔɛ ɔ he nɔ́ ko

[Daka/​Foni]

Yogbayo Kpakpa Nɛ E Suɔ Mawu

Sara kɛ nyumu ko nɛ e ngɛ hemi kɛ yemi wawɛɛ ɔ sɛ gba si himi mi. Se yo anɔkualetsɛ nɛ ɔ hu pee nɔ hyɛmi nɔ́ kpakpa nɛ sa kadimi. Ngɛ anɔkuale mi ɔ, Baiblo ɔ wo Sara biɛ ta si etɛ kɛ tsɔɔ kaa yihi nɛ a yeɔ Mawu gbeye ɔ ma nyɛ maa kase e nɔ hyɛmi nɔ́ kpakpa a. (Yesaya 51:1, 2; Hebri Bi 11:11; 1 Petro 3:3-6) E ngɛ mi kaa Baiblo ɔ de we níhi fuu kɛ kɔ Sara he mohu lɛɛ, se wa le kaa e ngɛ su kpakpahi fuu.

Kaa nɔ hyɛmi nɔ́ ɔ, mo susu bɔ nɛ Sara maa pee e ní ha benɛ Abraham de lɛ kaa Mawu ha mɛ blɔ tsɔɔmi kaa a je Ur ma a mi ɔ he nɛ o hyɛ. Anɛ e susu he nɛ a maa ya kɛ nɔ́ he je nɛ e sa nɛ a hia jamɛ a blɔ ɔ he lo? Anɛ e hao ngɛ he lo nya níhi nɛ a ngɛ ɔ he lo? Anɛ e ye aywilɛho akɛnɛ e ngɛ e weku li kɛ e huɛmɛ a he jee, nɛ e li be nɛ e maa kpale na mɛ ekohu ɔ he lo? Atsinyɛ jemi ko be he kaa e ma susu ní nɛ ɔmɛ a he. Ke jã nɛ e ji po ɔ, e je e tsui mi nɛ e je Ur ma a mi, nɛ e ná nɔ mi mami kaa Yehowa maa jɔɔ lɛ ke e bu lɛ tue.​—Ní Tsumi 7:2, 3.

Sara ji nɔ ko nɛ e buɔ Mawu tue, se pi lɔ ɔ pɛ, e ji yogbayo kpakpa hulɔ. Sara kɛ e huno ɔ si we koli ngɛ nɔ nɛ maa nyɛɛ weku ɔ hɛ mi ɔ he, mohu ɔ, e je e tsui mi nɛ e je bumi kpo kɛ tsɔɔ e huno ɔ, nɛ e je suɔmi mi nɛ e fĩ blɔ tsɔɔmi nɛ e huno ɔ kɛ ha ngɛ weku ɔ mi ɔ se. Enɛ ɔ nɛ e pee ɔ tsɔɔ kaa e ji yo kpakpa, nɛ su kpakpahi nɛ e je kpo ɔ ha nɛ e he pee fɛu saminya.​—1 Petro 3:1-6.

Anɛ yihi nɛ a ngɛ mwɔnɛ ɔ ma nyɛ ma ná nɔ hyɛmi nɔ́ kpakpa nɛ Sara pee ɔ he se lo? Yo ko nɛ a tsɛɛ lɛ ke Jill, nɛ e sɛ gba si himi mi jeha 30 kɛ se ɔ de ke: “Sara nɔ hyɛmi nɔ́ ɔ ha nɛ i na kaa e sa nɛ ma je ye tsui mi nɛ ma de ye huno ɔ bɔ nɛ i nuɔ he ngɛ níhi a he ha. Se ngɛ jamɛ a be ɔ mi nɔuu ɔ, e sa nɛ maa le kaa ye huno ɔ ji weku ɔ yi, nɛ lɛ nɛ e ngɛ he blɔ kaa e mwɔɔ yi mi kpɔ kɛ haa weku ɔ. Ke e mwɔ yi mi kpɔ ko ɔ, e sa nɛ ma pee nɔ́ fɛɛ nɔ́ nɛ ma nyɛ kɛ fĩ e se.”

Wa kaseɔ níhi fuu ngɛ Sara he, se eko ɔ, nɔ́ nɛ pe kulaa nɛ wa kase ngɛ e he ji: E ngɛ mi kaa Sara he ngɛ fɛu saminya mohu lɛɛ, se lɔ ɔ ha we nɛ e wo e he nɔ. (1 Mose 12:10-13) Mohu ɔ, ngɛ a si himi tsuo ɔ, e je he si bami mi nɛ e fĩ Abraham se ngɛ be kpakpahi kɛ be yayahi tsuo a mi. Atsinyɛ jemi ko be he kaa Abraham kɛ Sara tsuo yeɔ anɔkuale, a baa a he si nɛ a suɔ a sibi wawɛɛ. Ngɛ anɔkuale mi ɔ, a ji nɔ kɛ e yo nɛ Yehowa jɔɔ mɛ wawɛɛ nitsɛ.