Eŋɛnywiwema Luiki Tɔ 2:1-52
2 Le ŋkeke ŋtɔ́wo mɛɔ, Seza Oguisto ɖe gbe mɔ woaŋwlɛ mɛshiamɛ ci yí le nyigban lɔ ji ŋkɔ.
2 (Wotɔ amɛwo ŋkɔ ŋwlɛŋwlɛ ŋkɔtɔ hwenu Kiriniusi kpakpa nɔ Siri.)
3 Yí mɛɖekamɛɖeka yi yiŋtɔ ju mɛ yí vayi na ŋkɔ.
4 Ʒozɛfu can so le Nazarɛti ju mɛ le Galile yí yi Ʒude le Davidi ju ci woyɔnɔ mɔ Bɛtɛlɛhɛmu mɛ. Ðo Davidi xomu mɛ koɖo yi kannu mɛ yí eso.
5 Yɛ koɖo Mari, nyɔnu ci wosɔ ni yí eɖe shigbe lé wosɔ ɖo gbe ni nɛ yí yi ŋkɔ nagbe. Efu shin nɔ Mari hwenɔnu.
6 Hwenu ele nɔɔ, evijiji ga xo ni.
7 Eyi eji ŋsuvi, eviɛ ŋkɔtɔ. Ésɔ avɔn tro di yí sɔ mlɔ elanwo ŋɖuɖugban mɛ. Ðo wodekpɔ texwe le mɛdruzexu lɔ o.
8 Lɛngbɔkplɔtɔwo can le eju lɔ mɛ yí kpɔkpɔ wowo lɛngbɔwo ji zanmɛ le bojiwo.
9 Zeɖeka tɔntɔn ɔ, Yehowa* dɔla ɖeka va le te le ŋkɔ nɔ wo yí klɛnklɛn gangan ɖeka so Yehowa* gbɔ yí trɔdo wo yí wovɔn sugbɔ.
10 Vɔ mawudɔla lɔ nu nɔ wo mɔ: “Míŋgbevɔn o, ɖo ŋva yí ado eŋɛnywi ɖeka nɔ mí. Eŋɛnywi ci yí ahɛn jijɔ gangan vɛ nɔ amɛwo pleŋ.
11 Ðo egbɛɔ, woji hwlɛngantɔ ci yí nyi Axwetɔ Kristo nɔ mí le Davidi ju lɔ mɛ.
12 Ŋci míakpɔ asɔ jeshi ke: Míakpɔ wosɔ avɔn tro do vifin ɖeka yí sɔ mlɔ elanwo ŋɖuɖugban mɛ.”
13 Zeɖeka tɔntɔn ɔ, mawudɔlawo hwakɔn ɖeka so jeŋkwi mɛ va bɔdo mawudɔla lɔ nu yí wokanfukɔ Mawu yí nunuɔ mɔ:
14 “Kanfukanfu nɔ Mawu le eji ɖaa yí mɛ ciwo nu yí kpe ni le nyigban lɔ ji akpɔ fafa.”
15 Ci mawudɔla lɔwo so le lɛngbɔkplɔtɔ lɔwo gbɔ yí kpe jeŋkwi mɛɔ, lɛngbɔkplɔtɔ lɔwo nu nɔ wowonɔnɔwo mɔ: “Mìayi Bɛtɛlɛhɛmu akpɔ ŋci yí jɔ yí Yehowa* dasɛ nɔ mì.”
16 Eyi woɖe blɛ yí yi; wokpɔ Mari koɖo Ʒozɛfu sɔ kpe nɔ vifin lɔ yí ele nyimlɔxwe le elanwo ŋɖuɖugban mɛ.
17 Ci wokpɔɛ ahan ɔ, wonu nyɔ ci wose so ɖevi lɔ nu nɔ amɛwo.
18 Éjiŋ nɔ mɛ ciwo pleŋ yí se enyɔ ciwo lɛngbɔkplɔtɔ lɔwo nu.
19 Vɔ Mari lé nyɔ cɛwo pleŋ ɖɛ do ji mɛ yí bukɔ wo kpɔ.
20 Eyi lɛngbɔkplɔtɔ lɔwo trɔ yi wowo lɛngbɔwo gbɔ yí kanfukɔ Mawu yí dodoɔ akpe ni nɔ ŋciwo pleŋ wose yí gbekpɔ shigbe lé wonui nɔ wo do nɛ.
21 Le ŋkeke amɛnyitɔ lɔ gbe ci gamɛ sun yí woaso evo niɔ, wona ŋkɔ yi mɔ Yesu. Gbɔxwe woafɔn yi fuɔ, ŋkɔ ci mawudɔla lɔ mɔ woayɔ ni nɛ.
22 Gbesɔ kpe niɔ, ci gamɛ sun yí woaklɔ eɖyi le wo nu shigbe lé Moizi Se lɔ nui nɛɔ, wokplɔɛ yi Ʒerusalɛmu keŋ adasɛ yi nɔ Yehowa.*
23 Shigbe lé woŋwli ɖɛ do Yehowa* Se lɔ mɛ nɛ mɔ: “Evi ŋsuvi ŋkɔtɔ* ɖekpokpui ɖo anyi amɛkɔkɔɛ nɔ Yehowa.”*
24 Eyi wosa avɔn shigbe lé wonui do Yehowa* Se lɔ mɛ nɛ mɔ: “Míasɔ xlexu amɛve alo hwanlin vi amɛve asa vɔn.”
25 Ŋsu ɖeka le Ʒerusalɛmu yí tɔ mɔ Simeɔn. Ényi egbejinɔtɔ yí gbevɔnnɔ nɔ Mawu. Éle te kpɔ hwenu Mawu afa akɔn nɔ Izraɛli yí gbɔngbɔn kɔkɔɛ le ji.
26 Gbesɔ kpe niɔ, Mawu to gbɔngbɔn kɔkɔɛ ji yí nu ni mɔ, yɛakpɔ Kristo Yehowa* tɔ lɔ gbɔxwe aku.
27 Gbɔngbɔn kɔkɔɛ na yí eva gbedoxɔ lɔ mɛ yí ci Yesu dalɔ koɖo nɔlɔ kɔɛ va yí awa kɔnu ciwo yí Ese lɔ mɔ wo le waɔ,
28 éxɔ evi lɔ do alɔ̀ mɛ yí kanfu Mawu mɔ:
29 “Axwetɔ Acɛkpatɔ Gangantɔ, èɖeɖeɛ emɔ nɔ ao dɔwavi nɔ aku le fafa mɛ hɔntɔn shigbe lé ènui ɖɛ nɛ.
30 Ðo anyi ŋkuviwo kpɔ mɛ ci yí ahɛn hwlɛngan vɛ.
31 Mɛ ci èdra do nɔ amɛwo pleŋ akpɔ.
32 Ényi klɛnklɛn ci yí aɖe ŋci yí cɔn ŋmɛ nɔ jukɔnwo swi. Ányi kanfukanfu nɔ ao jukɔn Izraɛli.”
33 Enyɔ ciwo wonunuɔ so ɖeviɛ nu kpaca dalɔ koɖo nɔlɔ.
34 Simeɔn yra wo hɛnnɛ yí nu nɔ ɖevi lɔ nɔlɔ Mari mɔ: “Kpɔ ɖa! Wosɔ ɖevi cɛ keŋ nɔ adɔ yí amɛ sugbɔ ajuin yí amɛ sugbɔ afɔn le Izraɛli yí agbenyi jeshidu ci dakpe nɔ amɛwo o,
35 keŋ asɔ klo nu so susu ciwo yí le ji mɛ nɔ amɛ sugbɔ ji. (Vɔ eoɔ, àse vevi shigbe ewi lɛgbɛ wosɔ trɔn eo* nɛ.)”
36 Nyɔnu enyɔnuɖɛtɔ ɖeka li ci yí tɔ mɔ Ana yí nyi Fanuɛli vi yí so Asɛ kɔta mɛ. Nyɔnu cɛ shin sugbɔ le xwe mɛ. Ci eɖe asuɔ,* exwe amadrɛ kpaŋ yí yɛ koɖo asuɔ wa doju.
37 Ényi kposhu ci yí ɖo xwe 84. Yi fɔ dedɛnnɔ le gbedoxɔ lɔ mɛ gbeɖe o. Éwanɔ sɛnsɛndɔ kɔkɔɛ ezan koɖo kede. Éblanɔ nu yí gbefannɔ kwi nɔ Mawu.
38 Le gaxoxo ŋtɔ́ pɛpɛpɛ mɛɔ, égbosɔ wo yí tɔ akpe dodo nɔ Mawu yí xokɔ nuxu so ɖevi lɔ nu nɔ mɛ ciwo pleŋ yí le te kpɔ hwenu woahwlɛn Ʒerusalɛmu gan.
39 Ci wowa ŋciwo pleŋ Yehowa* Se lɔ mɔ wo le wa ɖegbɔɔ, wotrɔyi wowoŋtɔwo ju Nazarɛti mɛ le Galile.
40 Eyi ɖeviɛ shinkɔ yí ɖokɔ ŋsɛn yí gbenyakɔ ŋɖɛ doji yí yi nu jɔkɔ ji nɔ Mawu.
41 Xweshiaxweɔ, edalɔ koɖo nɔlɔ yinɔ Ʒerusalɛmu nɔ Paki xweɖuɖu.
42 Eyi ci eɖo exwe wiveɔ, wogbeyi Paki xwe lɔ ɖugbe shigbe lé wowɛni nɛ.
43 Ci woɖu Paki lɔ ɖegbɔ yí trɔ kpe axweɔ, Yesu yɛci Ʒerusalɛmu yí dalɔ koɖo nɔlɔ denya o.
44 Wobukɔ mɔ yɛle amɛahwa lɔ mɛ le emɔ lɔ ji koɖo yewo. Eyi wozɔn mɔ ŋkeke ɖeka gbɔxwe yí vatɔ jiji kpɔ le wowo xomumɛtɔwo koɖo amɛnyanyiwo mɛ.
45 Vɔ ci wodekpɔɛɔ, wotrɔyi Ʒerusalɛmu yí vayi ji kpɔ le nɔ nywiɖe.
46 Éwa ŋkeke amɛtɔn gbɔxwe wovakpɔɛ le gbedoxɔ lɔ mɛ yí ele nyinɔnɔ le dodomɛ nɔ enukplamɛtɔwo yí ɖokɔ to wo yí gbebiɔkɔ nyɔwo wo se.
47 Vɔ lé enya ŋɖɛ do koɖo lé eɖokɔ nyɔ ŋci do kpaca mɛ ciwo pleŋ yí ɖokɔ to yi.
48 Ci edalɔ koɖo nɔlɔ kpɔɛɔ, ékpaca wo yí enɔlɔ mɔ: “Evi, nyi yí taɖo èwa ahan koɖo mìɔ? Nyɛ koɖo dao mìle jikaswi ji yí ji eo kpɔ kpɛɖɛkpɛɖɛ.”
49 Vɔ énu nɔ wo mɔ: “Nyi yí taɖo míjijiɛŋ kpɔɔ? Mídenya mɔ danyɛ xomɛ nale ba?”
50 Vɔ wodemɔŋje nyɔ ci enu nɔ wo mɛ o.
51 Eyi ekplɔ wo do yí wotrɔgbɔ va Nazarɛti. Ékpɔtɔ sekɔ tonu nɔ wo.* Gbesɔ kpe niɔ, enɔlɔ wa ɖaŋ le enyɔ cɛwo pleŋ ɖɛ do ji mɛ.
52 Yesu shinkɔ yí gbenyakɔ nu doji yí yi nu jɔkɔ ji nɔ Mawu koɖo agbetɔwo.
Gɔnmɛnuŋwlɛnŋwlɛn
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Yi gɔnmɛɖeɖe tiin: “evi ŋsuvi ɖekpokpui ci yí hun evijidɔ.”
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Kpɔ Enumɛɖeɖewo A5.
^ Alo “ao se.”
^ Yi gɔnmɛɖeɖe tiin: “Ci enyi nyɔnuvi lealɔji yí ɖe asu.”
^ Kpɔ Enumɛɖeɖewo A5.
^ Yi gɔnmɛɖeɖe tiin: “sɔ yiɖeki do gɔnmɛ nɔ wo.”
