Eŋɛnywiwema Luiki Tɔ 15:1-32
15 Tagajɔtɔwo pleŋ koɖo nuvɔnwatɔwo pleŋ bɔ do Yesu gbɔ keŋ aɖo to yi.
2 Eyi Farizitɔwo koɖo esekplamɛtɔwo totoɔ nyɔ mɔ: “Ŋsu cɛ xɔkɔ nuvɔnwatɔwo yí ɖuɖuɔ nu koɖo wo.”
3 Yesu do labalu cɛ nɔ wo yí nu mɔ:
4 “Mi yí le mí mɛ yí nɔ éwa lɛngbɔ 100 ɖɛ yí kuɖeka bu ni ɖe, datashi 99 lɔwo do gbemɛ yí ayi ji kuɖeka lɔ kpɔ keke akpɔɛɔ?
5 Nɔ ékpɔɛɔ, ákɔɛ do abɔta yí akpɔkɔ jijɔ.
6 Nɔ égbɔ va axomɛɔ, áyɔ yi xlɔwo koɖo yi xwexatɔwo yí anu nɔ wo mɔ, ‘Míkpɔ jijɔ koɖoŋ, ɖo ŋkpɔ anyi lɛngbɔ ci yí bu lɔ.’
7 Ŋnukɔ nɔ mí mɔ, ahanke yí jijɔ ci woakpɔ le jeŋkwi mɛ nɔ nuvɔnwatɔ ɖeka trɔ ji mɛ asugbɔ wu jijɔ ci woakpɔ do amɛjɔjɔɛ 99 ciwo yí deʒan jimɛtrɔtrɔ nu nɛ.
8 “Alo nɔ nyɔnu ɖe wa drakma* amɛ́wo ɖɛ yí ɖeka bu ni ɖe, datɔ kaɖigban yí akplɔ yi xɔ mɛ yí aji kpɔ nywiɖe keke akpɔɛ ba?
9 Eyi nɔ ékpɔɛɔ, áyɔ yi xlɔwo* koɖo yi xwexatɔwo yí anu mɔ, ‘Míkpɔ jijɔ koɖoŋ, ɖo ŋkpɔ drakma* ci yí bu nɔŋ lɔ.’
10 Ŋnukɔ nɔ mí mɔ, ahanke eji jɔnɔ mawudɔlawo sugbɔ nɛ nɔ nuvɔnwatɔ ɖeka trɔ ji mɛ.”
11 Yi goduɔ, énu mɔ: “Evi ŋsuvi amɛve le ŋsu ɖeka shi.
12 Eyi vihwɛtɔ nu nɔ dalɔ mɔ, ‘Danyɛ, ma cinɔnu lɔ keŋ asɔ anyi kpaxwe nɔŋ.’ Eyi vida lɔ ma yi nuwo nɔ wo.
13 Azan ɖewo goduɔ, vihwɛtɔ lɔ potɛ yi nuwo pleŋ yí yi eju jinjin ɖeka mɛ yí vayi nɔ agbedɔndɔn* yí dahɛn yi nuwo pleŋ.
14 Ci ezan yi nuwo pleŋ vɛɔ, eju gangan ɖeka to le eju lɔ pleŋ mɛ yí enuwo wudi,
15 keke evayi tɔ egbɛ dodo koɖo juɔ mɛ tɔ ɖeka yí yɛsɔɛ ɖaɖa yi boji yí evayi kpɔkpɔ ehawo ji ni.
16 Eyi ejinɔ mɔ yeaɖu ŋɖuɖu ci eha lɔwo ɖunɔ, vɔ mɛɖe denanɔ ɖe yi o.
17 “Ci evanyɔ le yiɖeki mɛɔ, émɔ, ‘Ŋɖuɖu sugbɔ le danyɛ dɔwaviwo shi gan yí shive jikɔ asɔ nyɛ wu do lɛ!
18 Naso ayi danyɛ gbɔ anu ni mɔ: “Danyɛ, ŋje agɔ do eo koɖo Mawu le jeŋkwi mɛ.
19 Ŋdegbeje yí nàyɔŋ mɔ vio o. Sɔŋ sɔ wa ao dɔwavi.”’
20 Eyi eso yí kpe edalɔ gbɔ. Ci edalɔ kpɔɛ egbɔgbɔ le azɔge ɖaaɔ, yi nu wa ŋshishi ni yí elɔ ju yí fin* yí ki shi ni.
21 Eyi eviɛ nu ni mɔ, ‘Danyɛ, ŋje agɔ do eo koɖo Mawu le jeŋkwi mɛ. Ŋdegbeje yí nàyɔŋ mɔ vio o.’
22 Vɔ edalɔ nu nɔ yi dɔwaviwo mɔ, ‘Míɖe blɛ asɔ awu lɛgbɛ nywi ɖeka vɛ keŋ adui ni. Mído gavi do alɔ̀ ni yí ado fɔkpa ni.
23 Míle nyibusu doami lɔ vɛ hɛnnɛ yí awui nɔ mìaɖu nu yí akpɔ jijɔ.
24 Ðo vinyɛ cɛ ku sa, vɔ étrɔva agbe. Ébu sa yí wokpɔɛ.’ Eyi wotɔ jijɔ kpɔkpɔ.
25 “Eviɛ ŋsuvi xoxutɔ yi boji yí ci etrɔ gbɔgbɔ yí gogokɔ axwe lɔɔ, ése woxoxoɔ miziki yí ɖuɖuɔ we.
26 Eyi taɖo eyɔ dɔwavi ɖeka yí biɔɛ se mɔ nyi yí jɔjɔ ma.
27 Eyi dɔwavi lɔ nu ni mɔ, ‘Nɔvio yí gbɔ. Ci míwo da kpɔɛ yí egbɔ yí le nywiɖeɔ,* éwu nyibusu doami lɔ.’
28 Vɔ ŋsuvi xoxutɔ lɔ do dɔmɛzi yí gbe mɔ yedagbeɖo axwe lɔ mɛ o. Eyi edalɔ va gbɔ yí tɔ kuku ɖeɖe ni mɔ yɛ le va axomɛ.
29 Énu nɔ dalɔ mɔ, ‘Ènyaa? Exwe sugbɔ ke yí ŋwakɔ dɔ koɖo eo. Ŋdegbe to nɔ eo kpɔ o, gan yí dèna gbɔvi ɖeŋ kpɔ nɔ masɔ kpɔ jijɔ koɖo anyi xlɔwo o.
30 Vɔ ci ao vi hunnɔ ci yí vayi dahɛn ao nuwo koɖo sakabowo gbɔ zeɖeka ahan ɔ, èwu nyibusu doami lɔ ni.’
31 Eyi edalɔ nu ni mɔ, ‘Evinyɛ, èle ŋgbɔ tɛgbɛɛŋ. Ŋciwo pleŋ yí le ŋshiɔ, aotɔwo yí wonyi.
32 Vɔ ele mɔ mìaɖu azan yí akpɔ jijɔ. Ðo nɔvio ku sa, vɔ étrɔva agbe. Ébu sa yí wokpɔɛ.’”
Gɔnmɛnuŋwlɛnŋwlɛn
^ Kpɔ Enumɛɖeɖewo B14.
^ Alo “yi xlɔ nyɔnushiwo.”
^ Kpɔ Enumɛɖeɖewo B14.
^ Alo “nɔ agbe lé edrui do.”
^ Yi gɔnmɛɖeɖe tiin: “je kɔ ji ni.”
^ Alo “le lanmɛsɛn mɛ.”
