JUNIO cüyen püle 1970 tripantu mu pitalconcülefun. Niefun epu mari tripantu, soltaungefun ca rume cutrancülefun, quiñe tul cutran contueneu. Feimu mülefun ti Hospital General Valley Forge pingelu, mülelu Phoenixville, Estados Unidos mapu mu. Cüla marique minuto mu, quiñe enfermero tomaeneu ti presion, amulefui ñi huesalcalen. Ti enfermero pichi hunen-ngefui iñche mu. Fei rume llicalefui. “¿Turpu pelaimi quiñe che ñi lan?” pifiñ. “¡Turpu!” pieneu. ¡Quimfali tañi ange mu llemai!

Layalu troquihun. ¿Chumngelu fente huesa cutranün? Nütrameluhuayiñ.

Julio cüyen 1969 tripantu puhun ñi hueichayal Vietnam mapu meu. Üye mu cangelu hora mülei ca rume arengei, feimu elungen quiñe semana tañi huimtual. Fei elungen ñi quelluafiel pu doctor operafilu ta che. Rume ayüquefun ñi quelluafiel pu cutrancülelu ca pu allfülelu. Ayülefun ñi cirujanongeal. Petu femlu iñche feichi cüdau Vietnam mapu mu huesa cutranün.

Cüdauquefun quiñe hospital cheu ñi yengen pu soltau allfülelu. Müchaique acuquefui fillque helicoptero, cüpalniefui fentren allfülelu ca lachi cuerpo. Rume piuqueyefun tañi pais ca ayüquefun ñi cüdahual. Feimu müchai müten eluhun ñi cüdahual. Pepicaquefuiñ pu allfülelu ca matu yequefuiñ pichique contenedor nielu aire acondicionado. Fei mu operangequefui che, ponhuitu ngellu pepi nengümuuquefui ti anestesista ca tati epu enfermero. Rume yafüluuquefuingün ñi montulafiel com pu soltau. Cafei ngüneduamün inei no rume nacümquelafui helicoptero mu fütraque curü bolsa. Feichi bolsa mu elcünungequefui pu lachi soltau ñi troquiñ cuerpo, fei engün langümngei petu hueichalu. Tüfachi dungu rupan hue conlu iñche hueichan mu.

Quiñeque tripantu petu ñi amunon hueichan mu, quimfiñ pu Dunguquelu Ineingen Jehová. Tañi poyen ñuque quimelelngei Biblia, huelu fautizaulai. Iñche rume ayüquefun ñi allcütual tañi feipingeel. Quiñe antü pefiñ quiñe Trahunhue Ruca, fei ramtufiñ tañi malle chau: “¿Chem am ta tüfa?”. “¡Fülconpulayaimi feichi che mu!” pieneu. Iñche rume piuqueyefiñ ca maneluucülequefun fei mu, fei dunguhuelafiñ pu Dunguquelu Ineingen Jehová.

Huiñotulu iñche Vietnam mu, ayüniefun ñi quintuafiel ta Chau Dios. Tañi rupan üye mu cutrantuleneu tañi piuque. Inei no rume quimlai chem ñi rupamequen feichi pais mu troquiquefun. Feipingequefui Estados Unidos ñi pu soltau ñi langümfiel pu pichiqueche Vietnam mapu mu. Cafei protesta mu pu che dalluntucuquefui pu soltau ñi langümfiel pu pichiqueche.

Ñi fülmahual Chau Dios mu amun fillque iglesia mu. Rumel piuqueyefiñ ta Chau Dios, huelu ayüquelan chem ñi rupamequen iglesia mu. Fei quiñe domingo antü febrero cüyen 1971 tripantu mu, puhun pu Dunguquelu Ineingen Jehová ñi Trahunhue Ruca, mülelu Delray Beach, Florida troquiñ mapu mu.

Puhun epe aflu ti hueupin, huelu allcütun ñi chillcatungeal ti revista Ti Huerquen. Acordalan chem ñi feipingeel trahun mu, huelu raquiduamtucuniefiñ pu pichiqueche quintuquelu ti texto tañi Biblia mu. ¡Afmatulehuen! Re allcüquefun ca ngüneduamquefun ñi chumün engün. Epe amutulu iñche, dungueneu quiñe fücha huentru 80 tripantu nielu, Jim Gardner pingefui. Tañi cuhu mu nüniefui ti lifru La verdad que lleva a vida eterna. Feipieneu: “¿Ayüafuimi papeltuafiel tüfachi lifru?”. Fei feipicünuhuiyu tayu trahutual jueves antü pulihuen tayu chillcatual ti lifru.

Cüdauquefun quiñe hospital mu Florida troquiñ mapu meu. Feichi domingo antü amulu trahun mu mülefui ñi cüdahual pun meu. Ngenolu fentren cüdau, eluhun ñi papeltuafiel ti lifru. Quiñe enfermera müntuñmarumeneu ti lifru, ngüneduami ñi chem pilen, fei huirarcülen feipieneu: “Tüfachi religion mu conpeaimi mai?”. Müntuñmafiñ ti lifru, fei feipifiñ: “Petu com papeltulafiñ, huelu conalu tüfachi religion mu troquihun”. Amutui ti enfermera, fei feichi pun papeltufiñ com ti lifru.

Trahutulu peñi Gardner iñchiu jueves antü mu, ramtufiñ: “¿Chem chillcatuayu?”. “Ti lifru tami elufiel” feipieneu. “Deu papeltufiñ” pifiñ. Cümei pi, “huelu ngüneduamayu ti hunen troquiñ müten” pieneu. Femlu iñchiu, afmatulehuen com ti dungu tañi adümnofiel ellaca mu. Feipieneu ñi quintual fentren texto iñche tañi Biblia mu. Ayühun ñi ngüneduamfiel ineingen Jehová, taiñ rüfngechi Ngünechen. Feichi antü ngüneduamiyu cüla troquiñ tüfachi lifru. Fill jueves antü ngüneduamquefuyu cüla troquiñ, rume ayühun. Jim feipiquefiñ ti peñi Gardner. Fei dullin cristiano ürque ca quimfi ti peñi Russell. Rume falintuquefiñ ta tüfa.

Quiñeque semana müten rupalu eluhun ñi tripayal amuldungun mu. Ellaca mu rume llicalequefun, doyelchi mai amuldunguyaulu fill ruca püle (Hech. 20:20). Huelu Jim rume quelluqueneu. Doi amuldungulu Jim iñchiu, rume ayürpufiñ ta amuldungun. Fantepu mu petu falintuniefiñ tüfachi cüdau, rume ayühueleneu quiñentrür cüdahual Chau Ngünechen iñchiu (1 Cor. 3:9).

Feula nütrameluhuayiñ quiñe dungu ñi falintuquefiel iñche: fente ñi piuqueyefiel ta Jehová (Apoc. 2:4). Tüfa quellueneu ñi quiñepülecünuafiel com ñi rupan hueichan mu ca caquelu huesaque dungu (Is. 65:17).

Raquiduamtucunien chem ñi rupan quiñe antü. Feichi 1971 tripantu mu tañi malle chau quechanentueneu tañi ruca mu, pilai quiñe Dunguquelu Ineingen Jehová ñi müleal quisu tañi ruca mu. Pichin plata niefun, epuque semana mu cullingequefun tañi cüdau mu. Deu gastafiñ epe com tañi plata, ngillacan tacun tañi amuldungual, femngechi ñi püramyengeal ta Jehová. Quiñe banco mu niefun pichin plata, huelu camapulefui, Michigan mapu mu, cheu ñi tremün iñche. Feimu quiñeque antü tañi auto mu umauquefun. Tati bencinera ñi baño meu cüchauquefun.

Quiñe antü hune puhun ti Trahunhue Ruca mu ñi amuldungual. Hue tripafun cüdau mu. Elcünun tañi auto furitu ti Trahunhue Ruca mu tañi pengenoal. Fei mu acordarumen com ti huesaque dungu ñi rupan Vietnam mapu mu. Nümücantufiñ reque ti lachi cuerpo lüpümngelu. Peniefun tati hutruelchi mollfüñ. Allcüquefun ca cüme peniefun com pu soltau. Llicalen huirareneu engün: “¿Montupeafun mai? ¡Quelluen!”. Quimniefun ñi layal engün, feimu chumquefun rume ñi yafültucuafiel. Ellcaniequefun tañi llican ñi ngüneduamnoafiel engün. Acordarumelu tüfa, yafüngehuelai ñi piuque.

Fei ngümalen llellipufiñ ta Jehová, fei eluhun ñi raquiduamal ti huiñomongetun mu (Sal. 56:8). Müchai müten quimürpun chem chumai Chau Jehová, huiñomongeltuafi pu layelu, fei cüme elcünutuafi com ti huesaque dungu ñi pen iñche ca hueñancühuelayaiñ com pu rupalu femngechi dungu. Chau Ngünechen huiñomongeltuafi com feichi pu hueche, elungeai engün ñi quimafiel ta Chau Dios (Hech. 24:15). Ngüneduamün ñi fente piuqueyefiel ta Jehová com tañi nehuen mu. Piuquentucunien feichi antü. Fei fantepu meu yafüluuquen ñi piuqueyenieafiel ta Jehová, doyelchi mai rupalu huesaque dungu.

Hueichan mu pu che femquei rume huesaque dungu, iñche ca femün. Huelu epu texto quelluqueneu ñi tüngduamcületual. Quiñe ta Apocalipsis 12:10, 11, tüfa mu feipi Huecüfü ta hueungei iñchiñ taiñ huldungun mu müten no, cafei tati Cordero ñi mollfüñ mu. Cangelu fei ta Gálatas 2:20, tüfachi texto quimeltueneu Jesucristo lai iñche tañi duam mu. Jesús tañi mollfüñ mu Jehová duamtueneu iñche, fei rulpacünuñmaeneu tañi femün ta cuifi. Quimfiel tüfa quellueneu ñi lif raquiduam nieal. Yafültucuqueneu ñi quelluafiel pu che, fei ñi quimal engün taiñ Chau Ngünechen cutranpiuqueyechequelu (Heb. 9:14).

Raquiduamlu ñi rupan cuifi, ngüneduamün ñi fente cüme cuidanieteu Jehová. Quiñe dungu, feichi antü ñi quimfiel Jim tañi umamequen tañi auto mu, nütramcalelfi quiñe lamngen tañi quelluaeteu. Feichi lamngen niefui quiñe ruca cheu ñi umayal che. Rüf quimnien Jehová adniefi ta Jim ca feichi saquin lamngen, femngechi ñi nieal iñche quiñe ruca cheu tañi umayal. Jehová rume cutranpiuqueyequefi tañi pu che.

Mayo cüyen 1971 tripantu amun ta Michigan troquiñ mapu mu ñi femal quiñeque dungu. Petu ñi amutunon, tucufiñ tañi auto mu fentren lifru ca revista. Fei norte mu amun tati doi fütra carretera püle. Pichi rupalu, niehuelafun lifru ca revista. Cheu rume ayühunquechi amuldungulelquefiñ che Chau Dios ñi cümeque dungu. Amuldungun fillque carcel mu. Ca naglu iñche ñi amual baño meu elufiñ pichique papel tati pu huentru ñi pefiel. Quiñeque mu ramtuuquen chem rupai feichi pu che mu (1 Cor. 3:6, 7).

Hue quimlu iñche ti rüf dungu, cüme entuquelafun ñi feipin tañi amuldungual, doyelchi mai amuldungulelfilu iñche tañi familia. Rume piuqueyefiñ ta Jehová, feimu nehuen piuquecünuhun ñi amuldungulelafiel tañi pu che, huelu piuqueyenquechi dunguquelafun. Rume piuqueyefiñ tañi epu peñi John engu Ron, feimu epe obligafiñ ñi feyentual engu. Rupalu ta antü, perdonamuchi pifiñ engu ñi cüme dullinofiel tañi feipin. Petu llellipulequen ñi poyerpuafiel engu ta Jehová. Fantepu mu Jehová quimeltuqueneu, feimu feula cüme entuquen tañi feipin ñi amuldungual ca ñi quimeltucheal (Col. 4:6).

Tañi piuque mu hunencülei ñi piuqueyefiel ta Jehová, huelu ca piuqueyefiñ caquelu che. Rumeñma piuqueyefiñ ta Susan, tañi poyen domo. Quintuquefun quiñe domo tañi quelluaeteu ñi serfiafiel ta Jehová. Femngechi chengei Susan, nehuen piuquengei ca cüme hueniyefi ta Jehová. Petu tayu nieunon, pemefiñ tañi chau ñi ruca mu, mülelu Cranston, Rhode Island. Huecuntu anülefui, papeltumequefui chi revista Ti Huerquen, papeltumequefui quiñe pichi troquiñ ca quintumequefui com ti texto Biblia mu. Tüfa afmatuleneu. Feique ta cüme hueniyefi ta Jehová pin. Diciembre cüyen 1971 tripantu mu niehuiyu. Fei fanten mu afcadinieneu ca quelluntucunieneu. ¡Rume mañumcülen! Susan rume piuqueyeneu, huelu doi piuqueyefi ta Chau Jehová, ayüquefiñ ta tüfa.

Epu yall nierpun Susan iñchiu, Jesse engu Paul pingelu. Jehová cümelcaeyu engu com tañi mongen mu (1 Sam. 3:19). Ñi inanierpufiel engu ti rüf dungu, Susan iñchiu rume saquingequeyu. Fantepu mu piuqueyeniefingu ta Jehová, feimu amulei ñi serfiniefiel. Fei engu doi 20 tripantu yeniei tañi cüdahuelfiel Jehová fill antü. Cafei epu cümeque püñmo nien, Stephanie ca Racquel pingelu, ñahue troquiniefiñ engu. Tañi epu fotüm dullingu cümeque compañ rume piuqueyefilu ta Jehová (Efes. 6:6).

Fautizaulu iñche, mari cayu tripantu cüdahuelfiñ Jehová Rhode Island troquiñ mapu mu. Nien cümeque hueni üyeu. Quiñentrür cüdahun cümeque loncolelu iñchiñ. Cafei rume quelluqueneu ca quimeltuqueneu pu huitran-ngepaquechi loncolelu. Rume falintuquefiñ ñi quiñentrür cüdauquen pu cümeque cristiano iñchiñ, fei engün fentecünuquelai ñi piuqueyeniefiel ta Jehová. 1987 tripantu mu huiñamtuhuiyu Carolina del Norte troquiñ mapu mu ñi quelluafiel pu peñi, pu lamngen amuldungun mu. Ca nierpuyu cümeque hueni üye mu. *

Agosto cüyen 2002 tripantu mu Susan iñchiu mangelngeyu cüdahual Betel mu, mülelu Patterson, Estados Unidos mapu mu. Cüdahun ti Troquiñche Adcünuquelu ti Amuldungun. Susan cüdahui ñi cücharopayal, rume ayüquefui tañi cüdau. Fei hula Agosto cüyen 2005 tripantu mu elungen ñi coneltual ti Quiñeucülechi Ngünenielu, Cuerpo Gobernante pingelu. ¡Fütra cüdau tati! Falinolu troquihun. Tañi poyen domo fill raquiduami, mülefui tayu fentren cüdahual ca amual fill püle. Ayüquelafui ñi miyahual avion mu, huelu feula rumel femcaqueyu. Rume quelluqueyu ta Susan ñi feipin caquelu lamngen, fei engün tañi füta ca coneltulei ti Cuerpo Gobernante mu. Susan rumeñma quelluntucuqueneu, feimu doi piuqueyefiñ.

Tañi oficina mu, nien alün foto, rume falin-ngei iñche mu, pengeleneu fente ñi ayüfalngen tañi mongen. ¡Rume cümelcaqueneu Jehová iñche tañi fente piuqueyeniefiel!