¿Kunsa wawanakar yatichañäspa?

“Taqi Qillqatasti Diosan amuytʼayatawa, askirakiw yatichañataki, chiqachañataki, ukhamarak qʼuma jakañan sarnaqañ yatichañatakisa.” (2 TIMOTEO 3:16)

WAWANAKAX kunatï Diosat chiqäki ukwa yatiqapxañapa. ¿Kunjamsa yatiqapxaspa? Biblia liyisaw uk yatiqapxaspa, janipuniw uka librjama yaqhax utjkiti.

Bibliaxa Diosan apayanita mä cartäkaspas ukhamawa. Ukanwa kunjamas Jupaxa uk yatiyistu ukat sum sarnaqañasatak iwxtʼanaks churarakistu, uka iwxtʼanakax wawanakatakisa wayn tawaqunakatakisa ukat jilïr jaqinakatakisa wali askiwa. Kunanaksa Bibliax yatichi ukat kunsa wawanakax yatiqapxaspa uk mä qhawq uñjañäni.

¿Kunsa Diosat yatiñasäspa?

◼ ¿Kunsa Bibliax yatichi?: ‘Jaqinakan yatipxañapataki, jumaxa Jehová sutinïtama, juma sapakiw uraqpachxaru taqi Munañanïtaxa’ (Salmo 83:18, NM).

Yatichäwi: Diosax utjapuniwa ukat sutinirakiwa.

◼ ¿Kunsa Bibliax yatichi?: “[Jehová] Tatitusti taqi chuymanakxa sumwa uñji, ukhamarak yatiraki kuna amtäwinaksa, lupʼïwinaksa. Ukhamasti jumatix jupar thaqtätaxa, jupasti jumarux jikxatayasïtamwa” (1 Crónicas 28:9).

Yatichäwi: Jehová Diosax taqinin sum jakasipxañapwa muni, janirakiw jiskʼa wawanakatsa armaskiti (Salmo 10:14; 146:9). Diosax Jupar uñtʼañaswa muni.

◼ ¿Kunsa Bibliax yatichi?: “Janiw jan walinak lurasina tʼaqhisiyapxätati [...] wajchanakaru[xa], jumanakatix tʼaqhisiyapxäta ukaxa jupanakax nayaruw arnaqasipxitani, ukatsti nayax jupanakan arnaqasitanakapxa istʼäwa” (Éxodo 22:22-24).

Yatichäwi: Jehová Diosax taqinin mayisitanakapwa istʼi, jiskʼa wawanakan mayisitanakaps istʼarakiwa. Juparuw amtanakassa ukat kunjamsa chuymasan jikxatastan uks yatiysna.

◼ ¿Kunsa Bibliax yatichi?: “Wasitatsa, yantʼasipkakïnwa; Israelan Qullanaparuw llakisiyapxäna” (Salmos 78:41).

Yatichäwi: Arsutanakasasa ukat luratanakasas Jehová Diosarux kusisiyaspawa jan ukax chuymapwa ustʼayaspa, ukhamasti janïr kun parlkasasa ukat janïr kun lurkasasa sumwa amuytʼasiñasa.

¿Jan jiwasjamäpki jupanakarux kunjamsa uñjañasäspa?

◼ ¿Kunsa Bibliax yatichi?: “Diosatakix taqi casta jaqis mayakï[wa]. Jupasti kuna cast jaqirus katuqakiwa, khitinakatix jupar axsarki, ukhamarak aski lurapki taqi ukanakarusa” (Hechos 10:34, 35).

Yatichäwi: Diosatï taqi kasta jaqinakar katuqchixa, ukhamarakiw jiwasax katuqañasa. Jan jiwasjamäpki ukat yaqha kasta jañchinïpki jupanakar yaqhachañax janipuniw walïkaspati.

◼ ¿Kunsa Bibliax yatichi?: “Wakichatäpxapinirakim taqi khitinakatix jumanakan kuna suytʼäwimatix utjki uka arsupxañama munapki ukanakaru, llampʼu chuymampi [...] arsupxañamataki” (1 Pedro 3:15, MT).

Yatichäwi: Kuntï Diosat yatktan uk jan pächasisaw qhanañchañasa, ukampis llampʼu chuymampiw uk lurañasa. Ukat jan jiwasjam amuyapki jupanakarus respetañasawa.

¿Kunjamsa familiasaru uñjañäspa?

◼ ¿Kunsa Bibliax yatichi?: “Wawanaka, awkimar taykamarux taqi kunansa istʼapxapunim, uka lurañasti askiw Dios nayraqatanxa” (Colosenses 3:20).

Yatichäwi: Istʼasir wawanakaxa, janiw awk taykapar munasipxatapak uñachtʼayapkiti, jan ukasti Jehová Diosar kusisiyañ munapxatapwa uñachtʼayapxaraki.

◼ ¿Kunsa Bibliax yatichi?: “Sumankapxam, maynit maynikama khuyaptʼayasirïpxam, perdonasirïpxarakim maynit maynikama, kunjämtix Diosax jumanakaru perdonapxtam Cristo tuqi ukhama” (Efesios 4:32).

Yatichäwi: Yaqha jaqinakasa ukat familiasas awisax chuym ustʼayapxistaspawa. Ukampis jiwasatï Diosampi perdonatäñ munstanxa, jaqi masisar perdonañasarakiwa (Mateo 6:14, 15).

¿Kunatsa chiq parlañasa ukat munasiñ uñachtʼayañasa?

◼ ¿Kunsa Bibliax yatichi?: “Ukhamasti jichhax kʼarinakxa jan parlkxapxamti; sapa maynis jaqi masinakamarux kunatix chiqäki ukak parlapxam” (Efesios 4:25).

Yatichäwi: Chiqäki uk parltan ukhaxa, Diosatwa yatiqastanxa ukat kusisiyaraktanwa. Maysa tuqitsti, jiwasatï kʼarinak parlaskañänixa, Diosar kutkatasir Supayatwa yatiqasisksnaxa, jupaw ‘kʼarinakan awkipaxa’ (Juan 8:44; Tito 1:2).

◼ ¿Kunsa Bibliax yatichi?: “Kunjämtï jumanakax jaqinakampi uñjatäñ munapktas ukhamarak [...] jupanakar uñjapxam” (Mateo 7:12).

Yatichäwi: Familiasasa uta jakʼankirinakasas kunjamsa chuymapan jikxatasipxi, kunsa amuyapxi ukat kunanakansa yanaptʼañäspa uk sumwa amuyañasa. Jiwasatï ‘khuyaptʼayasiñänixa’, ukhamarakiw mayninakax khuyaptʼayistani (1 Pedro 3:8; Lucas 6:38).

 Kunjamtï yatiqawaytanxa, Bibliax wali aski yatichäwinakaniwa. Ukaxa wali respetasiri ukat mayninakat khuyaptʼayasiri ukham jilsupxañapatakiw wawanakar yanaptʼi. Ukampis ¿khitinakas yatichapxañapa?