Choyüngen quiñe pichi lof mu, Sajonia mu mülelu, República Democrática Alemana Mapu mu (RDA). Tañi ruca mu mülefui piuqueyehun ca tañi pu chau quimeltueneu ñi nor chengeal. Tati RDA mapu comunista ngefui, tüfa mu tati sajoniache falintuquelafi tati religion. Iñche feyentuquelafun ñi mülen Chau Dios. Petu huechengefulu epu raquiduam niefun ca marcacünueneu reque, tüfa tati comunismo ca ateismo.

¿Chumngelu am ayüquefuiñ ti comunismo? Pu coneltulelu comunismo mu feipiquei: “Inei no rume ngelai ñi doicüleal caquelu che mu”. Ayüquefun ñi quiñentrür feleal tati pu ricu che ca pofrengechi che. Ñi diturpual, com pu che mülefui ñi ca femngechi plata nieal. Cafei coneltulefun quiñe organizacion comunista mu. Nielu iñche 14 tripantu, reciclaje mu cüdauquefun, fei ñi lifcüleal chi Mapu. Tati pu autoridad mülelu Aue huaria mu fente tañi mañumcülen, elueneu quiñe regalo. Hueche huentrungefulu rume, quimfiñ quiñeque falin-ngechi politico tañi mapu mu. Cüme amulefui tañi mongen, ca raquiduamquefun ñi doi cüme amuleal cüpalechi antü meu.

Huelu rupalu ta antü, caletui tañi mongen. 1989 tripantu mu, teifücangei tati muro de Berlín. Fei hula tati Unión Soviética ca tañi pu quelluquefeteu hueluconque quelluntucuuhuelaingün. Tüfa hueñancüleneu. Cafei quimfun pu quelluquenofulu comunismo mu huesalcangeingün, che troquingelafuingün. Huelu, ¿chumngelu? Pu comunista, ¿feipiquelafuingün ama tañi quiñentrür feleal ricu ca pofre? ¿Ngünencangefun? Com ñi rupan huesa duameleneu.

Cacünutui ñi raquiduam, fei ayütufiñ chi musica ca ñi pintayal. Conün colegio meu ñi estudiayal musica, fei rupalechi antü mu ñi amual universidad meu. Rume ayüquefun musico ca pintor ngeal. Tañi pu chau quimeltueneu ñi nor chengeal, huelu inahuelafiñ ñi ngülam. Ayüquefun ñi cüme rupaleal müten, ca fentren domo niefun. Huelu tati musica, tañi cuadro ñi deumael ca ñi niequen fentren domo, turpu ayühulhuelaeneu. Ramtuhun: “¿Chumngechi ñi rupaleal cüpalechi antü mu? ¿Chumngelu am mongeleiñ?”.

Quiñe nagantü, pefiñ tañi pu compañ colegio mu nütramcamequen cüpalechi antü mu, fei nütramcafiñ. Feiti pu compañ mu mülefui quiñe Dunguquelu Inei Ngen Jehová, Mandy * pingelu, fei elueneu quiñe cüme ngülam. Feipieneu: “Andreas, cüpa quimülmi chem ñi rupayal cüpalechi antü meu ca chumngelu mongeleiñ, papeltuaimi Biblia”.

Cüpa papeltulafun Biblia, huelu mülelu cai fentren ramtun, feimu papeltufiñ müten. Mandy pengeleneu tati capitulo 2, Daniel pingechi lifru mu. Papeltufilu iñche, afmatulehuen. Feiti profecia mu, pengelngei quiñeque gobierno ngünenielu Mapu mu. Mandy ca pengeleleneu cangelu profecia ñi chumlerpual tati pu che cüpalechi antü meu. ¡Ahuem! Pefiñ tati huiñoldungun Biblia meu. Huelu ramtuhun: “¿Inei am huirintucucünui feichi profecia? ¿Inei am feipicünui chem ñi rüf rupayal? ¿Rüfngepei mai ñi mülen ta Chau Dios?”.

Feichi meu quimfiñ ta Horst ca Angelica, quiñe curehuen Dunguquelu Inei Ngen Jehová, tüfa ta Mandy ñi pu hueni. Quisu engu quimeltuleleneu Biblia. Pürüm quimtucun tati pu Dunguquelu Inei Ngen Jehová müten üituquefingün ta Chau Dios ca quimeltulelfingün caquelu pu che Chau Dios tañi üi (Salmo 83:⁠18; Mateo 6:⁠9). Biblia quimeleleneu ñi cüme elcünungetual chi Mapu ca Jehová ayüniei ñi rumel mongeleal tati pu che. Tati Salmo 37:⁠9 feipi pu “maneluucülelu Jehová meu ngen-ngeai Mapu”. Rume ayühuleneu quimal com pu che yafüluucülelu ñi poyeafiel ta Jehová rumel mongeleafui.

Rume cüdautufun ñi cüme elcünutual ñi mongen ca inayal chem ñi feipilen ta Biblia. Mallmahun huentru ngefun. Cüme amulefui tañi pintor ngen ca musico ngen, feimu cüdautufun ñi ñom piuquengeal. Cafei cüdautufun ñi elcünutual tañi huesa mongen. Jehová ñochi piuquengei, pepilniequefi ca piuqueyeniefi tati pu che yafüluucülelu ñi inayafiel Biblia ñi ngülam, feimu iñche mañumtuquefiñ.

Petu huechengefulu, tati comunismo ca ateismo marcacünueneu reque, huelu tati Biblia quelluqueneu ñi cüme elcünutual ñi mongen. Iñche quimtucun chumngelu taiñ mongelen ca chem ñi rupayal cüpalechi antü meu, feimu doi tüngduamcületun. 1993 tripantu mu, fautizahun, fei Dunguquelu Inei Ngen Jehová ngetun. 2000 tripantu mu niehuiyu Tabitha iñchiu, ca piuqueyeniefi ta Chau Dios. Rume quimeltulelquefiyu Biblia tati pu che. Fentren che tañi quimeltulelquefiel Biblia feyentuquelaingün Chau Dios meu ca comunista ngefuingün cuifi mu. Rume ayühulqueneu tañi quelluafiel feiti pu che ñi quimafiel ta Jehová.

Petu quimeltulngelu Biblia iñche, tañi pu chau llicaingu. Huelu rupachi antü ngüneduamingu tañi cümelcaeteu Biblia. Fei hula quimeltulngequeingu Biblia ca trahuluuqueingu tati pu Dunguquelu Inei Ngen Jehová engün. Fei iñche ayüucülen.

Tabitha iñchiu cüme loncontucunieyu tati cümeque ngülam mülelu Biblia mu, feimu rume ayüucüleyu. Biblia ngülamtueiñmu taiñ ñihuañpeunoal. Iñchiu cüme feyentuquefiyu, feimu cüme amuleyu tayu curehuen-ngen (Hebreos 13:⁠4).

Ramtuuhuequelan rume chumngelu taiñ mongelen ca cüpalechi antü meu. Coneltulen quiñe fütra familia reque huall Mapu mu. Quiñeucüleiñ, ayüucüleiñ ca cüme yeucüleiñ. Tüfachi familia mu com femngeiñ, inei rume doicülelai. Rumel quintuquefun femngechi feleal engün com pu che.