Eŋɛnywiwema Luiki Tɔ 17:1-37
17 Yi goduɔ, Yesu nu nɔ yi nukplaviwo mɔ: “Enuwo ali adɔn amɛwo do nuvɔn mɛ dandan, vɔ babɛ nɔ mɛ ci yí adɔ!
2 Nɔ wobla ekpecunu do kɔ ni yí sɔ dɔ ɖaɖa axu mɛɔ, ányɔ ni sɔwu nɔ édo fɔbli ɖevi cɛwo ɖe.
3 Míkpɔ míwoɖekiwo ji nywiɖe. Nɔ nɔvio je agɔ do eoɔ, gbe nyɔ ni, eyi nɔ étrɔ ji mɛɔ, nàsɔ ki.
4 Nɔ egbenyi zeadrɛ yí eje agɔ do eo gbeɖeka can yí trɔgbɔ zeadrɛ yí mɔ, ‘sɔ keŋ* ɔ,’ èɖo asɔ ki.”
5 Ecɛyɛɔ, apotru lɔwo nu nɔ Axwetɔ lɔ mɔ: “Do xɔse xɔse ji nɔ mì.”
6 Eyi Axwetɔ lɔ nu nɔ wo mɔ: “Nɔ míɖo xɔse yí egangan shigbe mutadiku* nɛɔ, míanu nɔ aci* cɛ mɔ, ‘Hun ayi je axu mɛ!’ eyi ase gbe nɔ mí.
7 “Mi yí le mí mɛ nɔ hwashi yitɔ ci yí dedeɛ agble ni alo kplɔkplɔ elanwo ni gbɔ so bojiɔ, anu ni mɔ, ‘Va nɔ kplɔn nu zeɖeka aɖu nuɔ’?
8 Ewaɖeɔ, de nu anu ni mɔ, ‘Ðɔli nuwo aɖa fiɛfiŋɖuɖu nɔŋ keŋ aɖo kplɔn nɔŋ yí nɔ ŋɖu nu ɖegbɔɔ, eɔŋtɔ navasɔ nu aɖu’ ba?
9 Ádo akpe nɔ hwashi lɔ nɔ edɔ lɔwo ci eɖo ni yí ewaa? Oo.
10 Ahanke nɔ míwo can míwa edɔ ciwo pleŋ woɖo nɔ mí ɖegbɔɔ, mínu mɔ: ‘Hwashi gbaliwo yí mìnyi. Ŋci mìɖo awa yí mìwa.’”
11 Ci Yesu sɔ mɔ kpe Ʒerusalɛmu ɔ, éto Samari koɖo Galile lixo ji.
12 Ci eɖo kɔxwi ɖeka mɛɔ, ŋsu amɛ́wo ɖekawo ciwo yí lé ekpodɔ̀ do go yi, vɔ wonɔ te le azɔge ni.
13 Eyi wodo axwa yí nu mɔ: “Yesu, Enukplamɛtɔ, ku ŋshishi nɔ mì!”
14 Ci ekpɔ woɔ, énu nɔ wo mɔ: “Míyi dasɛ míwoɖekiwo nɔ avɔnsatɔwo.” Eyi ci woɖedoɔ, edɔ̀ mi nɔ wo.
15 Ci mɛɖeka le wo mɛ kpɔ mɔ edɔ̀ mi nɔ yeɔ, étrɔ yí kanfukɔ Mawu koɖo axwa.
16 Eyi evacɔn ŋmɛ anyi do afɔ gbɔ nɔ Yesu yí do akpe ni. Samaritɔ enyi hɛnnɛ.
17 Yesu biɔ se mɔ: “De amɛ amɛ́wo lɔwo pleŋ yí edɔ̀ mi nɔ ba? Ecɛyɛ ɖe, fini amɛ amashiɖekɛ kpɛtɛwo leɔ?
18 Mɛɖe detrɔgbɔ le wo mɛ yí ava do akpe nɔ Mawu o yí enyi jukɔn bu mɛ tɔ cɛ ɖekɛ yí trɔgbɔa?”
19 Yi goduɔ, Yesu nu ni mɔ: “So ayi, xɔse ci èɖo na edɔ̀ mi nɔ eo.”
20 Ci Farizitɔwo biɔɛ se mɔ hwenu Mawu Fyɔɖuxu lɔ ava maɔ, éɖo ŋci nɔ wo mɔ: “Mawu Fyɔɖuxu lɔ dava yí woakpɔɛ gannaganna o.
21 Amɛwo danu mɔ, ‘Éle lɛ!’ alo ‘Hunɖaa!’ o. Ðo míkpɔ ɖa, Mawu Fyɔɖuxu lɔ le dodomɛ nɔ mí.”*
22 Énu nɔ nukplavi lɔwo mɔ: “Ŋkekewo li gbɔgbɔ yí míaji mɔ yewoakpɔ Agbetɔvi lɔ ŋkekewo ɖeka, vɔ mídakpɔ o.
23 Eyi amɛwo anu nɔ mí mɔ, ‘Éle hunɖaa!’ alo ‘Éle lɛ!’ Míŋgbeto alo akplɔ wo do o.
24 Ðo shigbe lé jeŋkwi ɖenɔ zo le akpaxwe ɖeka yí klɛnklɛn yitɔ vayinɔ akpaxwe ɖetɔ nɔ jeŋkwi lɔ nɛɔ, ahanke anɔ le Agbetɔvi lɔ ŋkekewo ji nɛ.
25 Vɔ doŋkɔɔ, éɖo akpe fun sugbɔ yí egbɛvi cɛwo agbi.
26 Eyi shigbe lé enɔ do le Nowe hwenu nɛɔ, ahanke anɔ le Agbetɔvi lɔ hwenu hɛnnɛ nɛ:
27 Amɛwo ɖuɖuɔ yí nunuɔ, ŋsuwo ɖekɔ nyɔnu yí wosɔ nyɔnuwo nakɔ asu keke je hwecinu yí Nowe ɖo tɔjihun daka lɔ mɛ yí Eshiɖɔɖɔ lɔ va yí wu wo pleŋ.
28 Ahanke enɔ le Lɔti ŋkekewo mɛ hɛnnɛ nɛ: Amɛwo ɖuɖuɔ yí nunuɔ, wosasa yí xwlexwleɛ, wododoɔ jinukuwo yí cucuɔ xɔwo.
29 Vɔ gbecigbe Lɔti to so Sodomu ju lɔ mɛɔ, ezo koɖo ezokpe ja so jeŋkwi mɛ yí wu wo pleŋ.
30 Ahanke anɔ le ŋkeke ci ji woadasɛ Agbetɔvi lɔ le hɛnnɛ nɛ.
31 “Le ŋkeke ŋtɔ́ jiɔ, mɛ ci yí le xɔ ta vɔ yí yi nuwo le xɔ mɛ ŋgbeɖyi mɔ yealɔ wo o, ahanke mɛ ci yí le boji deɖo atrɔgbɔ va axomɛ mɔ yeasɔ ŋciwo egbe ɖɛ nɛ.
32 Míɖo ŋwi Lɔti ashiɛ.
33 Mɛɖekpokpui ci yí jijiɛ mɔ yeahwlɛn ye gbe* gan ɔ, ásɔ bu. Vɔ mɛɖekpokpui ci yí bu yi gbeɔ,* ágbekpɔɛ.
34 Ŋnukɔ nɔ mí mɔ le ezan ŋtɔ́ mɛɔ, amɛ amɛve ale eba kuɖeka ji, vɔ woakplɔ ɖeka yí agbe xlɔtɔ ɖɛ.
35 Nyɔnu amɛve ale eɣɔ cukɔ le ete kuɖeka ji yí woakplɔ ɖeka yí agbe xlɔtɔ ɖɛ.”
36 * ——
37 Eyi wobiɔɛ se mɔ: “Axwetɔ finiɔ?” Éɖo ŋci nɔ wo mɔ: “Fini enukuku leɔ, enɔ yí ehɔnwo bɔnɔ do nɛ.”
Gɔnmɛnuŋwlɛnŋwlɛn
^ Yi gɔnmɛɖeɖe tiin: “ŋtrɔ ji mɛ.”
^ Ényi aciku hwɛhwɛ ɖeka ci wokpɔnɔ le Palestine yí aci yitɔ jinjinnɔ mɛta amɛnɛ han.
^ Aci ɖeka enyi yí woyɔnɔ le Flansegbe mɛ mɔ Mûrier noir.
^ Alo “le mí mɛ.”
^ Alo “ye se.”
^ Alo “yi se.”
^ Kpɔ Enumɛɖeɖewo A3.
