¿WAJÍ pachismea dekaskésh? Kuashat inibau íman ajuinawai aents aidau. Juka amesh makishkiakesh iniimsauwaitme:

• ¿Puyatjupawash Apajuish iinash?

• ¿Atinashit tsawan maaniamu waitiamu atsaush?

• ¿Jakaush wajukeawa?

• ¿Jakaunush awak dakamuji?

• ¿Wajuk segamainaita Apajuí antugtukti takuish?

• ¿Dakunkutash wajuk igkumainaita?

¿Amesh jujú inibaush tuwí egamainaitme? Awai shiig kuashat papí augtai agakbau, dekas aimaina íman aidau, tujash duka yapajia tau ainawai, tikich awai dekas tauwa íman yamaikik tujash nagkaemaju yapajia iwajamu ainawai.

Atus asamtai awai makichik papí agagbau autai dekaskea nuna aimu. Jisukristu tiuwai Apajuí seegak: “Amina chichamjumek dekaske’’ (Juan 17:17). Nu dekaskea duka Apajuí chichamegai. Yamai diistatji Apajuí chichame paan inibaun aima nunú.

¿WAGKA JUNASH INIIMAINAWA?: Jujú nugkanum pujuinag juka, yamaik kuashat pegkegchau ayamunum pujuinaji. Kuashat aents Apajuí nemagjai tuinayatak waitiamuk Apajuí wakegamui tu jintinawai.

¿APAJUÍ CHICHAME JINTINJAMA DUKA?: Apajuik pegkegchaunak takatsui tawai (Job 34:12). Apajuí anejatin asa aentsnak ukujui pegkegchin. Nuadui, Jisus juní segatajun tusa jintinkagtuawai: “Apawa, Amék nayaimpinum pujuwaitme [...] Amék jutinashkam inajatjata, tuja jujú nugkanmayati aidautishkam ame wakegamua duke umikagmi’’ (Mateo 6:9, 10). Apajuí dekas anejatu asa nii uchijí makichkiuchia nuna awetugmauwai ju nugkanum ni wakegamu uminkati tusa (1 Juan 4:9).

Jui ausatajum Génesis 1:26-28; 1 Pedro 5:7.

¿WAGKA JUNASH INIMAINAWA?: Shiig kuashat maaniamunum jinuinawai, antsag ashí aents tikich wajinum waituinawai.

¿APAJUÍ CHICHAME JINTINJAMA DUKA?: Apajuí tiuwai nugkán agkantán amastajai tusa. Apajuí inamjattanuig, aentsuk maniamunash unuimagchagtinai. Apajuí chichame tawai imá pegkeg yapajinatnai nagki aidauk wái ajanum takatai (Isaías 2:4). Nuigtú pegkegchau waitiamun emegkaktinai. Apajuí chimame tawai: “Atsutnai jaamu, buutbau, waitiaku untsubau, najaimamu aidaushkam. Juka ashimnaku asamtai’’ (Iwainakbau 21:4).

Jui ausatajum Salmo 37:10, 11; 46:9; Miqueas 4:1-4.

¿WAGKA JUNASH INIMAINAWA?: Kuashat aents Apajuí nemagjai tuinayatak jakajinish wakan iwaku pujawai. Nuigtú pegkejak nayaimpinum wegawai, tuja pegkegchau jiinum wegawai tu jintinkagtuinawai, nuigtush jakaushkam iwakun waitkawai tuinawai.

¿APAJUÍ CHICHAME JINTINJAMA DUKA?: Jakauk iwakbaujin megkaewai, antatsui, chichatsui, wainmachui. Apajuí chichame tawai: “Jakauk shiig anentaimchau ainawai’’ (Eclesiastés 9:5). Nunin asa yaijatmainchau nuigtú iwakunash waitkamainchau ainawai (Salmo 146:3, 4).

Jui ausatajum Génesis 3:19; Eclesiastés 9:6, 10.

¿WAGKA JUNASH INIMAINAWA?: Ashí aents aneamu aina nujai ju nugkanum shiig aneasa pujustasa wakegaji, nuniau asa ii patayí jakau aina nunú ataktú wainkatasa wakegaji.

¿APAJUÍ CHICHAME JINTINJAMA DUKA?: Kuashat aents jakau aina nu nantakiagtinai Apajuí chichame tawai: “Aents pegkeg aidau, pegkegchau aidau jinawajunash inanjatnai’’ (Takasbau 24:15). Aents nantainakug ju nugkanum batsamsatnai dui Apajuí emtika tiuwai (Isaías 65:21-25). Nuadui nugka pegkeg wajasbaunum aents Apajuí umigkauk waittsuk shiig aneas tuke iwaku pujustinai. Apajuí chichame tawai: “Apajuí umijuina duka ju nugkanum tuke iwaku pujusagtinai’’ (Salmo 37:29).

Jui ausatajum Job 14:14, 15; Lucas 7:11-17.

¿WAGKA JUNASH INIMAINAWA?: Kuashat aents Apajuí segainakush antugchamua núnin dekapenawai.

¿APAJUÍ CHICHAME JINTINJAMA DUKA?: Jisus jintinkagtuauwai: ‘‘Apajuí augkugmesh chicham imanchauk awá awagkijum segaigpajum’’ (Mateo 6:7). Apajuí antugtukti takuik ni wakega dutiksaik segamainaitji. Dui ni wakega nu dekamainai nuniku asa imatiksaik segamainaitji. “Apajuí wakegamua dutiksaik segamak antugkagtinai”, tawai 1 Juan 5:14.

Jui ausatajum Salmo 65:2; Juan 14:6, 14; 1 Juan 3:22.

¿WAGKA JUNASH INIMAINAWA?: Kuashat aents kuichkin, shiigmatjin, imanjin shiig aneasa pujumainaitji tu anentaimainawai, tujash shiig aneas pujuinatsui.

¿APAJUÍ CHICHAME JINTINJAMA DUKA?: Dekas wajukeaku shiig aneasjish pujumainaita nuna Jisus tiuwai: “Apajuí chichamen antukag umiidau nuní nagkaemas shiig aneasagtinai tiuwai” (Lucas 11:28). Aaja Apajuí umigku shiig aneasa pujustatji, Apajuí chichamen duka awai, nu dekaskea nu pegkeg dekatnum yaimpaktatui. Apajuí chichame unuimaja umiakuik ii pujutig pegkeg atatui.

Jui ausatajum Proverbios 3:5, 6, 13-18; 1 Timoteo 6:9, 10.

 Jui makichik uwejá ijúk inibau awa juka aimkámui Apajuí chichame diisa. ¿Nuní kuashat dekatasa wakegakmek? Ame tikich dekatasa wakejuina nuniakmek nuní kuashat dekattame. Amesh tatsumeash dekas Apajuí anejatnaitkush, wagka pegkegchaunash tuja waitiamu ati tusash idaiwa. Tuja dekatasa wakegakmek ame pataimijai shiig dakujusa pujustasam. Apajuí chichame aimui ashí inibaunak.

Tujash kuashat aents Apajuí chichame augtan dakitin ainawai nu agagbauk dekashmin antúmaitsui tinu asag. ¿Apajuí chichame dekatnum yainkatnume tusa wakegamek? Jehuwá etsegtin aidau yaimpaktasa wakegainawai. ¿Wajuk yaimpamainaita?

Yaimpamanai jintinjamak amina jeemin Apajuí chichamen. Apajuí Jehuwá etsegtin unuitamainai nunak. Apajuí chichamen akikchau amina jeemin nuniashkush, tui tsawan agkan ajutjamua nui. Kuashat aents Apajuinumian unuimájan pegkegnum yaigkam dekaskea nuna dekawag shiig aneasajui.

Apajuí chichame yaijatanu amesh dekamainaitme. Yaunchukek, wainka ishamajakbauwai, tujash yamaik Apajuí chichame dekamtijamji, nuigtú uminkattanu pegkeg dakaku dakujusa pujaji. Jisus tiuwai: “Chicham dekaskea dushakam dekamainaitjume. Nu dekaskea nunú agkanmitkagmamainai” (Juan 8:32).