Eŋɛnywiwema Luiki Tɔ 6:1-49
-
Yesu nyi “Sabati lɔ Xwetɔ” (1-5)
-
Yesu da dɔ̀ nɔ ŋsu ɖeka ci alɔ̀ ku nɔ (6-11)
-
Apotru 12 lɔwo (12-16)
-
Yesu kplakpla nu amɛwo yí dada edɔ̀wo (17-19)
-
Mɛ ciwo yí kpɔnɔ jijɔ koɖo mɛ ciwo wodo babɛ nɔ (20-26)
-
Lé woalɔn ketɔnɔwo do (27-36)
-
Mími kojo ɖoɖo nɔ amɛwo (37-42)
-
Eku ci aci ɖekpokpui sɛn yí wosɔ jenɔshi (43-45)
-
Exɔ ci wowa ɖaŋ cu; exɔ ci gɔnmɛɖokpe deli nɔ o (46-49)
6 Yesu to jinukugble ɖeka mɛ vayikɔ le Sabatigbe yí yi nukplaviwo tɔ jinuku lɔwo sunsun yí cukukɔ wo koɖo alɔ̀ yí ɖukɔ.
2 Eyi Farizitɔ ɖewo mɔ: “Nyi yí taɖo míwawa ŋci ese gbe le Sabatigbeɔ?”
3 Vɔ Yesu ɖo ŋci nɔ wo mɔ: “Mídehlɛn ŋci Davidi wa hwenu shive ci yɛ koɖo yi mɛwo ba?
4 Éyi Mawu xwe lɔ mɛ yí xɔ kpɔnnɔ kɔkɔɛwo* yí ɖu yí na ɖewo yi mɛwo yí wowo can ɖu. Ese dena gbe mɛɖe mɔ yɛaɖu kpɔnnɔ lɔwo o. Vɔ avɔnsatɔwo ɖekɛ yí ɖogbe aɖu wo.”
5 Yi goduɔ, énu nɔ wo mɔ: “Agbetɔvi lɔ yí nyi Sabati lɔ Xwetɔ.”
6 Le Sabatigbe bu jiɔ, éyi Ʒuifuwo nukplaxu yí tɔ enu kplakpla amɛwo. Ŋsu ɖeka le nɔ yí ɖushi lɔ̀ ku ni.*
7 Esekplamɛtɔwo koɖo Farizitɔwo gluigluiɛ kpɔ truɖuɖu akpɔ mɔ yɛada dɔ̀ nɔ ŋsu lɔ le Sabatigbe ma, keŋ nɔ woakpɔ emɔ ci ji woato ado hwɛ yi.
8 Vɔ Yesu yɛnya ŋci wodrɔdrɔ kpɔ. Eyi taɖo enu nɔ ŋsu ci alɔ̀ ku nɔ* lɔ mɔ: “So ava dodomɛ.” Eyi eso yí va nɔ te le nɔ.
9 Yesu nu nɔ wo mɔ: “Mabiɔ mí se lo, ese na gbe mɔ wo le wa nunywi alo nuvwin le Sabatigbea, ahwlɛn agbe* gan alo agui swia?”
10 Ci eglo wo pleŋ kpɔ trɔdo ɖegbɔɔ, énu nɔ ŋsu lɔ mɔ: “Vlu ao lɔ̀.” Eyi evlu yi lɔ̀ yí edɔ̀ lɔ mi ni.
11 Vɔ wodo dɔmɛzi sugbɔ yí tɔ ŋci woawa koɖo Yesu lele kpɔ le wowoɖeɖewo mɛ.
12 Gbeɖekaɔ, éyi eto ɖeka ji yí ado gbe ɖaɖa. Énɔ hunnɔ yí do gbe ɖaɖa nɔ Mawu le ezan lɔ pleŋ mɛ.
13 Ci eŋ keɔ, éyɔ yi nukplaviwo yí can amɛ 12 le wo mɛ yí na ŋkɔ wo mɔ apotruwo.
14 Wowo ŋkɔwo yí nyi: Simɔ ci egbena ŋkɔ mɔ Piɛ, nɔviɛ Andre, Ʒaki, Ʒan, Filipu, Batelemi,
15 Matie, Toma, Ʒaki Alufe vi, Simɔ ci yí nyi “mɛ ci yí sɔnɔ zo do enu nu,”
16 Ʒudasi Ʒaki vi koɖo Ʒudasi Iskariɔti ci yí vatrɔ amɛsatɔ.
17 Yesu ɖyi so eto lɔ ji koɖo wo yí va nɔ te do gbaja tɔxu ɖeka yí yi nukplaviwo lɔ ahwa va gbɔ. Amɛahwa gangan ɖeka can so Ʒude lɔ pleŋ, Ʒerusalɛmu sɔ kpe nɔ Tiru koɖo Sidɔn ju ciwo yí le axu tu mɛ. Wova mɔ yewoaɖo to yi yí agbeda dɔ̀ nɔ yewo.
18 Éda dɔ̀ nɔ mɛ ciwo gbɔngbɔn makɔmakɔwo dokɔ aya nɔ ŋtɔkpu hɛnnɛ.
19 Eyi amɛahwa lɔ pleŋ jijiɛ mɔ yewoatɔ alɔ̀ yi. Ðo ŋsɛn totoɔ le mɛ yí dada dɔ̀ nɔ wo pleŋ.
20 Éfɔn kɔ yi ji yí kpɔ yi nukplaviwo yí tɔ nunu mɔ:
“Míwo ciwo yí nyi wamɛnɔwo kpɔkpɔ jijɔ, ɖo míwotɔ yí nyi Mawu Fyɔɖuxu lɔ.
21 “Míwo ciwo yí shive ciciɛ yɛ kpɔkpɔ jijɔ, ɖo xodu avaɖɔ mí.
“Míwo ciwo yí fanfan avi yɛ kpɔkpɔ jijɔ, ɖo míavako nukui.
22 “Nɔ amɛwo gbe eŋwa nɔ mí yí nya mí ti le ha mɛ yí zukɔ mí yí gbexokɔ ɖyi míwo ŋkɔ mɔ mínyi amɛvwinwo do Agbetɔvi lɔ ŋciɔ, míkpɔ jijɔ.
23 Ŋcɛ han lɔwo ke yí wowo tɔgbiwo wa koɖo enyɔnuɖɛtɔwo. Eyi taɖo, míkpɔ jijɔ le ŋkeke ŋtɔ́ ji yí eji le jɔ mí sugbɔ. Ðo míwo fɛncu gangan le jeŋkwi mɛ.
24 “Vɔ babɛ nɔ míwo ciwo yí nyi dɔkunɔwo, ɖo míkpɔkpɔ nyɔna míwotɔwo pleŋ vɔ.
25 “Babɛ nɔ míwo ciwo yí xodu ɖɔ yɛ, ɖo shive avaci mí.
“Babɛ nɔ míwo ciwo yí kokoɔ nukui yɛ, ɖo míavafan gbɛkwi yí afan avin.
26 “Babɛ nɔ mí nɔ amɛwo pleŋ nunuɔ enyɔnywi so mí nu, ɖo eyi wowo tɔgbiwo wa nɔ enyɔnuɖɛtɔ ŋsukantɔwo.
27 “Vɔ ŋnukɔ nɔ míwo ciwo yí ɖokɔ to mɔ: Míkpɔtɔ alɔnnɔ míwo ketɔnɔwo yí awanɔ enywi nɔ mɛ ciwo yí xaxa mí.
28 Mícu shi nɔ mɛ ciwo yí sɛnsɛn kpɛn nɔ mí yí adonɔ gbe ɖaɖa do ta nɔ mɛ ciwo yí zuzuɔ mí.
29 Nɔ mɛɖe xo tomɛ nɔ eoɔ, trɔ xlɔtɔ ni nɔ axo. Eyi nɔ mɛɖe xɔ awu jitɔ le eo shiɔ, ŋgbegbe mɔ yedasɔ gɔnmɛtɔ can ni o.
30 Nɔ mɛɖekpokpui biɔ nu eoɔ, ni. Eyi nɔ mɛɖe sɔ ao nuwo le eo shi hɛn yiɔ, ŋgbebiɔ wo yi o.
31 “Ahanke ŋci míjinɔ mɔ amɛwo le wanɔ nɔ yewoɔ, míwo can míwɛni nɔ wo.
32 “Nɔ mɛ ciwo yí lɔnnɔ mí ɖekɛwo yí mílɔnnɔ ɖe, ele ci yí le mɛ nɔ míɔ? Ðo nuvɔnwatɔwo can lɔnnɔ mɛ ciwo yí lɔnnɔ wo hɛnnɛ.
33 Nɔ mɛ ciwo yí wakɔ enywi nɔ mí ɖekɛwo yí míwanɔ enywi nɔ ɖe, ale ci yí le mɛ nɔ míɔ? Ðo nuvɔnwatɔwo can wanɔ ahan hɛnnɛ.
34 Ahanke nɔ enyi mɛ ciwo gbɔ mínya mɔ yewoavakpɔ axɔ le ɖekɛwo yí mídonɔ* nu nɔ ɖe, ale ci míakpɔ le mɛɔ? Ðo nuvɔnwatɔwo can donɔ nu nɔ nuvɔnwatɔwo yí kpɔnɔ emɔ mɔ woavasɔɛ nɔ yewo pɛpɛpɛ.
35 Vɔ míwoɔ, míkpɔtɔ alɔnnɔ míwo ketɔnɔwo yí awanɔ enywi nɔ wo yí adonɔ nu nɔ amɛ yí mídakpɔ emɔ mɔ woacui nɔ mí o; eyi míwo fɛncu agangan yí míanyi Ejiɖaatɔ viwo, ɖo éwanɔ xomɛvu nɔ akpemadotɔwo koɖo nuvɔnwatɔwo.
36 Míkpɔtɔ akunɔ ŋshishi nɔ amɛ shigbe lé míwo Da kunɔ ŋshishi nɔ amɛ nɛ.
37 “Gbesɔ kpe niɔ, mími kojo ɖoɖo nɔ amɛwo yí wodaɖo kojo nɔ mí o; mími ehwɛ dodo amɛwo yí wodado hwɛ mí o. Míkpɔtɔ asɔ nu kenɔ amɛ* yí woasɔ ke míwo can hɛnnɛ.*
38 Mínanɔ nu amɛwo yí woana míwo can. Woawa ɖaŋ adre nu aʒin yí ahunhuin yí aɖɔ akɔkɔ yí woasɔ kɔ do avɔn mɛ nɔ mí. Ðo ŋci mísɔ drekɔ nu nɔ amɛwoɔ, eyi lɔ ke woasɔ dre enu nɔ mí.”
39 Égbedo labalu nɔ wo hɛnnɛ mɔ: “Ŋkuvitɔnnɔ asɛnŋ akplɔ ŋkuvitɔnnɔa? Oo. Wo koɖo ve lɔwo aje dodu mɛ.
40 Enukplavi ɖe dewunɔgan yi nukplamɛtɔ o, vɔ mɛɖekpokpui ci wokpla nu nywiɖe ale shigbe yi nukplamɛtɔ nɛ.
41 Nyi yí taɖo èkpɔkpɔ ebekwi le ŋkuvi ji nɔ nɔvio, gan yí dènya mɔ acikpu le eoŋtɔ tɔ jiɔ?
42 Lé àwɛ anu nɔ nɔvio mɔ, ‘Nɔvinyɛ, maɖe ebekwi le ŋkuvi ji nɔ eo,’ gan yí dèkpɔkpɔ acikpu ci yí le eoŋtɔ ŋkuvi jiɔ? Ayemɛnuwatɔ! Ðè acikpu ci yí le ao ŋkuvi ji si keŋ, eyi nàkpɔ nu nywiɖe yí aɖe ebekwi ci yí le nɔvio ŋkuvi ji.
43 “Ðo aci nywi datɛnŋ asɛn eku dɔndɔn o, ahanke aci dɔndɔn datɛnŋ asɛn eku nywi hɛnnɛ nɛ.
44 Eku ci aci ɖekpokpui sɛn yí wosɔ jenɔshi. Le kpɔwɛ mɛ, wodegbɛnnɔ figiwo le ŋjaciwo ji o, ahanke wodegbɛnnɔ rɛzɛnwo le aŋwakanwo ji hɛnnɛ nɛ.
45 Amɛnywi ɖenɔ nunywiwo ti le yi nunywiwo ɖoxu le yi ji mɛ, vɔ amɛvwin ɖenɔ nuvwinwo ti le yi nuvwinwo ɖoxu le yi ji mɛ; ɖo ŋci yí wugan ejiɔ, eyi tonɔ le aglan mɛ nɔ amɛ.
46 “Nyi yí taɖo míyɔnɔŋ mɔ ‘Axwetɔ! Axwetɔ!’ gan yí mídewanɔ do enyɔ ciwo yí ŋnunɔ jiɔ?
47 Mɛɖekpokpui ci yí va ŋgbɔ yí seseɛ anyi nyɔwo yí wawa do wo jiɔ, nanu mɛ ci eɖyi nɔ mí.
48 Éɖyi ŋsu ci yí cukɔ exɔ yí ku dodu yí ecito keŋ yí wa gɔnmɛɖokpe lɔ do ekpe ji. Eyi ci etɔ ɖɔ yí gban do exɔ lɔ nu can ɔ, ékpɔtɔ le te sɛnsinɖe yí dehunhun o, ɖo wowa ɖaŋ cui.
49 Vɔ mɛ ci yí sisiɛ yí dewakɔ do ji le shigbe ŋsu ci yí cu xɔ do nyigban gbali ji yí dewa gɔnmɛɖokpe ni nɛ. Ci etɔ ɖɔ yí va gban do exɔ lɔ nuɔ, éjuin zeɖeka yí cuku hannyahannya.”
Gɔnmɛnuŋwlɛnŋwlɛn
^ Alo “kpɔnnɔ ciwo wosɔ ɖo ŋmɛ nɔ Mawu.”
^ Alo “xo kplɛ ni.”
^ Alo “alɔ̀ xo kplɛ nɔ.”
^ Alo “ese.”
^ Edasɛ mɔ, wodaxɔ do ji o.
^ Alo “atanɔshi nyɔ.”
^ Alo “woatashi nyɔ nɔ míwo can hɛnnɛ.”
