Pu papeltuquelu ñi ramtuqueel
Pu papeltuquelu ñi ramtuqueel
Biblia feipi taiñ tuculelngenoal mollfüñ taiñ cuerpo mu. Huelu quiñeque mu lahuentuñmangequei che quisu ñi mollfüñ mu. Huelu, ¿chem raquiduamqueingün pu Dunguquelu Ineingen Jehová tüfachi dungu mu?
Com pu cristiano mülei cüme ngüneduamal chem ñi feipilen ta Biblia. Mülelai ñi dullial quisu ñi pin müten cam chem ñi feipieteu ti lahuentuchefe. Tüfa am ñi coneltulelu ñi huenihuen-ngen mu Jehová engu.
Jehová elueiñmu ta mongen. Feimu feipieiñmu taiñ inoafiel ti mollfüñ (Génesis 9:3, 4). Tati ley ñi elungeel pu Israel che feipi, tati mollfüñ adentulei ti mongen. Fei catrütueyu engün chumngechi ñi pünengeal tati mollfüñ. Jehová feipi tüfa: “Tati pu mongelelu am ñi mongen mülei tati mollfüñ meu, ca iñche ta elcünufiñ ti mollfüñ tati altar meu, eimün-ngealu, tamün liftuñmangeal tamün culpan mu”. ¿Chem mülefui ñi femngeal ti cullin langümngelu ñi ingeal? Dios feipi: “Mülei ta hutrulafiel ñi mollfüñ ca tacuafiel trufür mu” * (Levítico 17:11, 13). Tüfachi huercün dungu mufü rupachi feipingei (Deuteronomio 12:16, 24; 15:23). Ti lifru judio The Soncino Chumash feipi: “Ti mollfüñ mülelai ñi echelcünungeal, mülefui ñi hutrulngeal mapu mu, femngechi tañi ingenoal”. Chem Israel che no rume mülelafui ñi ngencahual ti culliñ ca üñüm ñi mollfüñ. Cafei ngelafui ñi guardacünunoafiel ca pünenoafiel. Tüfachi mongen Jehová am ngen-ngei.
Lalu ti Mesías fentepui ñi inangeal Moisés ñi ley dungu. Huelu Chau Ngünechen amulei ñi falintuniefiel ti mollfüñ. Chau Ngünechen ñi nehuen mu tati pu apostol feipifingün pu cristiano ñi ‘famentuafiel ti mollfüñ’. Ti pu cristiano mülefui ñi falintuafiel tüfachi huercün dungu. ¿Chumngechi trürümngeafui quiñe che inanofule tüfachi ngülam? Conlu pod cudumuhun dungu mu cam poyefilu coilaque dios ñi adentun (Hechos 15:28, 29; 21:25). 1900 tripantu mu pu che eluhui ñi eluafiel mollfüñ caquelu pu che ca tañi tuculelngeal mollfüñ. Huelu, ¿chem quimürpuingün pu Dunguquelu Ineingen Jehová? Tüfachi huimtun caiñetuniefi Ngünechen tañi huercün dungu. *
Quiñeque mu ti doctor feipiquefi ti cutran ñi entuñmangeal tañi mollfüñ petu tañi operangenon, fei duamfalngele ñi tuculelngeal quisu ñi mollfüñ. Tüfachi lahuentun dungu donacion autologa preoperatoria pingei. Huelu, ¿chem pilei Levítico ca Deuteronomio lifru mu? Cümelai ñi entungeal ti mollfüñ, ngülümal ca huiño tuculelafiel ti che. Ti mollfüñ mülelai tañi ngülümngeal, mülei tañi hutrulngeal, femngechi huiñolelngetui reque ta Chau Dios. Famülque mu inaquelaiñ Moisés ñi ley, huelu iñchiñ falintuquefiyiñ, fei eluucüleiñ taiñ famentuafiel ti mollfüñ. Feimu hulquelaiñ taiñ mollfüñ, ngülümquelafiyiñ rume ñi huiño tuculelngeal hula. ¿Chumngelu? ¿Chemu? Ti mollfüñ mülei ñi hutrulngeal. Pu huesa pünequefilu ti mollfüñ caiñetuquefi ta Chau Dios ñi ley.
Mülei caquelu lahuentun dungu pünequefilu ti mollfüñ. Huelu quisuque ti pu cristiano mülei cüme ngüneduamal. Peaiñ quiñeque pengelün dungu: fentren cristiano eluuquei ñi entuñmangeal ñi mollfüñ tañi inaduamngeal, fei hula hutrunentungequei. Huelu quiñeque mu pu doctor feipiquefingün pu cutran ñi mülen caquelu lahuentun dungu ñi pünequen ti mollfüñ.
Quiñeque tüfa, operangen mu pu che, ti doctor pünequefi ti hemodilucion pingelu. Tüfa mu cañpüle entungequei ti pichilehuechi mollfüñ, fei tañi dihuilngeal reque mülehuechi mollfüñ cuerpu meu. Fei hula ca huiño tucungequetui ti mollfüñ cuerpu mu. Femngechi ñi cüme hutrulngeal ca nietual fentren mollfüñ. Cafei quiñeque mu ti mollfüñ tripalu ti allfeñ meu ca ngülümngequei, fei chaitungequei ca tuculngetui ti globulos rojos. Tüfa recuperacion de celula pingequei. Cafei ti mollfüñ tucungequei ti maquina mu, tüfa femquei ti piuque, ponon ca cusacusa reque. Fei ti cutran ca huiño tuculelngetui ñi mollfüñ. Ca mülei quiñe maquina liftuquefilu ti mollfüñ, centrifugador pingelu. Tüfa mu huichucünungei chem ñi nieel ti mollfüñ, femngechi ñi huiño tuculelngeal cuerpo mu. Entungequei pichin mollfüñ ñi ngüneduamngeal, fei reyülngequei lahuen mu tañi huiño tuculelngetual ti cutran.
Ca femngechi caquerumeafui ti lahuentun ti mollfüñ meu. Cafei mülerumeafui caque rume fillque lahuen, huelu ngelai taiñ ngüneduamafiel feiti fillque lahuen. Caque quiñeque pu cristiano mülei ñi dullial chumngechi pünengeai ñi mollfüñ, chem lahuen llohual, tañi inaduamngeal ñi mollfüñ ca tañi operangeal. Petu tañi operangenon ti cutran mülei ñi ramtuafiel ti doctor chumngechi pünengeai tañi mollfüñ. Fei hula quisu dulliafui chumngechi ñi feipieteu tañi raquiduam (inaduamnge ti huichulechi dungu).
Pu cristiano mülei tañi quimtucunieal ñi elufiel tañi mongen ta Dios. Ca quimtucunieal tüfachi ngülam: ‘Piuqueyeafiel ta Chau Jehová com taiñ piuque meu, com taiñ cuerpo meu, com taiñ nehuen meu, ca com taiñ raquiduam meu’ (Lucas 10:27). Iñchiñ trürlaiñ tati pu che poyequenofilu ta Chau Dios. Doi mai rume falintuquefiyiñ ñi hueniyefiel Chau Dios. Quisu elueiñmu ta mongen. Feimu falintuquefiyiñ Jesús ñi hutruelchi mollfüñ. Biblia feipilei: “Fei culli taiñ montulngeal tañi Fotüm ñi mollfüñ mu. Femngechi lifrenentungeafuiñ, fei rulpacünuñmangeafuiñ taiñ culpan” (Efesios 1:7, Traducción del Nuevo Mundo).
[Quimngeal dungu]
^ Quiñe quim huentru Frank H. Gorman feipi: “Quiñe che hutrulfilu ti mollfüñ pengelquei ñi falin-ngen ñi mongen ti culliñ ca tañi yamfiel ta Chau Dios. Fei huli ti mongen ca amulei ñi cuñiutucuniefiel”.
^ La Atalaya 1 conchi noviembre cüyen 1951 tripantu mu inaduami quiñeque dungu ti mollfüñ mu ca pengeli chumngelu ñi cümenon ñi tuculelngeal mollfüñ ti cutran.
[Huichulechi dungu/Adentun]
CHEM RAMTUHUAFUIÑ
Pichiñma mu catrüngele tañi mollfüñ cañpüle ñi rupayal, huelu hutrulngenole mapu mu, ¿cümelu troquiafun mai tañi huiño tuculelngeal?
Entuñmangeli tañi mollfüñ ñi reyülngeal caquelu lahuen mu fei ñi huiño tuculelngetual tañi cuerpo mu, ¿tüngünpeafeneu mai tañi raquiduam? ¿Pengeafun ñi inanieafiel Biblia ñi ngülam?