Jiwatanakajj ikisipkaspas ukhamäpjjewa, kunattejj janiw kunsa amuyapkiti ukat janirakiw kuns lurapkiti. Ukampis jakäw utjayir Diosajja, jupanakarojj jaktayaniwa. Ukajj cheqapun ukhamätap uñachtʼayañatakejja, Jesusaruw jiwatanakar jaktayañapatak chʼam churawayi. (Eclesiastés 9:5 ukat Juan 11:11, 43, 44 liytʼäta.)

Jiwatanak jaktayañatak horasajj purinini ukhajja, kawkïrinakatï Diosan amtapankapki ukanakajj jutïr pachan paraison jakasiñatakiw jaktayatäpjjani sasaw Dios pachpajj arsuwayäna. Taqe chʼaman Diosakiw jiwatanakar jaktayaspa, ukat uk lurañ Jupajj wal muni. (Job 14:14, 15 liytʼäta.)

Jaktanipkani ukanakajja, khitinakäpjjes uk jupanakajj sum amuyasipjjani ukat familiaranakapsa amigonakapsa sum uñtʼapjjarakini. Cuerpopajj laqʼar tukutäjjchisa, mä machaq cuerponwa Diosajj jiwatanakar jaktayani, kunjamäpkäntï nayrajj ukhama, mä arunjja, mä machaq jathar uñtata. (1 Corintios 15:35, 38 liytʼäta.)

Biblianjja pä kasta jaktäwitwa parli, mayajj alajjpachan jakapjjañapataki ukat yaqhasti aka Oraqen jakapjjañapataki (Apocalipsis 20:6). Jaktanipkani ukanakat jila partejja, paraisoptayat aka Oraqen wiñay jakañatakiw jaktanipjjani. (Salmo 37:29 ukat Hechos 24:15 liytʼäta.)