Ao mɛ vevi ɖe ci èlɔn kua? Le vevisese hwenu lɔ mɛɔ, ètɛnŋ biɔ se mɔ: ‘Nyi yí jɔnɔ do mì ji nɔ mìkuɔ? Mìagbevakpɔ mìwo mɛ vevi ciwo yí ku kpɔa?’ Le nukplakpla cɛ koɖo ci yí akplɔɛdo mɛɔ, àkpɔ Bibla ɖoŋci fakɔnnamɛwo.

1. Nyi yí jɔnɔ do mì ji nɔ mìkuɔ?

Yesu sɔ eku sɔ koɖo alɔn ci yí yi mɛ ɖaa. Mɛ ci yí dɔn alɔn yi mɛ ɖaa denyanɔ enu ciwo jɔjɔ le axa ni o. Lé eku le shigbe alɔn nɛ doɔ? Nɔ mɛɖe kuɔ, degbesenɔ vevi o. Decinɔ akogo o, nɔ élɔn yi xlɔwo koɖo yi xomumɛtɔwo sugbɔ do ɖe can. Bibla nu mɔ: “Amɛkukuwo degbenya enu ɖekpokpui o.”—Hlɛn Ŋununyatɔ 9:5, NWT.

2. Nyɔna ci mìkpɔnɔ ci mìnya nyɔnɔnwi ci yí kudo eku nuɔ?

Amɛ sugbɔ vɔnnɔ nɔ eku koɖo amɛkukuwo! Vɔ àtɛnŋ akpɔ akɔnfafa so nyɔ ci Bibla nu so eku nu mɛ. Yesu nu mɔ: “Nyɔnɔnwi lɔ a na vovo mí.” (Ʒan 8:32) Sɛnsɛn ɖewo kplanɔ nu mɔ nɔ mɛɖe kuɔ, ŋɖeka tonɔ le mɛ yí yi nɔnɔ agbe, vɔ denyi enu ci Bibla kpla mì nɛ o. Edasɛ mɔ mɛɖekɛ dekpenɔ fun le eku mɛ o. Can hɛnnɛ, ci amɛkukuwo denya enu ciwo yí jɔjɔ le axa nɔ woɔ, wodatɛnŋ awa nuvevi koɖo mì o. Eyi taɖo deʒan mɔ mìafa akɔn nɔ amɛkukuwo alo asɛn wo o, yí deʒan mɔ mìado gbe ɖaɖa nɔ wo alo axo ɖe nɔ wo o.

Mɛɖowo nunɔ mɔ yewoatɛnŋ axo nuxu koɖo amɛkukuwo. Vɔ datɛnŋ ajɔ ahan o. Shigbe lé mìkpɔɛ sabaɖe yɛ nɛɔ, amɛkukuwo “degbenya enu ɖekpokpui o.” Mɛ ciwo yí buini mɔ yewoxonɔ nuxu koɖo yewo mɛ vevi ciwo yí kuɔ, etɛnŋ nyi gbɔngbɔnvɔn ciwo yí nɔ wowo mɛ vevi lɔwo dumɛ yí woxokɔ nuxu koɖo. Eyi taɖo nɔ mìnya nyɔnɔnwi ci yí kudo eku nuɔ, aglɔn ta nɔ mì so gbɔngbɔnvɔnwo shi. Yehowa kanxle mì mɔ mìwoŋgbetekpɔ mɔ mìaxo nuxu koɖo amɛkukuwo o, ɖo énya mɔ nɔ mìca ka koɖo gbɔngbɔnvɔnwoɔ, woadahɛn nu le mì nu.—Hlɛn 2 Ese Wema 18:10-12.

3. Kpla nu so nɔnɔmɛ ci mɛ amɛkukuwo le nyɔnɔnwitɔ nu

Le xexeɛ pleŋ mɛɔ, amowo ɖo jixɔse vovovowo kudo enu ci yí jɔnɔ do mì ji nɔ mìku nu. Vɔ jixɔse lɔwo pleŋ datɛnŋ anyi nyɔnɔnwi o.

• Nɔnɔmɛ ci mɛ amɛkukuwo le jixɔse ciwo yí bɔ le míwo nutwi mɛɔ?

 4. Mìkpɔnɔ nyɔna so nyɔnɔnwi ci yí kudo eku nu mɛ

Nɔ mìnya nyɔnɔnwi ci yí kudo eku nuɔ, mìdegbevɔnnɔ nɔ amɛkukuwo o. Hlɛn Ŋununyatɔ 9:10, keŋ agbeje nyɔbiɔse cɛ mɛ:

• Amɛkukuwo atɛnŋ awa nu koɖo mìa?

Nɔ mìkando Bibla mɛ nyɔnɔnwi lɔ jiɔ, mìdaxɔ ŋsukankan ci yí nyi mɔ, woɖo afa akɔn nɔ amɛkukuwo alo asɛn wo ji se o. Hlɛn Ezai 8:19 koɖo Enyɔdasɛ 4:11, keŋ agbeje nyɔbiɔse cɛ mɛ:

• Ci eɔ kpɔɛ ɖe, lé Yehowa kpɔnɔ mɛ ciwo yí sɛnnɔ amɛkukuwo alo biɔnɔ kpekpedonu wo doɔ?

5. Nyɔnɔnwi ci yí kudo eku nu fanɔ akɔn nɔ mì

Wokplanɔ amɛ sugbɔ mɔ nɔ wokuɔ, woadɔn to nɔ wo do nuvɔn ciwo wowa vayi nu. Vɔ efa akɔn nɔ mì, ci mìnya mɔ mɛɖekɛ dekpenɔ fun le eku mɛ o, mɛ ci yí wa nuvɔn ganganwo can. Hlɛn Rɔmatɔwo 6:7, keŋ agbeje nyɔbiɔse cɛ mɛ:

• Bibla mɔ nɔ mɛɖe kuɔ, yɛcu yi nuvɔnwo fɛn yí vo so nuvɔn mɛ; ci eɔ kpɔɛ ɖe, mɛɖe aku yí agbekpekɔ fun nɔ nuvɔn ciwo ewa vayia?

Nɔ mìjekɔshi Yehowa ɖɛ dojiɔ, ahanke mìagbevanya mɔ yɛdatre fun nɔ amɛkukuwo gbeɖe nɛ. Hlɛn 2 Ese Wema 32:4 koɖo 1 Ʒan 4:8, keŋ agbeje nyɔbiɔse cɛwo mɛ:

• Mawu ci yí ɖo nɔnɔmɛ nywi cɛwo ciwo woyɔ le kpukpui cɛwo mɛ alɔn do ji mɔ wo le tre fun nɔ amɛkukuwoa?

• Ci èkpɔɛ ɖe, nyɔnɔnwi ci yí kudo eku nu afa akɔn nɔ amɛa? Nyi yí taɖoɔ?

 ENU CI ÈKPLA

Nɔ mɛɖe kuɔ, yi gbe vɔ. Amɛkukuwo dekpenɔ fun o, yí wodatɛnŋ awa nu koɖo amɛlagbuwo o.

Enumɛtoto

• Nyi yí jɔnɔ do mì ji nɔ mìkuɔ?

• Lé mìkpɔnɔ nyɔna so nyɔnɔnwi ci yí kudo eku nu mɛ doɔ?

• Lé nyɔnɔnwi ci yí kudo eku nu fanɔ akɔn nɔ mì doɔ?