Ti Biblia cüme elcünutueyu ñi mongen

QUIÑE ricu empresario, ¿chem dungu doi ayühueleyu? Quiñe huentru pod mongen niequefulu ca drogatuquefulu, ¿chem quellueyu ñi doi cüme mongen nietual? ¿Chem quellueyu quiñe hueche ñi elcünutual ñi ngollifengequen? Tami quimal, papeltunge chem tañi feipiel engün.

“Quiñe rume cüme rupan niequefun” (JOHN RICKETTS)

TRIPANTU ÑI CHOYÜNGEEL: 1958

CHEU ÑI TUHUN: ESCOCIA

ÑI RUPAN: QUIÑE ÜLMEN EMPRESARIONGEQUEFUI

TAÑI CUIFI MONGEN: Pichicalu iñche, tremün quiñe ricu familia mu. Tañi chau quiñe loncolechi soltaungequefui, feimu fillque pais mu mülepuquefuiñ. Escocia pais mu mülequefuiñ, huelu ca amuiñ taiñ pichiqueñma mülepual Inglaterra, Alemania, Kenia, Malasia, Irlanda ca Chipre mapu mu. Nielu pura tripantu iñche, tañi pu chau huercüeneu Escocia mülechi colegio mu. Af mu entun tañi titulo quiñe falin universidad mu, Cambridge pingelu.

Nielu 20 tripantu iñche, conün industria petrolera cüdau mu, pura tripantu cüdahun fei mu. Hunelu mu cüdahun Sudamérica mu, fei hula amun ta África, ca fei hula amun Australia mu. Australia mu nierpun quisu ñi negocio, rupachi tripantu mu fendefiñ.

Tañi fendefiel mu ñi negocio, rume fentren plata llohun, feimu 40 tripantu nielu iñche jubilahun. Cüdauhuenolu am iñche, feimu eluhun ca fillque pais ñi amual. Epu rupa amun ñi quimafiel com tati pais Australia, miyahun tañi moto mu müten. Fei hula amun ñi quimafiel com fill pais mülelu tüfachi Mapu mu. Quiñe rume cüme rupan niequefun.

TI BIBLIA CÜME ELCÜNUTUENEU ÑI MONGEN: Petu tañi jubilanon mu, ayüfun ñi mañumafiel ta Ngünechen tañi cüme mongen nien mu. Feimu eluhun tañi amual tati Iglesia Anglicana mu, fei mu am amuquefun pichicalu iñche. Huelu feita mu, müte quimeltungequelafui tati Biblia. Fei hula chillcatuleneu tati pu mormon, huelu ayülafiñ, quisu engün müte duamtulafingün ta Biblia.

Huelu quiñe antü, pu Dunguquelu Ineingen Jehová acui tañi ruca mu. Fei ngüneduamün com tañi quimeltuqueel engün nüucülei Biblia mu. Quiñe texto tañi pengeleteu engün mülei 1 Timoteo 2:3, 4, cheu feipilei Chau Ngünechen ayüniei “com che tañi montual ca tañi quimürpuafiel engün tati rüfngechi dungu”. Pu Dunguquelu Ineingen Jehová feipiqueingün taiñ quimal chem tañi rüf quimeltuqueel ti Biblia, feita afmatuleneu.

Tañi chillcatuleteu engün, fei quimürpun chem tañi rüf quimeltuqueel ta Biblia. Fei ngüneduamün Chau Dios ca Jesús tañi trürnon engu (Juan 14:28; 1 Corintios 11:3). Fentren tiempo ngünamcaquefun tañi adümafiel tati trinidad, huelu quimürpun tañi coila quimeltun-ngen. Tati rüf dungu ñi quimeltuqueel ta Biblia doi adümfalngei.

Pichi rupachi antü mu, eluhun tañi amual tañi trahun mu engün. Ngüneduamün ñi huenicachefengen ca ñi cümeque chengen engün, feita afmatuleneu. Ñi rüf hueluconque piuqueyehun engün pengeleneu ñi nien tati rüfngechi religion (Juan 13:35).

CHEM CÜMELCAN LLOHUN: Deu fautizaulu iñche quimfiñ quiñe cüme lamngen, Diane pingelu. Petu pichicalu müten, quisu poyequefi ta Jehová. Rume cüme piuquengei, feimu ayüfiñ. Rupachi antü mu niehuiyu. Rume mañumniefiñ ta Jehová tañi elueteu quiñe rume cüme compañ.

Diane iñchiu ayüquefuyu tayu amuldungual cheu fentren che duamniefui ñi allcütual Ngünechen ñi dungu. Feimu 2010 tripantu mu huiñamtuhuiyu Belice pais mu, Centroamérica mülelu. Fau fentren che yamniequefi ta Chau Dios ca ayüniei tañi doi quimafiel, iñchiu amuldungulelquefiyu.

Feula tañi quimfiel mu Ngünechen ca tati Biblia, quiñe cüme tüngcülen mongen nien. Fentren che quelluquefiñ ñi quimafiel Ngünechen ñi dungu. Iñche, tati Biblia quellueneu tañi doi cüme mongen nierpual. Feimu ayüquen caquelu che ñi ca femngechi nierpual doi cüme mongen. Feula quimün chumngechi mañumafiel ta Ngünechen tañi cüme mongen tañi elueteu.

“Fei engün rume cüme dungueneu” (MAURÍCIO ARAÚJO)

TRIPANTU ÑI CHOYÜNGEEL: 1967

CHEU ÑI TUHUN: BRASIL

ÑI RUPAN: QUIÑE PODNGECHI MONGEN YENIEQUEFUI

TAÑI CUIFI MONGEN: Tremün quiñe pichi huaria mu São Paulo mu mülelu. Fei mu com che reque pofrelequefui.

Tañi chau lai petu tañi choyüngenon. Pichicalu iñche, tucuquefun tañi ñuque ñi ropa quisu mülenolu ruca mu. Tañi femün domo reque trürquefun, fei tati pu che homosexual reque peeneu engün. Rupalechi antü mu, cudumuhun chaf huecheque huentru iñchiu, ca fei hula ca doi tremchi pu huentru engu.

Epe puhul-lu 20 tripantu iñche, quintuquefun domo ca huentru tañi cudumuhual iñchiu. Amuquefun ñi quintual bar mu, discoteca mu ca iglesia mu cütu. Müleyüm fiesta, domo reque tucutuuquefun ca domo reque failaquefun, femngechi fentren che quimeneu tañi femqueel mu.

Hueniyequefuiñ tati pu homosexual che, cüri domo ca tati pu drogatuquelu. Mangelngequefun tañi drogatual, fei huimtun ñi femal. Quiñeque mu tañi pu hueni iñchiñ com pun drogatuquefuiñ. Ca quiñeque mu, quisu iñche com antü drogatuquefun. Fei rume huesa ad nierpun, feimu tati pu che raquiduamquefui tañi nieel sida cutran.

TI BIBLIA CÜME ELCÜNUTUENEU ÑI MONGEN: Feichi mu quimfiñ tati pu Dunguquelu Ineingen Jehová. Fei engün rume cüme dungueneu. Papeltuleneu ñi feipin Romanos 10:13, cheu feipi com tati maneluulu Chau Jehová ñi üi meu, montulngeai. Fei quimürpun ñi falin-ngen üituafiel Ngünechen tañi üi. Deu com pun tañi drogatun mu, nülaquefun tañi fentana, fei ngümalen llellipuquefuiñ ta Jehová tañi quelluaeteu.

Ca ngüneduamün tañi ñuque ñi rume cutrancauquefel tañi drogatun mu. Feimu eluhun tañi elcünuafiel tati droga. Doi pichi rupachi antü mu, eluhun tañi chillcatulaeteu Biblia pu Dunguquelu Ineingen Jehová. Quisu engün feipieneu tañi chillcatun Biblia quelluaeneu tañi elcünual tati droga. Fei femtriparpui llemai.

Tañi chillcatun mu, ngüneduamürpun tañi cümelcatual tañi mongen. Pichicalu müten iñche conquefulu am homosexual huimtun mu, feimu rume cüdautun tañi elcünuafiel. Tañi elcünuafiel feichi huesaque huimtun, mülefui tañi famentuafiel tañi cuifique hueni ca amuhuenoal bar ca discoteca mu.

Cüdautufun rume ñi femal tüfachi dungu, cüme duamelqueneu quimün mu Jehová tañi piuqueyenieteu ca tañi duamnieteu (1 Juan 3:19, 20). Fei 2002 tripantu püle, com elcünufiñ ca famentufiñ tañi homosexualngequefel, fei fautizahun tañi Dunguquelu Ineingen Jehová ngeal.

CHEM CÜMELCAN LLOHUN: Tañi ñuque am rume afmatulehuelu tañi cüme elcünutun mu tañi mongen, ca eluhui tañi chillcatual ta Biblia. Feula cutran chehui tañi rupan mu quiñe infarto cerebral mu, huelu nehuentulei tañi poyeafiel ta Jehová.

Pura tripantu yenien ñi rume cüdaucülen ñi quimeltulelafiel Biblia ta caquelu che. Quiñeque mu contuqueneu huesaque illutun, huelu yafülqueneu ñi femnoal feichi dungu ayühuelquefiñ ta Jehová.

Feula hueniyefiñ ta Jehová ca femquen quisu tañi ayüqueel, feimu doi yamuuquen. Feula feipiafun tañi ayüucülechi chengen.

“Tuduamquelafui tañi putun” (LUKA ŠUC)

TRIPANTU ÑI CHOYÜNGEEL: 1975

CHEU ÑI TUHUN: ESLOVENIA

ÑI RUPAN: QUIÑE NGOLLIFENGEFUI

TAÑI CUIFI MONGEN: Iñche choyüngen Eslovenia mu. Puhul-lu meli tripantu, quiñe tüngcülechi mongen niefun. Huelu feichi mu tañi chau langümuhui. Femngechi dungu rupan mu, tañi ñuque rumeñma mülefui tañi cüdahual tañi tremümaeteu iñche ca tañi peñi.

Mari quechu tripantu nielu iñche, amun tañi mülepual tañi chuchu ñi ruca mu. Ayüquefun fei mu ñi müleal, nielu mu am iñche fentren hueni ca doi lifrelequefun. Puhul-lu mari cayu tripantu iñche, fei hueniyefiñ pu che tripaquelu ñi putual afchi semana mu. Fei eluhun tañi tremümal tañi lonco ca huesaque tucutuhun, fei hula conürpun tañi pütremtual.

Fillque droga illutufiñ, huelu doi tañi ayüqueel fei tati pulcu. Hunelu mu epuque copa müten putuquefun. Huelu rupalelu, doi quiñe fotilla pulcu putuquefun. Ngollilequefun, huelu femfaluuquefun tañi ngollilenon inei no rume tañi ngüneduamaeteu. Quiñeque mu tati nümün pulcu dalluntucuquefeneu, huelu fei rume inaduamngequelafun fentren pulcu ñi putuqueel.

Trahun mu tañi pu hueni iñchiñ, iñche doi putuquefun quisu engün mu, huelu iñche quelluquefuiñ ñi cüme huiñotual ñi ruca mu engün. Quiñe antü, tuduamquelafui tañi putun pingen. Feichi ayetun dungu ñi feipingen mu, rume cutrantuleneu.

Tañi feipingen mu, huitracünuhun reque tañi raquiduamal ca ramtuhun: “¿Chem chummequen tañi mongen mu?”. Huesa raquiduameleneu, falinolu troquihun. Com tañi femqueel, re ngünam dungu troquifiñ.

TI BIBLIA CÜME ELCÜNUTUENEU ÑI MONGEN: Pichin antü meu, ngüneduamün ñi doi tüng chengetun quiñe tañi colegio compañ. Cüpa quimfun chumngelu tañi femngetun, feimu mangelfiñ tayu cafetual ca pichi nütramcayal. Feipieneu ñi chillcatumequen Biblia pu Dunguquelu Ineingen Jehová engün. Ca feipieneu quiñeque dungu tañi quimürpuel. Iñche quimquelafun ti Biblia, feimu com tañi nütramcaeteu turpu allcüquelafuiñ. Fei eluhun ñi amual pu Dunguquelu Ineingen Jehová ñi trahun mu ca chillcatun Biblia quisu engün mu.

Tati Biblia mu quimürpun fentren dungu, fei quellueneu ñi cüme elcünutual ñi mongen. Tati Biblia mu quimürpun taiñ mülen tati afaelchi antü mu (2 Timoteo 3:1-5). Cafei Ngünechen ñi apümcayafiel com ti huesaque che, fei cümeque che ñi rumel mongeleal Mapu mu (Salmo 37:29). Fei quellueneu ñi femhuenoal huesaque dungu.

Nütramcafilu tañi pu hueni ñi quimürpuel Biblia mu iñche, epe com reque ayetueneu engün. Fei ngüneduamün ñi cüme hueningenon engün. Cafei ngüneduamün fei engün ñi duam mu huimtun tañi putual. Feitachi tañi pu hueni üngümniequefuingün müten ñi acual afchi semana, fei ñi ca ngollicahual.

Elcünufiñ tañi pu cuifique hueni, fei eluhun ñi hueniyeafiel pu Dunguquelu Ineingen Jehová. Fei engün rüf piuqueyequefui ta Jehová, ayüquefui yenieal ñi mongen chumngechi tañi ayüqueel. Fei rume yafültucueneu. Ñi cüme compañngen engün quellueneu ñi elcünual ti ngollin.

CHEM CÜMELCAN LLOHUN: Duamhuelafiñ tati pulcu tañi ayüucüleal, feimu mañumquefiñ ta Jehová. Quimlan ñi chumleafel tañi mongen amulele ñi putufengen, huelu quimnien tüfa tañi doi cümelcaletun.

Yenien regle tripantu ñi cüdaucülen pu Dunguquelu Ineingen Jehová ñi sucursal Eslovenia mu, rume ayüfal cüdau. Tañi quimfiel mu ca poyefiel mu ta Jehová, elueneu rüf ayühun-ngechi mongen.