Eŋɛnywiwema Luiki Tɔ 18:1-43
18 Yi goduɔ, Yesu do labalu nɔ yi nukplaviwo so ŋci yí taɖo ele veviɖe mɔ woɖo adonɔ gbe ɖaɖa gashiagamɛ yí deɖo aci kɔ nɔ wo nu.
2 Énu mɔ: “Kojoɖotɔ ɖeka le eju ɖeka mɛ, devɔnnɔ nɔ Mawu o yí debunɔ mɛɖe hɛnnɛ o.
3 Kposhu ɖeka can le eju lɔ mɛ yí yinɔ gbɔ yí nunɔ ni mɔ, ‘So kojo jɔjɔɛ nɔŋ le nyɛ koɖo mɛ ci yí ɖo nyɔ koɖoŋ gblamɛ.’
4 Na nɔ hwenu ɖeɔ, deji mɔ yeakpedo nu o. Gan évanu le yiɖeki mɛ mɔ, ‘Ci ŋdevɔnnɔ nɔ Mawu o yí ŋdebunɔ mɛɖe can ɔ,
5 nawɛ keke woaso kojo jɔjɔɛ nɔ kposhu lɔ, ɖo ékpɔtɔ dokɔ aya nɔŋ, keŋ nɔ ami ŋgbɔ vava yí ami aya dodo nɔŋ koɖo ŋci ebiɔbiɔ lɔ.’”
6 Yi goduɔ, Axwetɔ lɔ nu mɔ: “Ci kojoɖotɔ lɔ nyi amɛmajɔmajɔ can ɔ, enyɔ ci enu nɛ.
7 Nɔ enyi ahan ɖe, Mawu yɛdaɖo kojo jɔjɔɛ nɔ yi mɛcancan ciwo yí dokɔ axwa yɔɛ ezan koɖo kede, ci yí exɔkɔ jigbɔnɖɛ nɔ wo ba?
8 Ŋnukɔ nɔ mí mɔ, ána yí woaɖo kojo jɔjɔɛ nɔ yi mɛwo kaba. Vɔ nɔ Agbetɔvi lɔ va ɖe, ákpɔ xɔse cɛ hanci le nyigban lɔ ji nyaoa?”
9 Édo labalu hɛnnɛ nɔ mɛ ciwo yí kpɔnɔ wowoɖekiwo mɔ yewonyi amɛjɔjɔɛwo yí wodekpɔnɔ mɛbuwo do ŋɖe ji o. Énu mɔ:
10 “Ŋsu amɛve yi gbedoxɔ mɛ yí ado gbe ɖaɖa. Mɛɖeka nyi Farizitɔ yí xlɔtɔ nyi tagajɔtɔ.
11 Farizitɔ lɔ so je te yí do gbe ɖaɖa le yi ji mɛ mɔ, ‘Oo Mawu, ŋdo akpe nɔ eo mɔ ŋdele shigbe mɛkpɛtɛwo nɛ o. Ŋdele shigbe flafinɔwo, amɛmajɔmajɔwo, hashiwatɔwo alo tagajɔtɔ ŋtɔ́ can hannɛ o.
12 Ŋblanɔ nu zeve le kwɛshila ɖeka mɛ; ŋnanɔ madowo nɔ ŋciwo pleŋ ŋkpɔ.’
13 Vɔ tagajɔtɔ lɔ yɛle te le azɔge. Deji mɔ yeafɔn ta akpɔ eji kpetii o. Vɔ ésɔ alɔ̀ xoxoɔ akɔnta yí nunuɔ mɔ, ‘Oo Mawu, ku ŋshishi nɔ enyɛ ci yí nyi nuvɔnwatɔ.’
14 Ŋnukɔ nɔ mí mɔ, ŋsu cɛ trɔyi yi xomɛ yí Mawu kpɔ mɔ yɛnyi amɛjɔjɔɛ sɔwu Farizitɔ lɔ. Ðo mɛɖekpokpui ci yí agangan yiɖekiɔ, woaɖi kpɔtɔ yí mɛɖekpokpui ci yí asɔ yiɖeki hweɔ, woagingin.”
15 Ecɛyɛɔ, amɛwo kplɔkplɔ wowo viwo va Yesu gbɔ nɔ atɔ alɔ̀ wo. Ci enukplavi lɔwo kpɔ ŋcɛɔ, wotɔ gbegbe nɔ wo.
16 Vɔ Yesu yɔ ɖevi lɔwo va yiɖeki gbɔ yí mɔ: “Mítashi ɖeviɛwo nɔ woava ŋgbɔ. Míŋgbexe mɔ nɔ wo o. Ðo mɛ ciwo yí le shigbe wowo hannɛ tɔ yí Mawu Fyɔɖuxu lɔ nyi.
17 Ŋnukɔ nɔ mí le nyɔnɔnwi mɛ mɔ, mɛɖekpokpui ci yí dexɔ Mawu Fyɔɖuxu lɔ shigbe ɖevihwɛ hannɛɔ, datɛnŋ ayi mɛ o.”
18 Eyi Ʒuifuwo ga ɖeka biɔɛ se mɔ: “Enukplamɛtɔ nywi, nyi ŋɖo awa keŋ akpɔ agbe mavɔɔ?”
19 Yesu nu ni mɔ: “Nyi yí taɖo èyɔkɔŋ mɔ amɛnywiɔ? Mɛɖekpokpui denyi amɛnywi sɔ zeto amɛ kuɖeka nu o, eyi nyi Mawu.
20 Èjeshi ese lɔwo: ‘Ŋgbewa hashi o, ŋgbewu amɛ o, ŋgbefi fi o, ŋgbekan ŋsu do nu nɔ amɛ o, bu dao koɖo nɔo.’”
21 Eyi ŋsu lɔ nu mɔ: “Ŋwakɔ do ese cɛwo pleŋ ji so vihwɛ mɛ ɖii.”
22 Ci Yesu se nyɔ cɛɔ, énu ni mɔ, “Ŋɖeka kpɔtɔ nɔ eo: Sa ao nuwo pleŋ yí asɔ eho lɔ ma nɔ wamɛnɔwo yí awa dɔkunuwo ɖɛ le jeŋkwi mɛ; yi goduɔ, nàkplɔ ŋdo.”
23 Ci ese nyɔ cɛɔ, éve ni sugbɔ, ɖo dɔkunɔ gangan ɖeka enyi.
24 Yesu glui kpɔ yí nu mɔ: “Mawu Fyɔɖuxu lɔ mɛ ɖoɖo agbɔnnu nɔ mɛ ciwo shi eho le kekeɖe!
25 Le nyɔnɔnwi mɛɔ, ale fafɛɖe nɔ esɔkpotɔnɔ mɔ ato tɔnnyi tu mɛ sɔwu nɔ dɔkunɔ mɔ aɖo Mawu Fyɔɖuxu lɔ mɛ.”
26 Mɛ ciwo yí se enyɔ cɛ nu mɔ: “Mi yí atɛnŋ akpɔ hwlɛngan ɔ?”
27 Yesu nu do nu mɔ: “Ŋciwo yí glonɔ agbetɔwo deglonɔ Mawu o.”
28 Vɔ Piɛ nu mɔ: “Kpɔ ɖa! Mìgbe mìwo nuwo ɖɛ yí kplɔ eo do.”
29 Énu nɔ wo mɔ: “Ŋnukɔ nɔ mí le nyɔnɔnwi mɛ mɔ, mɛɖekpokpui ci yí tashi axwe alo ashiɛ alo nɔviɛwo alo yi jilawo alo eviɛwo do Mawu Fyɔɖuxu lɔ ŋciɔ,
30 ákpɔ wo donu sugbɔ le kakacɛ mɛ yí le xexe* ci yí gbɔgbɔ mɛɔ, ákpɔ agbe mavɔ.”
31 Yi goduɔ, Yesu yɔ Amɛ Wive lɔwo do akpo yí nu nɔ wo mɔ: “Míkpɔa? Mìyikɔ Ʒerusalɛmu. Eyi ŋciwo pleŋ enyɔnuɖɛtɔwo ŋwlɛ so Agbetɔvi lɔ nu ajɔ do ji.*
32 Le kpɔwɛ mɛ, woasɔ do alɔ̀ mɛ nɔ jukɔn bu mɛ tɔwo. Woakui yí azui yí acu tan do nu.
33 Eyi nɔ woyɛ koɖo lanŋba ɖegbɔɔ, woawui. Vɔ le ŋkeke amɛtɔntɔ lɔ gbeɔ, woafuin do agbe.”
34 Gan wodemɔŋje nyɔ cɛwo ɖe mɛ o. Ðo wowla nyɔ lɔwo do wo yí wodese nyɔ ci enu mɛ o.
35 Ecɛyɛ ci Yesu gogokɔ Ʒeriko ɔ, ŋsu ŋkuvitɔnnɔ ɖeka nɔ nyinɔnɔ do mɔ tu yí le enu biɔkɔ.
36 Ci ese yí amɛahwa ɖeka vayikɔɔ, ébiɔ se mɔ nyi yí jɔjɔ ma.
37 Wonu ni mɔ: “Yesu Nazarɛtitɔ lɔ yí vayikɔ!”
38 Eyi edo axwa mɔ: “Yesu, Davidi Vi, ku ŋshishi nɔŋ!”
39 Eyi mɛ ciwo yí le ŋkɔ ni tɔ adan wawa di mɔ yɛ le bɔ nu. Vɔ égbedo axwa doji mɔ: “Davidi Viɛ, ku ŋshishi nɔŋ!”
40 Eyi Yesu ci te yí mɔ wo le kplɔ ŋsu lɔ vɛ nɔ ye. Ci ŋsu lɔ va gbɔɔ, Yesu biɔɛ se mɔ:
41 “Nyi èji mɔ mawa nɔ eoɔ?” Énu ni mɔ: “Axwetɔ, wɛ nɔ magbetɔ enu kpɔkpɔ.”
42 Eyi Yesu nu ni mɔ: “Gbetɔ enu kpɔkpɔ; xɔse ci èɖo na edɔ̀ mi nɔ eo.”
43 Eyi zeɖeka tɔntɔn ɔ, étɔ enu kpɔkpɔ yí kplɔ Yesu do yí kanfukɔ Mawu. Mɛ ciwo pleŋ yí kpɔ ŋci yí jɔ lɔ can kanfu Mawu.
