ENUKPLAKPLA 44
Azanwo pleŋ ɖuɖu yí jɔnɔ ji nɔ Mawua?
Yehowa ji mɔ mìwo le se vivi nɔ agbe lɔ keke aɖu azan hweɖowonu hɛnnɛ. Vɔ azanɖuɖuwo pleŋ yí kpenɔ nia? Lé mìawɛ adasɛ le nyɔ cɛ mɛ mɔ mìlɔn Yehowaɔ?
1. Nyi yí taɖo azanɖuɖu sugbɔtɔ dekpenɔ nɔ Yehowaɔ?
Ajiŋ nɔ eo nɔ èvakpɔɛ mɔ azanɖuɖu sugbɔtɔ jɔ so nukplakpla ciwo yí deso Bibla mɛ o, alo so vojusɛnsɛn mɛ. Azanɖuɖu ŋtɔ́ hanwo tɛnŋ ca ka koɖo ŋsusɛnsɛn. Wotɛnŋ ca ka koɖo gbɔngbɔnyɔyɔ alo wotɛnŋ jɔ so susu ci yí nyi mɔ ese dekunɔ mɛ. Azanɖuɖu ɖewo jɔ so ŋsukankan jixɔse mɛ. (Ezai 65:11) Yehowa kanxle yi sɛntɔwo mɔ: “[Mí] teyì azɔge . . . Mí ŋgbe tɔ alɔ̀ enu makɔmakɔ ɖe o.”—2 Korɛntitɔwo 6:17. a
2. Nɔ azanɖuɖuwo sɔ bubu ci agbetɔwo deje nɔ nakɔ wo ɖe, lé ewanɔ nɔ Yehawaɔ?
Yehowa kanxle mì mɔ ‘mìŋgbekando agbetɔvi gbali ji o.’ (Hlɛn Ʒeremi 17:5, NWT.) Azanɖuɖu ɖewo donɔ bubu acɛkpatɔwo alo sɔjawo nu. Mɛbuwo ɖunɔ azan nɔ wowo jukɔn, alo le azan ci ji jukɔn lɔ xɔ ablɔɖe le. (1 Ʒan 5:21) Le azan buwo jiɔ, amowo ɖunɔ azan nɔ politiki gbɛbɔbɔwo alo gbɛbɔbɔ buwo. Lé awa nɔ Yehowa, nɔ mìdokɔ bubu ci mɛɖe alo gbɛbɔbɔ ɖe deje nɔ nu, vevitɔ nɔ mɛ lɔ alo gbɛbɔbɔ lɔ susuwo trɔkpe Yehowa tajinuɔ?
3. Nuwana ciwo yí atɛnŋ ana mɔ azanɖuɖu ɖe danyɔɔ?
Bibla mɔ mìwoŋgbenyi ‘ahanumunɔwo, aɖunɔ exwe vwinwo, yí awanɔ hwlɛn le ahanunu mɛ o.’ (1 Piɛ 4:3) Agbe yakayaka nɔnɔ koɖo gbɔdɔndɔnnuwo nɔnɔ azanɖuɖu ɖewo mɛ. Gbɔxwe mìakpɔtɔ anyi Yehowa xlɔwoɔ, mìɖo ate yi azɔge kpanŋkpanŋ nɔ agbenɔnɔ makɔmakɔ ŋtɔ́wo.
JI DWI NI KPƆ DOJI
Kpɔ lé mìawɛ asɔ gbeta nywiwo so azanɖuɖuwo nu nɔ mìwo nu akpe nɔ Yehowa.
4. Gbe azanɖuɖu ciwo yí dedonɔ bubu Yehowa nu o
Hlɛn Efezitɔwo 5:10, keŋ agbeje nyɔbiɔse cɛwo mɛ:
-
Nyi mìɖo atekpɔ awa nɔ mìsɔkɔ gbeta mɔ mìaɖu azan ɖe alo mìdaɖuiɔ?
-
Azanɖuɖu ciwo yí bɔ le fini èleɔ?
-
Ci èkpɔɛ ɖe, azanɖuɖu lɔwo kpenɔ nɔ Yehowaa?
Le kpɔwɛ mɛ, èbiɔ eoɖeki se kpɔ mɔ lé Yehowa kpɔnɔ jigbezanɖuɖu do maa? Bibla denu kpɔ mɔ Yehowa sɛntɔ ɖe ɖu jigbezan o. Vɔ exo nuxu so jigbezan ciwo amɛ amɛve ciwo yí denyi Yehowa sɛntɔwo ɖu nu. Hlɛn Gɔnmɛjeje 40:20-22 koɖo Matie 14:6-10. Yi goduɔ, gbeje nyɔbiɔse cɛwo mɛ:
-
Nyi mɛ jigbezanɖuɖu lɔwo koɖo ve ɖyi nɔnɔ leɔ?
-
Sɔ koɖo Bibla xolɔlɔ cɛwo ɖe, lé èkpɔ mɔ Yehowa kpɔnɔ jigbezanɖuɖu doɔ?
Vɔ ètɛnŋ biɔ eɔɖeki se mɔ, ‘Nɔ ŋɖu jigbezan alo azan buɖe ci yí desɔgbe koɖo Bibla ɖe, ewanɔ ɖe nɔ Yehowa teŋ a?’ Hlɛn Hunhun 32:1-8. Yi goduɔ, xo VIDEO lɔ keŋ agbeje nyɔbiɔse ciwo yí gbɔgbɔ mɛ.
-
Nyi yí taɖo mìɖo atekpɔ anya enu ciwo yí kpenɔ nɔ Yehowaɔ?
-
Nyi yí akpedo mì nu mìawɛɔ?
Lé mìawɛ anya mɔ azanɖuɖu ɖe dekpe nɔ Mawu o
-
Nukplakpla ciwo yí desɔgbe koɖo Bibla mɛ yí ejɔ soa? Nɔ àkpɔɛɔ, ji fini ejɔ so kpɔ.
-
Esɔ bubu ci agbetɔwo, gbɛbɔbɔwo alo jukɔnwo deje nɔ nanɔ woa? Mìdonɔ bubu Yehowa nu wu mɛɖekpokpui, yí ɖoŋ do nu mɔ eyi avakpɔ xexeɛ mɛ cukaɖawo gbɔ.
-
Azan lɔ kɔnuwo koɖo yi nuwanawo trɔkpe agbenywinɔnɔ se Bibla tɔwoa? Mìɖo akpɔtɔ anɔnɔ agbe kɔkɔɛ.
5. Kpedo mɛbuwo nu nɔ woadonɔ bubu ao jixɔsewo nu
Nɔ amowo ʒinkɔ mì ji mɔ mìwo le ɖu azan ciwo yí dekpenɔ nɔ Yehowaɔ, atɛnŋ agbɔnnu mɔ mìagbe. Sɔ ayexa koɖo jigbɔnɖɛ ɖe ao jixɔsewo mɛ nɔ wo. Nɔ àkpɔ lé àwɛ doɔ, xo VIDEO lɔ.
Hlɛn Matie 7:12, keŋ agbeje nyɔbiɔse cɛwo mɛ:
-
Sɔ koɖo kpukpui cɛ ɖe, eo yí asɔ gbeta do nu nɔ ao xomumɛtɔwo mɔ, wodeɖo aɖu azan ɖea?
-
Nyi han àtɛnŋ awa yí asɔ na kankandoji ao xomumɛtɔwo mɔ, ci yedaɖu azan lɔ koɖo wo can ɔ, yelɔn wo yí wole veviɖe nɔ yeɔ?
6. Yehowa ji mɔ mìwo le kpɔ jijɔ
Yehowa ji mɔ mìwo koɖo mìwo xomumɛtɔwo koɖo mìwo xlɔwo ado go akpɔ jijɔ. Hlɛn Ŋununyatɔ 8:15, keŋ agbeje nyɔbiɔse cɛ mɛ:
-
Lé kpukpui cɛ dasɛ do mɔ Yehowa ji mɔ mìwo le kpɔ jijɔɔ?
Yehowa ji mɔ ye mɛwo amu munu yí anɔ ju akpɔ jijɔ. Xo VIDEO lɔ keŋ akpɔ lé ecɛ ze petii le mìwo jukɔnwo mɛ takpekpeganwo mɛ do ɖa.
Hlɛn Galatitɔwo 6:10, keŋ agbeje nyɔbiɔse cɛwo mɛ:
-
Azan ciwo yí mɛshiamɛ ɖunɔ yí mìaɖu duu gbɔxwe yí ana “enunywi” mɛbuwoa?
-
Ci èɖo ana nu amowo dandanmɛ le azanɖuɖu ɖe hwenu, koɖo ci eoŋtɔ àna nu amowo faa hwenu yí edro eo ɖe, ci yí ado jijɔ nɔ eo sɔwuɔ?
-
Kunuɖetɔ sugbɔ ɖunɔ azan koɖo wowo viwo hweɖowonu yí nanɔ nuwo wo le avomɛ hɛnnɛ. Nɔ eviwo le eo shi ɖe, enuvevi ciwo àtɛnŋ awa nɔ woɔ?
MƐÐEWO NUNƆ MƆ: “Fini azan ɖe jɔ so dele veviɖe o. Azanɖuɖu koɖo ao xomumɛtɔwo koɖo ao xlɔwo yí le veviɖe.”
-
Lé ànu do nu nɔ woɔ?
ENU CI ÈKPLA
Yehowa ji mɔ mìwo le kpɔ jijɔ doju koɖo mìwo xomumɛtɔwo koɖo mìwo xlɔwo. Vɔ égbeji mɔ mìwo le ze nɔ azanɖuɖu ciwo yí dekpe nɔ ye o.
Enumɛtoto
-
Nyɔ ciwo mìatɛnŋ abiɔ se keŋ anya nɔ azanɖuɖu ɖe dekpe nɔ Jehowaɔ?
-
Lé mìawɛ akpedo mìwo xomumɛtɔwo nu nɔ woamɔŋje gbeta ciwo mìsɔ kudo azanɖuɖuwo nu mɛɔ?
-
Lé èwɛ yí nya mɔ Yehowa ji mɔ mìwo le mu munu yí akpɔ jijɔɔ?
KPƆ ŊCƐWO KPƆ
Kpɔ azan ɖewo ciwo Kristotɔwo deɖunɔ ɖa.
“Nyi yí taɖo Yehowa Kunuɖetɔwo deɖunɔ exwe ɖewoɔ?” (Àkpɔɛ le siti lɔ ji)
Kpɔ susu amɛnɛ ciwo yí taɖo mìxɔɛ se mɔ, jigbezanwo dekpenɔ nɔ Mawu o.
“Nyi yí taɖo Yehowa Kunuɖetɔwo deɖunɔ jigbezan ɔ?” (Àkpɔɛ le siti lɔ ji)
Kpɔ lé ɖevihwɛ ciwo yí lɔn Yehowa awɛ nɔ wowo nu akpe ni hwenu amɛwo ɖukɔ exwe ɖa.
Kristotɔ miliɔn nɛniɖe gbe mɔ yewodaɖu Nɔwɛli xwe o. Lé wowo gbetasɔsɔ lɔ wanɔ nɔ woɔ?
a Kpɔ Enumɛɖeɖe ciwo yí le vɔvɔnu 5 tɔ keŋ akpɔ enu ci àwa nɔ amowo ɖukɔ azan ɖe.
Ebuwo Ke
ENYƆ CIWO AMƐWO BIƆNƆ SE BLAŊBLAŊ
Nyi Bibla nukplakpla ci Yehowa Kunuɖetɔwo sɔ ɖokɔ ŋmɛ nɔ amowo nyiɔ?
To seŋkankan toto ehomana ci Yehowa Kunuɖetɔwo sɔ ɖokɔ ŋmɛ nɔ amowo jiɔ, àtɛnŋ azan Bibla gɔnmɛɖeɖe ɖekpokpui. Vo faa ayɔ ao xomu lɔ pleŋ alo ao xlɔwo nɔ woava bɔdo eo nu le nukplakpla lɔ mɛ.
