Pu papeltuquelu ñi ramtuqueel

Tripanolu rume brindis Biblia mu, ¿chumngelu brindaquelai pu Dunguquelu Ineingen Jehová?

Fütra cuifi ñi huimtulen che ñi brindayal quiñe copa pulcu mu. Caquerumei tüfachi huimtun fillque mapu mu. Quiñeque mapu meu trililngequei ti copa, tati brindaquelu feipiquei ñi ayüucüleal engün, tremoleal, nieal fentren mongen, nieal fentren plata ca ñi cüme rupaleal. Quiñeque mu pu coneltulelu felepe mai piqueingün, püramelqueingün ñi copa ca pichi putuqueingün chi. Fentren che raquiduamqueingün huesa dungu no tati brindis, huelu pu Dunguquelu Ineingen Jehová inaduamingün ñi cümenon. ¿Chumngelu? Peafiyiñ.

Taiñ pu cristianongen brindaquelaiñ, huelu cafei ayüqueiñ com che ñi cüme rupaleal ca tremoleal. Cuifi mu quiñeque loncolelu huirilelfi carta pu hunenque cristiano, fentepun mu feipifi: “Cüme amulepe tamün dungu” (Hechos 15:29). Cafei quiñeque cuifique che poyequefilu Jehová feipi engün: “¡Mongelepe ti rey!” (Nehemías 2:3; 1 Reyes 1:31).

Huelu, ¿cheu cüpai feichi huimtun brindis? La Atalaya 1 conchi marzo cüyen mu 1968 tripantu, tripai ñi feipin quiñe enciclopedia: “Feichi mu cüpapelai ti brindis cuifique religion ñi femquefel. Cuifique che yem putuquefuingün tañi pu dios mu ca tañi pu layechi che mu, feimu peno ca femngechi femngequei fachantü. Cuifi, pu griego ca romano hutrunacümquefui pichin pulcu, femngechi tañi acordayal tañi pu dios ca tañi pu la. Quisu engün, ¿ca putuquepelafui femngechi tañi nieal cüme mongen?” (The Encyclopædia Britannica [1910], tomo 13, pagina 121).

Tati brindis fachantü, ¿nüucülepei mai feichi cuifique huimtun mu? Mai, quiñe lifru ca femngechi feipi: “Pu brindaquelu raquiduamquelafuingün ñi cüpan religion mu, huelu cüpapelai cuifique huimtun mu cheu hutrunacümngequefui mollfüñ ca pulcu tañi pu dios ngealu, femngechi tañi eluaeteu cüme felen” (ti lifru International Handbook on Alcohol and Culture tripalu 1995 tripantu).

Mülei quiñeque chemcün ca huimtun nüucülelu ñi femquefel pu coilaque religion cuifi, huelu com tüfa cümelai pilayafuiñ pu cristianongen. Raquiduamnge granada mu, quiñe fün tripalu Biblia mu. Quiñe falin enciclopedia biblica feipi: “Quiñeque cuifique religion pünequefui ti granada ñi püramyeafiel tañi pu dios”. Femngechi rume, Jehová feipifi pu Israel che ñi adelcacünual ti loncolechi sacerdote ñi tacun granada mu. Ca femngechi Jehová tañi ngillatuhue ruca adelcangei granada mu (Éxodo 28:33; 2 Reyes 25:17). Ca femngechi ti ihul cuhu (anillo) hue curehuen mu cuifi nüucülequefui coilaque religion mu. Huelu famülque mu pu curehuen tucuquei ihul cuhu tañi pengelal ñi niehun müten, femquelai ñi poyeafiel coilaque dios.

¿Chem pi tati Biblia putungeal pulcu ñi püramyengeal coilaque dios? Quiñe dungu, Biblia pengeli quiñeque huentru poyequefilu coilaque dios putumequen mu llellipufingün tañi dios tañi malisiayafiel ta Abimélec, poyequefilu ti rüfngechi Dios (Jueces 9:22-28). ¿Chem raquiduamelfi Jehová engün? Cümelai tañi femün engün. Biblia ca pengeli fentren tripantu rupalu, fentrenque pu Israel che huelulcaulu Jehová mu, putuquefuingün ca hutrunacümquefuingün pulcu ñi püramyeafiel coilaque dios (Amós 2:8). ¿Femngechi femafui quiñe che rüf püramyequefilu Jehová? Quiñe rüfngechi cristiano, ¿püramelafui copa pulcu quiñe coila dios ñi füreneafiel quiñe che? Femlayafui llemai (Jeremías 7:18).

Feingei, cuifi mu pu poyequefilu ta Jehová fampürami ñi cuhu tañi ngillatuafiel Jehová, femngechi tañi cümelcayaeteu. Huelu femngechi femlai coilaque dios mu. Biblia pengeli Salomón fampürami tañi cuhu ñi ngillatuafiel Jehová, fei feipifi: “Ahuem Jehová, Israel tañi Ngünechen. Ngelai Dios huenu ca mapu mu eimi reque. [...] Fütra huenu cheu tami mülemum, allcütumuiñ taiñ llellipun. Allcütumuiñ ca perdonamuiñ” (1 Reyes 8:22, 23, 30). Ca femngechi Esdras feichi ngillatufilu ta Jehová, com pu allcütulelu fampürami tañi cuhu engün, fei felepe mai pi engün (Nehemías 8:6; 1 Timoteo 2:8). Femi llemai, huitrañpürami tañi cuhu engün tañi ngillatuafiel Jehová, femlai engün ñi poyeafiel coilaque dios (Isaías 65:11).

Fentrenque che brindaquelu raquiduamquelaingün ñi llellipufiel quiñe dios tañi cümelcayaeteu. Huelu, ¿feimu no am püramelqueingün tañi copa pulcu? Tati pu che quimnole rume cheu ñi tuhun tati brindis, cümelayafui taiñ inayentuafiel.

Felei llemai, pu Dunguquelu Ineingen Jehová conquelaingün caquelu huimtun mu ñi nieel pu che. ¿Tuchi am? Fentren che chaliquefi ti bandera ca ülcantuqueingün ti himno nacional, huelu huesa dungu no piqueingün. Iñchiñ taiñ rüf cristianongen catrütuquelafiyiñ, huelu coneltuquelaiñ femngechi dungu mu (Éxodo 20:4, 5; 1 Juan 5:21). Pu Dunguquelu Ineingen Jehová quimle ñi müleal tüfachi huesaque huimtun, eluuquei tañi cañpüle tripayal, femngechi taiñ huelulcaunoal Biblia ñi feipin mu. Fachantü fentren che ngüneduamquelaingün ti brindis ñi nüucülen coilaque religion mu, huelu coilaque religion mu tuhun-ngei llemai. Pu che femngechi brindaquelu llellipuquefi reque tati pu coilaque dios ñi cümelcayaeteu. Feimu llemai pu Dunguquelu Ineingen Jehová ngen brindaquelaiñ (Éxodo 23:2).