Eŋɛnywiwema Luiki Tɔ 1:1-80
1 Amɛ sugbɔ je agbla yí ji dui kpɔ nɔ enu ciwo yí jɔ yí ŋwlɛ wo ɖɛ yí mìwo can mìkando wo ji pleŋpleŋ.
2 Mɛ ciwo yí kpɔ enu lɔwo tɔxu so tɔtɔmɛ yí gbenyi Mawu ŋɛdu lɔ dratɔwo yí nu enyɔ cɛwo nɔ mì.
3 Eyi taɖo mɛgan Teofilu, nyɛ can ŋji dui kpɔ nɔ enu lɔwo pleŋ kitokito so tɔtɔmɛ yí ɖui mɔ naŋwlɛ enu lɔwo eɖekplɔɖedo shigbe lé wojɔ do nɛ asɔ ɖaɖa eo.
4 Ŋwɛ ahan nɔ nàkando ji mɔ enu ciwo yí wokpla eo vayi nyi nyɔnɔnwi.
5 Avɔnsatɔ ɖeka ni le Ʒude fyɔ Erodi* hwenu yí tɔ mɔ Zakari. Éle avɔnsatɔwo gbɛbɔbɔ ci woyɔnɔ mɔ Abiya mɛ. Ashiɛ so Arɔn kannu mɛ yí tɔ mɔ Elizabɛti.
6 Wo koɖo ve nyi amɛjɔjɔɛwo le ŋmɛ nɔ Mawu yí wa ɖaŋ wanɔ do Yehowa* sewo ji nywiɖe.
7 Vɔ wodeɖo evi o, ɖo Elizabɛti nyi konɔ. Wo koɖo ve gbeshin sugbɔ.
8 Sɛnsɛndɔ vaɖo gbɛbɔbɔ ci mɛ Zakari le ji yí ele avɔnsatɔdɔ wakɔ le ŋmɛ nɔ Mawu.
9 Shigbe lé eyinɔ do* le avɔnsatɔwo dɔwawa lɔ mɛ nɛɔ, évaɖo Zakari ji mɔ áyi ŋkɔ nɔ Yehowa* le gbedoxɔ lɔ mɛ yí atɔ zo linfin.
10 Eyi amɛahwa lɔ pleŋ le gbedoɖa wakɔ le xexenu gacimɛ etɔtɔ zo linfin lɔ.
11 Yehowa* dɔla dasɛ yiɖeki ni yí le te le ɖushi mɛ nɔ avɔnsakpe ci ji wotɔnɔ zo linfin le.
12 Ci Zakari kpɔɛɔ, écaka le yiɖeki mɛ yí vɔn sugbɔ.
13 Vɔ mawudɔla lɔ nu ni mɔ: “Zakari ŋgbevɔn o, ɖo Mawu se ao kwifan. Ashio Elizabɛti aji ŋsuvi ɖeka nɔ eo yí nàna ŋkɔ yi mɔ Ʒan.
14 Ána yí eji ajɔ eo yí avivi nɔ eo sugbɔ yí amɛ sugbɔ akpɔ jijɔ do yi jiji nu.
15 Ðo ányi amɛ gangan le ŋmɛ nɔ Yehowa.* Vɔ deɖo anu vɛn alo aha sɛnŋ ɖekpokpui o, eyi gbɔngbɔn kɔkɔɛ aɖɔɛ gbɔxwe woaji* ŋtɔkpu,
16 eyi atrɔ Izraɛlivi sugbɔ hɛn gbɛ va wowo Mawu Yehowa* gbɔ.
17 Gbesɔ kpe niɔ, ásɔ Eli gbɔngbɔn koɖo yi ŋsɛn asɔ je ŋkɔ nɔ Mawu. Áwɛ yí vidawo ji avale shigbe ɖeviwo tɔ nɛ* yí etotritɔwo aɖo nunya adodwi shigbe amɛjɔjɔɛwo nɛ. Áwɛ ahan keŋ asɔ dra jukɔn lɔ do nɔ ale gbesɔsɔ asɛn Yehowa.”*
18 Zakari biɔ mawudɔla lɔ se mɔ: “Lé nawɛ akando enyɔ cɛ jiɔ? Ðo ŋku nyɔxo yí ashinyɛ can shin sugbɔ.”
19 Mawudɔla lɔ ɖo ŋci ni mɔ: “Enyɛ yí nyi Gabriɛli, mɛ ci yí nɔnɔ te le ŋmɛ nɔ Mawu. Wodɔŋ ɖaɖa nɔ maxo nuxu koɖo eo yí anu eŋɛnywi cɛ nɔ eo.
20 Vɔ kpɔ ɖa! Aɖe aku nɔ eo yí dàgbexo nuxu keke ana nɔ gbecigbe ŋcɛwo ajɔ o, ɖo dèkando anyi nyɔ ciwo yí avamɛ do wowo gamɛ ji o.”
21 Hwenɔnuɔ, jukɔn lɔ le te kpɔ Zakari yí ekpaca wo mɔ detotoɔ kaba so kɔkɔɛtɔxu lɔ o.
22 Ci etoɔ, desɛnŋ xoxoɔ nuxu nɔ wo o, eyi wodo jeshi mɔ yɛkpɔ enukpacamɛ* ɖeka le kɔkɔɛtɔxu lɔ. Alɔ̀ yí ewawa nɔ wo, vɔ desun ji yí xokɔ nuxu o.
23 Ci azan ciwo awa sɛnsɛndɔ kɔkɔɛ* yitɔ lɔwo vɔɔ, éso yi axomɛ.
24 Azan ɖewo goduɔ, ashiɛ Elizabɛti fɔn fu. Eyi Elizabɛti xo yiɖeki do xɔ na nɔ wleci amatɔn. Énu mɔ:
25 “Ŋci Yehowa* wa nɔŋ le ŋkeke cɛwo mɛ ke: Ésɔ ɖe le ji nɔŋ keŋ aɖe ŋkpɛn nɔŋ le amɛwo mɛ.”
26 Ci efu lɔ ɖo wleci amadɛn ɔ, Mawu dɔ mawudɔla Gabriɛli ɖaɖa Galile ju ci woyɔnɔ mɔ Nazarɛti mɛ,
27 nɔ ayi kpɔ nyɔnu lealɔji ɖeka ci wosɔ ɖo gbe nɔ ŋsu ɖeka ci yí tɔ mɔ Ʒozɛfu mɔ yɛaɖi ɖɛ. Ʒozɛfu so Davidi kannu mɛ. Nyɔnu lealɔji lɔ ŋkɔ yí nyi Mari.
28 Eyi mawudɔla lɔ va yí nu mɔ: “Ŋdo gbe nɔ eo. Eo ci Mawu wa xomɛvunu gangan nɔ, Yehowa* le koɖo eo.”
29 Vɔ yi nyɔ lɔwo dɔ yí Mari caka sugbɔ yí etekpɔ mɔ yeamɔŋje egbedonamɛ cɛ mɛ.
30 Eyi mawudɔla lɔ nu ni mɔ: “Mari ŋgbevɔn o, ɖo Mawu wa xomɛvu nɔ eo.
31 Kpɔ ɖa! Àfɔn fu yí aji ŋsuvi yí ana ŋkɔ yi mɔ Yesu.
32 Ávanyi amɛ gangan yí woayɔɛ mɔ Ejiɖaatɔ Vi yí Yehowa* Mawu asɔ edalɔ Davidi fyɔʒinkpin sɔ ni.
33 Ákpa nɔ Ʒakɔbu xwe lɔ sɔyi mavɔmavɔ yí vɔvɔnu dali nɔ yi Fyɔɖuxu o.”
34 Vɔ Mari biɔ mawudɔla lɔ se mɔ: “Lé ecɛ ajɔ do ci ŋdeyi ŋsu gbɔ kpɔɔ?”
35 Mawudɔla lɔ ɖo ŋci ni mɔ: “Gbɔngbɔn kɔkɔɛ ava eo ji yí Ejiɖaatɔ lɔ ŋsɛn ado fafɛ do eo ji. Eyi taɖo woayɔ mɛ ci àji mɔ kɔkɔɛtɔ, Mawu Vi.
36 Kpɔ ɖa! Elizabɛti ci yí nyi ao xomumɛtɔ can fɔn fu yí aji ŋsuvi ɖeka ci eku nyɔxo can. Yi fu ɖoɖoɔ wleci amadɛn yɛ, eyɛ ci woyɔnɔ mɔ nyɔnu konɔ;
37 ɖo enyɔ ci Mawu nu dagɔnmajɔ do ji o.”
38 Eyi Mari mɔ: “Kpɔ ɖa! Yehowa* dɔwavi yí ŋnyi! Le jɔ do ji shigbe lé ènui do nɛ.” Eyi mawudɔla lɔ so le gbɔ.
39 Eyi le ŋkeke ŋtɔ́wo mɛɔ, Mari so yí ɖe blɛ yi fini etowo le le eju ɖeka mɛ le Ʒuda.
40 Éyi Zakari xwe mɛ yí do gbe nɔ Elizabɛti.
41 Ci Elizabɛti se Mari gbedonamɛɔ, evi ci yí le xodu mɛ ni hwan, eyi gbɔngbɔn kɔkɔɛ ɖɔ Elizabɛti.
42 Édo axwa mɔ: “Wocu shi nɔ eo le nyɔnuwo mɛ, wocu shi nɔ evi ci yí le dɔmɛ nɔ eo!
43 Lé enyi do yí emɔ gangan cɛ hun nɔŋ yí anyi Xwetɔ nɔlɔ va ŋgbɔɔ?
44 Ðo ci ŋse ao gbedonamɛ kakaɔ, evi ci yí le dɔmɛ nɔŋ hwan koɖo jijɔ.
45 Eo ci yí kando ji kpɔkɔ jijɔ hɛnnɛ, ɖo enyɔ ciwo yí èse so Yehowa* gbɔ avamɛ keŋkeŋ.”
46 Eyi Mari mɔ: “Anyi se* kanfukɔ Yehowa.*
47 Eyi anyi gbɔngbɔn dami jijɔ sugbɔ kpɔkpɔ do Mawu ci yí nyi anyi Hwlɛngantɔ lɔ nu o,
48 ɖo éɖe ekɔ kpɔŋ, enyɛ ci yí nyi yi dɔwavi ci yí dele ɖe o. Kpɔ ɖa! So egbɛ jiɔ, egbejinɔtɔwo pleŋ ayɔnɔŋ mɔ jijɔtɔ,
49 ɖo Ŋsɛntɔnɔ lɔ wa enu ganganwo nɔŋ yí yi ŋkɔ le kɔkɔɛɖe.
50 Gashiagamɛɔ, ékunɔ ŋshishi nɔ mɛ ciwo yí vɔnnɔ ni.
51 Ésɔ yi lɔ̀ wa enu ganganwo, ékakanɔ mɛ ciwo yí egoyiyi susuwo le ji mɛ nɔ do gbe.
52 Éɖe ŋsu ŋsɛntɔnɔwo so efyɔʒinkpin ji yí gangan mɛ ciwo yí dele ɖe o;
53 ésɔ nunywiwo ɖɔ xodu nɔ mɛ ciwo yí shive ci yí nya dɔkunɔwo ashigba alɔgba.
54 Éva yí akpedo yi dɔwavi Izraɛli nu keŋ asɔ dasɛ mɔ yeɖokɔ ŋwi ŋshishi ci yemɔ yeaku ni tɛgbɛɛ
55 shigbe lé enui nɔ mìwo tɔgbiwo, Abrahamu koɖo viviɛwo* nɛ.”
56 Mari nɔ gbɔ yí wa wleci amɛtɔn han. Yi goduɔ, étrɔ yi axwe.
57 Ecɛyɛɔ, ega xo nɔ Elizabɛti yí aji vi, eyi eji ŋsuvi.
58 Yi xwexatɔwo koɖo yi mɛwo se mɔ Yehowa* ku ŋshishi ni sugbɔ yí wokpɔ jijɔ koɖi.
59 Ŋkeke amɛnyitɔ lɔɔ, wova mɔ woaso evo nɔ ɖevi lɔ yí wojikɔ asɔ edalɔ ŋkɔ Zakari ni.
60 Vɔ nɔlɔ nu nɔ wo mɔ: “Oo! Ʒan yí atɔ.”
61 Eyi wonu ni mɔ: “Mɛɖe tɔ ahan le ao xomu mɛ ba.”
62 Eyi wowa alɔ̀ nɔ dalɔ yí biɔɛ se mɔ lé eji mɔ woayɔ ɖevi lɔ ma.
63 Ébiɔ kpako ɖeka yí ŋwlɛ do ji mɔ: “Ʒan yí nyi yi ŋkɔ.” Eyi ekpaca wo pleŋ.
64 Zeɖeka vɔɔ, aglan hun ni yí yi ɖe tɔ soso yí etɔ nuxu xoxo yí kanfukɔ Mawu.
65 Vɔnvɔn lé wowo xwexatɔwo pleŋ yí wo pleŋ tɔ nuxu xoxo so ŋcɛwo nu le etowo tɔxu le Ʒude ju lɔ pleŋ mɛ.
66 Mɛ ciwo pleŋ yí se nyɔ lɔwo lé wo ɖɛ do wowo jiwo mɛ yí biɔkɔ se mɔ: “Nyi ɖevi cɛ avanyiɔ?” Ðo Yehowa* ŋsɛn le koɖi nyao.
67 Eyi edalɔ Zakari ɖɔ koɖo gbɔngbɔn kɔkɔɛ yí nu nyɔ ɖɛ mɔ:
68 “Woakanfu Yehowa* Izraɛli Mawu lɔ, ɖo ésɔ ɖe le ji nɔ yi mɛwo yí hwlɛn wo gan.
69 Éna hwlɛngantɔ ŋsɛntɔnɔ* ɖeka mì le yi dɔwavi Davidi xwe mɛ,
70 enyɔ cɛ enu ɖɛ to yi nyɔnuɖɛtɔ kɔkɔɛwo ji so gbeɖegbe.
71 Éɖo gbe mɔ yeahwlɛn mì gan le mìwo ketɔnɔwo koɖo mɛ ciwo pleŋ yí xaxa mì shi.
72 Áku ŋshishi nɔ mì shigbe lé eɖo gbe nɔ mìwo tɔgbiwo nɛ yí aɖo ŋwi enublabla kɔkɔɛ yitɔ.
73 Egbe cɛ yí eɖo nɔ mìwo tɔgbi Abrahamu.
74 Nɔ Mawu hwlɛn mì so mìwo ketɔnɔwo shi ɖegbɔɔ, ána yí mìasin yí mìdavɔn o,
75 keŋ nɔ mìanɔ gbeji ni yí awa enujɔjɔɛ le ŋmɛ ni le mìwo gbe pleŋ mɛ.
76 Vɔ eo vinyɛ, woayɔ eo mɔ Ejiɖaatɔ nyɔnuɖɛtɔ, ɖo àje ŋkɔ nɔ Yehowa* yí adra emɔwo do ɖɛ ni.
77 Ána yi mɛwo anya mɔ woasɔ yewo nuvɔnwo ke yewo yí ahwlɛn yewo gan,
78 ɖo mìwo Mawu ku ŋshishi nɔ mì sugbɔ. Ŋshishikuku cɛ ana klɛnklɛn aso jeŋkwi mɛ ava nɔ mì,
79 keŋ ana klɛnklɛn mɛ ciwo yí nɔ nyinɔnɔ do vinvin mɛ koɖo fini eku do vinvin do yí adasɛ emɔ nɔ mì to fafa mɔ ji.”
80 Eyi ɖevi lɔ shin yí ɖo ŋsɛn le gbɔngbɔn mɛ. Énɔ zogbeji keke na nɔ gbecigbe eyi Izraɛli jukɔn lɔ gbɔ.
Gɔnmɛnuŋwlɛnŋwlɛn
^ Kpɔ Enyɔgbe Veviwo mɛ Ðeɖe.
^ Kpɔ Enumɛɖeɖewo A5.
^ Alo “lé kɔnu lɔ yinɔ do.”
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Alo “so enɔlɔ dɔmɛ.”
^ Kpɔ Enumɛɖeɖewo A5.
^ Yi g̱ɔnmɛɖeɖe tiin: “Átrɔ vidawo ji anyi ɖeviwo tɔ.” Edasɛ mɔ woasɔ wowoɖekiwo hwe le ji mɛ.
^ Kpɔ Enumɛɖeɖewo A5.
^ Alo “ŋtegannu.”
^ Alo “jugbaja sɛnsɛndɔ.”
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Alo “Nyɛŋtɔ lɔ pleŋ.” Kpɔ Enyɔgbe Veviwo mɛ Ðeɖe.
^ Kpɔ Enumɛɖeɖewo A5.
^ Yi gɔnmɛɖeɖe tiin: “yi kannu.”
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Yi g̱ɔnmɛɖeɖe tiin: “hwlɛngan zo.” Kpɔ Enyɔgbe Veviwo mɛ Ðeɖe.
^ Kpɔ Enumɛɖeɖewo A5.
