Eŋɛnywiwema Luiki Tɔ 11:1-54
-
Lé woado gbe ɖaɖa do (1-13)
-
Kpɔwɛ gbedodoɖa (2-4)
-
-
Yesu zan Mawu gbɔngbɔn yí sɔ nya gbɔngbɔnvɔnwo (14-23)
-
Nɔ gbɔngbɔn makɔmakɔ trɔgbɔ va mɛɖe mɛ (24-26)
-
Jijɔkpɔkpɔ ŋtɔŋtɔ (27, 28)
-
Enujiŋ Ʒonasi tɔ (29-32)
-
Ŋci yí nyi kaɖigban nɔ agbetɔ lankpu (33-36)
-
Yesu do babɛ nɔ sɛnsɛnŋkɔnɔtɔ ayemɛnuwatɔwo (37-54)
11 Gbeɖeka Yesu dokɔ gbe ɖaɖa le fiɖeka yí ci eɖegbɔɔ, yi nukplavi ɖeka nu ni mɔ: “Axwetɔ kpla gbedodoɖa mì shigbe lé Ʒan kpla yi nukplaviwo nɛ.”
2 Eyi taɖo enu nɔ wo mɔ: “Hweɖekpokpuinu ci míado gbe ɖaɖaɔ, mínu mɔ: ‘Eda, ao ŋkɔ le mɛ́.* Ao Fyɔɖuxu le va.
3 Nà ŋɖuɖu gbeɖeka tɔ mì sɔgbe koɖo eʒan ŋkeke ɖekaɖeka tɔ.
4 Sɔ mìwo nuvɔnwo ke mì, ɖo mìwo can sɔ agɔjeje kenɔ mɛɖekpokpui ci yí je agɔ do mì; yí ŋgbelɔn nɔ mìaje tetekpɔ mɛ o.’”
5 Yi goduɔ, énu nɔ wo mɔ: “Mísɔɛ mɔ mɛɖeka le mí mɛ wa exlɔ ɖeka ɖɛ. Eyi eyi gbɔ le zandomɛ yí nu ni mɔ, ‘Anyi xlɔ do kpɔnnɔ amɛtɔn nɔŋ,
6 ɖo yinɛ anyi xlɔ ɖeka so mɔ ji yí va ŋgbɔ yɛ nɛ yí ŋdewa ŋɖe ɖɛ ani aɖu o.’
7 Vɔ yi xlɔ lɔ le xɔ mɛ yí nu ɖaɖɛ mɔ: ‘Mi aya dodo nɔŋ. Mìgla hɔn vɔ, yí nyɛ koɖo anyi viwo mlɔ anyi. Ŋdatɛnŋ aso asɔ ŋɖe nɔ eo o.’
8 Ŋnukɔ nɔ mí mɔ, nɔ daso asɔ ŋɖe ni ci wo koɖo yɛ nyi exlɔ taɖo can ɔ, kankandoji li mɔ edɔn ci egbe yí kpɔtɔ yí biɔbiɔɛ adɔ yí aso asɔ enushianu ci ejijiɛ ni.
9 Eyi taɖo ŋnukɔ nɔ mí mɔ, míkpɔtɔ abiɔkɔ yí woana mí; míkpɔtɔ ajijiɛ yí míakpɔɛ; míkpɔtɔ axoxoɔ ehɔn yí woahuin nɔ mí.
10 Ðo mɛɖekpokpui ci yí biɔkɔ nu akpɔ axɔ, mɛɖekpokpui ci yí jijiɛ nu akpɔɛ yí mɛɖekpokpui ci yí xoxoɔ ehɔn ɔ, woahuin ni.
11 Le nyɔnɔnwi mɛ ɖe, vida ɖe le mí mɛ yí eviɛ abiɔ kpavi yi yí asɔ edan jo ni do kpavi dumɛa?
12 Alo abiɔ klokloʒin yi yí asɔ kekli jo nia?
13 Eyi taɖo nɔ míwo ciwo yí nyi amɛvwinwo nya enunywiwo nana míwo viwo ɖe, Eda ci yí le jeŋkwi mɛ dana gbɔngbɔn kɔkɔɛ mɛ ciwo yí biɔɛni sɔwu ba!”
14 Le yiyimɛɔ, énya gbɔngbɔnvɔn ci yí na wodexonɔ nuxu le ŋsu ɖeka mɛ. Ci gbɔngbɔnvɔn lɔ toɔ, ŋsu lɔ tɔ nuxu xoxo yí ekpaca amɛahwa lɔ.
15 Vɔ mɛɖewo nu mɔ: “Bɛlzebul* ci yí nyi gbɔngbɔnvɔnwo ga yí na ŋsɛn yi yí esɔ nyakɔ gbɔngbɔnvɔnwo.”
16 Yí mɛbuwo ji mɔ yewoadui kpɔ yí tɔ nunu ni mɔ yɛ le wa enujiŋ ɖeka so jeŋkwi mɛ nɔ yewoakpɔ.
17 Ci Yesu nya ŋci yí le susu mɛ nɔ woɔ, énu nɔ wo mɔ: “Nɔ amɛwo le evu wakɔ le fyɔɖuxu ɖe mɛɔ, fyɔɖuxu lɔ gbannɔ yí nɔ amɛwo le evu wakɔ le axwe ɖe mɛɔ, axwe lɔ gbannɔ.
18 Ahanke nɔ Satana can le evu wakɔ koɖo yiɖeki ɖe, lé fyɔɖuxu yitɔ awɛ ale teɔ? Ðo mínunuɔ mɔ Bɛlzebul ŋsɛn ŋsɔ nyanya gbɔngbɔnvɔnwo.
19 Nɔ Bɛlzebul gbɔ ŋxɔ ŋsɛn le yí sɔ nyakɔ gbɔngbɔnvɔnwo ɖe, mi gbɔ míwo dokplɔtɔwo xɔ ŋsɛn le yí sɔ nyakɔ gbɔngbɔnvɔnwoɔ? Ecɛ yí dɔ taɖo míwo dokplɔtɔwo avaɖo kojo nɔ mí.
20 Vɔ nɔ enyi Mawu ŋsɛn* ŋxɔ yí sɔ nyakɔ gbɔngbɔnvɔnwoɔ, anyi Mawu Fyɔɖuxu lɔ va mí gbɔ le avomɛ nyɔnɔnwitɔ.
21 Nɔ ŋsu ŋsɛntɔnɔ ɖe wa ɖaŋ do ahwawanuwo yí cɔcɔ yi xweɔ, mɛɖe datɛnŋ ava fi yi nuwo o.
22 Vɔ nɔ mɛ ci yí sɛnŋ wui va je ji yí ɖu jiɔ, éxɔnɔ ahwawanu ciwo pleŋ ji ekando le shi yí sɔ yi nuwo manɔ nɔ mɛbuwo.
23 Mɛ ci yí dele ŋjiɔ, éfɔn gu do ŋji yí mɛ ci yí debɔnɔ amɛwo doju koɖoŋ kakanɔ wo.
24 “Nɔ gbɔngbɔn makɔmakɔ ɖe to le mɛɖe mɛɔ, édannɔ to finiwo yí eshi dele o yí ajijiɛ fini agbɔn domɛ le yí nɔ dekpɔ fiɖeɔ, énunɔ mɔ, ‘Matrɔ yi anyi xomɛ fini ŋso le.’
25 Nɔ évaɖoɔ, ékpɔnɔ mɔ wokplɔ axwe lɔ mɛ yí ɖo acɔ ni.
26 Yi goduɔ, évayi kplɔnɔ gbɔngbɔn amadrɛ bu ciwo yí nyinashu wu yiŋtɔ. Nɔ woɖo mɛ lɔ mɛɔ, wocinɔ mɛ. Eyi lé mɛ lɔ nɔnɔ do vanyinanɔ doji sɔwu sa.”
27 Hwenu enukɔ enyɔ cɛwoɔ, nyɔnu ɖeka do axwa le amɛahwa lɔ mɛ yí nu ni mɔ: “Nyɔnu ci dɔmɛ ènɔ yí egbedo anɔ nɔ eo kpɔkɔ jijɔ!”
28 Vɔ Yesu nu mɔ: “Oo, mɛ ciwo yí senɔ Mawu nyɔ lɔ yí wanɔ do ji yí kpɔnɔ jijɔ!”
29 Ci amɛahwa lɔ tɔ egbɔ susu dojiɔ, étɔ nunu mɔ: “Egbɛvi cɛwoɔ, amɛvwinwo yí wonyi; wojijiɛ mɔ yewoakpɔ enujiŋ, vɔ wodakpɔ enujiŋ ɖe to akpo nɔ Ʒonasi tɔ o.
30 Ðo shigbe lé Ʒonasi vanyi jeshidu nɔ Ninivutɔwo nɛɔ, ahanke Agbetɔvi lɔ can anyi jeshidu nɔ egbɛvi cɛwo nɛ.
31 Le kojoɖogbeɔ, fɔde fyɔnyɔnu lɔ afɔn so ku koɖo egbɛviwo yí ado hwɛ wo; ɖo éso keke nyigban lɔ vɔxu mɔ yeavase Salomɔ ŋɖɛnyanya. Vɔ mɛ ci yí gangan wu Salomɔ yí le lɛ.
32 Le kojoɖogbeɔ, Ninivutɔwo afɔn so ku koɖo egbɛviwo yí ado hwɛ wo, ɖo ci Ʒonasi nu Mawu nyɔ nɔ woɔ, wosi yí trɔ ji mɛ. Vɔ mɛ ci yí gangan wu Ʒonasi yí le lɛ.
33 Nɔ mɛɖe tɔ kaɖigban ɔ, desɔ danɔ do fini yí wla alo kishi* gɔnmɛ o, vɔ ésɔ danɔ do kaɖigbanhɛnnu ji nɔ aklɛn nɔ mɛ ciwo yí va axwe lɔ mɛ.
34 Ŋkuvi yí nyi kaɖigban nɔ agbetɔ lankpu. Nɔ ao ŋkuvi le enu kuɖeka jiɔ,* ao lankpu lɔ pleŋ mɛ aklɛn; vɔ nɔ ŋkuvi vwin* le eo shiɔ, ao lankpu lɔ can ado vinvin.
35 Eyi taɖo kpɔ nywiɖe nɔ klɛnklɛn ci yí le eo mɛ ŋgbenyi vinvin o.
36 Taɖo nɔ ao lankpu lɔ pleŋ kɔ yí fiɖe dedo vinvin niɔ, lankpu lɔ pleŋ akɔ shigbe lé kaɖigban kɔnɔ yí nanɔ klɛnklɛn nɛ.”
37 Ci enu enyɔ cɛ ɖegbɔɔ, Farizitɔ ɖeka yɔɛ mɔ yɛ le va ɖu nu koɖo ye. Eyi taɖo eyi yí nɔ kplɔn nu.
38 Vɔ ci Farizitɔ lɔ kpɔ mɔ deklɔ ashi* gbɔxwe yí ɖukɔ nuɔ, ékpacɛ.
39 Vɔ Axwetɔ lɔ nu ni mɔ: “Míwo Farizitɔwo, míklɔnɔ gotu nɔ kɔnkpu koɖo agban, gan yí xomɛ ɖɔ nɔ mí koɖo sukanujiji koɖo nuvɔnwawa.
40 Xlunɔwo! De mɛ ci yí wa agogbe lɔ ke yí wa xomɛ hɛnnɛ ba?
41 Vɔ nɔ mínakɔ nu wamɛnɔwoɔ,* mína wo koɖo xomɛ yí enushianu amɛ́ nɔ mí.
42 Vɔ babɛ nɔ mí Farizitɔwo, ɖo mínanɔ madowo nɔ egbehwɛnte ciwo yí nyi maŋti, rugbe koɖo amahwɛnte buwo, gan yí tashi enujɔjɔɛwawa koɖo lɔnlɔn ci míaɖo nɔ Mawu. Ele dandan mɛ mɔ míawanɔ ŋcɛwo, vɔ míŋgbegbe wawa do kpɛtɛwo ji hɛnnɛ o.
43 Babɛ nɔ mí Farizitɔwo, ɖo ʒinkpin ŋkɔtɔwo* ji nɔnɔ le Ʒuifuwo nukplaxuwo jɔnɔ ji nɔ mí yí míjinɔ mɔ wo le do gbe nɔ yewo koɖo bubu le amɛwo mɛ.*
44 Babɛ nɔ mí, ɖo míle shigbe yɔdu* ciwo yí dezezeɛ nywiɖe* nɛ, yí amɛwo tonɔ wo ji le manyamanya mɛ!”
45 Mɛ ciwo yí jeshi Ese lɔ ɖɛ nywiɖe ɖeka nu do nu ni mɔ: “Enukplamɛtɔ, ci ènukɔ enyɔ cɛwoɔ, èzukɔ mìwo canŋ?”
46 Eyi enu mɔ: “Babɛ nɔ míwo ciwo yí jeshi Ese lɔ ɖɛ nywiɖe hɛnnɛ, ɖo míblanɔ agban kpɛnkpɛn ciwo yí gbɔnnu hɛnhɛn nɔ amɛwo mɔ wo le hɛn, vɔ míwoŋtɔwo mídesɔ alɔ̀vi tɔnɔ agban lɔwo kpetii o!
47 “Babɛ nɔ mí, ɖo mídranɔ enyɔnuɖɛtɔwo yɔduwo* do, vɔ etrɔ nyi míwo tɔgbiwo yí wu wo!
48 Eze gbajɛɛ mɔ mínya ŋciwo míwo tɔgbiwo wa vayi. Ele ahan gan, mílɔn do wo ji. Ðo wowo yí wu enyɔnuɖɛtɔwo gan yí míwo dradra wowo yɔduwo do.
49 Eyi taɖo nunya Mawu tɔ can nu mɔ: ‘Nadɔ enyɔnuɖɛtɔwo koɖo apotruwo ɖaɖa wo yí woawu ɖewo yí aci yumɛ nɔ ɖewo,
50 keŋ nɔ woabiɔ enyɔnuɖɛtɔ ciwo pleŋ hun wokɔ ɖɛ so gɔnmɛjeje nɔ xexe lɔ egbɛvi cɛwo,
51 so Abɛli hun ji keke vaje Zakari hun ji, mɛ ci wowu le avɔnsakpe lɔ koɖo gbedoxɔ* lɔ gblamɛ.’ Ɛɛ, ŋnukɔ nɔ mí mɔ woabiɔ wowo hun egbɛvi cɛwo.
52 “Babɛ nɔ mí, míwo ciwo yí jeshi Ese lɔ ɖɛ nywiɖe, ɖo mísɔ nunya safli lɔ hɛn yi. Míwoŋtɔwo mídeɖo mɛ o yí mídenakɔ emɔ mɛ ciwo yí ji mɔ yewoaɖo mɛ hɛnnɛ o!”
53 Eyi taɖo ci Yesu so le nɔɔ, esekplamɛtɔwo koɖo Farizitɔwo fɔn do ji dɔmɛzitɔ yí tɔ enyɔ sugbɔ biɔbiɔɛ se keŋ asɔ do nyɔ aɖe mɛ ni,
54 wotrɔtrɔɛ keŋ ali le yi nuxuwo mɛ.
Gɔnmɛnuŋwlɛnŋwlɛn
^ Alo “amɛwo le kpɔɛni mɔ yɛnyi ŋkɔ mɛ́mi yí abuini.”
^ Satana woyɔnɔ ahan.
^ Yi g̱ɔnmɛɖeɖe tiin: “Mawu lɔ̀vi.”
^ Alo “kishi ci wosɔ drenɔ nu.”
^ Alo “kpɔnɔ nu nywiɖe.”
^ Alo “ci yí bianɔŋ.”
^ Farizitɔwo koɖo Ʒuifu buwo klɔnɔ alɔ̀ sɔgbe koɖo wowo kɔnuwo.
^ Yi gɔnmɛɖeɖe: “nɔ míku ŋshishi nɔ amɛwo yí na enu wo.” Kpɔ Enyɔgbe Veviwo mɛ Ðeɖe.
^ Alo “nywiwo.”
^ Yi gɔnmɛɖeɖe tiin: “afiwo mɛ.”
^ Alo “eŋwiɖoɖo yɔduwo.”
^ Alo “ciwo wodedo jeshi o.”
^ Alo “eŋwiɖoɖo yɔduwo.”
^ Alo “Mawu xwe.”
