ENUKPLAKPLA 47
Èle gbesɔsɔ awa ʒinʒindoshimɛa?
To Bibla kplakpla aotɔ jiɔ, èkpla nu sugbɔ so Yehowa nu. Èje agbla yí wa trɔtrɔwo hɛnnɛ keŋ atɛnŋ awa do enu ci èkplakpla ji. Vɔ ɖowotɔɔ, susu ɖewo li ci yí dɔ ewawa nɔ eo mɔ yedesɔgbe hɔɖo yí asɔ yeɖeki na Yehowa keŋ awa ʒinʒindoshimɛ o. Enukplakpla cɛ agbeje emɔxenu ciwo mìdonɔ go blaŋblaŋ mɛ yí agbedre lé mìawɛ aɖu wo ji.
1. Enu nɛni ànya gbɔxwe awa ʒinʒindoshimɛɔ?
Gbɔxwe àwa ʒinʒindoshimɛɔ, èɖo “a jeshi nyɔnɔnwi [adodwi lɔ].” (1 Timɔte 2:4) Ecɛ dedasɛ mɔ èɖo anya ɖoŋci nɔ enyɔ ɖekpokpui ci amowo abiɔ eo se so Bibla nu o. Kristotɔ ciwo yí wa ʒinʒindoshimɛ so exwe sugbɔ ke can gbekpɔtɔ kplakɔ nu. (Kolosetɔwo 1:9, 10) Ele ahan gan, èɖo anya Bibla gɔnmɛjeje nukplakplawo. Hamɛmɛshinshinwo akpedo eo nu nakpɔ mɔ yejeshi enu sugbɔ ma.
2. Afɔ ɖewo ciwo èɖo aɖe gbɔxwe awa ʒinʒindoshimɛɔ?
Gbɔxwe àwa ʒinʒindoshimɛɔ, èɖo “atrɔ jimɛ, yí atrɔ.” (Hlɛn Edɔwawawo 3:19, NWT.) Ecɛ dasɛ mɔ, èse vevi sugbɔ so nuvɔn ɖekpokpui ci èwa vayi nu yí biɔ Yehowa mɔ yɛ le sɔ ke ye. Ègbeɖui gligaan mɔ yedawa enudɔndɔn ɖe o, vɔ ènɔnɔ agbe shigbe lé Mawu ji do hannɛ. Gbesɔ kpe niɔ, ètɔ bɔbɔwo yiyi yí ɖenɔ kunu koɖo hamɛ lɔ.
3. Nyi yí taɖo deɖo alɔn yí vɔnvɔn axe mɔ nɔ eoɔ?
Mɛɖowo vɔnnɔ mɔ yewodavasun ji awa do egbe ciwo yewoɖo nɔ Yehowa ji o. Nyao yɔ, hweɖowonuɔ, mìwanɔ afɛnwo shigbe lé eyi do nɔ ŋsu koɖo nyɔnu egbejinɔtɔ ciwo nu Bibla xo nuxu so hannɛ. Vɔ, Yehowa deji mɔ ye sɛntɔwo anyi amɛmaɖoafɛnwo o. (Hlɛn Ehajiji Wema 103:13, 14.) Nɔ èwa ci ji èsun ɔ, ejɔnɔ ji ni! Ákpedo eo nu. Gbesɔ kpe niɔ, Yehowa na kankandoji mì mɔ, ŋɖekɛ “da tɛnŋ klan mì le [ye] lɔnlɔn nu o.”—Hlɛn Rɔmatɔwo 8:38, 39.
JI DWI NI KPƆ DOJI
Kpɔ lé àwɛ aɖu ŋciwo yí xekɔ mɔ nɔ eo nɔ ʒinʒindoshimɛ wawa ji, keŋ ajeshi Yehowa ɖɛ nywiɖe yí alɔn nɔ akpedo eo nu.
4. Jeshi Yehowa ɖɛ nywiɖe doji
Lé èɖo ajeshi Yehowa ɖɛ nywiɖe do gbɔxwe awa ʒinʒindoshimɛɔ? Èɖo ajeshi ɖɛ nywiɖe, yí aluin keŋ aji mɔ yeado jijɔ ni. Xo VIDEO lɔ keŋ akpɔ lé Bibla nukplaviwo le xexeɛ pleŋ mɛ wɛni do. Yi goduɔ, gbeje biɔse ci yí gbɔgbɔ mɛ.
-
Le video lɔ mɛ ɖe, nyi yí kpedo mɛɖewo nu yí wole gbesɔsɔ nɔ ʒinʒindoshimɛwawaɔ?
Hlɛn Rɔmatɔwo 12:2, keŋ agbeje biɔse cɛwo mɛ:
-
Ŋɖe na yí dekando ji mɔ ŋciwo Yehowa Kunuɖetɔwo kplanɔ nyi nyɔnɔnwia?
-
Nɔ ahan yɔ nɛ ɖe, nyi àtɛnŋ awa so nuɔ?
5. Ðu enu ciwo yí atɛnŋ xe mɔ nɔ eo nɔ ʒinʒindoshimɛwawa ji
Nɔ mìsɔ gbeta mɔ mìasɔ mìwoɖekiwo na Yehowa keŋ awa ʒinʒindoshimɛɔ, mì pleŋ yí donɔ go cukaɖawo. Nɔ àkpɔ yi kpɔwɛ ɖekaɔ, xo VIDEO lɔ, keŋ agbeje biɔse ciwo yí gbɔgbɔ mɛ.
-
Le video lɔ mɛ ɖe, emɔxenu ciwo ji Narangerel ɖo aɖu gbɔxwe asɛn Yehowaɔ?
-
Lé lɔnlɔn ci eɖo nɔ Yehowa kpedo nu eɖu mɔxenu lɔwo ji doɔ?
Hlɛn Elododo Wema 29:25 koɖo 2 Timɔte 1:7, keŋ agbeje biɔse cɛ mɛ:
-
Nyi yí nanɔ dɔngbegbe mì mìɖunɔ mɔxenuwo jiɔ?
6. Ðoŋ do Yehowa nu mɔ yɛakpedo ye nu
Yehowa akpedo eo nu nado jijɔ ni. Xo VIDEO lɔ, keŋ agbeje nyɔbiɔse ciwo yí gbɔgbɔ mɛ.
-
Le video lɔ mɛ ɖe, nyi yí taɖo Bibla nukplavi lɔ vɔn nɔ ʒinʒindoshimɛwawaɔ?
-
Nyi ekpla yí edo ŋsɛn yi eɖoŋ do Yehowa nuɔ?
Hlɛn Ezai 41:10, 13, keŋ agbeje biɔse cɛ mɛ:
-
Nyi yí taɖo àtɛnŋ akando ji mɔ yeatɛnŋ awa do egbe ci èɖo yí sɔ eoɖeki na Yehowa jiɔ?
7. Lɔnlɔn ci Yehowa ɖo nɔ eo le jeŋ nɔ eo doji
Nɔ èbunɔ tamɛ kpɔ so lé Yehowa lɔn eo sugbɔ do nuɔ, àdonɔ akpe ni doji, yí agbejinɔ mɔ yeasin doji tɛgbɛɛ. Hlɛn Ehajiji Wema 40:5, keŋ agbeje biɔse cɛ mɛ:
-
Yehowa shicu ciwo yí jɔnɔ ji nɔ eo koŋ ɔ?
Enyɔnuɖɛtɔ Ʒeremi lɔn Yehowa koɖo yi nyɔ lɔ, yí gbedonɔ akpe sugbɔ mɔ yɛnyi bubu nɔ ye mɔ Yehowa ŋkɔ le ye nu. Énu mɔ: “Ao ŋɛdwi va ŋ gbɔ, yí ŋ ɖu Ao nyɔ. Ao ŋɛdwi do jijɔkpɔkpɔ nɔ ŋ sugbɔ. Ŋ kpɔ jijɔ toto Ao ŋkɔ xɔxɔ ji. Ao ŋkɔ nyi [Yehowa Mawu].” (Ʒeremi 15:16) Ðo nyɔbiɔse cɛwo ŋci:
-
Nyi yí taɖo Yehowa Kunuɖetɔ nyinyi nyinɔ emɔ vevi ɖeka ci yí hunnɔ nɔ amɛɔ?
-
Èji mɔ yeawa ʒinʒindoshimɛ keŋ avanyi Yehowa Kunuɖetɔa?
-
Ŋɖe xexeɛ mɔ nɔ eo nɔ yi wawaa?
-
Nyi èkpɔ mɔ yeɖo awa keŋ aɖo ʒinʒindoshimɛ tajinu lɔ gbɔɔ?
MƐÐEWO NUNƆ MƆ: “Ŋvɔnkɔ mɔ ŋdatɛnŋ avawa do egbe ciwo naɖo hwenu nawa ʒinʒindoshimɛ ji o.”
-
Ahan ewanɔ nɔ eo nɛa?
ENU CI ÈKPLA
Le Yehowa kpekpedonu mɛɔ, àtɛnŋ aɖu mɔxenu ɖekpokpui ji keŋ awa ʒinʒindoshimɛ.
Enumɛtoto
-
Enu nɛni èɖo ajeshi le Bibla mɛ gbɔxwe awa ʒinʒindoshimɛɔ?
-
Trɔtrɔ ciwo atɛnŋ aʒan mɔ àwa gbɔxwe awa ʒinʒindoshimɛɔ?
-
Nyi yí taɖo deɖo alɔn nɔ vɔnvɔn axe mɔ nɔ eoɔ?
KPƆ ŊCƐWO KPƆ
Kpɔ ŋci yí ɖo acucu eo nasɔ gbeta keŋ awa ʒinʒindoshimɛ.
Kpɔ lé àwɛ aɖu cukaɖa ɖewo ciwo yí atɛnŋ axe mɔ nɔ eo ji.
“Nyi yí xekɔ mɔ nɔŋ yí nawa ʒinʒindoshimɛ egloɔ?” (Jutakpɔxɔ mars 2019)
Kpɔ lé ŋsu ɖeka sun ji yí ɖu mɔxenu ɖewo ji keke yí wa ʒinʒindoshimɛ ɖa.
Doŋkɔɔ, ŋsu ɖeka ci yí tɔ mɔ Ataa, vɔn nɔ ʒinʒindoshimɛwawa. Kpɔ ŋci yí na kankandoji yi, yí eɖe afɔ vevi cɛ ɖa.
Ebuwo Ke
ENYƆ CIWO AMƐWO BIƆNƆ SE BLAŊBLAŊ
Nyi Bibla nukplakpla ci Yehowa Kunuɖetɔwo sɔ ɖokɔ ŋmɛ nɔ amowo nyiɔ?
To seŋkankan toto ehomana ci Yehowa Kunuɖetɔwo sɔ ɖokɔ ŋmɛ nɔ amowo jiɔ, àtɛnŋ azan Bibla gɔnmɛɖeɖe ɖekpokpui. Vo faa ayɔ ao xomu lɔ pleŋ alo ao xlɔwo nɔ woava bɔdo eo nu le nukplakpla lɔ mɛ.
