Ti Biblia cüme elcünutueyu ñi mongen

¿Chumngelu quiñe domo 60 tripantu nielu poyehuelafi tati pu coilaque dios ca pu adentun? ¿Chumngelu quiñe sacerdote sintoista elcünui tañi cüdau santuario mu tañi rüf cristianongerpual? Quiñe domo adoptangei, ¿chumngechi cüme duamcülerpui? Peafiyiñ chem tañi rupan.

“Poyehuelafiñ tati adentun” (ABA DANSOU).

TRIPANTU ÑI CHOYÜNGEEL: 1938

CHEU ÑI TUHUN: BENÍN

ÑI RUPAN: POYEQUEFUI TA FILLQUE IDOLO CA ADENTUN

TAÑI CUIFI MONGEN: Choyüngen So-Tchahoué lof mapu mu. Fülcülei quiñe lafquen. Com mapu menocon-ngei. Ngelai carretera, feimu re farcu ca canoa miyauquei che. Cüdauqueingün ñi entual challhua. Cafei niei huaca, capüra, ufisa, sanchu ca fentren achahuall. Deumangequei trafla ruca, pünequei cüna ca quiñeque chi deumangequei ladrillo. Tati pu che pofrengele rume, ngelai fentren hueñefe cam huesaque che fütraque huaria reque.

Petu pichi domo ngelu iñche, huercüeiñmu tañi chau tañi lamngen iñchiu ñi amual convento. Fei mu quimeltungeiñ taiñ poyeafiel pu adentun ca tañi lof ñi feyentun. Pu yoruba che poyequefingün ta Dudua (Oduduwa) pingechi dios. Iñche tremlu, poyequefiñ feichi dios. Deumalfiñ quiñe pichi santuario ñi poyeafiel. Yelelquefiñ itrofillem: caracoles, achahuall, paloma ca caquelu fillque culliñ. Rume fali feichi chalintucun, feimu gastaquefun epe com tañi plata.

TI BIBLIA CÜME ELCÜNUTUENEU ÑI MONGEN: Papeltulu Biblia iñche, quimürpun ñi mülen quiñe rüf Chau Dios müten, Jehová pingei tañi üy. Quisu ayüquelai taiñ poyeafiel pu idolo (Éxodo 20:4, 5; 1 Corintios 10:14). Pürüm ngüneduamün tañi chem chumal. Com tañi pu idolo ütrüfnentufiñ ca com ñi reyüconqueel coilaque religion. Amuhuelan ñi pehutungeal ca conhuelan quiñeque trahun femquelu pu coneltulelu feichi religion.

Iñche doi 60 tripantu nien. Feimu cüdautun ñi elcünual tüfachi huimtun. Tañi pu pariente ca tañi pu hueni ca pu carucatu catrüntucueneu tañi femhuenoal. Llellipufiñ ta Jehová ñi femal norngechi dungu. Rumel yafültucueneu ñi feipin Proverbios 18:10. Feipilei: “Jehová ñi üy quiñe nehuen-ngechi ellcaupeyüm reque felei. Üye mu lefmauquei tati norngechi che, fei cuñiutucungequei”.

Rume quellueneu ñi trahuluhual pu Dunguquelu Ineingen Jehová. Feichi trahun mu pefiñ ñi rume piuqueyehun engün. Pu Dunguquelu Ineingen Jehová rüf femqueingün ñi feipin ta Biblia, feimu afmatulehuen. Pefilu iñche ñi femquen pu Dunguquelu Ineingen Jehová, fei hula quimtucun ñi yenien ti rüfngechi religion.

CHEM CÜMELCAN LLOHUN: Tañi papeltun Biblia, doi cüme yeniehuiyiñ tañi pu püñeñ iñchiñ. Cuifi, rume gastaquefun plata ñi ngillayal adentun. Tati pu adentun quelluquelaeneu chem dungu no rume. Huelu feula poyequefiñ ta Jehová, quisu norcünutuai huesaque dungu (Apocalipsis 21:3, 4). Poyehuelafiñ tati pu idolo, doi mai feula com tañi piuque mu poyequefiñ ta Jehová, feimu ayüucülen ca cüme duamcülen.

“Pichicalu iñche, quintuyahulquefun ta Chau Dios” (SHINJI SATO)

TRIPANTU ÑI CHOYÜNGEEL: 1951

CHEU ÑI TUHUN: JAPÓN

ÑI RUPAN: SACERDOTE SINTOISTA NGEFUI

TAÑI CUIFI MONGEN: Choyüngen quiñe pichi huaria Japón mapu mu. Tañi chau, tañi ñuque rume ayüquefi religion dungu. Cheu ñi mülen iñche mülei quiñe cuifi religion sintoismo pingelu. Tañi chau ca tañi ñuque quimeltuqueneu ñi poyeafiel feichi pu dios. Raquiduamquefun ñi doi cüme mongen nietual ca chumngechi ñi quelluafiel tati pu cutrancaucülelu. Quiñe rupa, colegio mu quiñe profesor ramtueiñmu: “Doi tremcülelmün, ¿chem am ta cüpa femimün?”. Tañi pu compañ feipingün ñi cientificongeal ca caquelu cüdau. Iñche “poyeafiñ ta Dios” pin, fei com ayentueneu engün.

Tripalu colegio mu, conün quiñe escuela mu tañi profesor religion ngeal. Feichi mu quimürpufiñ quiñe sacerdote sintoista. Quisu papeltuquei quiñe lifru curü tapa nielu. Quiñe antü feipirumeneu: “¿Quimimi chem lifru ta tüfa?”. “Mai, fei tati Biblia” pifiñ. Fei feipieneu: “Com pu ayülu ñi sacerdote sintoista ngerpual, mülei ñi papeltuafiel chi Biblia”.

Pürüm müten ngillañmun quiñe Biblia, fei elcünun cheu ñi doi cüme pengeal. Huelu fentren duam niefun, nielafun tiempo ñi papeltuafiel Biblia. Rupachi antü mu, sacerdotengerpun. Fei hula eluhun ñi cüdahual quiñe templo sintoista mu. Pichicalu iñche, ayülefun ñi poyeafiel ta Chau Dios, feimu rume ayühun ñi sacerdotengerpun.

Pichi rupalu, ngüneduamün ñi rüf chumquen pu sacerdote, feimu huesa duamün. Epe com pu sacerdote duamtuchequelaingün, fentren engün maneluuquelaingün rume Chau Dios mu. Quiñe loncolechi sacerdote feipieneu: “Ayülmi tami cüme amuleal, dungulayaimi tami feyentun mu”.

Com tüfa ñi femquen ti sintoista religion huesa duameleneu. Pürüm elcünulafiñ ti templo sintoista, hune ngüneduamürpun caquelu religion. Huelu quiñe no rume ayülafiñ, com huesa duameleneu müten. Fei raquiduamün quiñe religion no rume quimeltuquelai ti rüf dungu.

TI BIBLIA CÜME ELCÜNUTUENEU ÑI MONGEN: 1988 tripantu mu, quimfiñ ta quiñe budista. Quisu ngülamtueneu ñi papeltuafiel Biblia, fei acordan cuifi quiñe sacerdote sintoista ca femngechi ngülamtueneu. Fei eluhun ñi papeltuafiel Biblia. Rume ayürpufiñ ñi papeltun. Quiñeque mu hunman tañi papeltufiel Biblia.

Papeltufilu Biblia iñche, quimürpufiñ ta Chau Dios, fei eluhun tañi llellipuafiel. Tañi ngillatun mu feipiquen ñi chem pilen Mateo 6:9-13. Epuque hora ca huiño feipiquen feichi ngillatun, petu ñi mülen ti templo sintoista cütu.

Feichi antü mu curengen. Pu Dunguquelu Ineingen Jehová pemequefui tañi domo cuifi, feimu quimniefun ñi quimeltuchequen engün ta Biblia. Fentren ramtun nierpun tañi papeltun mu. Feimu nütramcafiñ quiñe testigo domo, fei ramtucafiñ. Lloudungueneu com tañi ramtun Biblia mu, afmatulehuen. Fei adcünui quiñe huentru tañi quimeltuaeteu Biblia.

Pichi rupalu, eluhun ñi amual pu Dunguquelu Ineingen Jehová ñi trahun mu. Trahun mu mülefui quiñeque testigo iñche ñi huesa duamelfiel cuifi. Huelu com cüme llohueneu ca cüme duameleneu engün.

Trahun mu quimürpun Chau Dios ayüniei pu füta ñi duamnieafiel ca yamnieafiel tañi familia. Iñche rume duamniequefun tañi cüdau, feimu nehue duamtulafiñ tañi pu che. Fei ngüneduamün allcütuquefiñ tati pu che santuario mu, huelu turpu allcütuquelafiñ tañi domo.

Papeltulu Biblia, doi quimürpufiñ ta Jehová, feimu piuqueyerpufiñ. Fillque troquiñ Biblia puhui tañi piuque mu. Rume ayüfiñ Romanos 10:13. Feipilei: “Itrocom che ta maneluucülen ‘montulen’ pifile ta Ñidol Ngünechen, nieai ta montuluhun”. Pichicalu iñche, quintuyahulquefun ta Chau Dios. ¡Feula llemai ta pefiñ!

Cüme duamcülehuelan ñi mülen santuario mu. Iñche raquiduamcülefun, “chem chi feipiaeneu pu che elcünufili sintoismo religion”. Huelu afquentu raquiduamquefun ñi elcünual chi sintoismo quimfili ta Chau Dios cañpüle. Feimu 1989 tripantu, tripatun santuario mu. Maneluucülen Jehová tañi cuidanieaeteu.

Rume cüdautun ñi elcünual chi santuario. Pu loncolelu santuario mu fillpieneu ñi mülenagal. Huelu doi cüdautun mai ñi nütramcayafiel tañi pu chau. Petu amulelu quisu engu ñi ruca mu, müllmüllcülefun, trefcü piuquelefun fente ñi llican. Fentren rupa huitracünuhun, llellipufiñ ta Jehová, “quelluen” pifiñ.

Puulu iñche tañi pu chau ñi ruca mu, llicalefun ñi feipiafiel “elcünun chi santuario”. Quiñeque hora rupai. Fentren rupa llellipufiñ ta Jehová. Fei feipifiñ müten tañi chau: “Quimürpufiñ tati rüfngechi Ngünechen, feimu tañi serfiafiel elcünufiñ chi sintoismo” pifiñ. Tañi chau armulehuei, rume hueñancünagi. Caquelu tañi pariente cüpai tañi rulpaduamelaeteu. Iñche ayülafun ñi huesa duamelafiel tañi pu familia, huelu ayüniefun ñi poyeafiel ta Jehová. Rupachi antü, tañi pu che yamüñmaeneu tañi feyentun.

Duamnielafun ñi elcünual chi santuario müten. Ca duamniefun ñi cüme elcünutual ñi raquiduam. Fentren tripantu mülefun santuario mu, feimu cüdautun ñi ca raquiduam nietual. Cheu rume miyauli, acordarumequen ñi sacerdotengefel.

Epu dungu quellueneu. Hunen dungu, tañi ruca mu quintufiñ chem rume nüucülelu sintoismo mu, com lüpümfiñ. Femngechi lüpümfiñ lifru, cuadro ca rume falichi chemcün. Epu dungu, rume quellueneu ñi quiñeucüleal pu peñi ca pu lamngen engün. Hueniyeneu ca quellueneu engün, femngechi ñochiquechi ngoimanentun tañi cuifi mongen.

CHEM CÜMELCAN LLOHUN: Cuifi müte duamtuquelafuiñ tañi domo, tañi fotüm ca tañi ñahue, feimu quisulelu troquiuquefuingün. Huelu eluhun ñi doi duamnieafiel chumngechi ñi feipin ta Biblia, femngechi doi quiñeucüleiñ. Rupachi antü mu, tañi domo ca eluhui ñi poyeafiel ta Jehová. Feula tañi curehuen-ngen, tañi fotüm, tañi ñahue ca tañi chedcui trür poyeniefiyiñ ta Jehová.

Pichicalu iñche, ayüniefun ñi poyeafiel ta Chau Dios ca ñi quelluafiel che. Feula ta femürpun. Com tañi piuque mu mañumquefiñ ta Jehová.

“Ca quiñe dungu duamniefun ñi ayüucüleal” (LYNETTE HOUGHTING)

TRIPANTU ÑI CHOYÜNGEEL: 1958

CHEU ÑI TUHUN: SUDÁFRICA

ÑI RUPAN: CUÑIFALL TROQUIUQUEFUI

TAÑI CUIFI MONGEN: Choyüngen quiñe pichi huaria Germiston pingelu. Tañi chau, tañi ñuque raquiduamquefui ñi pepi cuidanoaeteu. Feimu rupalu 14 antü ñi choyüngen, huleneu cangelu curehuen mu ñi tremümngeal. Feichi curehuen iñche tañi rüf chau, tañi rüf ñuque troquiquefiñ. Quimürpulu iñche femngechi ñi tremümngen, quisulelu troquiuquen. Quiñeucülelaiñ tañi chau, tañi ñuque iñchiñ troquihun. Feimu cuñifall troquiucülequen.

16 tripantu nielu iñche, tripaqueiñ tañi hueni iñchiñ. Amuqueiñ bar mu taiñ failayal ca taiñ allcütual musica. Nielu iñche 17 tripantu pütremturpun. Ayüfun tañi trongli domongeal pu modelo reque. Nielu 19 tripantu, amun ñi cüdahual ta quiñe huaria Johannesburgo pingelu. Rupachi antü mu, nierpun huesaque hueni. Ngam fillpimequen ca putuquen, pütremtuquen fillque afchi semana.

Feimu fill deportequefun. Cüdauquefun industria informatica mu. Ñi cüme che pingeal ca yamniengeal, rume cüdauquefun. Hueuquefun fentren plata, feimu pu che feipiqueneu ñi rume cüme amuquen. Femngechi femafun rume, huelu ayüucülequelan. Tañi piuque mu quimniefun ca quiñe dungu duamniefun ñi ayüucüleal.

TI BIBLIA CÜME ELCÜNUTUENEU ÑI MONGEN: Papeltulu Biblia iñche, quimürpun Chau Dios piuqueyechequei, feimu elueiñmu Biblia. Tati Biblia huirintucungei quiñe carta reque ñi norcüleal taiñ mongen (Isaías 48:17, 18). Ngüneduamün, tañi inayafiel Biblia tañi feipin mülei ñi norümal tañi mongen.

Mülefui tañi quintual hue hueni. Inafiñ ñi feipin Proverbios 13:20. Feipilei: “Quimche engu miyauquelu ca quimchengeai, huelu tati quiñeucülelu pu huedhuedcülelu engün huesa triparpuai”. Feichi ngülam quellueneu ñi elcünual tañi cuifique hueni, fei hueniyerpufiñ pu Dunguquelu Ineingen Jehová.

Rume cüdautun ñi pütremtuhuenoal, huelu quimtucuniefun ñi elcünuafiel. Rume llellipuquefiñ Chau Dios ñi elcünual chi pütrem, fei quellueneu. Pütremtuhuenolu iñche, motrin epe 14 kilo. Tañi motrin rume huesa duameleneu. Rupai 10 tripantu ñi doi tronglitual.

CHEM CÜMELCAN LLOHUN: Feula doi tremoletun, fei hula ayüucületun. Fei quintuquelafiñ ayühun tañi cüdau mu ca tati plata mu. Fei ayüucületun ñi quimeltuafiel Biblia com pu che. Quellufiñ 3 chaf cüdaufe tañi testigo ngeal. Poyequefiñ ta Jehová quiñentrür tañi füta iñchiu. Petu lanolu tañi pu chau ñi tremümeteu, dungufiñ ñi müleal quiñe huiñomongetun Mapu mu. Quiñe ayüfal mülehue ngetuai.

Fei hula püllelen Jehová mu, feimu cuñifall troquiuquelan. Feula coneltulen quiñe fütra familia, Jehová ñi poyequeteu. Quisu engün iñche tañi chau, ñuque, lamngen, ñaña reque feleingün (Marcos 10:29, 30).

[Adentun]

Ngüneduamün pu Dunguquelu Ineingen Jehová piuqueyehuingün

[Adentun]

Tüfachi santuario mu sacerdotengequefun