Eŋɛnywiwema Luiki Tɔ 21:1-38
21 Ci efɔn ta yi ejiɔ, ékpɔ hotɔnɔwo yí wosɔ enunanawo dodoɔ enujɔjɔdakawo mɛ.
2 Eyi ekpɔ kposhu wamɛnɔ ɖeka sɔ eho hwɛhwɛ amɛve ciwo yí denyi ŋɖe* do mɛ.
3 Eyi enu mɔ: “Ŋnukɔ nɔ mí le nyɔnɔnwi mɛ mɔ, kposhu wamɛnɔ cɛ na nu wu wo pleŋ.
4 Ðo wo pleŋ sɔ le sugbɔ ci yí le wo shi nu yí sɔ do mɛ. Vɔ eyɛ ci yí nyi wamɛnɔ sɔ ŋciwo pleŋ yí le shi yí asɔ nɔ agbe do mɛ.”
5 Yi godu ci mɛɖekawo xokɔ nuxu so lé wosɔ ekpe nywiwo koɖo ŋciwo wonanɔ Mawu ɖo acɔ nɔ gbedoxɔ lɔ nuɔ,
6 Yesu nu mɔ: “Ŋcɛwo ci míkpɔkpɔɔ, ŋkekewo li gbɔgbɔ yí woagban ekpe lɔwo pleŋ yí ekpe ɖe dagbele yi kpena ji o.”
7 Eyi wobiɔɛ se mɔ: “Enukplamɛtɔ, hwenu yí ŋcɛwo ajɔ teŋ ɔ? Yí nyi yí anyi jeshidu nɔ hwecinu ŋcɛwo ajɔɔ?”
8 Énu mɔ: “Míkpɔ nywiɖe nɔ mɛɖe ŋgbeble mí o, ɖo amɛ sugbɔ ava asɔ anyi ŋkɔ anukɔ mɔ, ‘Enyɛ yí nyi Kristo lɔ’ yí woagbenu mɔ, ‘Gamɛ ci woɖo ɖɛ lɔ tɔ sunsun.’ Míŋgbekplɔ wo do o.
9 Ahanke nɔ míse woxokɔ nuxu so ahwawo koɖo eʒintɔntɔnwo* nuɔ, jika ŋgbeso mí o. Ðo ŋcɛwo ajɔ doŋkɔ, vɔ vɔvɔnu lɔ dava kaka o.”
10 Énu nɔ wo hɛnnɛ mɔ: “Jukɔn atɔ ahwa koɖo jukɔn bu yí fyɔɖuxu atɔ ahwa koɖo fyɔɖuxu bu.
11 Nyigban ahunhun sɛnŋsɛnŋɖe le texwe vovovowo, eju ato yí edɔ̀bamɛwo ato le afi vovovowo; yí woakpɔ enuɖyivɔnvɔnwo koɖo jeshidu ganganwo so jeŋkwi mɛ.
12 “Vɔ gbɔxwe ŋcɛwo pleŋ ajɔɔ, amɛwo alé mí yí aci yumɛ nɔ mí, woalé mí hɛn yi Ʒuifuwo nukplaxuwo koɖo gakpawo mɛ. Woakplɔ mí yi ŋkɔ nɔ efyɔwo koɖo ejukplɔtɔwo do anyi ŋkɔ ŋci.
13 Ecɛ ana yí míanu Mawu nyɔ nɔ mɛbuwo.
14 Eyi taɖo míɖui le míwo jiwo mɛ mɔ, yewodabubuɔ lé míahwlɛn ta nɔ míwoɖekiwo kpɔ doŋkɔ o,
15 ɖo nana nunya koɖo enyɔ ciwo míanu mí yí nɔ míwo ketɔnɔwo pleŋ bɔ doju can ɔ, wodatɛnŋ ɖu mí ji alo akpɔ nyɔ ɖe anu o.
16 Gbesɔ kpe niɔ, míwo dawo koɖo míwo nɔwo, míwo nɔviwo, míwo xomumɛtɔwo koɖo míwo xlɔwo asa mí* ŋtɔkpu yí woawu mɛɖewo le mí mɛ,
17 eyi amɛwo pleŋ agbe ŋwa nɔ mí do anyi ŋkɔ ŋci.
18 Vɔ eɖa ciwo yí le ta nɔ mí kuɖeka kpeti dajuin o.
19 Eyi nɔ mído jiɔ, míahwlɛn míwo gbewo* gan.
20 “Vɔ nɔ míkpɔ sɔjawo hwakɔnwo trɔdo Ʒerusalɛmu ɔ, mínya mɔ gugu yitɔ gogo.
21 Eyi mɛ ciwo yí le Ʒude le shi yi etowo ji, mɛ ciwo yí le Ʒerusalɛmu le so yí mɛ ciwo yí le bomɛwo ŋgbegbɔ avaɖo eju lɔ mɛ o.
22 Ðo ŋkeke cɛwo nyi kojoɖoɖo ŋkekewo* keŋ nɔ ŋciwo pleŋ woŋwlɛ ɖɛ ajɔ do ji.
23 Babɛ nɔ nyɔnu funɔwo koɖo mɛ ciwo yí dodoɔ anɔ nɔ evi le ŋkeke ŋtɔ́wo ji! Ðo amɛwo ase vevi sugbɔ le nyigban lɔ ji yí woado dɔmɛzi do jukɔn cɛ.
24 Woaku ewi ku yí woakplɔ wo yi hwashigbemɛ le jukɔnwo pleŋ mɛ; jukɔnwo* aɖo afɔ Ʒerusalɛmu ji keke aje hwenu gamɛ ci woɖo ɖɛ nɔ jukɔn lɔwo* avɔ.
25 “Jeshiduwo aze le ewe, wleci koɖo wleciviwo mɛ hɛnnɛ, yí vɔnvɔn alé jukɔnwo le nyigban lɔ ji hwenu axu adodoɔ gbe yí ale adan wakɔ.
26 Amɛwo abubuɔ ŋciwo yí jikɔ avajɔ le nyigban lɔ pleŋ ji kpɔ, ɖo woahunhun ŋsɛn ciwo yí le jeŋkwi mɛ.
27 Eyi woakpɔ Agbetɔvi lɔ agbɔgbɔ le azɔwo mɛ koɖo ŋsɛn koɖo kanfukanfu gangan.
28 Vɔ nɔ ŋcɛwo tɔ jɔjɔɔ, míso je te ajɔ yí afɔn tawo yi ji, ɖo hwlɛngan míwotɔ gogo.”
29 Eyi edo labalu ɖeka nɔ wo mɔ: “Míglo figici koɖo aci kpɛtɛwo pleŋ kpɔ.
30 Nɔ míkpɔ yí wozɛn lɔ̀vi yoyuwoɔ, mínyanɔ mɔ fyɔta hwenu gogo.
31 Ahanke míwo can nɔ míkpɔ ŋcɛwo jɔjɔɔ, mínya mɔ Mawu Fyɔɖuxu lɔ gogo.
32 Ŋnukɔ nɔ mí le nyɔnɔnwi mɛ mɔ, jijimɛ cɛ davayi kpɔ gbeɖe gbɔxwe ŋcɛwo pleŋ ajɔ o.
33 Jeŋkwi koɖo nyigban avayi, vɔ anyi nyɔwo davayi kpɔ gbeɖe o.
34 “Vɔ míkpɔ míwoɖekiwo ji nywiɖe, nɔ sukanuɖuɖu, aha sugbɔ nunu koɖo enulolokpɔ agbe mɛ tɔwo ŋgbenyi agban akpɛn míwo jiwo gbeɖe o keŋ nɔ ŋkeke ŋtɔ́ ŋgbevacu mí le avomɛ
35 shigbe lé wojenɔ fɛnca mɛ nɛ o. Ðo ŋkeke ŋtɔ́ daxla mɛɖe do le nyigban lɔ keŋkeŋ ji o.
36 Eyi taɖo mínɔ zanŋte, yí awanɔ kwifan gashiagamɛ keŋ atɛnŋ ashi nɔ ŋcɛwo pleŋ ciwo yí jikɔ ajɔ yí anɔ te le ŋkɔ nɔ Agbetɔvi lɔ.”
37 Le kedemɛɔ, Yesu kplanɔ nu amɛwo le gbedoxɔ lɔ mɛ; vɔ zanmɛɔ, éto yí nɔnɔ eto ci woyɔnɔ mɔ Eto Olivuciwo tɔ ji.
38 Yí jukɔn lɔ pleŋ vanɔ gbɔ nyidin fɔnfɔnmɛ le gbedoxɔ lɔ mɛ keŋ aɖo to yi.
Gɔnmɛnuŋwlɛnŋwlɛn
^ Yi gɔnmɛɖeɖe tiin: “lɛpta amɛve” ciwo yí wa kuadran ɖeka. Kpɔ Enumɛɖeɖewo B14.
^ Alo “hunnyahunnyawo; evuwawawo.”
^ Yi gɔnmɛɖeɖe tiin: “asɔ mí jo.”
^ Alo “míwo sewo.”
^ Alo “ŋkeke ciwo ji woaɖe hlɔn le.”
^ Alo “Amɛmanyiʒuifuwo.”
^ Alo “Amɛmanyiʒuifuwo.”
