Јаҥы јердеги амыр-энчӱ јӱрӱм

Бу трактатта јурукты кӧрӱп, слер кандый кӱӱн-санаага келедер? Слердиҥ јӱрегер андагы кӧрӱнип турган амыр-энчӱ, ырысту ла јайым јӱрӱмди кӱӱнзебейт пе? Кӱӱнзебей а. Је бу айалга качан-бирде јердиҥ ӱстинде болор деп бӱткени, ол тегин ле амаду, кей, тӧгӱн болуп калбас па?

Кӧп саба улус, анайда сананып турган болор. Бӱгӱнги чын болуп турган керектердиҥ јӱк ле бир кезегин эске алза — ол јуу-согуштар, каршулу керек эдери, торо, оору-јобол, карыганы. Андый да болзо, ижемјиге тӧзӧлгӧ бар. Келер ӧйгӧ кӧрӱп, Библия айдат: «бис [Кудайдыҥ] черт бергениле чындык јӱрер јаҥы теҥери ле јаҥы јер сакыйдыс» (2 Петрдыҥ 3:13; Исаия 65:17).

Библия аайынча, «јаҥы теҥери» ле бу «јаҥы јер» дегени не немелердеҥ турган јаҥы теҥери ле чын ла јаҥы јер эмес. Физический теҥери ле физический јер бийик кеминде јайалган, олор чактыҥ-чакка артар деп, Библия кӧргӱзет (Псалом 88:37, 38; 103:5). «Јаҥы јер» — јердиҥ ӱстинде јуртаган чындык улустаҥ турган албаты-јон, а «јаҥы теҥери» бийик кеминде турар теҥеридеги Каандык, ол эмезе јердеги эл-јонды башкаратан башкару. Је чынынча сананза, «јаҥы јер», ол эмезе кайкамчылу јаҥы телекей болор аргазы бар ба?

Мындый сӱреен јараш айалга, бистиҥ јерге Кудайдыҥ элдеҥ ле озо кӱӱнзегениниҥ чын бӧлӱги болгонын темдектеп ал. Ол баштапкы кижиниҥ эжерин јердеги едем райга јатыргызып: «Бала-барканы кӧптӧдип, ончо јерди текши толтырып, оныҥ ээзи болыгар» деп, кайкамчылу  иш берген (Бытие 1:28). Эйе, Кудайдыҥ кӱӱнзегениле болзо, олор экӱ балдар чыдадып, јараш садты јердиҥ ӱстине текши таркадар учурлу болгон. Је кийнинде Кудайдыҥ сӧзин укпай, олор экӱ ӱргӱлјиге јӱргедий аргазын јылыйткан да болзо, је Кудайдыҥ элдеҥ ле озо кӱӱнзегени солынбаган. Ол јаҥы ӧйдӧ бӱдер учурлу! (Исаия 55:11).

Качан, слер «Адабыс бистиҥ» деген мӱргӱлерде Кудайдыҥ Каандыгы келзин деп суранганарда, ол оныҥ башкарузы јерди јаманнаҥ арутап, јаҥы телекей ле башкарзын деп, сураганар болуп јат (Матфейдеҥ 6:9). Кудай бистиҥ сурагыска каруу берерине алаҥзу јок, нениҥ учун дезе Оныҥ Сӧзи ижендирет: «Чындык улус јерди энчиркенип, чактыҥ чакка ондо јадар» (Псалом 36:29).

Кудайдыҥ јаҥы телекейинде јӱрӱм

Кудай элдеҥ ле озо оныҥ јайаганы јердиҥ ӱстинде јилбиркеп, јакшызынып јӱрзин деп, экелерге сананган кӱӱнин, бастыра јакшы быйанды эдип, јердиҥ неле де тӱҥдештирип болбос алкыжын экелер. Јаман кӧрӱжери ле јок немеге бӱдери јоголып калар, учы-учында кажы ла кижи кемниҥ де чындык нӧкӧри болор. Библияда Кудай сӧзин берет, ол «јердиҥ учы-куйузына јетире јуу-чакты токтодор». «Албаты албатыга ӱлдӱ, кылыш кӧдӱрбес ле јуулажарга база ӱренбес» (Псалом 45:10; Исаия 2:4).

Учы-учында бастыра јер садта чылап, кайкамчылу рай болуп кубулар. Библия айдат: «Ээн чӧл лӧ кургак јер сӱӱне берер, кижи јатпай турган ороон сӱӱнип, нарцисстий чечектей берер... Ээн чӧлдӧ суулар сызылып чыгар ла чӧлдӧ агын суулар агар. Суулардыҥ кегеени кӧл болуп, какшаган јер — тоҥмок сууларга» кубулар (Исаия 35:1, 6, 7).

Райдый јерде ырысту јӱрерге, текши тӧзӧмӧлдӧр  болор. Курсак-тамак јетпезинеҥ улам, улус качан да торолобос. «Јер бойыныҥ јиилектерин берди»,— деп Библияда айдылат (Псалом 66:7; 71:16). Ончозы бойыныҥ ижиниҥ једими ле јилбиркеп, соотонор. Нениҥ учун дезе бистиҥ Јайаачыс сӧзин берет: «Виноград ӧскӱрип, оныҥ јиилегин јиир... Ӧскӧ кижи јизин деп, ӧскӱрбес» (Исаия 65:21, 22).

Кудайдыҥ јаҥы телекейинде улус канча кат албаты чогулышкан тураларда, ол эмезе эскирип калган тураларда јатпас, Кудайдыҥ кӱӱнзеп айтканыла: «Туралар тудуп, анда јаткылаар... Ӧскӧ кижи јатсын деп, тутпас». Библия анайда ок, сӧзин берет: «Калас јерге иштенбес» (Исаия 65:21—23). Анайып, улуста кӱӱнине јараар, арбынду иш болор. Јӱрӱм кунукчылду болбос.

Табынча, Кудайдыҥ Каандыгы, едем райда болгон тындулар ортодо ло, кижи ле тындулар ортодо болгон амыр-энчӱ колбуны орныктырар.

Библия айдат: «Бӧрӱ ле кураан кожо јӱрер, ирбис уулак ла кожо јадар; бозу, ла јаш кара-кула, ла чар кожо болор, олорды кичинек бала јединип јӱрер» (Исаия 11:6—9; Осия 2:18).

Бойыгарда сананып ийер: райдый јерде бастыра оорулар јазылып калар, арка-сыныҥ чыдал јок болоры јоголып калар. Кудайдыҥ Сӧзи бисти бӱдӱмјилейт: «Кем де „мен оору“ деп айтпас» (Исаия 33:24). «Кудай олордыҥ кӧзиниҥ јажын арчып салар, ла ӧлӱм де болбос база; ый-сыгыт, оору-јобол база болбос; нениҥ учун дезе эмдигизи ӧдӱп калды» (Откровение 21:4).

 Канайып ол сеге болор аргалу?

Јаҥы телекейде чындык јӱрӱм керегинде, Кудайдыҥ берген сӧзи, сениҥ јӱрегиҥе чокум тийер учурлу. Чын, кезик улус бого бӱдерге, бу алкыштар сӱреен, ол эмезе ӧйинеҥ ӧткӱре јараш деп, бодогылайт, је бу ончозы бистиҥ сӱӱген Јайаачынаҥ чыгып турарда, олор бӱдер (Псалом 144:16; Михей 4:4).

Бу келип јаткан Райда ӱргӱлјиге јадарга турган болзобыс, чокум некелтелердиҥ каруузына биске турар керек. Иисус, Кудайга баштанып мӱргӱл айдарда, бир јаан тӧс некелте кӧргӱскен: «Сени, Јаҥыс чындык Кудайды ла Сениҥ ийген Иисус Христосты билип турары, бу ӱргӱлјик јӱрӱм» (Иоаннаҥ 17:3, ЈТ).

Анайдарда, бис чын ла Кудайдыҥ јаҥы ӧйинде јадарга турган болзобыс, озо ло баштап Кудайдыҥ кӱӱни ле таныжып, оны бӱдӱрерге албаданар учурлу. Бистиҥ сӱӱген Јайаачынаҥ келип турган алкыштары ла ӱргӱлјиге јакшызынып, сӱӱнип јӱретениниҥ чыны бу, «јаман эл-јон ло оныҥ кычазы ӧдӧт, а Кудайдыҥ кӱӱнин бӱдӱрип тургандар чактыҥ-чакка јӱрер» (1 Иоанныҥ 2:17).

Ӧскӧртӧ кӧргӱзилбеген болзо, бастыра Библияныҥ цитаталары Библияныҥ Синодал кӧчӱриштеҥ алынган. Цитатаныҥ кийнинде кыскарта ЈТ болзо, ол цитата англияныҥ тилине кӧчӱрилип чыгарган «Агару Бичикти Јаҥы Телекейдиҥ кӧчӱрижи» болор.