Aˬ JEˬ˗EUˬ yaw tsaˬ yaw dawˇ? Tsawˇ haˬ zaˬ deuˬ naˇ haˬ luꞈ˗eu, aˇ yehˇ huiˬ˗eu gaˇ kawˆ nehˬ˗ehˇ taꞈ leˇ˗eu, yaw tsaˬ yaw dawˇ meh. Gaˇ kawˆ heu deuˬ˗ahˇ, nawˇ jiˇ ni naˇ haˬ haw˗euˬ paˬ lawˇ:

• Miˬ yehˇ aˬ dui˗ahˇ, ngehˬ g‵eh luꞈ meh loˇ?

• Guiˇ deuˆ˗eu hawˇ˗eu shaˬ˗eu zahˬ˗eu heu deuˬ, byoˆ iˇ˗eu aˇ nah baw meh loˇ?

• Aˬ dui shiˇ naˇ, aˬ jeˬ pyeuꞈ iˇ˗eu nga?

• Shiˇ˗euˬ deuˬ noeˬ tmˬ˗eu jeˬ jaˆ meh loˇ?

• Miˬ yehˇ naˇ haˬ ni, guiˬ lahˬ aˬ joˆ˗ehˇ shaˇ nmˇ?

• Nui k‵ahˇ shiˇ laˇ paˬ˗ehˇ g‵eh˗eu dehꞈ ziˇ, aˬ joˆ˗ehˇ poˆ mawˇ nmˇ?

Heu gaˇ naˇ haˬ taˬ˗euˬ gaˇ kawˆ deuˬ˗ahˇ siˬ nya laˇ ni aˬ gaˇ poˆ iˇ nmˇ? Aˇ boꞈ taˬ duˬ hawˇ˗eu, sahˬ boꞈ paˇ dmˬ ahˬ gaˇ nawˇ iˇ ngeh, ehˇ k‵oꞈ˗eu dawˬ ahˇ ma lehˇ ehˇ˗eu, sahˬ boꞈ paˇ dmˬ yaw myaˬ heˇ dmˬ˗ahˇ, ya mawˇ tehꞈ˗a. Ehˇ k‵awꞈ paˇ dmˬ heu deuˬ, tiˬ dmˬ tiˇ dmˬ maˬ dzoeˇ leˇ˗a. Tiˬ dmˬ na˗aˬ, tiˬ k‵ehˬ laꞈ k‵oeˇ zmˬ nya k‵awꞈ, myahˇ laˇ ngeh jawˇ, saˇ ka nehˬ˗ehˇ maˬ tsaˬ leˇ ni pyeuꞈ iˇ˗euˬ miˇ neh, ya boꞈ lahˬ˗eu meh. maˬ ngeuˇ naˇ k‵awꞈ yawˬ dmˬ yawˬ ya laˆ paˇ˗eu meh.

Ehˇ k‵awꞈ ni nui ma taˬ nya˗awˇ, gaˇ kawˆ heu˗ahˇ ehˇ k‵oꞈ nehˬ nya˗eu, paˇ dmˬ tiˬ dmˬ jaˆ˗eu meh. Paˇ dmˬ heu dmˬ naˇ, yaw tsaˬ yaw dawˇ˗euˬ paˇ dmˬ pyeuꞈ˗eu meh. Yeˬsuˇ Ka li Miˬ yehˇ˗ahˇ guiˬ lahˬ shaˇ ngeh “nawˬ˗euˬ dawˬ˗aˬ yaw tsaˬ yaw dawˇ jeˬ meh” lehˇ ehˇ yaꞈ˗euˬ meh. (Yoˇhaˬ 17:17) Nymˇ iˬ nah yaw tsaˬ yaw dawˇ˗euˬ dawˬ teu naˇ, Jaˇ liꞈ meh lehˇ nga maꞈ siˬ nya taˬ˗euˬ ma. Gaˇ kawˆ heu deuˬ mehˬ shi taꞈ˗ahˇ, shaw jaˆ ni ehˇ nehˬ taˬ˗euˬ meh.

Aˬ JEˬ MIˇ NEH NAˇ HAˬ˗EU NGA: Miˇ tsaˬ kʼoeˇ taˆ, yaw haiˬ jeˬ hawˇ˗eu, maˬ tsaˬ maˬ dawˇ˗eu jeˬ tehꞈ˗ehˇ, byah jiˇ taˬ˗euˬ uˬ taꞈ, zahˇ myaˬ tiˬ paˆ, aˬ dui˗euˬ shaˬ zahˬ dawˬ tawˆ luꞈ, Miˬ yehˇ neh bi pyeuꞈ laˇ˗euˬ meh lehˇ, mehˬ˗eu miˇ neh meh.

JAˇ LIꞈ MEHˬ˗EU JEˬ: Maˬ muiˬ˗eu jeˬ Miˬ yehˇ˗ahˇ neh, pyeuꞈ laˇ˗eu maˬ ngeuˇ˗a. “Baoˬ huiˬ˗eu Miˬ yehˇ yaw lehˬ jeˬ mˇ tehꞈ˗a loˇ” lehˇ, Yawˇbaˆ 34:10 laꞈ k‵oeˇ ehˇ taˬ˗euˬ meh. Tsawˇ haˬ zaˬ deuˬ˗euˬ g‵aˇ duˬ, Miˬ yehˇ nui gaˬ ahˇ˗eu nui noeˬ tiˬ hmˬ jaˆ˗eu meh. Teu miˇ neh Yeˬsuˇ aˬ dui maꞈ˗ahˇ “mˬ k‵oeˇ taˆ jawˇ˗eu nga maꞈ˗euˬ Aˬ da˗oˇ . . . mˬ k‵oeˇ taˆ nawˬ˗euˬ nui k‵ahˇ shiˇ˗eu jeˬ byah˗eu loꞈ˗ehˇ, miˇ tsaˬ k‵oeˇ taˆ k‵awꞈ bi byah” le˗eu g‵aˇ duˬ, guiˬ lahˬ shaˇ˗awˬ lehˇ, mehˬ taˬ yaꞈ˗euˬ meh. (Maꞈtehˬ 6:9, 10, YS97) Miˬ yehˇ aˬ dui maꞈ˗ahˇ yaw duiˇ˗ehˇ ngehˬ g‵eh˗eu laꞈ k‵oeˇ, aˬ yawꞈ neh noeˬ taˬ˗euˬ jeˬ aˬ diˇ byah laˇ ni, aˇ poeˬ kʼaˆ dui dui˗eu jeˬ, biꞈ neh yaꞈ˗euˬ meh.—Yoˇhaˬ 3:16.

Aˇdahˬbeh˗eu 1:26-28; Yaˬkoˆ 1:13; hawˇ˗eu 1 Beˬtuˆluˆ 5:6, 7 jiˇ ni haw˗awˬ.

Aˬ JEˬ MIˇ NEH NAˇ HAˬ˗EU NGA: Guiˇ deuˆ˗eu miˇ neh, tsawˇ haˬ zaˬ maˬ gui jiˇ coeˇ ni, shiˇ luꞈ˗eu meh. Shaˬ˗eu zahˬ˗eu jeˬ kʼawꞈ, aˬ dui yawˬ gʼaˬ na luꞈ˗ahˇ coeˬ luꞈ meh.

JAˇ LIꞈ MEHˬ˗EU JEˬ: Miˇ tsaˬ heu siˬ saˇ laˇ˗eu tiˬ nah baw meh lehˇ, Miˬ yehˇ ehˇ taˬ˗euˬ meh. Miˇ tsaˬ heu siˬ˗ahˇ, Miˬ yehˇ uˆ lahˇ le ngeh jawˇ, tsawˇ haˬ zaˬ deuˬ“guiˇ deuˆ˗eu gaˇ kawˆ [dzaw˗eu]” maˬ paˇ loˬ meh. “Guiˇ deuˆ˗eu mi cehˇ˗ahˇ, aˬ yawꞈ maꞈ nyoˬ tsehˬ tehˆ pyeuꞈ” jiˇ˗eu meh. (Iˇsaˬyaˇ 2:4) Miˬ yehˇ maˬ tsaˬ maˬ dawˇ˗eu jeˬ hawˇ˗eu, shaˬ˗eu zahˬ˗eu jeˬ dawˬ tawˆ luꞈ˗ahˇ, laˆ cawˆ jiˇ ma lehˇ, Jaˇ liꞈ laꞈ kʼoeˇ saˇ jaˇ dzaˬ taˬ˗euˬ meh. “[Miˬ yehˇ] aˬ yawꞈ maꞈ˗euˬ myaˆ biˇ dawˬ tawˆ luꞈ˗ahˇ, aˬ yawꞈ siˆ shawˇ nehˬ tehꞈ˗a, shiˇ˗eu jeˬ maˬ paˇ jaˆ˗ehˇ, noeˬ shaˬ noeˬ zahˬ˗eu jeˬ ngoeˇ˗eu jeˬ hawˇ˗eu, naˇ˗eu gawˇ˗eu jeˬ maˬ paˇ jaˆ meh. Yaw oeˇ kʼoeˇ deuˬ dawˬ tawˆ luꞈ byoˆ iˇ jiˇ˗euˬ meh”​—Pah mehˬ˗eu 21:3, 4.

Ja ceuˬ˗eu 37:10, 11; 46:9; hawˇ˗eu Miˇkaˬ 4:1-4 jiˇ ni haw˗awˬ.

Aˬ JEˬ MIˇ NEH NAˇ HAˬ˗EU NGA: Miˇ tsaˬ kʼoeˇ taˆ zahˇ myaˬ tiˬ paˆ, tsawˇ haˬ shiˇ dzeuˇ˗euˬ kʼawꞈ ni, mawˇ do laꞈ kʼoeˇ tiˬ jeˬ na, dehꞈ luꞈ˗a siˬ lehˇ mehˬ˗eu meh. Tsawˇ haˬ tiˬ deuˬ na˗aˬ, shiˇ˗euˬ deuˬ dehꞈ luꞈ˗eu deuˬ˗ahˇ, laˆ bahˬ laˇ nya˗awˇ, Miˬ yehˇ ehˇ dawˬ maˬ naˇ haˬ˗eu deuˬ˗ahˇ kʼawꞈ, shiˬ buiˇ lah ma laꞈ kʼoeˇ, mˬ maˬ maˬ byaˆ zaˇ ziˇ maˬ shiˇ maˬ dehꞈ˗ehˇ, kʼehˬ meh lehˇ jah˗eu meh.

JAˇ LIꞈ MEHˬ˗EU JEˬ: Tsawˇ haˬ shiˇ naˇ tiˬ jeˬ˗iˬ maˬ paˇ jaˆ meh. “Shiˇ dzeuˇ˗euˬ deuˬ, siˬ nya˗eu aˬ jeˬ paˇ jaˆ ta” lehˇ Dawˬtsoˆ 9:5 laꞈ kʼoeˇ ehˇ taˬ˗euˬ meh. Shiˇ˗euˬ deuˬ naˇ, tiˬ jeˬ˗iˬ maˬ siˬ nya ni pyeuꞈ iˇ˗euˬ miˇ neh, dehꞈ luꞈ˗eu deuˬ˗ahˇ, maˬ laˆ bahˬ nya˗a, maˬ caw ba nya˗a.—Ja ceuˬ 146:3, 4.

Aˇdahˬbeh˗eu 3:19 hawˇ˗eu Dawˬtsoˆ 9:6, 10 jiˇ ni haw˗awˬ.

Aˬ JEˬ MIˇ NEH NAˇ HAˬ˗EU NGA: Aˬ dui maꞈ yaw dehꞈ dehꞈ mawꞈ˗eu meh. Yawˬ ha gaˬ˗eu deuˬ nehˬ˗ehˇ jiˇ, tiˬ kawˆ loꞈ˗ehˇ dehꞈ taꞈ mawꞈ˗eu meh. Shiˇ dzeuˇ taˬ˗euˬ yawˬ ha gaˬ˗eu deuˬ˗ahˇ kʼawꞈ, Yawˬ gʼaˬ na luꞈ paˇ mawˇ dzoeˇ kʼoꞈ mawꞈ˗eu meh.

JAˇ LIꞈ MEHˬ˗EU JEˬ: Shiˇ˗euˬ deuˬ myaˬ tiˬ paˆ, paˇ ya gʼoꞈ dehꞈ laˇ meh. “Lmˬ bymˇ laꞈ kʼoeˇ neh aˬ yawꞈ maꞈ doˆ laˇ” tehꞈ˗a lehˇ, Yeˬ suˇ saˇ jaˇ dzaˬ taˬ˗euˬ meh. (Yoˇhaˬ 5:28, 29) Yaw beh Miˬ yehˇ neh noeˬ˗euˬ heu nehˬ˗ehˇ tsaˬ leˇ˗eu, shiˇ˗euˬ gaˇ neh gʼoꞈ dehꞈ laˇ˗eu tsawˇ haˬ zaˬ deuˬ, muiˬ dui dui˗eu jawˇ duˬ miˇ tsaˬ heu siˬ kʼoeˇ taˆ, jawˇ˗eu aˇ kawˬ˗aˬ za meh. (Luˇkaꞈ 23:43) Saˇ jaˇ dzaˬ taˬ˗euˬ, mehˬ hu paw heu hmˬ˗ahˇ, ehˇ dawˬ naˇ haˬ˗eu deuˬ naˇ, zaˬ muiˬ jawˇ saˇ doˆ dui dui˗awˇ, mˬ maˬ maˬ byaˆ zaˇ ziˇ ya dehꞈ meh. ‘tsawˇ muiˬ deuˬ miˇ kʼahˬ oꞈ˗awˇ, mˬ maˬ maˬ byaˆ zaˇ ziˇ ya jawˇ tehꞈ˗a’ lehˇ, Jaˇ liꞈ laꞈ kʼoeˇ ehˇ taˬ˗euˬ meh.—Ja ceuˬ˗eu 37:29.

Yawˇbaˆ 14:14, 15; Luˇkaꞈ 7:11-17; hawˇ˗eu Gʼaˬkʼehˇ 24:15 jiˇ ni, haw˗awˬ.

Aˬ JEˬ MIˇ NEH NAˇ HAˬ˗EU NGA: Zahˇ yawˬ zahˇ na luꞈ˗ahˇ jawˇ˗eu tsawˇ haˬ yawˬ gʼaˬ na luꞈ, guiˬ lahˬ shaˇ˗eu meh. Ehˇ kʼawꞈ tsawˇ haˬ myaˬ ni, yawˬ ha neh shaˇ˗euˬ jeˬ˗aˬ, gaˇ dahˇ maˬ tsoeˬ nya lehˇ noeˬ˗eu meh.

JAˇ LIꞈ MEHˬ˗EU JEˬ: Aˬ dui maꞈ guiˬ lahˬ shaˇ ngeh, aˬ yawꞈ yaw oeˇ tehꞈ˗ehˇ maˬ bi shaˇ poˆ˗eu gʼaˇ duˬ, Yeˬsuˇ mehˬ taˬ yaꞈ˗euˬ meh. “naw maꞈ guiˬ lahˬ shaˇ ngeh, lawˇ ciꞈ zaˬ nehꞈ toˇ toˇ˗eu loꞈ˗ehˇ taˬ gʼeh” lehˇ, Yeˬsuˇ ehˇ taˬ yaꞈ˗euˬ meh.(Maꞈtehˬ 6:7,YS97) Aˬ dui˗euˬ shaˇ dawˬ˗ahˇ, Miˬ yehˇ bi naˇ haˬ mawꞈ naˇ, aˬ yawꞈ ya leˇ˗eu jeˬ˗ehˇ ya shaˇ˗eu meh. Teu loꞈ˗ehˇ jahˇ˗eu gʼaˇ duˬ, aˬ dui Miˬ yehˇ geuꞈ mawꞈ˗eu jeˬ˗ahˇ siˬ nya˗eu loˬ meh. Siˬ nya˗euˬ loꞈ˗ehˇ, ya shaˇ caw meh. 1Yoˇhaˬ5:14 ˗ahˇ heu loꞈ˗ehˇ, ehˇ mawˇ nehˬ taˬ˗euˬ meh. “aˬ yawꞈ nui ma tsaˬ˗eu loꞈ˗ehˇ aˬ dui shaˇ naˇ, aˬ dui kʼaˇ shaˇ˗eu jeˬ˗ahˇ, aˬ yawꞈ naˇ haˬ nehˬ laꞈ tehꞈ˗a.”

Ja ceuˬ˗eu 65:2; Yoˇhaˬ 14:6, 14; hawˇ˗eu 1 Yoˇhaˬ 3:22 jiˇ ni, haw˗awˬ.

Aˬ JEˬ MIˇ NEH NAˇ HAˬ˗EU NGA: Tsawˇ haˬ myaˬ ni, pyuˇ shuiˇ, myaˆ pyawˬ naˇ mehˇ, muiˬ˗eu jaˬ˗eu jeˬ heu deuˬ jaˆ law nmˇ˗aˬ, aˇ naˆ ni byawˬ˗eu maˬ siˬ lehˇ noeˬ˗eu meh. Teu miˇ neh heu deuˬ˗ahˇ, leh jeh˗awˇ poˆ luꞈ meh. Ehˇ kʼawꞈ laꞈ kʼaˬ cehˇ nui saˇ oꞈ˗eu jeˬ˗ahˇ maˬ mawˇ˗a.

JAˇ LIꞈ MEHˬ˗EU JEˬ: Laꞈ kʼaˬ cehˇ nui saˇ oꞈ˗eu jeˬ˗ahˇ za mawꞈ naˇ, aˬ joˆ˗ehˇ ya jahˇ˗eu lehˇ,Yeˬsuˇ mehˬ taˬ yaꞈ˗euˬ meh.“Miˬ yehˇ uˆ lahˇ˗eu laꞈ kʼoeˇ” jawˇ˗eu deuˬ naˇ, laꞈ kʼaˬ cehˇ nui saˇ oꞈ˗eu jeˬ za meh. (Maꞈtehˬ 5:3, YS97) Aˬ diˇ nui saˇ za mawꞈ naˇ, aˬ dui ha loˬ˗eu jeˬ˗ahˇ, aˬ laꞈ ya mˇ keuˆ iˇ meh. Teu naˇ Miˬ yehˇ˗ahˇ taꞈ˗eu yaw tsaˬ yaw dawˇ gaˇ kawˆ hawˇ˗eu, aˬ dui gʼaˇ duˬ Miˬ yehˇ neh noeˬ taˬ˗euˬ jeˬ pyeuꞈ meh. Yaw tsaˬ yaw dawˇ jeˬ teu naˇ, Jaˇ liꞈ˗ahˇ poˆ mawˇ nya˗eu meh. Yaw tsaˬ yaw dawˇ jeˬ˗ahˇ, siˬ nya taˬ˗euˬ deuˬ naˇ, aˇ yehˇ huiˬ˗eu jeˬ hawˇ˗eu maˬ huiˬ˗eu jeˬ˗ahˇ, tseˇ paˆ nya˗eu meh. Aˬ dui maꞈ noeˬ tsehˆ gaˇ maˬ ehˇ, gaˇ mˇ gaˇ maˬ ehˇ, Jaˇ liꞈ neh bi sheuˬ hehˇ naˇ, aˬ dui maꞈ˗euˬ dehꞈ ziˇ muiˬ daˆ laˇ˗eu meh.—Luˇkaꞈ 11:28.

Dawˬdaˬ 3:5, 6, 13-18 hawˇ˗eu 1 Tiˆmoˇseˬ 6:9, 10 jiˇ ni, haw˗awˬ.

 Heu gaˇ ja sawˇ taˬ˗euˬ gaˇ kawˆ koꞈ kawˆ heu naˇ, Jaˇ liꞈ laꞈ kʼoeˇ˗euˬ gaˇ kawˆ ui cuiˆ tehꞈ˗a siˬ. Nawˇ heu naˆ maˬ tseˇ siˬ nya mawꞈ miˇ˗a laˬ? Nawˇ “Miˬ yehˇ uˆ lahˇ˗eu laꞈ kʼoeˇ” jawˇ˗eu gʼaˇ duˬ loˬ nga lehˇ, noeˬ siˬ˗euˬ tiˬ gʼaˬ naˇ, siˬ nya mawꞈ˗eu yaw duˬ baw tehꞈ˗a. Miˬ Yehˇ aˬdui maꞈ˗ahˇ kʼahˬ lahˇ˗eu jeˬ maˇ˗iˬ, aˬ jeˬ miˇ neh yaw doeˇ jeˬ hawˇ˗eu shaˬ˗eu zahˬ˗eu jeˬ teu myah myah˗ehˇ bi jaˆ˗euˬ nga? Ngaˬ˗euˬ nymˇ jiˇ muiˬ daˆ laˇ ni, aˬ joˆ˗ehˇ jahˇ paˬ nga? lehˇ, ehˇ˗eu gaˇ kawˆ heu deuˬ˗ahˇ nawˇ siˬ nya mawꞈ tehꞈ˗a. Jaˇ liꞈ˗aˬ, gaˇ kawˆ heu deuˬ˗ahˇ tehꞈ˗ehˇ maˬ gʼaˬ ni, nyaˆ taꞈ gaˇ kawˆ yaw myaˬ jeˬ˗ahˇ kʼawꞈ, ehˇ kʼoꞈ nehˬ nya˗eu meh.

Ehˇ kʼawꞈ ni nymˇ saˇ ka tsawˇ haˬ myaˬ ni, Jaˇ liꞈ˗ahˇ pyehˆ tseˇ˗eu gʼaˇ duˬ, guˆ guˆ tsi tsi˗ehˇ pyeuꞈ luꞈ˗eu meh. Aˬ yawꞈ maꞈ naˇ Jaˇ liꞈ˗aˬ, oeˇ dui dui˗awˇ, oˆ shaw˗eu yaw shaˬ˗a lehˇ noeˬ˗eu meh. Nawˇ Jaˇ liꞈ˗euˬ gaˇ kawˆ˗ahˇ siˬ nya laˇ ni, bi caw ba mawꞈ miˇ˗a loˇ? Yeˬhawˇbaˬ Saˇ kiˇ deuˬ, nawˬ˗ahˇ caw ba nehˬ nya˗eu, nyiˬ jeˬ lehˬ hmˬ taˬ˗euˬ ma.

Aˇ dahˬ beh˗eu jeˬ naˇ Miˬ yehˇ dawˬ naˇ haˬ˗awˬ lehˇ kuˇ˗eu sahˬ boꞈ paˇ dmˬ meh. Paˇ dmˬ heu dmˬ naˇ yaw kʼaˆ˗ehˇ maˬ dah˗eu deuˬ, Jaˇ liꞈ˗ahˇ bi pyehˆ tseˇ˗eu lehˇ, lehˬ hmˬ nehˬ taˬ˗euˬ ma. Nyiˬ jeˬ aˬ yawꞈ jeˬ naˇ, aˇ poeˬ maˬ jiˇ ni, iˇ kahˇ˗ahˇ Jaˇ liꞈ dzaw mehˬ laˇ˗eu jeˬ pyeuꞈ meh. Aˇ poeˬ maˬ jiˇ ni mehˬ nehˬ nya˗eu noeˬ dahˇ doe laˇ˗euˬ Yeˬhawˇbaˬ Saˇ kiˇ deuˬ, jawˇ nah yawˬ jaw na luꞈ nawˇ jawˇ gaˇ laˇ˗awˇ neh, Jaˇ liꞈ˗euˬ gaˇ kawˆ ja sawˇ laˇ nya ma. Nga maꞈ heu loꞈ˗ehˇ mˇ˗eu miˇ neh, nymˇ iˬ nah miˇ tsaˬ kʼoeˇ taˆ tsawˇ haˬ yaw myaˬ lam gʼaˬ, gaˇ dahˇ tsoeˬ˗eu jeˬ˗ahˇ za luꞈ meh. Teu deuˬ laꞈ kʼoeˇ neh myaˬ tiˬ paˆ “yaw tsaˬ yaw dawˇ jeˬ˗ahˇ poˆ mawˇ maˬ” lehˇ, laꞈ kʼaˬ tiˬ cehˇ ehˇ˗eu meh.

Yaw tsaˬ yaw dawˇ jeˬ˗ahˇ mawˇ˗euˬ naˆ maˬ tseˇ, poeˬ dzehˬ˗eu jeˬ maˬ jaˆ. Jaˇ liꞈ yaw tsaˬ yaw dawˇ jeˬ heu naˇ, jah bahˬ taˬ˗euˬ jeˬ, noeˬ bahˬ noeˬ lahˇ taˬ˗euˬ jeˬ, guˆ˗eu gaˆ˗eu jeˬ heu deuˬ˗ahˇ neh, bi doˆ laˇ˗eu meh. Heu tehꞈ˗ehˇ maˬ gʼaˬ ni, aˬ dui˗ahˇ noeˬ tmˬ˗eu jeˬ, yaw duˬ baw˗eu jeˬ, nui saˇ oꞈ˗eu jeˬ, heu deuˬ˗ahˇ jiˇ, paˇ biꞈ nehˬ laꞈ˗eu meh. Yeˬsuˇ ehˇ˗eu “yaw tsaˬ yaw dawˇ jeˬ˗ahˇ naw maꞈ siˬ nya laˇ˗awˇ, yaw tsaˬ yaw dawˇ jeˬ naw maꞈ˗ahˇ, bi buˬ iˇ tehꞈ˗a”.—Yoˇhaˬ 8:32.