Eŋɛnywiwema Luiki Tɔ 19:1-48
19 Yi goduɔ, Yesu ɖo Ʒeriko yí to eju lɔ mɛ vayikɔ.
2 Ŋsu ɖeka tɔ mɔ Zashe yí le nɔ. Tagajɔtɔwo ga enyi yí nyi hotɔnɔ.
3 Éji mɔ yeakpɔ mɛ ci yí nyi Yesu lɔ. Vɔ ci amɛwo sugbɔɔ, detɛnŋ kpɔɛ o. Ðo amɛtakpui enyi.
4 Eyi elɔ ju yí de aci* ɖeka ji keŋ akpɔɛ. Ðo Yesu jikɔ ato nɔ avayi.
5 Ci Yesu ɖo nɔɔ, éfɔn ta yi ji yí nu ni mɔ: “Zashe, ɖyi kaba, ɖo ao xomɛ ŋjikɔ aze gbɛ.”
6 Eyi eɖe blɛ yí ɖyi yí xɔɛ do yi xomɛ koɖo jijɔ.
7 Ci wokpɔɛ ahan ɔ, wo pleŋ tɔ enyɔ toto mɔ: “Éyi ze nuvɔnwatɔ xomɛ.”
8 Vɔ Zashe so je te yí nu nɔ Axwetɔ lɔ mɔ: “Axwetɔ, kpɔ ɖa! Nama anyi dɔkunuwo do ve yí asɔ akpa ɖeka jo nɔ wamɛnɔwo. Eyi ŋɖekpokpui ci ŋtafu mɛɖe do* yí xɔ le shiɔ, nasɔ nu lɔ donu amɛnɛ jo ni.”
9 Eyi Yesu nu ni mɔ: “Hwlɛngan va axwe cɛ mɛ gbɛ, ɖo Abrahamu vi yɛ can nyi.
10 Agbetɔvi lɔ va yí aji mɛ ciwo yí bu kpɔ yí ahwlɛn wo gan.”
11 Ci woseseɛ nyɔ cɛwoɔ, égbedo labalu bu nɔ wo. Ðo ci egogo Ʒerusalɛmu ɔ, wobu mɔ Mawu Fyɔɖuxu lɔ ava yewoakpɔ zeɖeka.
12 Eyi taɖo enu mɔ: “Ŋsu ɖeka ci yí nyi fyɔvi zɔn mɔ yi eju jinjin ɖeka mɛ nɔ woasɔ ɖo fyɔ nɔ agbetrɔgbɔ.
13 Éyɔ yi dɔwavi amɛ́wo yí sɔ mina* amɛ́wo jo nɔ wo yí nu nɔ wo mɔ, ‘Mísɔ dokɔ ajɔ keke magbɔ.’
14 Vɔ yi nu dekpenɔ nɔ yi jumɛviwo o. Eyi wodɔ amɛwo ɖaɖa eju ci mɛ eyi nɔ woanu mɔ, ‘Mìdeji mɔ ŋsu cɛ anyi fyɔ nɔ mì o.’
15 “Ci wosɔ ɖo efyɔ ɖegbɔɔ, étrɔgbɔ. Eyi eyɔ yi dɔwavi ciwo esɔ eho* jo nɔ keŋ akpɔ mɔ ale nɛni wokpɔ do ji ci wodo ajɔ ma.
16 Eyi amɛ ŋkɔtɔ va yí nu mɔ, ‘Axwetɔ, ŋkpɔ mina amɛ́wo do ao mina ji.’
17 Eyi enu ni mɔ, ‘Èwa ɖaŋ wɛ, dɔwavi nywi! Ci ènɔ gbeji le enu hwɛhwɛ mɛɔ, àkpa nɔ eju amɛ́wo.’
18 Eyi amɛ amɛvetɔ va yí mɔ, ‘Axwetɔ, ŋkpɔ mina amatɔn do ao mina ji.’
19 Eyi enu nɔ yɛ hɛnnɛ mɔ, ‘Eɔ can àkpa nɔ eju amatɔn.’
20 Vɔ dɔwavi bu va yí mɔ, ‘Axwetɔ, ao mina ke, ŋsɔ wla do avɔn mɛ ɖɛ.
21 Ènyaa? Ŋvɔn nɔ eo, ɖo ao nyɔ defanɔ o, èsɔnɔ ŋci dèsɔ ɖɛ o yí èɖenɔ jinuku le fini dèdo jinuku do o.’
22 Énu ni mɔ, ‘Ao nyɔwo yí nasɔ ɖo kojo nɔ eo, dɔwavi vwin. Ènya mɔ anyi nyɔ defanɔ o, ŋsɔnɔ ŋci ŋdesɔ ɖɛ o yí ŋɖenɔ jinuku le fini ŋdedo jinuku do o, alo?
23 Ecɛyɛ ɖe, nyi taɖo dèsɔ anyi ho yi da do ehodadoxu nɔŋ yí ci ŋgbɔ yɛɔ, maxɔɛ koɖo ehovi lɔ saɔ?’
24 “Eyi enu nɔ mɛ ciwo yí le te le nɔ mɔ, ‘Míxɔ mina lɔ le shi yí asɔ jo nɔ mɛ ci shi mina amɛ́wo le.’
25 Vɔ wonu ni mɔ, ‘Axwetɔ, mina amɛ́wo yí le yɛ shi nɛ!’—
26 Énu do nu mɔ: ‘Ŋnukɔ nɔ mí mɔ, mɛɖekpokpui ci shi enu leɔ, woasɔ sugbɔ kpi ni. Vɔ mɛ ci shi enu deleɔ, woaxɔ ci yí le shi ŋtɔkpu hɛnnɛ.
27 Gbesɔ kpe niɔ, míkplɔ anyi ketɔnɔ ciwo yí deji mɔ maɖu fyɔ nɔ yewo va lɛ yí awu wo le ŋmɛ nɔŋ.’”
28 Ci Yesu nu nyɔ cɛwo ɖegbɔɔ, éso kpe Ʒerusalɛmu.
29 Ci wogogokɔ Bɛtifaʒe koɖo Betani fini Eto Olivuciwo tɔ leɔ, édɔ enukplavi amɛve ɖaɖa
30 yí nu mɔ: “Míyi kɔxwi ci míkpɔkpɔ ɖaa mɛ. Nɔ míɖo mɛ kakaɔ, míakpɔ esɔkɛtɛvi ɖeka le ka mɛ. Mɛɖekɛ dede ji kpɔ o. Mícu ka ni yí ahin va lɛ.
31 Vɔ nɔ mɛɖe biɔ mí se mɔ, ‘Nyi yí taɖo mícucuɔ ka ni maɔ?’ mínu mɔ, ‘Axwetɔ lɔ yí ʒin.’”
32 Eyi mɛ ciwo edɔ ɖaɖa lɔwo yi yí kpɔɛ pɛpɛpɛ shigbe lé enui nɔ wo do nɛ.
33 Vɔ ci wocucuɔ esɔkɛtɛvi lɔɔ, mɛ ciwo tɔ enyi biɔ wo se mɔ: “Nyi yí taɖo mícucuɔ esɔkɛtɛvi lɔɔ?”
34 Wonu mɔ: “Axwetɔ lɔ yí ʒin.”
35 Wokplɔ esɔkɛtɛvi lɔ vɛ nɔ Yesu yí sɔ awu jitɔ wowotɔwo da do ji yí kɔ Yesu do ji.
36 Ci eɖedoɔ, wosɔ awu jitɔ wowotɔwo ɖo do emɔ lɔ ji.
37 Ci egogokɔ emɔ ci wotonɔ yí ɖyinɔ so Eto Olivuciwo tɔ lɔ jiɔ, enukplavi lɔwo pleŋ tɔ jijɔ kpɔkpɔ yí do axwa yí kanfukɔ Mawu nɔ enujiŋ ciwo pleŋ tɔxu wokpɔ.
38 Wonunuɔ mɔ: “Woacu shi nɔ Efyɔ ci yí gbɔgbɔ le Yehowa* ŋkɔ mɛ! Fafa le jeŋkwi mɛ, kanfukanfu nɔ mɛ ci yí le jeŋkwi ɖaa!”
39 Vɔ Farizitɔ ciwo yí le amɛahwa lɔ mɛ ɖewo nu ni mɔ: “Enukplamɛtɔ, nu nɔ ao nukplaviwo mɔ wo le bɔ nu.”
40 Vɔ énu do nu nɔ wo mɔ: “Ŋnukɔ nɔ mí mɔ nɔ wowo bɔ nu can ɔ, ekpewo ado axwa.”
41 Ci egogo Ʒerusalɛmu yí kpɔ jugan lɔ ɖaaɔ, éfan avin do nu ni.
42 Énu mɔ: “Nɔ je àjeshi ŋciwo yí ahɛn fafa vɛ nɔ eo gbɛsaɔ, ányɔ. Vɔ kakacɛɔ, wosɔ wo wla do ao ŋkuviwo.
43 Ðo ŋkekewo li yí gbɔgbɔ nɔ eo yí ao ketɔnɔwo aɖyi acinugbɔngbwinwo trɔdo eo godogluu. Woatrɔ do eo yí ajan eo toto fishiafi.
44 Woasɔ eo koɖo ao viwo ya gu do nyigban yí wodagbe ekpe ɖe do eɖe ji o. Ðo dènya hwenu woɖo kojo nɔ eo o.”*
45 Yi goduɔ, éɖo gbedoxɔ lɔ mɛ yí tɔ mɛ ciwo yí sasa nu nyanya ti.
46 Énu nɔ wo mɔ: “Woŋwlɛ do Mawu Nyɔ lɔ mɛ ɖɛ mɔ, ‘Woayɔ anyi xwe mɔ gbedoɖawaxu’ vɔ míwo sɔ trɔ flafiwo nɔxu.”
47 Ékpɔtɔ kplakpla nu amɛwo gbeɖeka duu le gbedoxɔ lɔ mɛ. Vɔ avɔnsatɔwo gawo, esekplamɛtɔwo koɖo jumɛgawo jijiɛ kpɔ keŋ awui.
48 Vɔ wodekpɔ emɔ ɖekɛ ci ji woato yí awa cɛ o, ɖo mɛ lɔwo pleŋ kpɔtɔ le gbɔ yí ɖoɖoɔ to yi.
Gɔnmɛnuŋwlɛnŋwlɛn
^ Woyɔnɔ aci lɔ mɔ “sycomore ci.”
^ Alo “ci ŋxo awo.”
^ Grɛki mina ɖeka kpɛnkpɛnmɛ nyi gramu 340 yí ɖeka nyinɔ drakma 100. Kpɔ Enumɛɖeɖewo B14.
^ Yi gɔnmɛɖeɖe tiin: “egacuho.”
^ Kpɔ Enumɛɖeɖewo A5.
^ Yi g̱ɔnmɛɖeɖe tiin: “wova glo eo kpɔ o.”
