Ehun nyi enuvevi. Nɔ dele lanmɛ nɔ mìɔ, mɛɖekɛ datɛnŋ anɔ agbe o. Ci enyi Mawu yí wa mìɔ, eyi ɖo anu lé mìazan ehun lɔ do. Nyɔ ci enu so ehun nuɔ? Woaɖui drua, alo woadui nɔ amɛ dru? Lé àwɛ asɔ gbeta nywitɔ kuso nyɔ cɛ nuɔ?

1. Lé Yehowa kpɔnɔ ehun doɔ?

Yehowa nu nɔ yi sɛntɔwo le Bibla mɛ mɔ: “Ŋcilan ɖeshiaɖe gbe yí nyi yi hun.” (1 Ese Wema 17:14, NWT) Le Yehowa gbɔɔ, ehun le dumɛ nɔ agbe. Ci agbe nyi enuvevi koɖo enunana kɔkɔɛ so Mawu gbɔɔ, edasɛ mɔ ehun can nyi enuvevi.

2. Ehunzanzan mɔnu ci Mawu gbeɔ?

Yehowa do se nɔ yi sɛntɔ ciwo yí nɔ agbe doŋkɔ nɔ Kristotɔwo mɔ woŋgbeɖu ehun o. (Hlɛn Gɔnmɛjeje 9:4 koɖo 1 Ese Wema 17:10.) Égbeɖo kpe ese lɔ ji hwenu edɔjikpɔha lɔ na emɔdasɛnamɛ Kristotɔwo mɔ “Mí ŋgbe tɔ aɖe ehùn o [“mígbe ehun,” NWT.]”—Hlɛn Edɔwawawo 15:28, 29.

Woagbe ehun gɔnmɛ ɖe? Nɔ doto ɖe nu nɔ eo mɔ, eɔ le gbe aha sɛnŋsɛnŋ ɔ, danui o. Vɔ àlɔn aɖu enu ciwo mɛ aha sɛnŋsɛnŋ le alo amɔ wo le dui do ekánwo mɛ nɔ yea? Dalɔn o. Edasɛ mɔ, ci Mawu do se mɔ mìwo le gbe ehun ɔ, mìdeɖo anu ehun alo aɖu elan ci wodeso kɔ nɔ o. Gbesɔ kpe niɔ, mìdeɖo aɖu ŋɖekpokpui ci wosɔ ehun baka o.

Vɔ ehunzanzan le edɔ̀dadamɔnuwo mɛ yɛ ɖe? Edɔ̀dadamɔnu ɖewo trɔkpe Mawu se lɔ tiin. Ðowo yí nyi ehun lɔ pleŋ alo yi kpaxwe vevi ɖe dodo nɔ amɛ. Wowo yí nyi: Ehunmɛnuvileagbu junwo (les globules rouges), ehunmɛnuvileagbu ɣiwo (les globules blancs), ehunmɛnu gbabɛwo (les plaquettes) koɖo ehunshi (le plasma). Taŋfuin edɔ̀dadamɔnu ɖowo datrɔkpe Mawu se lɔ tiin o. Le kpɔwɛ mɛ, woɖenɔ ehunmɛnu wliwli buwo (fractions de sang) so ehun kpaxwe vevi lɔwo mɛ yí zannɔ wo le edɔ̀dadamɔnu ɖewo mɛ. Wozannɔ amɛ ŋtɔ hun le edɔ̀dadamɔnu buwo mɛ. Mɛɖeka mɛɖeka yí abu tamɛ kpɔ so edɔ̀dadamɔnu cɛwo nu keŋ asɔ gbeta yiŋtɔ. a—Galatitɔwo 6:5.

 JI DWI NI KPƆ DOJI

3. Sɔ gbeta ciwo yí kpenɔ nɔ Yehowa

Lé àwɛ asɔ gbeta ci yí sɔ koɖo susu ci Mawu ɖo do ehun nuɔ? Xo VIDEO lɔ, keŋ akan seŋ so enu ci yí taɖo ele veviɖe mɔ, mìawa enu cɛ ciwo yí gbɔgbɔ:

• Do gbe ɖaɖa abiɔ nunya.—Ʒaki 1:5.

• Ji Bibla gɔnmɛɖosewo koɖo lé àzan wo do.—Elododo Wema 13:16.

• Ji edɔ̀dadamɔnu ciwo yí le fini èle.

• Do jeshi edɔ̀dadamɔnu ciwo deɖo azan o.

• Kando ji mɔ gbeta ci èsɔ davaɖe fun nɔ ayexadohwɛnamɛnu aotɔ o.—Edɔwawawo 24:16. b

• Ðo ŋwi mɔ mɛɖekɛ deɖo asɔ gbeta do nu nɔ eo le ayexadohwɛnamɛnu nyɔwo mɛ o, nɔ mɛ lɔ nyi mɛ ci èɖe, hamɛmɛshinshin alo ao Bibla nukplamɛtɔ can.—Rɔmatɔwo 14:12.

• Ŋwlɛ ao gbetasɔsɔ lɔ ɖɛ, nɔ mɛbuwo atɛnŋ anya nu so nu.

4. Yehowa Kunuɖetɔwo jinɔ edɔ̀dadamɔnu nywitɔ

Mìatɛnŋ awa do Mawu se ci yí kudo ehun nu ji gan yí woazan edɔ̀dadamɔnu nywitɔ ci mɛ ehun dele nɔ mì. Xo VIDEO lɔ.

Hlɛn Titu 3:2, keŋ agbeje enyɔbiɔse cɛ mɛ:

• Nyi yí taɖo mìɖo abu amɛ yí agbesɔ mìwoɖekiwo hwe nɔ mìxokɔ nuxu nɔ dotowoɔ?

  5. Nɔ enu ciwo woɖe so ehunmɛnuvileagbu lɔwo mɛ vaʒan

Enuvileagbu vevi amɛnɛ yí le ehun mɛ. Wowo yí nyi: Ehunmɛnuvileagbu junwo, ehunmɛnuvileagbu ɣiwo, ehunmɛnu gbabɛwo koɖo ehunshi. Woɖenɔ enu wliwli buwo le nuvileagbu vevi cɛwo mɛ. c Wozannɔ enu wliwli ɖewo le edɔ̀dada mɛ nɔ woaɖu dɔ̀lekuiwo ji alo nɔ woaso ehun ci yí ŋɛŋɛ do mɛɖe nu.

Nɔ enu ciwo woɖe so ehunmɛnuvileagbu lɔwo mɛ vaʒan ɔ, Kristotɔ ɖeshiaɖe yí asɔ gbeta sɔ koɖo ayexadohwɛnamɛnu ci esɔ Bibla na kpla. Kristotɔ ɖewo tɛnŋ gbe mɔ, wodazan enu ciwo woɖe so ehunmɛnuvileagbu lɔwo mɛ nɔ yewo le edɔ̀dadamɔnuwo mɛ o. Mɛbuwo tɛnŋ kpɔɛ mɔ, ayexadohwɛnamɛnu yewotɔ ɖe mɔ nɔ yewo yí woazan ehunmɛnu wliwli lɔwo nɔ yewo.

Nɔ èsɔkɔ ao gbetawo so nuɔ, bu tamɛ kpɔ so nyɔbiɔse cɛ nu:

• Nɔ ŋgbe ehunmɛnu wliwli ciwo woɖe so ehunmɛnuvileagbu lɔwo mɛ alo lɔn mɔ woazan wo nɔŋ ɖe, lé naɖe mɛ nɔ doto lɔ doɔ?

 ENU CI ÈKPLA

Yehowa deji mɔ mìwo le wa fɛn azan ehun lɔ o.

Enumɛtoto

• Nyi yí taɖo Yehowa kpɔnɔ ehun mɔ yɛnyi enuveviɔ?

• Lé mìwɛ yí nya mɔ, ese ci Mawu do mɔ mìwo le gbe ehun kan ehundodoɔ?

• Lé àwɛ asɔ gbeta nywi so edɔ̀dadamɔnu ciwo mɛ wozannɔ ehun le nuɔ?