Eŋɛnywiwema Luiki Tɔ 13:1-35
-
Nɔ mídetrɔ ji mɛɔ, ahanke míagu nɛ (1-5)
-
Labalu ci Yesu do so figici ci yí desɛn nu (6-9)
-
Le Sabatigbeɔ, Yesu da dɔ̀ nɔ nyɔnu ɖeka ci yí zɔnnɔ gozomɛ (10-17)
-
Labalu ci Yesu do so mutadiku koɖo kpɔnnɔcike nu (18-21)
-
Egbla ci woɖo ado keŋ gbɔxwe aɖo mɛ to xɔmɔnu hwɛhwɛ lɔ (22-30)
-
Erodi, “wataklɛ ŋtɔ́” (31-33)
-
Yesu fan avin do nu nɔ Ʒerusalɛmu (34, 35)
13 Hwenɔnuɔ, mɛ ciwo yí le nɔ ɖewo nu ŋci yí jɔ do Galiletɔ ɖekawo ji nɔ Yesu. Wole avɔn sakɔ yí Pilati wu wo yí sɔ wowo hun baka koɖo vɔnsa ciwo wowakɔ lɔwo.
2 Yesu nu do nu nɔ wo mɔ: “Míbukɔ mɔ Galiletɔ ŋtɔ́wo nyi amɛvɔnwo sɔwu Galiletɔ kpɛtɛwo taɖo yí ŋcɛ jɔ do wo jia?
3 Oo, vɔ manu nɔ mí mɔ nɔ mídetrɔ ji mɛɔ, ahanke míwo pleŋ can aku nɛ.
4 Alo míbu mɔ amɛ 18 ciwo ji Silue xɔ yiji lɔ mu je yí woku je agɔ sɔwu mɛkpɛtɛ ciwo yí le Ʒerusalɛmu yɔa?
5 Oo, vɔ manu nɔ mí mɔ nɔ mídetrɔ ji mɛɔ, ahanke míwo pleŋ can agu nɛ.”
6 Eyi edo labalu cɛ mɔ: “Ŋsu ɖeka do figici do yi vɛngble mɛ. Éva mɔ yeagbɛn yi sɛnsɛn vɔ dekpɔ ɖe o.
7 Énu nɔ vɛngbledetɔ lɔ mɔ, ‘So exwe amɛtɔn ke ŋva jinɔ sɛnsɛn le figici cɛ ji, vɔ ŋdekpɔnɔ ɖe o. Sui si! Nyi yí taɖo axɔ texwe gbaliɔ?’
8 Vɛngbledetɔ lɔ nu do nu ni mɔ, ‘Axwetɔ, tashi nɔ agbewa exwe ɖeka kpɔ, naku dodu trɔdi yí alɔ kɔlu kɔ do guinu ni.
9 Nɔ évasɛn le yiyimɛɔ, ányɔ nywiɖe. Vɔ nɔ desɛn ɔ, nàsui si hɔntɔn.’”
10 Ecɛyɛɔ, Yesu kplakpla nu amɛwo le Ʒuifuwo nukplaxu ɖeka le Sabatigbe.
11 Eyi nyɔnu ɖeka le nɔ yí gbɔngbɔnvɔn* le mɛ. Gbɔngbɔnvɔn lɔ na yí eble so exwe 18 ke yí zɔnnɔ gozomɛ yí detɛnŋ jɔnɔ o.
12 Ci Yesu kpɔɛɔ, énu ni mɔ: “Nyɔnu, edɔ̀ lɔ mi nɔ eo.”
13 Eyi Yesu sɔ yi lɔ̀wo da do ji yí zeɖeka tɔntɔn ɔ, nyɔnu lɔ jɔ do te yí tɔ Mawu kanfukanfu.
14 Vɔ dɔmɛ ve Ʒuifuwo nukplaxu jikpɔtɔ lɔ ci Yesu da dɔ̀ le Sabatigbe yí enu nɔ amɛahwa lɔ mɔ: “Ŋkeke amadɛn yí li nɔ edɔwawa, eyi taɖo míavanɔ le ŋkeke ŋtɔ́wo ji nɔ woadanɔ dɔ̀ nɔ mí. Vɔ ŋgbenyi Sabatigbe yɔ o.”
15 Axwetɔ lɔ ɖo ŋci ni mɔ: “Ayemɛnuwatɔwo, mɛɖekaɖeka le mí mɛ deɖenɔ ka nɔ yi nyibu alo esɔkɛtɛ le Sabatigbe yí kplɔɛ yinɔ eshinuxu ba?
16 Denyɔ mɔ woacu ka nɔ nyɔnu cɛ ci yí nyi Abrahamu vi nyɔnuvi ci Satana bla do ka mɛ na nɔ xwe 18 le Sabatigbe ba?”
17 Ci enu nyɔ cɛwoɔ, ŋkpɛn wa mɛ ciwo yí fɔn gu do ji, vɔ amɛahwa lɔ pleŋ le jijɔ kpɔkɔ nɔ nu gangan ciwo pleŋ ewa.
18 Eyi taɖo enu mɔ: “Nyi yí Mawu Fyɔɖuxu lɔ ɖyiɔ, nyi nu nasɔ dre doɔ?
19 Éle shigbe mutadiku* ci ŋsu ɖeka do do yi xɔkpagble mɛ nɛ. Éshin yí trɔ aci yí xeviwo ɖo atɔ do yi lɔ̀viwo ji.”
20 Égbenu mɔ: “Nyi nu nagbesɔ Mawu Fyɔɖuxu lɔ dre doɔ?
21 Éle shigbe kpɔnnɔcike ci nyɔnu ɖeka sɔ do kpɔnnɔɣɔ enudregban gangan* amɛtɔn mɛ keke kpɔnnɔɣɔ nyanya lɔ pleŋ vaho nɛ.”
22 Éyi juganwo koɖo kɔxwiwo mɛ yí kplakpla nu amɛwo yí sɔ mɔ kpe Ʒerusalɛmu.
23 Ŋsu ɖeka va biɔɛ se mɔ: “Axwetɔ, amɛ kankin yí akpɔ hwlɛngan a?” Énu nɔ wo mɔ:
24 “Mído gbla sɛnsinɖe yí aɖo mɛ to xɔmɔnu hwɛhwɛ lɔ. Ðo ŋnukɔ nɔ mí mɔ amɛ sugbɔ aji mɔ yewoaɖo mɛ, vɔ wodasun ji o.
25 Nɔ axwetɔ lɔ so yí gla hɔn lɔɔ, míale te le xexenu axoxoɔ ehɔn lɔ yí anukɔ mɔ, ‘Axwetɔ, huin nɔ mì.’ Vɔ ánu nɔ mí mɔ: ‘Ŋdenya fini míso o.’
26 Eyi míatɔ nunu mɔ, ‘Mìɖu nu yí nu aha koɖo eo yí èkpla nu amɛwo le mìwo mɔganwo ji nɛ.’
27 Vɔ ánu nɔ mí mɔ, ‘Ŋdenya fini míso o. Mígboteyi ɖaa, enumajɔmajɔwatɔwo mí pleŋ mínyi!’
28 Enɔ yí míafan avin yí aɖu aɖukli le nɛ, gayimɛ míakpɔ Abrahamu, Izaki, Ʒakɔbu koɖo enyɔnuɖɛtɔwo pleŋ le Mawu Fyɔɖuxu lɔ mɛ, gan yí woasɔ míwo dɔŋkpe do xexenu.
29 Amɛwo aso wezexu, weɖoxɔxu, tagbe koɖo fɔde yí anɔ kplɔn nu le Mawu Fyɔɖuxu lɔ mɛ hɛnnɛ.
30 Eyi mɛ ciwo yí nyi godutɔwo avanyi ŋkɔtɔwo yí mɛ ciwo yí nyi ŋkɔtɔwo avanyi godutɔwo.”
31 Le gaxoxo ŋtɔ́ mɛ pɛpɛpɛɔ, Farizitɔ ɖewo va gbɔ yí nu ni mɔ: “So le lɛ, ɖo Erodi jijiɛ mɔ yeawu eo.”
32 Eyi enu nɔ wo mɔ: “Míyi nu nɔ wataklɛ ŋtɔ́ mɔ, ‘Kpɔ ɖa! Ŋnyanya gbɔngbɔnvɔnwo yí dada dɔ̀ nɔ amɛwo egbɛ koɖo esɔ yí nyisɔ keɔ, naɖegbɔ anyi dɔ.’
33 Vɔ eɖekpokpuiɖe ci anyiɔ, ŋɖo ayi anyi dɔ ji egbɛ, esɔ koɖo ŋkeke ci yí akplɔɛ do yí ŋɖo ayi emɔzɔnzɔn lɔ ji, ɖo wodatɛnŋ awu enyɔnuɖɛtɔ le fibu sɔ zeto Ʒerusalɛmu nu o.
34 Ʒerusalɛmu, Ʒerusalɛmu ci yí wu enyɔnuɖɛtɔwo yí xo kpe mɛ ciwo wodɔ ɖaɖa gbɔ. Ŋji zenɛniɖe mɔ nabɔ viowo do ju shigbe lé kloklovinɔ bɔnɔ eviɛwo do yi wawo gɔnmɛ nɛ! Vɔ dèlɔn o.
35 Míkpɔ ɖa! Wotashi míwo xwe ɖɛ nɔ mí. Eyi taɖo ŋnukɔ nɔ mí mɔ, mídagbevakpɔŋ o, keke avaje hwenu yí míanu mɔ: ‘Woacu shi nɔ mɛ ci yí gbɔgbɔ le Yehowa* ŋkɔ mɛ!’”
Gɔnmɛnuŋwlɛnŋwlɛn
^ Alo “gbɔngbɔn ci yí xɔnɔ ŋsɛn le amɛ shi.”
^ Ényi aciku hwɛhwɛ ɖeka ci wokpɔnɔ le Palestine yí aci yitɔ jinjinnɔ mɛta amɛnɛ han.
^ Yi gɔnmɛɖeɖe tiin: “sea dredre.” Sea ɖeka nyi lita 7,33. Kpɔ Enumɛɖeɖewo B14.
^ Kpɔ Enumɛɖeɖewo A5.
