Pu papeltuquelu ñi ramtuqueel

Pablo ñi feipin 2 Corintios 6:14 mu, ¿inei engün am tati pu “feyentulenolu”?

¿Chem feipilei 2 Corintios 6:14? Feipi: “Eimün ta quiñeuquilmün chem dungu meu no rume tati pu feyentulenolu eimün”. Fillque versiculo mu Pablo nütramcalu tati “feyentulenolu” meu, adentulei feitachi pu che coneltulenolu ti trahunche meu.

Por ejemplo, quiñeque cristiano Pablo ñi antü meu yequefi tañi pu peñi ñi juiciantucuaeteu pu feyentulenolu (1 Corintios 6:6). ¿Inei am feichi pu che feyentulenolu? Pu juez cüdauquefulu ti tribunal Corinto mu. Epungechi Corintios mu Pablo feipi tati Huecüfü traumalniefi tati pu feyentuquenolu, feimu adümlaingün Cristo ñi cüme dungu. Feichi pu che pilai ñi cüdahuelafiel ta Jehová, femfule traumangelayafui reque feipi Pablo (2 Corintios 3:16; 4:4).

Quiñeque feyentuquenolu femquei huesaque dungu ca poyequefi coilaque dios (2 Corintios 6:15, 16). ¿Com pu feyentuquenolu caiñetuquefi Chau Jehová ñi pu che? Femlai. Quiñeque duamtufingün ti rüf dungu, caquelu nieingün afcadi cristianongelu ca ayüqueingün quiñentrür müleal (1 Corintios 7:12-14; 10:27; 14:22-25; 1 Pedro 3:1, 2). Huelu trahunche mu re concülei che feyentuquelu Ñidol Jesús meu. Feimu Pablo feipilu tati “feyentulenolu”, fei tüfa pu che coneltulenolu trahunche mu (Hechos 2:41; 5:14; 8:12, 13).

Ñi feipin 2 Corintios 6:14 quelluafeiñmu com taiñ mongen meu, doyelchi mai tati pu ayünielu ñi nieal afcadi (Mateo 19:4-6). Quiñe cristiano fautizaucülelu quintulayai quiñe afcadi feyentulenolu, ¿chumngelu? Tati pu feyentuquenolu ñi raquiduamqueel ca femqueel trürngelai tati pu cristiano mu.

Tati pu chillcatuquelu Biblia amuquelu trahun mu ca pu amuldunguquelu, huelu fautizaucülelaingün, ¿feyentuquenolu pingeafuingün? Femlai, fillque dungu femmequelu cai engün tañi fautizahual (Romanos 10:10; 2 Corintios 4:13). Femngechi chengefui Cornelio. Petu ñi fautizaunon quimngequefui ñi püramyequefiel ta Chau Ngünechen (Hechos 10:2).

Pablo ñi feipin 2 Corintios 6:14 mu coneltulelai feichi amuldunguquelu, huelu fautizaucülelai. Huelu quiñe cristiano ayüle ñi niehual quiñe che engu elungelu ñi amuldungual, huelu petu fautizaucülelai, ¿cümepeafui mai? Cümelayafui. ¿Chumngelu? Raquiduamafuiñ ñi feipifiel Pablo tati pu lantu domo cristianangelu, fei feipi: “Lifreletuai ñi huiño fütangetual. Inei rume dulliafui, huelu ti huentru mülei ñi serfiafiel ta Ñidol” (1 Corintios 7:39, Traducción del Nuevo Mundo [TNM]). Tüfa mu ngülamtungei com pu cristiano ñi quintual quiñe afcadi serfiniefilu ta Ñidol.

Romanos 16:8-10 ca Colosenses 4:7 mu Pablo nütramcai ñi chumquen pu serfiquefilu ta Ñidol. Femqueingün Cristo ñi cüdau, Cristo saquieyu engün, saquin chengeingün, ca manelfal cüdau femqueingün.

Feimu llemai quiñe che serfiniefilu ta Ñidol quiñepülecünuquei tañi ayüqueel, fei cüdahuelquefi ta Jesús. Taiñ Ñidol Jesús feipi: “Inei rume ayüle tañi inayaeteu, quisu illamuupe, eluupe ñi meñcu yenieal tañi orcon mamüll iñche reque ca inaechimeu” (Mateo 16:24, TNM). Quiñe che, ¿chumngechi eluuquei ñi inanieafiel ta Cristo? Ngillatun meu feipifile ta Chau Ngünechen ñi cüdahuelafiel com tañi mongen mu. Fei fautizaule, coneltuai Chau Jehová ñi troquiñche mu. * Feimu ti cristiano mülei ñi quintual quiñe afcadi fautizaucülelu ca tañi mongen meu pengelquelu ñi cüdahuelquefiel ta Chau Ngünechen ca taiñ Ñidol Jesucristo (Santiago 1:1).

Tati chillcatumequelu Biblia ca eluucülelu ñi doi hueniyeafiel ta Jehová saquifali tati. Huelu petu hulcünulai tañi mongen Jehová mu ca eluucülelai ñi serfiafiel ta Jehová com ñi mongen mu. Petu duamniei ñi cüme elcünutual quiñeque dungu ñi mongen meu, femngechi tañi fautizahual. Femle hula, raquiduamafui tañi quintual tañi afcadi.

Quiñe cristiano ayüafui chi ñi niehual quiñe che engu chillcatumequelu Biblia. Cüme amulei, huelu petu fautizaucülelai. Fei ti cristiano feipiafui: “Fautizaule hula niehuafuyu”. ¿Cümepei mai tüfachi dungu? Cümelai. ¿Tati chillcatumequelu Biblia fautizahuai ñi niehual ti cristiano engu cam fente ñi piuqueyefiel ta Chau Jehová? Quimngelayafui.

Epe com pu chillcatuquelu Biblia elungelu ñi amuldungual alüñmaquelaingün tañi fautizahual. Feimu ti cristiano üngümafui, femngechi ñi inayal Pablo ñi ngülam. Raquiduamnge tüfa, quiñe cristiano ayüle ñi niehual quiñe che engu, feichi che deu tremcülei, tañi familia poyeniefi ta Jehová ca fentreñma mu amuquei trahun mu ca amuldunguquei, huelu petu fautizaucülelai. Ramtuhuafuiñ: ¿chumngelu petu fautizaucülelai? ¿Epu rume raquiduamcülei chi? Feyentuquenolu feipingelayafui, huelu rüf serfiquelafi ta Ñidol.

Pablo ñi feipin müna cümelcaqueiñmu (Isaías 48:17). Ti epu che niehualu fautizaucülele, trürcüleai tañi raquiduam ca tañi femqueel engu. Fei nehuentuleaingu, quiñeucüleaingu ca doi cüme hueniyeafingu ta Jehová. Femngechi rüf ayüucüleaingu tañi curehuen-ngen. Cafei quintuliyiñ quiñe afcadi serfiniefilu ta Ñidol, pengelaiñ taiñ nor piuqueyefiel ta Jehová. Fei quisu cümelcayaiñmu, Jehová nor piuqueyefilu cai tañi pu nor piuqueyeteu (Salmo 18:25).

[Quimngeal dungu]

[Adentun]

Jehová nor piuqueyefi tañi pu nor piuqueyeteu