መጋቢት 23, 2022 | የታደሰው፦ ጥቅምት 11, 2024
ሩሲያ

ወቅታዊ መረጃ—የእስራት ፍርድ በይግባኝ ተሻረ | ይሖዋ ስድስት ታማኝ ወንድሞችንና እህቶችን ደግፏቸዋል

አጫውት

ጥቅምት 10, 2024 የካባረቭስክ ክልላዊ ፍርድ ቤት፣ እህት ማያ ካርፑሽኪና፣ ወንድም ስታኒስላቭ ኪም፣ ወንድም ኒኮላይ ፖሌቭዶቭ፣ እህት ስቬትላና ሴዶቫ እንዲሁም ወንድም ቪታሊ ዡክና ባለቤቱ ታትያና ያቀረቡትን ይግባኝ ተመልክቶ ውሳኔ አስተላልፏል። በማያ፣ በስቬትላና እና በታትያና ላይ የተላለፈው የገደብ እስራት በአንድ ዓመት እንዲቀነስ ተወስኗል። በስታኒስላቭ ላይ ተላልፎ የነበረው የእስራት ፍርድ ደግሞ ወደ ሰባት ዓመት ከሁለት ወር የገደብ እስራት፣ የቪታሊ የእስራት ፍርድ ወደ ሰባት ዓመት ከአራት ወር የገደብ እስራት እንዲሁም የኒኮላይ ፍርድ ወደ ሰባት ዓመት ከስድስት ወር የገደብ እስራት ተቀይሯል። ወንድሞች ውሳኔው በተላለፈበት ዕለት ከእስር ተፈትተዋል።

ሰኔ 20, 2024 በካባረቭስክ ክልል የሚገኘው የኢንደስትሪያልኒ አውራጃ ፍርድ ቤት እህት ማያ ካርፑሽኪና፣ ወንድም ስታኒስላቭ ኪም፣ ወንድም ኒኮላይ ፖሌቭዶቭ፣ እህት ስቬትላና ሴዶቫ እንዲሁም ወንድም ቪታሊ ዡክና ባለቤቱ ታትያና ጥፋተኛ ናቸው የሚል ብይን አስተላልፏል። ማያ የአራት ዓመት የገደብ እስራት ተፈርዶባታል። ስቬትላና እና ታትያና እያንዳንዳቸው የአምስት ዓመት የገደብ እስራት ተበይኖባቸዋል። እህቶች በአሁኑ ወቅት እስር ቤት አይገቡም። ስታኒስላቭ የስምንት ዓመት ከሁለት ወር፣ ቪታሊ የስምንት ዓመት ከአራት ወር፣ ኒኮላይ ደግሞ የስምንት ዓመት ከስድስት ወር እስራት ተፈርዶባቸዋል። እነዚህ በ2017 ከተጣለው እገዳ ወዲህ ከተላለፉት የእስራት ፍርዶች ሁሉ ረጅም ናቸው። ወንድሞች ከፍርድ ቤት በቀጥታ ወደ እስር ቤት ተወስደዋል።

የክሱ ሂደት

ኅዳር 10, 2018

55 ገደማ ሰዎች አንድ ካፌ ውስጥ ተሰባስበው እየተጨዋወቱ ሳሉ ባለሥልጣናቱ አቋረጧቸው። ለአካለ መጠን ያልደረሱ ልጆችን ጨምሮ በቦታው የነበሩት ሰዎች በሙሉ የወንጀል ምርመራ ተደረገባቸው፤ አሻራቸው ተወሰደ፤ እንዲሁም ፎቶግራፍ እንዲነሱ ተደረገ
ኅዳር 12, 2018

ስታኒስላቭ፣ ኒኮላይና ቪታሊ ወደ ማረፊያ ቤት ተላኩ። ማያ፣ ስቬትላና እና ታትያና የጉዞ ገደብ ተጣለባቸው
ጥር 14, 2019

ኒኮላይና ቪታሊ ከማረፊያ ቤት ተለቀው በቁም እስር እንዲቆዩ ተደረጉ
ጥር 29, 2019

ስታኒስላቭ ከማረፊያ ቤት ተለቆ በቁም እስር እንዲቆይ ተደረገ
ሐምሌ 18, 2019

ክሱ በካባረቭስክ ክልል ወደሚገኘው የኢንደስትሪያልኒ አውራጃ ፍርድ ቤት ተወሰደ
ነሐሴ 2, 2019

ኒኮላይ ከቁም እስር ተለቀቀ
መስከረም 9, 2019

በስታኒስላቭና በኒኮላይ ላይ የተመሠረተው ሌላ ክስ በካባረቭስክ ወደሚገኘው የዢለዝናዳሮዥኒይ አውራጃ ፍርድ ቤት ተወሰደ
ኅዳር 5, 2019

ኒኮላይ የጉዞ ገደብ ተጣለበት
ጥር 18, 2020

ስታኒስላቭና ቪታሊ ከቁም እስር ተለቀቁ
የካቲት 4, 2020

ስታኒስላቭና ኒኮላይ በተመሠረተባቸው ሌላ ክስ ጥፋተኛ ናቸው ተብሎ ተፈረደባቸው። በካባረቭስክ የሚገኘው የዢለዝናዳሮዥኒይ አውራጃ ፍርድ ቤት በሁለቱም ላይ የሁለት ዓመት የገደብ እስራትና የአመክሮ ቆይታ በየነባቸው
ነሐሴ 3, 2020

ለኢንደስትሪያልኒ አውራጃ ፍርድ ቤት የቀረበው ክስ ወደ አቃቤ ሕግ ቢሮ ተመለሰ፤ በመሆኑም አቃቤ ሕጉ ይግባኝ ጠየቀ
መስከረም 29, 2020

የካባረቭስክ ክልላዊ ፍርድ ቤት አቃቤ ሕጉ ያቀረበውን ይግባኝ ተመለከተ። ስታኒስላቭና ኒኮላይ በዳኛው ፊት ቀርበው እንዲናገሩ ተፈቀደላቸው። እነሱም እንደ አብዛኞቹ አገራት ሁሉ የሩሲያ ፌዴሬሽንም አንዳንድ ዓለም አቀፋዊ ስምምነቶችን እንደፈረመና የዜጎቹን የአምልኮ መብትና ነፃነት ላለመጣስ እንደተስማማ ገለጹ
ጥቅምት 12, 2020

የካባረቭስክ ክልላዊ ፍርድ ቤት የኢንደስትሪያልኒ አውራጃ ፍርድ ቤት ያደረገውን ውሳኔ አጸና፤ በመሆኑም ክሱ ወደ አቃቤ ሕግ ቢሮ ተመለሰ
ታኅሣሥ 15, 2021

ክሱ በድጋሚ ለኢንደስትሪያልኒ አውራጃ ፍርድ ቤት ቀረበ

አጭር መግለጫ

ማያ ካርፑሽኪና

የትውልድ ዘመን፦ 1949 (አኑቺኖ፣ ፕሪሞርይስ ክልል)

ግለ ታሪክ፦ በአንደኛ ደረጃ ትምህርት ቤት ውስጥ አስተማሪ ሆና ትሠራ ነበር። አትክልትና አበባ መንከባከብ ያስደስታታል። ሦስት ልጆች አሳድጋለች። ከልጅ ልጆቿ ጋር ጊዜ ማሳለፍ ትወዳለች

የይሖዋ ምሥክሮች መጽሐፍ ቅዱስን በደንብ የሚያውቁና በትምህርቶቹ የሚመሩ መሆኑ አስደነቃት። በ1997 ተጠመቀች

የሰጠችው ሐሳብ

የእምነት ባልንጀሮችሽ ያበረታቱሽ እንዴት ነው?

የእምነት ባልንጀሮቼ የሚያሳዩት ምግባርና የፍርድ ሂደቱ ቢኖርም አዎንታዊ አመለካከት መያዛቸው በጎ ተጽዕኖ አሳድሮብኛል። አዎንታዊ አመለካከት ስላላቸው ደፋሮችና ፈገግተኞች ናቸው፤ እንዲሁም እቅፍ ያደርጉኛል። ይህም ለመጽናት ረድቶኛል።

ስታኒስላቭ ኪም

የትውልድ ዘመን፦ 1968 (ካባረቭስክ፣ ካባረቭስክ ክልል)

ግለ ታሪክ፦ በልጅነቱ መዘመር እንዲሁም ቼዝና ዳማ መጫወት ይወድ ነበር። በአገር ውስጥ ጉዳዮች ሚኒስቴር ውስጥ የምርምር ባለሙያ ሆኖ ይሠራ ነበር

ከባድ አደጋ ከደረሰበት በኋላ ከይሖዋ ምሥክሮች ጋር ተገናኘ። መጽሐፍ ቅዱስን ማጥናቱ ከመንፈስ ጭንቀት ለመላቀቅ ረዳው። በ2004 ተጠመቀ። በ2008 ከኦሌስያ ጋር ትዳር መሠረተ። ሁለት ልጆች አሏቸው

የሰጠው ሐሳብ

ከይሖዋ ጋር ያለህን ዝምድና ይዘህ ለመቀጠል የትኞቹን እርምጃዎች ወስደሃል?

ማረፊያ ቤት በነበርኩበት ወቅት መጽሐፍ ቅዱስ ስላልነበረኝ በቀን አሥር ጥቅሶችን አስታውሼ በእነሱ ላይ ለማሰላሰል ወሰንኩ። በተጨማሪም ከጸሎት ጋር የተያያዘ ግብ አወጣሁ፤ በቀን አምላክን ስለ አሥር ነገሮች ለማመስገን እንዲሁም አሥር ልመናዎችን ለማቅረብ ጥረት አደርግ ነበር። ስሜቴን አውጥቼ ወደ ይሖዋ እጸልይ ነበር

ኒኮላይ ፖሌቭዶቭ

የትውልድ ዘመን፦ 1970 (ካባረቭስክ፣ ካባረቭስክ ክልል)

ግለ ታሪክ፦ ያደገው ሃይማኖታዊ ባልሆነ ቤተሰብ ውስጥ ነው። የኤሌክትሪክ ባለሙያ ነው።

አምላክ መኖሩን እንዲሁም መጽሐፍ ቅዱስ እምነት የሚጣልበት መጽሐፍ መሆኑን የሚያሳይ ማስረጃ እስከተመለከተበት ጊዜ ድረስ አምላክ የለሽ ነበር። በ1995 ተጠመቀ። በኋላም ከታትያና ጋር ትዳር መሠረተ። አንድ ወንድ ልጅ አላቸው

የሰጠው ሐሳብ

በታሰርክበት ወቅት ምን ያሳስብህ ነበር? ሁኔታውን ለመቋቋምስ ምን አደረግክ?

ልጄ በወቅቱ ገና አሥር ዓመቱ ስለነበር እሱን እንዴት ማበረታታት እንደምችል ያሳስበኝ ነበር። . . . [ከባለቤቴ ጋር ሆኜ] ሳምንታዊ የቤተሰብ አምልኮ ፕሮግራም አዘጋጀሁ። አንዳንድ ጊዜ የቃላት ጨዋታ አዘጋጅ፣ ሥዕል እሥል እንዲሁም ቻርት አዘጋጅ ነበር። አንዳንዴ ደግሞ አንድ ርዕስ መርጬ ለውይይት የሚያግዙ ጥያቄዎችን አዘጋጃለሁ። ያዘጋጀሁትን ነገር በየሳምንቱ ወደ ቤት እልክ ነበር።

በዚህ ፈተና ወቅት ይሖዋ እንደሚደግፍህ ያሳመነህ ምንድን ነው?

አንድ ቀን ጠዋት ላይ መጥታ ያየችን ጠባቂ ወደ እኔ ቀረበችና አንድ መጽሐፍ አወጣች፤ ከዚያም “አማኝ ነህ አይደል? ይህን አንብብ” አለችኝ። ከዚያም ፊቷን አዙራ ሄደች። የሰጠችኝ መጽሐፍ ምን እንደሆነ ስመለከት ለካ አዲስ ዓለም ትርጉም መጽሐፍ ቅዱስ ነው! . . . በእስር በቆየሁበት ጊዜ ሁሉ የአምላክን ቃል ከሁሉ በተሻለው ትርጉም ተጠቅሜ ማንበብ ችያለሁ።

ስቬትላና ሴዶቫ

የትውልድ ዘመን፦ 1969 (ኮምሶሞልስክ ኦን አሙር፣ ካባረቭስክ ክልል)

ግለ ታሪክ፦ የ3 ዓመት ልጅ ሳለች አባቷ ሞተ፤ የ14 ዓመት ልጅ ሳለች ደግሞ እናቷ ሞተች። በጨርቃ ጨርቅ ፋብሪካ ውስጥ ትሠራ ነበር። አሁን በጽዳት ሙያ ተሰማርታለች። አበባ መንከባከብ ትወዳለች። ልጆቿ ገና ትንሽ እያሉ ባለቤቷ ሞተ፤ በመሆኑም ሁለት ወንዶች ልጆቿንና አንዲት ሴት ልጇን ያሳደገችው ብቻዋን ነው

በአሥራዎቹ ዕድሜ ላይ ሳለች ምድራችንና ጽንፈ ዓለም ጥበበኛ ፈጣሪ ሊኖረው እንደሚገባ ተገነዘበች። በ1984 ተጠመቀች

የሰጠችው ሐሳብ

በዚህ አስቸጋሪ ጊዜ ስለ ምን ጉዳይ ጸልየሻል?

ይሖዋ እኔን ብቻ ሳይሆን ተመሳሳይ ፈተናና መከራ እያጋጠማቸው ያሉትን ወንድሞቻችንንና እህቶቻችንን በሙሉ እንዲያበረታን እጸልያለሁ። የአምላክ እርዳታ ከሌለን የሰይጣን ዓለም የሚያሳድርብንን ጫና መቋቋም አንችልም።

ይሖዋ ምንጊዜም ከጎኔ እንደሆነ ይበልጥ እርግጠኛ ሆኛለሁ። ቃሉም “ታማኝ ለሆነ ሰው ታማኝ ትሆናለህ” ይላል።—2 ሳሙኤል 22:26

ታትያና ዡክ

የትውልድ ዘመን፦ 1973 (ካባረቭስክ፣ ካባረቭስክ ክልል)

ግለ ታሪክ፦ የአጸደ ሕፃናት መምህርት ነበረች፤ አሁን በጽዳት ሙያ ተሰማርታለች

በ19 ዓመቷ ስለ መጽሐፍ ቅዱስ ለማወቅ ጥልቅ ፍላጎት አደረባት። መጽሐፍ ቅዱስ ሕይወትን በተመለከተ ለምታነሳቸው ጥያቄዎች መልስ እንድታገኝ ረዳት። በ1994 ተጠመቀች። በ1994 ከቪታሊ ጋር ትዳር መሠረተች

የሰጠችው ሐሳብ

በዚህ አስቸጋሪ ወቅት መረጋጋት የቻልሽው እንዴት ነው?

ውዱን ባለቤቴን ጨምሮ ወንድሞች ወደፊት ስለሚያጋጥሙኝ ችግሮች እንዳላስብ፣ ከዚህ ይልቅ በአዲሱ ዓለም ስለማገኛቸው በረከቶች እንዳስብ ረዱኝ። . . . ይህም በእጅጉ ረድቶኛል።

ይሖዋ ፈጽሞ ባላሰብኩት መንገድ መረጋጋት ሰጥቶኛል። . . . ቤታችን በተፈተሸበት ወቅት አንዱ ፖሊስ “እንዲህ የተረጋጋሽው ለምንድን ነው? እንደምንመጣ ታውቂ ነበር?” አለኝ። ይህን ጥያቄ ሲጠይቀኝ ምን ያህል እንደተደሰትኩ ሊገምት አይችልም!

ቪታሊ ዡክ

የትውልድ ዘመን፦ 1972 (ካባረቭስክ፣ ካባረቭስክ ክልል)

ግለ ታሪክ፦ የብየዳ ባለሙያ ነው

የ20 ዓመት ወጣት ሳለ ስለ ሕይወት ትርጉም ማሰብ ጀመረ። እውነትን ለማግኘት ባደረገው ጥረት ከይሖዋ ምሥክሮች ጋር መጽሐፍ ቅዱስን ማጥናት ጀመረ፤ በዚህ ጊዜ ለጥያቄዎቹ አጥጋቢ መልስ አገኘ። በ1994 ተጠመቀ። በዚያው ዓመት ከታትያና ጋር ትዳር መሠረተ

የሰጠው ሐሳብ

በዚህ ፈተና ወቅት ምን ትምህርት አግኝተሃል?

ወደፊት ሊያጋጥሙኝ ስለሚችሉት ፈተናዎች በማሰብ ከመፍራት ይልቅ በይሖዋ መታመን እንዳለብኝ ተምሬያለሁ። ይከሰታሉ ብለን የምናስባቸው አብዛኞቹ ነገሮች አይከሰቱም። . . . በተጨማሪም ለወንድማማች ማኅበሩ ያለኝ አድናቆት ጨምሯል። በዓለም ዙሪያ ከስምንት ሚሊዮን የሚበልጡ ወንድሞችና እህቶች አሉን፤ እነሱም ከምናስበው በላይ ቅርባችን ናቸው። ለእኛ በመጸለይ፣ አበረታች ሐሳቦችን በመናገር እንዲሁም ተግባራዊ እርምጃ በመውሰድ ሊረዱንና ሊደግፉን ዝግጁ ናቸው።

ይሖዋ እነዚህን ውድ ወንድሞችና እህቶች እንዲሁም በዘመናችን ባለው “ታላቅ የምሥክሮች ደመና” ውስጥ የታቀፉትን ክርስቲያኖች በሙሉ መደገፉን እንደሚቀጥል እርግጠኞች ነን።—ዕብራውያን 12:1