¿Chumafuiñ mülenole quiñe huercün dungu Biblia meu?

PICHICALU iñchiñ taiñ pu chau fentren dungu feipieiñmu taiñ femal cam femnoal. Deu tremlu iñchiñ quimürpuiñ fente taiñ cümelcaqueteu tañi ngülam engün. Feula cai mülenoliyiñ rume taiñ pu chau ñi ruca mu, petu inaniequefiyiñ quiñeque dungu ñi feipin engün.

Taiñ huenu Chau Jehová ca feipieiñmu huercün dungu Biblia mu. Chau Jehová condenaquefi ñi poyeafiel coilaque dios ñi adentun, ti pod cudumuhun dungu, tati ñihuan dungu ca tati hueñen (Éxodo 20:1-17; Hechos 15:28, 29). Doi cüme hueniyefilu Jehová iñchiñ, quimürpuiñ Chau Dios ayüniei taiñ cümelcaleal ca tañi huercün dungu cüdaungelai taiñ inayal (Efesios 4:15; Isaías 48:17, 18; 54:13).

Huelu mülei quiñeque dungu tripanolu Biblia mu. Feimu quiñeque che feipiafui: “Tüfachi dungu tripanole Biblia, chem rume femafuiñ. Chau Ngünechen pilefule, huirintucucünuafui tañi ayüel” piafuingün.

Pu femngechi feipiquelu quiñeque mu huesa dullingün. Rupachi antü hueñancüleyu. Quimtuculaingün Biblia ñi mülenon re huercün dungu, cafei pengeli chem raquiduamquei Jehová fillque dungu mu. ¿Chumngechi quelluqueiñmu taiñ chillcatual Biblia ca quimal chem raquiduamquei Chau Dios? Quelluqueiñmu taiñ cüme raquiduamnieal ca cümeque dungu dullial. Femngechi femliyiñ, ayühulafiyiñ ta Chau Jehová ca nierpuaiñ fentren cümeque dungu taiñ cüme dulliel mu (Efesios 5:1).

Cuifique che ñi inayentufal femün

Quiñeque che poyequefilu ta Jehová cuifi mu, ¿chem chumingün rupalu huesaque dungu? Biblia feipi inaniefuingün Chau Dios tañi raquiduam mülenole rume quiñe huercün dungu. Peaiñ ñi rupan ta José. Potifar ñi domo huichaeyu ñi femal pod dungu, huelu feichi mu petu nielafui rume quiñe huercün dungu condenaquefilu ñihuan dungu. Huelu, ¿chem raquiduami José? José ngüneduami, conle ñihuan dungu culpantucuafui ñi raquiduam ca Chau Dios mu (Génesis 39:9). José quimürpui ti ñihuan dungu caiñetuquefi Chau Dios tañi feipicünuel Adán ca Eva cureyeulu engu (Génesis 2:24).

Ca quiñe ejemplo. Hechos 16:3 pengeli Pablo circuncidafi ta Timoteo, femngechi tañi pemeafiel pu trahunche. Versiculo 4 feipi: “Fillque huaria püle miyahuingün. Fei huldungulelfingün tati pu peñi chem ñi dulliel pu apostol ca pu loncolelu Jerusalén mülelu, femngechi inayal engün tañi feipin”. Feichi mu tati pu cristiano obligangequelafui tañi circuncidangeal (Hechos 15:5, 6, 28, 29). Huelu, ¿chemu Pablo circuncidafi ta Timoteo? “Com pu judio üyeu mülelu quimnierquei ñi griego tuhun-ngen tañi chau. Feimu Pablo circuncidafi ta Timoteo”. Pablo ayüquelafui huesa duamelafiel ca hueluraquiduamelafiel pu judio. Pablo feipifi com pu cristiano: “Chau Ngünechen ñi adquiñ meu pengelqueiñ taiñ cüme femün, fei tüfa ngüneduamai com pu che” (2 Corintios 4:2; 1 Corintios 9:19-23, Traducción del Nuevo Mundo [TNM]).

Femngechi raquiduami Pablo ca Timoteo. Pablo ayüquelafui huelulcayafiel pu cristiano nehuencülenolu tañi feyentun mu. Doi mai quellufi engün tañi doi hueniyeafiel ta Jehová (Romanos 14:15, 20, 21; 1 Corintios 8:9-13; 10:23-33). Pablo huirintucui chumngechi ñi troquifiel ta Timoteo, feipi: “Nielan inei no rume Timoteo reque. Raquiduamcülequei tamün duamnieelchi dungu meu. Caquelu che quisu duamuuquei müten, duamniequelafingün Jesucristo ñi dungu. Nehuentu cüdahuiyu Timoteo iñchiu, fotümhuen reque, femngechi ñi amuldungungeal Chau Dios ñi cümeque dungu. Femün mu tüfa, pengeli ñi falin-ngen, eimün quimnieimün” (Filipenses 2:20-22, TNM). Müna inayentufali ñi femün Pablo ca Timoteo. Mülenole rume quiñe huercün dungu, doyümlaingu quisu ñi ayüel müten. Doi mai inayentufingu Jehová ca Jesús tañi piuqueyechen. Feimu com tañi dulliel engu doyümfingu caquelu pu che tañi cümelcaleal.

Peaiñ ñi femün Jesús, fei doi inayentufali. Hul-lu tañi fütra hueupin nütrami mülefule rume quiñe huercün dungu, duamfali ngüneduamal chem ñi ayüel ta Jehová (Mateo 5:21, 22, 27, 28). José, Pablo, Timoteo ca Jesús turpu raquiduamlaingün mülenole quiñe huercün dungu, chem rume femafuiñ. Doi mai yafüluhuingün ñi raquiduamal chumngechi raquiduamquei ta Jehová. Femngechi inaniefingün chem ñi quimeltuel ta Jesús: piuqueyeafiel ta Chau Jehová ca taiñ chafche. Tüfachi epu huercün dungu doi falin-ngei (Mateo 22:36-40).

Ñi femün pu cristiano fantepu mu

Tati Biblia trürlai quiñe lifru nielu fentren ley feipiquelu com taiñ chumal. Huirintucunole rume quiñe huercün dungu, Chau Jehová ayüniei taiñ inayal quisu tañi raquiduam. Mülei taiñ loncontucual “chem ñi ayünieel ta Chau Jehová”. Duamfalngelai taiñ feipingeal com taiñ chumal (Efesios 5:17; Romanos 12:2). Chau Jehová, ¿chumngelu ayüquei taiñ femngechi femal? Femngechi femliyiñ, pengelaiñ taiñ quisutu duamuunon. Doi mai ayüqueiñ taiñ ayühulafiel ta Chau Dios ca mañumtuquefiyiñ taiñ piuqueyenieteu, feimu inayentuquefiyiñ. Fei com taiñ mongen mu pengelqueiñ taiñ piuqueyechequen (Proverbios 23:15; 27:11). Cafei inanieliyiñ Biblia ñi feipin, cümelcaqueiñmu taiñ mongen mu ca taiñ huenihuen-ngen Jehová iñchiñ.

Peaiñ chumngechi inayal tüfachi ngülam quisuque taiñ mongen meu.

Dullial chumngechi taiñ cüme rupaleal

Raquiduamaiñ tüfachi pengelün dungu. Quiñe hueche huentru ayüi allcütual quiñe album de musica. Rume ayüfi chem tañi allcütuel, huelu allcürumei quiñe ül nütramcalu podngechi dungu. Cafei allcütulu, quimfali ñi illcufengen tati ülcantufe. Huelu ti hueche cüpa ayühulfi ta Jehová, feimu ayüi ñi doyümafiel Jehová tañi raquiduam, fei tañi ayühulafiel. Tüfachi hueche, ¿chumngechi quimai chem ñi ayünieel ta Jehová?

Tati apostol Pablo huirintucui ñi chumngechi chengen tati pu inaquefilu tañi huesaque illutun ca tati pu eluulu ñi adnieteu Chau Ngünechen ñi nehuen. Iñchiñ quimnieiñ chumngechi chengen tati pu eluucülelu ñi adnieteu Ngünechen ñi nehuen. Fei engün “pengelqueingün piuqueyehun, ayüucülequei, tüng chengei, ñochi duamngei, fürenechequei, cüme piuquengei, niei feyentun, ñom piuquengei, quim ngünenieuquei”. Huelu, ¿chumquei pu che inaniequelu tañi huesaque illutun? Biblia feipi: “Quimfali ñi femquen tati pu inaquefilu tañi huesaque illutun. Fei tüfa femquei pod cudumuhun, ünufal dungu, quim yehuequelai ñi huesaque femün mu, püramyequefi pu coilaque dios ñi adentun, fülmauquei pu huesaque püllü mu, caiñetuchequei, yafcauquei caquelu che engu, lladcütuchequei, rume illcuquei, notucachequei, püntülcachequei, ngüchaltucuchequei ñi inayal che ñi quimeltun, ütrirchequei, ngollicauquei, pofolcahun mu fiestaquei, caquelu femngechi dungu femquei. Deu feipicünuhuiyiñ, huelu ca huiño feipihuayiñ: pu femngechi femquelu conpulayai Chau Ngünechen ngünenietule ta mapu” (Gálatas 5:19-23, TNM).

Ti texto feipi: “Caquelu femngechi dungu femquei”. ¿Chem raquiduameleiñmu tüfa? Pablo feipilai com tañi femquen pu inaquefilu tañi huesaque illutun. Feimu cümelayafui quiñe che ñi feipial: “Pablo huirintuculai ta tüfa, chem rume femafun”. Feimu duamfali pu cristiano ñi quim ngüneduamal tüfachi texto, fei ñi quimürpual engün “caquelu femngechi dungu” ñi femquen tati pu inaquefilu ñi huesaque illutun. Quiñeque huesaque dungu tripanole rume Biblia mu, huelu quiñe che mequei tañi femquen mu, conpulayai Chau Ngünechen ngünenietule ta mapu.

Felei, mülei taiñ quim ngüneduamal chem ñi üdequeel ta Jehová. ¿Cüdaungepei mai? Peaiñ quiñe pengelün dungu. Tami doctor feipieimu tami iyal fentren fün ca tucucan, huelu tami famentual cochi cofque, helado ca caquelu femngechi dungu. ¿Eimi iyafuimi mai queque? ¡Femlai llemai! Ca femngechi, ¿chem chumai ti hueche huentru taiñ nütramcapeel? ¿Allcütupeafui mai ti album de musica? Feingele, ¿trürümuhuafui pu eluucülelu ñi adnieteu Chau Ngünechen ñi nehuen cam tati pu inaquefilu tañi huesaque illutun? Feiti ül pengelquelai piuqueyen, cüme piuquengen, quim ngüneniehun ca caquelu femngechi dungu Chau Ngünechen ñi nehuen mu cüpalu. Duamfalngelai quiñe huercün dungu pengelquelu feichi ül ñi caiñetuquefiel Chau Dios tañi raquiduam. Ca femngechi ngülam inaquefiyiñ papeltulu iñchiñ, pequefilu pelicula ca television, aucantulu video juegos ca conlu internet mu ca caquelu femngechi dungu.

Cüme tucutuhual

Tati Biblia ca ngülamtuquei chumngechi taiñ tucutuhual ca adelcahual. Fillque ngülam Biblia mu quelluqueiñmu taiñ cüme adelcaleal. Feimu pu cristiano fente tañi piuqueyefiel ta Jehová inalaingün quisu tañi raquiduam. Doi mai femqueingün Jehová tañi ayünieel. Feimu mülenole rume quiñe huercün dungu Biblia mu, Chau Jehová duamtuquei taiñ femal quisu tañi ayüel. Caquerumei chumngechi ñi tucutuuquen pu che ca tañi adelcahun. Feimu Chau Jehová huli fentren ngülam, fei pu che inanieafui chumül rume ca cheu rume.

Tüfa ta quiñe ngülam mülelu 1 Timoteo 2:9, 10, feipi: “Cafei pu domo cüme tucutuucülepe, quimfalngepe ñi mallmangenon ca ñi nien cüme raquiduam. Ngelai ñi rumeñma adelcaleal tañi lonco. Ngelai ñi adelcahual engün oro meu, llancatu, rume falichi tacun no rume. Doi mai tañi cüme adngeal engün, mülei ñi femal cümeque dungu. Femngechi femquei pu domo poyequefilu ta Chau Dios”. Com pu cristiano, domo ca huentrungepe rume, mülei tañi ngüneduamuhual, fei ñi quimfalngeal tañi poyequefiel ta Chau Dios. Feimu ramtuhuafuiñ: chumngechi taiñ tucutuucülen ca taiñ adelcalen, ¿chem piafui pu che taiñ amuldungumequefiel? (2 Corintios 6:3). Pu cristiano ayüquelaingün ñi quisu duamuhual müten, fei ñi huesa duamelnoafiel pu che (Mateo 18:6; Filipenses 1:10).

¿Chumafui pu cristiano ngüneduamle ñi cüme tucutuucülenon? Quisu duamuulayai, fei inayentuafi ti apostol Pablo, femngechi ñi quelluafiel pu che tañi doi cüme hueniyeafiel Jehová. Pablo feipi: “Inayentumuchi chumngechi iñche inayentuquefiñ ta Cristo” (1 Corintios 11:1). ¿Ca chem dungu feipi Pablo? “Cristo quisu duamuulai”. Pu cristiano, ¿chumqueiñ? “Iñchiñ nehuencüleiñ taiñ feyentun mu, feimu mülei taiñ quelluafiel tati pu nehuencülenolu. Femngechi cüme chaftuafingün tañi cüdaungechi dungu. Quisutu duamuulayaiñ. Caque quiñeque iñchiñ mülei taiñ duamtuafiel taiñ chafche. Femngechi cümelcayafiyiñ ca nehuentucuafiyiñ” (Romanos 15:1-3).

Quim ngüneduamaiñ com dungu

Mülenofule rume quiñe huercün dungu, ¿chumngechi quim ngüneduamaiñ chem ñi ayünieel Chau Dios? Fill antü yafüluhuaiñ taiñ papeltual Biblia ca raquiduamal taiñ papeltuel. Femngechi femliyiñ, ñochiquechi quim ngüneduamaiñ com dungu. Pu pichiqueche fill antü amulei tañi tremcülen, ca femngechi iñchiñ fill antü tremcülerpuaiñ reque taiñ huenihuen-ngen Jehová iñchiñ. Taiñ femngechi chengeal duamfali taiñ nieal paciencia. Alüñmayafuiñ taiñ cüme cristianongeal, huelu fei ca müten no. Elantücünuaiñ taiñ papeltual ca ngüneduamal ta Biblia, ca yafüluhuaiñ ñi femal taiñ papeltumequen (Hebreos 5:14).

Huercüngeliyiñ quiñe dungu, pengelafuiñ taiñ feyentulen. Huelu inanieliyiñ chem ñi raquiduamquen Jehová, pengelaiñ taiñ hueniyequefiel ca taiñ ayühulquefiel. Doi cüme hueniyeuliyiñ Jehová iñchiñ, doi falintuafiyiñ taiñ inayentuafiel ta Chau Jehová ca tañi fotüm. Chem dulliliyiñ rume, inanieafiyiñ ñi feipilen ta Biblia, tüfa mu mülei Chau Dios ñi raquiduam. Com taiñ femquen mu ayühulfiliyiñ ta Jehová, iñchiñ ca ayüucüleaiñ.

 [Adentun]

Caquerumei chumngechi tucutuuquei pu che, huelu iñchiñ inaniefiyiñ ñi chem pilen Biblia taiñ cüme dullial