1. ¿Chem cümeque dungu pu corintoche mu llohui Pablo?

FEICHI 55 conchi tripantu mu Pablo allcüi ñi mülen yafcahun dungu trahunche Corinto huaria mu. Pablo rume poyequefui engün, chumngechi tañi poyequen quiñe Chau tañi pu yall, feimu huirintuculelfi quiñe carta tañi quimeltuafiel engün (1 Corintios 1:11; 4:15). Femngechi huercüfi ta Tito ñi pemeafiel ti trahunche Corinto huaria mu. Pablo feipifi ta Tito ñi trahuluhual engün Troas mu, fei chem dungu ñi cüpalelaeteu. Quiñeque cüyen ñi rupan mu, Pablo puhui Troas mu. Huelu Tito puulai, fei Pablo amui Macedonia mu. Pichin antü ñi rupan mu, trahuluhuingu Pablo ca Tito, feimu rume ayühuingu. Tito cüpalelfi cümeque dungu ta Pablo, ti pu corintoche ñi cüme lloufiel ti ngülam, feimu rume ayülefuingün ñi peafiel ta Pablo. Allcülu tüfa ta Pablo, doi ayühui (2 Corintios 2:12, 13; 7:5-9).

2. 1) ¿Chem feipifi Pablo tati pu corintoche? 2) ¿Chem ramtun inaduamaiñ tüfachi troquiñ mu?

² Quiñeque cüyen ñi rupan mu, Pablo ca huirintuculelfi cangelu carta tati pu corintoche. Feimu feipifi: “Eimün quisu tamün feyentun mu nehuencüleimün. Feimu ngencauquelaiñ tamün feyentun mu. Doi mai quelluhuiyiñ tamün ayüucüleal” (2 Corintios 1:24, TNM). ¿Chumngelu feipi tüfa Pablo? ¿Chem quimeltueyu tüfa pu loncolelu trahunche mu? Peafiyiñ.

3. 1) Pablo feipi: “Eimün quisu tamün feyentun mu nehuencüleimün”, ¿chem pifel am tüfa? 2) Fachantü, ¿chumngechi inayentuafui pu loncolelu ta Pablo?

³ Pablo feipi epu rume falin-ngechi dungu: feipi pu corintoche nieingün cüme feyentun Jehová mu, ca feipi tañi quellufiel mu engün nieingün ayühun. Feula inaduamaiñ ti hunen dungu Pablo ñi feipifiel ti pu corintoche. Feipifi: “Eimün quisu tamün feyentun mu nehuencüleimün”. Feimu feipifi reque: “Eimün ta fülmaniefimün ta Jehová iñche tañi duam mu no, ca caquelu che tañi duam mu no. Eimün tamün cüme maneluucülen mu ta Jehová mu püntütripalaimün”. Pablo quimniefui pu corintoche ñi piuqueyeniefiel ta Jehová ca ayüniefuingün ñi femal engün cümeque dungu. Feimu feipifi: “Iñchiñ ngencauquelaiñ tamün feyentun mu”. ¿Chem piel am tüfa? Pablo inayahulquelafi tañi pu peñi ca lamngen chem dungu tañi femquen engün, duamfal-lafui femngechi dungu (2 Corintios 2:3). Fachantü ti pu loncolelu femngechi inayentuquefingün ta Pablo. Quimnieingün tañi pu peñi ñi nien maneluhun Dios mu, femngechi cüdahuelquefingün com tañi piuque mu (2 Tesalonicenses 3:4). Feimu feipiyahulquelafingün com dungu chumngechi tañi femafiel engün. Doi mai quimeltuquefingün chem pin ta Biblia ca pengelelquefingün chem tañi huercüel Jehová tañi troquiñche. Femngechi quimeltuquefingün pu peñi, fei quisu tañi dullial engün chem cümeque dungu tañi femal engün. Pablo reque, ngencauquelaingün pu peñi tañi maneluhun mu (1 Pedro 5:2, 3).

4. 1) Pablo feipifi pu corintio: “Quelluhuiyiñ tamün ayüucüleal”, ¿chem pengeli tüfa? 2) Fachantü, ¿chumngechi inayentuafuingün pu loncolelu ta Pablo?

⁴ Pablo feipifi pu corintio “quelluhuiyiñ tamün ayüucüleal”. ¿Pablo müten quellufi tati pu corintio? Femlai, caquelu peñi ca quelluntucuingün. ¿Chumngechi quimfiyiñ? Pablo huirintuculelfilu ta pu corintio tati epu conchi carta, feipi Silvano ca Timoteo engün quiñentrür amuldunguingün feichi huaria mu (2 Corintios 1:19). Caquelu carta mu, Pablo ca feipi ñi quellueteu caquelu peñi ca lamngen amuldungun mu. Pablo üitufi Apolos, Áquila, Prisca, Timoteo ca Tito (Romanos 16:3, 21; 1 Corintios 3:6-9; 2 Corintios 8:23). Chumngechi taiñ papeltuel, Pablo feipifi pu corintio: “Quelluhuiyiñ tamün ayüucüleal”, ¿chem pengeli tüfa? Pablo ca caquelu cristiano tañi compañeteu quellufingün pu corintio tañi ayühunquechi serfiafiel ta Jehová. Fachantü, ca femngechi pu loncolelu quelluquefingün ta pu peñi ca lamngen ayühunquechi tañi serfiafiel ta Jehová engün (Salmo 100:2; Filipenses 1:25).

5. 1) ¿Chem ramtungei fentrenque pu peñi? 2) Allcütuñmafilmi ñi feipin, ¿chem mülei tami femal eimi?

⁵ Pichin antü ñi rupan mu, ramtungei pu peñi ca pu lamngen com Mapu mu mülelu. Ramtungeingün chem dungu ca chem nütram ñi feipin pu loncolelu ayühuleyu engün. ¿Ayüfuimi quimal chem pin engün? Feula inaduamüñmayafiyiñ ñi huiñoldungun engün. Cüme allcütufilmi, fei raquiduamnge chem dungu ñi femün ca ñi nütramcan quiñe loncolelu ayühuleimu. Ca femngechi raquiduamnge chem dungu mülei tami femal ta eimi doi ayüucüleal tami trahunche. *

6, 7. 1) Pu loncolelu ¿chumngechi inayentuafui ta Pablo ca Jesús ca caquelu cüdahuelquefilu ta Jehová? 2) Quimnieñmangen mu ñi üi pu peñi ca lamngen, ¿chumngelu ayüuqueingün?

⁶ Fentrenque peñi ca pu lamngen feipingün: “Quiñe loncolelu, pengelün mu tañi duamtunieteu, rume ayüuquen”. ¿Chumngechi femafui tüfa pu loncolelu? Mülei ñi inayentuafiel David, Elihú ca Jesús (papeltunge 2 Samuel 9:6; Job 33:1; Lucas 19:5). Fei engün nütramcafiel mu pu che üituquefuingün, femngechi pengelquefuingün ñi duamtuniefiel. Pablo ca üituquefui tañi pu peñi, quimniefui ñi rume falin-ngen. Ñi huirintuculelfiel quiñe carta ñi pu peñi Roma trahunche, üitufi epu mari quechu peñi ca lamngen. Quiñe ejemplo, huirintuculu feipi: “Lemoria piafimün [...] taiñ saquin lamngen Pérsida” (Romanos 16:3-15).

⁷ Quiñeque loncolelu ngoimañmaquefi ñi üi quiñeque peñi ca lamngen. Huelu eluule ñi quimnieñmayafiel ñi üi com tañi pu peñi ca lamngen, rume piuqueyeniengelu troquihuaingün (Éxodo 33:17). Ca femngechi pu peñi ca lamngen trahun mu huenuntun mu ñi cuhu engün, rume ayüqueingün ñi üitungeal tañi üi mu engün (ca ngüneduamafuimi Juan 10:3).

8. Pablo ¿chumngechi inayentuquefui Jehová ca Jesús?

⁸ ¿Ca chumngechi quelluafuiñ taiñ pu peñi ca lamngen tañi ayüucüleal engün? Saquiafiyiñ tañi cümeque dungu ñi femquen engün. Quiñe ejemplo, Pablo ñi huirintuculelfiel mu tañi pu peñi trahunqueche Corintio huaria mu, feipifi: “Rume saquiniehuiyiñ ta eimün” (2 Corintios 7:4). ¿Rume ayüupelaingün ti pu corintoche Pablo femngechi ñi feipieteu? Pablo ca femngechi saquifi caquelu trahunqueche ñi cüme cüdau mu (Romanos 1:8; Filipenses1:3-5; 1 Tesalonicenses 1:8). Ca huirintuculelfilu carta ta trahunqueche Roma, cümeque dungu feipi tati lamngen Pérsida mu: “Fei ta rumeñma cüdauquei Ñidol tañi dungu meu” (Romanos 16:12). Lamngen Pérsida ¿rume ayüupelai allcülu femngechi dungu? Pablo rume saquiquefui tañi pu peñi ca lamngen, femngechi inayentuquefui ta Jehová ca Jesús (papeltunge Marcos 1:9-11; Juan 1:47; Apocalipsis 2:2, 13, 19).

9. Hueluconque saquiuliyiñ trahunche mu, ¿chumngelu doi ayüucüleafuiñ?

⁹ Fachantü ca rume falin-ngei pu loncolelu tañi saquiafiel pu peñi ca pu lamngen ñi cüme cüdahulquefiel ta Jehová (Proverbios 3:27; 15:23). Ñi saquifiel mu tañi pu peñi ca lamngen, pengelqueingün ñi falintuñmafiel tañi cüdau. Pu peñi ca lamngen duamnieingün ñi quimtucuñmangeal tañi cüme cüdaucülen engün. Quiñe lamngen nielu doi quechu mari tripantu feipi tañi cüdau mu inei rume saquiquelayu tañi cüme cüdau tañi femquen. Tañi pu compañ ütrirchefengeingün, quisu trürümuuqueingün, “iñche doi cüme cüdaufe” piqueingün. Feimu pu loncolelu tañi saquieteu taiñ lamngen, rume ayüuquei. “Femngechi doi quimtucurpun Jehová tañi rume poyenieteu” pi taiñ lamngen. Ca quiñe peñi quisu tremümnielu tañi epu yall saquieyu quiñe loncolelu. “Rume saquifalimi tami femngechi cüdau tami femquen” pieyu. Allcülu tüfa taiñ peñi. yafültucuhui, femngechi eluhui tañi cüdahuelnieafiel ta Jehová. Quimfali llemai, falin-ngei pu loncolelu tañi saquiafiel pu peñi ca lamngen. Femngechi quelluquefingün tañi ürcünoal ta pu peñi ca lamngen ca tañi ayühunquechi cüdahuelnieafiel ta Jehová (Isaías 40:31).

10, 11. 1) Pu loncolelu ¿chumngechi inayentuafuingün ta Nehemías? 2) Quiñe loncolelu petu ñi yafültucumenofiel quiñe peñi, ¿chumngechi mülei ñi pepicahual?

¹⁰ ¿Ca chumngechi quelluafui pu loncolelu tañi pu peñi ca lamngen ayühunquechi cüdahuelnieafiel ta Jehová? Mülei ñi inaduamnieafiel pu peñi ca pu lamngen inei tañi ngañhuadcülen, femngechi ñi yafültucufemafiel engün (papeltunge Hechos 20:28). Femngechi femingün cuifi mu fentrenque che poyequefilu ta Jehová. Quiñe ejemplo, Nehemías quimürpulu ñi ngañhuadcülen ti pu judio, amufemi tañi yafültucumeafiel (Nehemías 4:14). Fachantü ca femngechi femquei pu loncolelu. Quiñeque tañi pu peñi ca lamngen ngañhuadcülerpulu, quintufemqueingün chumngechi tañi yafültucumeafiel. Pu loncolelu duamnieingün tañi pu peñi ca lamngen ñi cüme maneluucüleal Jehová mu. Femngechi, quiñeque mu amuquei tañi ruca mu engün ñi yafültucumeafiel (Romanos 1:11). ¿Chem dungu nütramcayafuingün?

¹¹ Pu loncolelu petu ñi pemenofiel ñi peñi cam lamngen, elcünuqueingün quiñeque tiempo tañi raquiduamal chem ñi duamnieel engün. Mülefui ñi ramtual engün: ¿Chem huesaque dungu rupaquei tüfachi peñi? ¿Chem piafiñ ñi doi cümelcaletual? ¿Chem texto Biblia mu papeltulelafiñ? ¿Chem che tripalu Biblia mu nütramcalelafuiñ? Raquiduamle tüfachi dungu mu, pu loncolelu doi cüme pepicaucüleaingün. Fei nütramcalayafingün nehue falinochi dungu, doi mai rüf quelluafingün. Ca femngechi, mülei ñi eluñmayafiel ñi nütramcayal tañi pu peñi engün ca ñi cüme allcütuafiel engün (Santiago 1:19). Quiñe lamngen feipi: “Quiñe loncolelu tañi allcütuqueteu com tañi piuque mu, fei rume nehuentuqueneu” (Lucas 8:18).

12. Trahunche mu, ¿inei duamniei ñi yafültucungeal? ¿Chumngelu?

¹² ¿Inei duamniei ñi yafültucungeal trahunche mu? Pablo feipifi pu loncolelu: “Cüme adnieafimün ti troquiñ feyentulelu”. Feimu com pu peñi ca lamngen trahunche mu duamniei ñi yafültucungeal engün. Pu publicador ca precursor fentren tripantu yenielu ñi amuldunguqueel mu ca duamnieingün ñi yafültucuaeteu pu loncolelu. Huelu ¿chumngelu? ¿“Nehue nehuencülelai ñi maneluhun Jehová mu” piafuiñ? No, felelai. Huesaque dungu mu rupamequeingün chi cam rume quisuleingün chi, feimu duamniei ñi yafültucungeal engün. Femngechi dungu mu rupai ti rey David cuifi mu.

13. 1) Isbí-Benob ¿chumngelu eluhui ñi quehuatumeafiel ta David? 2) Abisái ¿chumngechi quimi ñi huesa dungu mu rupamequen ta David?

¹³ David dullingei ñi loncoleal Israel mu petu hueche huentrungelu. Pichin tripantu ñi rupan mu, chaftufi tati fütra huentru Goliat pingelu, refaim tuhun-ngelu. David rume nehuen piuquecünuhui, fei langümfi tati fütra huentru Goliat (1 Samuel 17:4, 48-51; 1 Crónicas 20:5, 8). Fentren tripantu rupalu, David petu quehuatufilu ti pu filisteo, ca chaftufi cangelu fütra huentru. Tüfachi fütra huentru Isbí-Benob pingefui. Goliat reque, refaim tuhun-ngefui (2 Samuel 21:16). Huelu feula David epe langümngefui. ¿Chumngelu am? ¿Llicanchengehuefui? No, femlai. Rume ürcütripai tati hueichan mu pi ta Biblia. Ti fütra huentru pefilu ta David tañi rume ürcülen, feipi: “Feula langümafiñ”. Feimu Abisái pürüm amufemi ñi quelluafiel ta David, fei langümfi tati fütra huentru (2 Samuel 21:15-17). Femngechi David epe montulafui. Felei llemai, Abisái rume ngüneduamniefui ta David. Feimu ñi pefiel mu ñi rupamequen huesaque dungu mu, amufemi tañi quellumeafiel. David rume mañumcülehuei. ¿Chem quimeltueiñmu tüfachi dungu ñi rupan?

14. 1) Huesaque dungu mu rupamequeliyiñ, ¿chumafuiñ taiñ chaftuafiel? 2) Ürcüleliyiñ, ¿chumngechi quelluafeiñmu pu loncolelu taiñ ayühunquechi serfinieafiel ta Jehová? Feipinge quiñe rupan dungu.

¹⁴ Com Mapu mu, iñchiñ Jehová tañi troquiñchengen rupaqueiñ fillque huesaque dungu mu. Quiñeque mu ti cutrancahun rume fütraquei, quiñe fütra huentru taiñ chaftumequefiel reque felequei. ¿Chumqueiñ taiñ chaftuafiel? Inayentuquefiyiñ ta David chumngechi ñi chaftufiel tati fütra huentru Goliat pingelu: maneluuqueiñ ta Jehová mu, fei ta eluaiñmu nehuen taiñ huehuafiel tati huesaque dungu. Huelu fill antü hueichamequefiyiñ reque ta Huecüfü ca tañi pu inanieteu, feimu quiñeque mu ürcütripayafuiñ chi. Cuifi fillque huesaque dungu chaftuquefuiñ, huelu feula taiñ ürcülen mu yafüngehuelayafuiñ. Huelu quiñe loncolelu inaduamnieliyiñmu chem dungu taiñ rupamequen, quellufemeliyiñmu, rume mañumnieafiyiñ, ¿felelai anchi? Quiñe loncolelu tañi cüpafemün mu taiñ quelluaeteu, nentuqueiñ fentrenque nehuen ca yafüluuqueiñ taiñ ayühunquechi cüdahuelnieafiel ta Jehová. Eimi ¿femngechi dungu mu rupaqueimi quiñeque mu? Quiñe lamngen hunelequelu amuldungun mu 65 tripantu niepelai, fei feipi: “Quiñe rupa, nehue cüme duamcülequelafun. Ürcülequefun ti amuldungun mu. Quiñe loncolelu inaduameneu tañi ürcülen, fei ramtueneu chem dungu mu tañi rupamequen. Papeltuleneu quiñe troquiñ Biblia mu, fei rume nehuentucueneu. Allcütuñmafiñ ñi ngülam tañi feipieteu, fei rume cümelcaeneu. Mañumfiñ tañi eluucülen tañi quellufemaeteu”. Pu loncolelu duamtunieiñmu, femngechi eluucülei taiñ quellufemaeteu, Abisái chumngechi tañi quellufemfiel ta David. Quimngen mu tüfa, rume tüngduamelqueiñmu.

15, 16. 1) ¿Chumngelu pu peñi ca lamngen fente piuqueyequefuingün ta Pablo? 2) ¿Chumngelu iñchiñ fente piuqueyequefiyiñ taiñ pu loncolelu?

¹⁵ Pu loncolelu rume cüdauqueingün. Quiñeque mu, umautuquelaingün rume fente tañi raquiduamcülen tañi pu peñi ca ñi lamngen mu engün. Quiñeque mu, pun mu huitraqueingün tañi ngillatual fei engün mu ca ñi quelluafiel engün (2 Corintios 11:27, 28). Felefui rume tañi cüdau engün, pu loncolelu rume ayüniefingün ca ayüucüleingün Pablo reque. Pablo huirintuculelfilu tati pu corintoche, feipifi: “Ayühun mu hulcünuan com tañi nieel [...] eimün tamün duam meu” (2 Corintios 12:15, TNM). Pablo femquefui com tüfa fente tañi poyeniefiel tañi pu peñi ca tañi pu lamngen (papeltunge 2 Corintios 2:4; Filipenses 2:17; 1 Tesalonicenses 2:8). Feimu llemai pu peñi ca lamngen rume piuqueyeniefuingün ta Pablo (Hechos 20:31-38).

¹⁶ Iñchiñ ca rume piuqueyeniefiyiñ taiñ pu loncolelu. Jehová ta adnieyu taiñ cuidayaeteu, feimu rume mañumniefiyiñ taiñ Chau Ngünechen Jehová. Pu loncolelu raquiduamcülei ta iñchiñ mu, feimu huitranpequeiñmu taiñ eluaeteu nehuen, inaduamnieiñmu chem dungu mu taiñ rupamequen, fei quellufemqueiñmu taiñ ngañhuadcülen mu. Ñi cüme cüdau ñi femquen tati pu loncolelu, femngechi ayühunquechi cüdahuelniefiyiñ ta Jehová.