Puerto Limón huaria püle tremün iñche, Costa Rica ñi tripahue antü püle. Nien epu peñi ca quechu lamngen, iñche tati reglengelu. Nielu iñche pura tripantu, lai tañi chau. Feimu tañi ñuque quisu tremümeiñmeu.

Pichicalu müten iñche, rume ayüquefun ti deporte, doyelchi mai ti beisbol. Pichi huentrungelu, conün ñi aucantual quiñe pichi equipo mu. Fei 20 tripantu nielu iñche, quiñe huentru mangeleneu ñi aucantual quiñe fütra equipo Nicaragua mapu mu. Feichi mu iñche cuidaquefun tañi ñuque cutrancülelu, feimu ayülafun ñi quisucünuafiel ñi amual ca mapu, feimu amulan. Rupalu ta tripantu ca huentru mangeleneu ñi coneltual Costa Rica ñi equipo mu. Tüfa mu re dullingequefui che coneltulefulu pichique equipo mu. Feulaque ta amuan pin. 1949 puulu 1952 tripantu mu aucantun Costa Rica ñi equipo mu. Cuba, México ca Nicaragua mapu mu yengequefuiñ taiñ aucantual. Rume cüme aucantuquefun, mari regle partido yeniefun ñi huelulcaunon aucantun mu. Pu che huirarquefui iñche tañi üi, rumeñma ayüquefun ñi allcütufiel.

Fei hula eluhun ñi yenieal huesa mongen. Niefun tañi novia, huelu miyauquefun caquelu domo engün. Rume putuquefun. Quiñe antü fente tañi ngollilen acordalafun rume chumngechi ñi puhun tañi ruca mu. Cafei rume ayüquefun tati apuesta, aucantuquefun domino ñi huehual plata ca ngillaquefun loteria.

Feichi mu tañi ñuque Dunguquelu Ineingen Jehová ngerpui. Fei ayüquefui iñche ñi ca femngechi femal. Huelu iñche re raquiduamquefun deporte mu, fei femlan. Quiñeque mu aucantuquefulu iñche, ngüñülafun rume, re raquiduamniequefun ñi aucantun. Rumeñma ayüquefun ti beisbol.

Nielu iñche 29 tripantu, huesa allfütripan quiñe partido mu. Tremotun, huelu pepi aucantuhuelan fütraque equipo mu. Huelu rüf elcünulan ti beisbol. Pepicaquefun quiñeque huentru aucantuquelu pichique equipo mu püllelelu tañi ruca mu.

1957 tripantu mu amun pu Dunguquelu Ineingen Jehová ñi fütra trahun meu. Femngei quiñe estadio mu cheu aucantuquefun iñche. Partido mu rume pofolcauquei ta che. Huelu anülelu iñche ti fütra trahun mu, ngüneduamün fente ñi yamchefengen pu testigo, feimu afmatulehuen. Ñi pefiel tüfa, eluhun ñi chillcatual ta Biblia pu testigo engün ca ñi amual tañi trahun mu.

Afmatuleneu com ñi quimürpun Biblia mu. Quiñe dungu: Jesús feipicünui tañi pu inanieteu ñi amuldungual ti cümeque dungu huall Mapu mu (Mateo 24:14). Cafei pu rüfngechi cristiano llouquelaingün plata tañi amuldungun mu. Jesús feipi: “Re elungeimün ta tüfachi pepiluhun. Ca femngechi re hulafimün ta eimün” (Mateo 10:8).

Doi chillcatulu Biblia iñche, ngüneduamquefun chem tañi quimeltuel pu testigo ca tañi chumquen engün. Afmatulehuen tañi yafüluuquen engün tañi amuldungucheal Chau Dios ñi dungu com huall Mapu mu. Ngüneduamün ñi poyechefengen engün chumngechi Jesús quimeltufi tañi pu inanieteu. Feimu papeltufilu iñche Marcos 10:21, eluhun ñi Dunguquelu Ineingen Jehová ngerpual. Tüfachi texto mu Jesús feipi: “Cüpange ca inayaen”.

Huelu cüdaungefui tañi elcünutual ñi cuifi mongen. Quiñe dungu, fentren tripantu mu fill semana ngillaquefun tañi numero de la suerte ñi huehual plata loteria mu. Huelu Biblia meu quimürpun Chau Dios famentuquefi pu poyequefilu ti ‘coila dios hulquelu cüme suerte’ ca ti pu diñmaplataquelu. Fei ngillahuelan ti loteria (Isaías 65:11; Colosenses 3:5). Feichi domingo müten, tañi numero de la suerte hueutripai. Ayentueneu pu che ñi aucantunon feichi semana, ngüchaltucueneu engün tañi huiño aucantual, huelu femlan. Turpu femhuetulan.

Feichi antü tañi fautizahun, huiño ngüchaltucungen tañi huiñotual tañi cuifi mongen mu (Efesios 4:24). Punlu, huiñotun tañi hotel mu. Fei puerta meu üngümnieneu tañi cuifi novia, fei feipieneu: “Cüpange Sami, cüme rupayayu”. Feimeu müten feipifiñ: “Femlayan, feula inaniequen Biblia ñi ngülam tañi lif mongen nieal” pifiñ (1 Corintios 6:18). “¿Chem pimi?” pieneu. Feipi ñi falin-ngenon Biblia ñi ngülam. Ngüchaltucueneu tayu huiño noviongetual. Huelu iñche conpun müten tañi pieza mu, fei llafentucufiñ. Feichi fautizaulu iñche 1958 tripantu mu ta fantepu mu, turpu huiñotulan tañi cuifi mongen mu, feimu rume ayühun.

Rume fentren cümelcan llohun tañi inaniefiel mu Biblia ñi ngülam. Feula nien cümeque hueni, ayüfal mongen ca rüf ayühun.

Petu ayüquen tañi aucantual beisbol, huelu doyümquelafiñ tañi mongen mu. Ti deporte elueneu fentren plata ca rume quimniengerpun, huelu com tüfa pichiñmaquei. Huelu turpu aflayai tañi cüme hueniyefiel ta Chau Jehová ca tañi hueniyefiel pu peñi ca pu lamngen. Biblia feipi: “Tüfachi mapu ca com huesaque dungu ñi nieel apümngetuai, huelu tati femquelu Ngünechen ñi ayüelchi dungu, rumel mongen nieai” (1 Juan 2:17). Feula rume ayüquen cangelu dungu: tañi serfiniefiel ta Jehová ca ñi coneltulen tañi troquiñche mu. Tüfa doi falintuniefiñ iñche.