Eŋɛnywiwema Luiki Tɔ 16:1-31
16 Yesu gbenu nɔ nukplavi lɔwo mɔ: “Ŋsu hotonɔ ɖeka li yí wovanu ni mɔ yi xwejikpɔtɔ dadahɛn yi nuwo.
2 Eyi ŋsu lɔ yɔ axwejikpɔtɔ lɔ yí mɔ, ‘Enyɔ ciwo yí nyi cɛ ŋseseɛ so eo nuɔ? Va mìawa kɔnŋta nɔ edɔ ciwo yí èwa, ɖo dàgbekpɔ anyi xwe ji ke o.’
3 Axwejikpɔtɔ lɔ nu le yiɖeki mɛ mɔ, ‘Nɔ anyi xwetɔ xɔ edɔ cɛ le ŋshi yɛ ɖe, lé nawɛɔ? Kpɔ ŋsɛn dele ŋshi nade agble o yí enubiɔbiɔ can wanɔ ŋkpɛn nɔŋ.
4 Ɛhɛɛn! Ŋnya ŋci nawa yí nɔ woxɔ axwejikpɔkpɔdɔ lɔ le ŋshiɔ, amɛwo axɔŋ do wowo xwewo mɛ.’
5 Éyɔ mɛ ciwo yí ɖu fɛn do yi xwetɔ ɖekaɖeka yí biɔ amɛ ŋkɔtɔ se mɔ, ‘Nɛni èɖu do anyi xwetɔɔ?’
6 Éɖo ŋci mɔ, ‘Olivumi lita 2 200.’* Eyi enu ni mɔ, ‘Xɔ ao fɛnwema, nɔ nyinɔnɔ keŋ aŋwlɛ lita 1 100 blaŋ.’
7 Yi goduɔ, ébiɔ mɛbu se mɔ, ‘Eɔ ɖe, nɛni fɛn èɖuɔ?’ Éɖo ŋci ni mɔ, ‘Jinuku enudregban* gangan sanŋdi ɖeka.’ Eyi enu ni mɔ, ‘Xɔ ao fɛnwema yí aŋwlɛ 80.’
8 Ci axwejikpɔtɔ lɔ nyi amɛmajɔmajɔ can ɔ, yi xwetɔ kanfui nɔ ŋɖɛ ci enya,* ɖo xexe* cɛ mɛ viwo nyanɔ ŋɖɛ sɔwu klɛnklɛn viwo nɔ wowakɔ nu ɖaɖa wowo hwenu mɛ tɔwo gbɔ.
9 “Ŋnukɔ nɔ mí hɛnnɛ mɔ: Mízan dɔkunu majɔmajɔwo asɔ wa exlɔwo ɖɛ, keŋ nɔ wodegbevaliɔ, woaxɔ mí do texwe mavɔwo.
10 Mɛ ci yí nɔ gbeji le enu nyɛkuin mɛɔ, énɔnɔ gbeji le enu sugbɔ mɛ hɛnnɛ yí mɛ ci yí dewa enujɔjɔɛ le enu nyɛkuin mɛɔ, dewanɔ enujɔjɔɛ le enu sugbɔ mɛ hɛnnɛ o.
11 Taɖo nɔ mídedasɛ mɔ mínyi egbejinɔtɔwo le dɔkunu majɔmajɔwo zanzan mɛ ɖe, mi yí asɔ dɔkunu adodwiwo do alɔ̀ mɛ nɔ míɔ?
12 Yí nɔ mídedasɛ mɔ mínyi egbejinɔtɔ le mɛbu nuwo zanzan mɛ ɖe, mi yí asɔ ci yí nyi míwotɔ jo nɔ míɔ?
13 Edɔwavi ɖe datɛnŋ anyi hwashi nɔ axwetɔ amɛve o, ɖo ágbe ɖeka yí alɔn amɛvetɔ, alo áku do ɖeka nu yí agbali amɛvetɔ. Mídatɛnŋ anyi hwashi nɔ Mawu koɖo Dɔkunuwo o.”
14 Farizitɔ ciwo yí eho jɔnɔ ji nɔ le nɔ yí seseɛ enyɔ cɛwo pleŋ, eyi wotɔ Yesu koko.
15 Eyi taɖo enu nɔ wo mɔ: “Mídanasɛ mɔ mínyi amɛjɔjɔɛwo le ŋmɛ nɔ agbetɔwo, vɔ Mawu nya ŋci yí le ji mɛ nɔ mí. Ðo ŋci agbetɔwo kpɔnɔ mɔ yɛnyi enu gangan ɔ, enunyɔŋ enyi le ŋmɛ nɔ Mawu.
16 “Ese lɔ koɖo enyɔ ciwo yí Enyɔnuɖɛtɔwo nu li keke vaje Ʒan hwenu. So hwenɔnuɔ, woxokɔ nuxu so Mawu Fyɔɖuxu lɔ nu yí enyi eŋɛnywi yí amɛ hamɛhamɛwo pleŋ dokɔ gbla veviɖe mɔ yewoaɖo mɛ.
17 Le nyɔnɔnwi mɛɔ, jeŋkwi koɖo nyigban tɛnŋ gu, vɔ Ese lɔ alo yi wemakwi kankin ɖe dagɔnma jɔ do ji o.
18 “Mɛɖekpokpui ci yí gbe ashiɛ keŋ yí ɖe mɛbuɔ, éwa hashi yí mɛɖekpokpui ci yí ɖe nyɔnu ci asuɔ gbe wa hashi.
19 “Ŋsu hotonɔ ɖeka li yí donɔ ehoganwuwo. Gbeɖeka duuɔ, éɖunɔ agbe haan yí wanɔ mɛjɔmɛ.
20 Vɔ wokɔnɔ enubiɔtɔ ɖeka ci yí tɔ mɔ Lazar ci abiwo ɖɔ gotu nɔ va danɔ do yi gbo ji.
21 Eyi ejinɔ mɔ yeaɖu ŋɖuɖu ciwo yí hlɛnhlɛn so ŋsu hotonɔ lɔ kplɔn ji. Ɛɛ, avuwo vaɖyiɖɔnɔ abi lɔwo mɛ ni ŋtɔkpu.
22 Le hwenu ɖewo goduɔ, enubiɔtɔ lɔ ku yí mawudɔlawo kɔɛ yi Abrahamu gbɔ.*
“Hotonɔ lɔ can ku yí woɖyi.
23 Ci ele Yɔdu* lɔ mɛ yí sekɔ gbazaviɔ, éfɔn ta yi eji yí kpɔ Abrahamu le azɔge ɖaa yí Lazar le axa ni.*
24 Eyi taɖo edo axwa mɔ, ‘Danyɛ Abrahamu, ku ŋshishi nɔŋ yí adɔ Lazar ɖaɖa nɔ asɔ lɔ̀vi do eshi mɛ keŋ aja do aɖe ji nɔŋ, ɖo ŋseseɛ gbazavi le ezo gangan cɛ mɛ.’
25 Abrahamu nu mɔ, ‘Evinyɛ, ɖo ŋwi mɔ èxɔ ao nunywiwo le agbe mɛ, vɔ Lazar yɛxɔ dɔndɔntɔwo. Ecɛyɛɔ, ékpɔ akɔnfɛ le lɛ, vɔ eɔle gbazavi sekɔ.
26 Can hɛnnɛɔ, dodu gangan ɖeka le gblamɛ nɔ mìwo koɖo míwo yí nɔ mɛɖe ji mɔ yeava mì gbɔ lɛɔ, dasun ji o; ahanke mɛɖe datɛnŋ aso le mì gbɔ yí ava mí gbɔ hɛnnɛ nɛ.’
27 Ehotɔnɔ lɔ nu mɔ, ‘Nɔ enyi ahan yɔ nɛɔ, edanyɛ, ŋɖe kuku nɔ eo, ɖo Lazar ɖaɖa edanyɛ xomɛ,
28 ɖo nɔvinyɛ amatɔn li, nɔ adre nu mɛ nɔ wo nywiɖe nɔ wowo can ŋgbevava gbazavisese tɔxu lɛ o.’
29 Vɔ Abrahamu nu mɔ, ‘Moizi koɖo enyɔnuɖɛtɔwo le wo gbɔ, wo le ɖo to wowo.’
30 Eyi hotonɔ lɔ nu mɔ, ‘Oo, edanyɛ Abrahamu, nɔ mɛɖe so mɛkukuwo mɛ yí yi wo gbɔɔ, woatrɔ ji mɛ.’
31 Vɔ Abrahamu nu ni mɔ, ‘Nɔ wodeɖo to Moizi koɖo enyɔnuɖɛtɔwoɔ, wodaɖo to mɛ ci yí aso le amɛkukuwo mɛ ayi hɛnnɛ o.’”
Gɔnmɛnuŋwlɛnŋwlɛn
^ Yi gɔnmɛɖeɖe tiin: “baf 100.” Baf 1 nyi lita 22 han. Kpɔ Enumɛɖeɖewo B14.
^ Alo “kɔr dredre sanŋdi ɖeka.” Kɔr 1 nyi lita 220. Kpɔ Enumɛɖeɖewo B14.
^ Alo “wa enu le nunya mɛ, wa ɖaŋ wa enu.”
^ Kpɔ Enyɔgbe Veviwo mɛ Ðeɖe.
^ Yi gɔnmɛɖeɖe tiin: “akɔnnu nɔ Abrahamu.”
^ Alo “Hadɛsi,” ci yí nyi agbetɔviwo pleŋ yɔdu. Kpɔ Enyɔgbe Veviwo mɛ Ðeɖe.
^ Yi gɔnmɛɖeɖe tiin: “akɔnnu ni.”
