ENUKPLAKPLA 37
Enyɔ ci Bibla nu so edɔwawa koɖo eho nu
Èlo nu kpɔ so edɔwawa koɖo eho nu kpɔa? Atɛnŋ agbɔnnu mɔ mìakpɔnɔ mìwo nuʒanʒanwo gbɔ yí agbesɛnnɔ Yehowa shigbe lé eje nɛ. Bibla na nukplamu ŋtɔŋtɔ ciwo yí atɛnŋ akpedo mì nu.
1. Enyɔ ci Bibla nu so edɔwawa nuɔ?
Mawu ji mɔ mìwo le se vivi nɔ mìwo dɔ. Bibla nu mɔ “enunywi buɖe deli nɔ agbetɔ sɔwu mɔ . . . akpɔ jijɔ so edɔ sɛnsin ci ewa mɛ o.” (Ŋununyatɔ 2:24, NWT) Yehowa wanɔ dɔ sɛnsinɖe. Nɔ mìsrin yí wanɔ dɔ veviɖeɔ, mìwo nu akpe ni yí mìakpɔ jijɔ le mìwoɖekiwo mɛ.
Edɔwawa le veviɖe. Vɔ mìdeɖo alɔn yí avale veviɖe wu Yehowa sɛnsɛn gbeɖe o. (Ʒan 6:27) Yehowa ɖo gbe mɔ nɔ mìwosɔ ye sɛnsɛn ɖo texwe ŋkɔtɔɔ, yeakpɔ mìwo ŋcilanmɛ nuʒanʒanwo gbɔ nɔ mì.
2. Susu sɔgbe ci woɖo aɖo do eho nuɔ?
Ci Bibla nu mɔ “eho glɔnnɔ ta nɔ amɛ” can ɔ, ekanxle mì mɔ eho ɖekɛ datɛnŋ ana mìakpɔ jijɔ o. (Ŋununyatɔ 7:12, NWT) Eyi taɖo Bibla do ŋsɛn mì mɔ mìwoŋgbelɔn eho o, vɔ ‘enu ciwo yí le mì shi le jeŋ nɔ mì.’ (Hlɛn Ebretɔwo 13:5.) Nɔ enu ciwo yí le mì shi jeŋ nɔ mìɔ, mìavo le mìwoɖekiwo mɛ, ɖo mìdajinɔ mɔ mìawa enu sugbɔ ɖɛ o. Mìdaɖunɔ fɛn gbaagbali o. (Elododo Wema 22:7) Gbesɔ kpe niɔ, mìdadanɔ ehoɖyi alo ajinɔ alɔkpa ciwo mìazan yí akpɔ ho fafɛɖe le afɔdumɛ o.
3. Lé mìawɛ awanɔ xomɛvu le ehozanzan mɛɔ?
Yehowa nyi xomɛvu Mawu, nɔ ‘mìnanɔ enu amɛ, yí le gbesɔsɔ yí manɔ enu koɖo amɛɔ,’ anyi mìsrinkɔ. (1 Timɔte 6:18) Mìatɛnŋ azan mìwo ho yí asɔ wanɔ xomɛvu, nɔ mìsɔ donɔ alɔ hamɛ lɔ yí gbekpenɔdo mɛbuwo nu, vevitɔ mìwo kpena xɔsetɔwo. Denyi enu nɛni mìna yí jɔnɔ ji nɔ Yehowa sugbɔ o, vɔ nɔ mìlɔn faa nanɔ nu yí jɔnɔ ji ni. Nɔ mìsɔ xomɛvu nanɔ nu so ji mɛɔ, mìakpɔnɔ jijɔ yí mìwo nu akpe nɔ Yehowa.—Hlɛn Edɔwawawo 20:35.
JI DWI NI KPƆ DOJI
Kpɔ nyɔna ciwo mìakpɔ nɔ mìɖo susu nywi do edɔwawa nu yí enu jenɔŋ nɔ mì ɖa.
4. Lé èwanɔ dɔ do le nyi kanfukanfu nɔ Yehowa
Exlɔ ci mìnyi koɖo Yehowa ɖo akpɔ ŋsɛn do susu ci mìɖo do edɔwawa nu ji. Xo VIDEO lɔ, keŋ agbeje nyɔbiɔse ciwo yí gbɔgbɔ mɛ.
-
Ci èkpɔ susu koɖo agbenɔnɔ ci yí le Jason shi le edɔ lɔ mɛ ɖe, lé ewa dɔ do eo ji doɔ?
-
Nyi ewa yí sɔ edɔ lɔ ɖo texwe nywitɔɔ?
Hlɛn Kolosetɔwo 3:23, 24, keŋ agbeje nyɔbiɔse cɛ mɛ:
-
Nyi yí taɖo susu ci mìɖo do edɔwawa nu le veviɖeɔ?
Edɔwawa le veviɖe. Vɔ mìdeɖo alɔn yí avale veviɖe wu Yehowa sɛnsɛn gbeɖe o
5. Nɔ nu jenɔŋ nɔ mìɔ, mìakpɔ nyɔna so mɛ
Amɛ sugbɔ tekpɔ yí jinɔ eho sugbɔ lé woakpe ji do. Vɔ nukplamu bu yí Bibla na mì. Hlɛn 1 Timɔte 6:6-8, keŋ agbeje nyɔbiɔse cɛ mɛ:
-
Nyi Bibla do ŋsɛn mì mɔ mìwo le waɔ?
Nɔ enu ci yí le mì shi desugbɔ can ɔ, mìatɛnŋ akpɔ jijɔ. Xo VIDEO lɔ, keŋ agbeje nyɔbiɔse ci yí gbɔgbɔ mɛ.
-
Ci enyi eho hwɛɖeka yí le xomu lɔwo shi can ɖe, nyi yí na wokpɔnɔ jijɔɔ?
Vɔ nɔ enu sugbɔ le mì shi, gan yí mìgbejikɔ doji ɖe? Yesu wa kpɔwɛ ɖeka so afɔku cɛ nu. Hlɛn Luiki 12:15-21, keŋ agbeje nyɔbiɔse cɛ mɛ:
-
Nyi èkpla so Yesu kpɔwɛ lɔ mɛɔ?—Kpɔ kpukpui 15.
Hlɛn Elododo Wema 10:22 koɖo 1 Timɔte 6:10, keŋ asɔ wo sɔ kpɔ. Yi goduɔ, nagbeje nyɔbiɔse cɛwo mɛ:
-
Ci èkpɔɛ ɖe, nyi yí le veviɖe wuɔ? Exlɔnyinyi koɖo Yehowa yɔa, alo eho sugbɔ kpɔkpɔ yɔ? Nyi yí taɖoɔ?
-
Nɔ mɛɖe lɔ ju kplɔ eho do ɖe, cukaɖa ciwo yí tonɔ so mɛɔ?
6. Yehowa akpɔ mìwo nuʒanʒanwo gbɔ
Edɔ koɖo eho cukaɖawo atɛnŋ ado mìwo xɔse ci mìɖo nɔ Yehowa kpɔ. Xo VIDEO lɔ keŋ akpɔ lé mìatɛnŋ awa nu do nɔ mìdo go dodokpɔ hunnɔ hanwo, yi goduɔ, nagbeje nyɔbiɔse ciwo yí gbɔgbɔ mɛ.
-
Le video lɔ mɛ ɖe, cukaɖa ci nɔvi lɔ do goɔ?
-
Nyi ewa yí sɔ ɖu cukaɖa lɔ jiɔ?
Hlɛn Matie 6:25-34, keŋ agbeje nyɔbiɔse cɛ mɛ:
-
Nyi Yehowa ɖo gbe mɔ yeawa nɔ mɛ ciwo yí sɔ ye ɖo texwe ŋkɔtɔ le agbe mɛɔ?
MƐÐEWO NUNƆ MƆ: “Ŋɖo awa dɔ sɛnsinɖe keŋ akpɔ anyi xomu ji. Ŋdatɛnŋ ayinɔ hamɛ bɔbɔwo kwɛshila ɖeshiaɖe o.”
-
Kpukpui ci yí na kankandoji eo mɔ, Yehowa sɛnsɛn sɔsɔ ɖo texwe ŋkɔtɔ yí nyi gbeta nywitɔ gashiagamɛɔ?
ENU CI ÈKPLA
Edɔwawa koɖo eho le veviɖe, vɔ mìdeɖo alɔn yí woaɖe mìwo susu so Yehowa sɛnsɛn ji gbeɖe o.
Enumɛtoto
-
Nyi yí atɛnŋ akpedo eo nu naɖo susu sɔgbe do edɔwawa nuɔ?
-
Lé enujeŋnamɛ kpenɔdo eo nu doɔ?
-
Lé àwɛ akando egbe ci Yehowa ɖo nɔ yi mɛwo mɔ yeakpɔ wowo nuʒanʒanwo gbɔ nɔ wo jiɔ?
KPƆ ŊCƐWO KPƆ
Kpɔ mɔ Bibla mɔ eho nyi enuvwin ma.
Kpɔ lé mìatɛnŋ ananɔ nu nɔ ajɔnɔ ji nɔ Mawu do ɖa.
“Enyɔ ci Bibla nu so enunana amɛ nuɔ?” (Àkpɔɛ le siti lɔ ji)
Munumumu kpoŋ yí ehoɖyidada nyia?
Kpɔ enu ci yí cucu ehoɖyidatɔ ɖeka ci yí nyi flafinɔ yí etrɔ yi gbenɔnɔ ɖa.
“Esɔ kuku asɔ wa hwlɛn jɔnɔ ji nɔŋ” (Jutakpɔxɔ 1er novembre 2011)
Ebuwo Ke
ENYƆ CIWO AMƐWO BIƆNƆ SE BLAŊBLAŊ
Nyi Bibla nukplakpla ci Yehowa Kunuɖetɔwo sɔ ɖokɔ ŋmɛ nɔ amowo nyiɔ?
To seŋkankan toto ehomana ci Yehowa Kunuɖetɔwo sɔ ɖokɔ ŋmɛ nɔ amowo jiɔ, àtɛnŋ azan Bibla gɔnmɛɖeɖe ɖekpokpui. Vo faa ayɔ ao xomu lɔ pleŋ alo ao xlɔwo nɔ woava bɔdo eo nu le nukplakpla lɔ mɛ.
